Be a yí sọwhiwhe do hia zinjẹgbonu Atọ̀họ̀-Nuhihọ́ lọ Tọn agọe tọn lẹ ya? Eyọn, pọ́n eyin a sọgan na gblọndo kanbiọ he bọdego ehelẹ tọn:

Nawẹ mí dona nọ yinuwa hẹ Klistiani yiamisisadode lẹ gbọn?

Mí nọ yọ́n pinpẹn yise yetọn tọn; amọ́, mí ma nọ gbògbéna yé zẹjlẹgo. Mí nọ dapana “sisi nukunta tọn [nina] gbẹtọ lẹ.” (Juda 16; Odò.) Mí ma nọ kàn kanbiọ mẹdetiti tọn lẹ sè yé gando todido yetọn go.—w20.01, w. 29.

Etẹwẹ hẹn we kudeji dọ Jehovah yọ́n we?

Biblu dohia dọ ewọ ko yọ́n we whẹpo a do yin jiji. Podọ e nọ sè odẹ̀ towe lẹ. E yọ́n linlẹn towe po nuhe to ahun towe mẹ lẹ po, podọ walọyizan towe lẹ nọ yinuwadeji. (1 Otàn. 28:9; Howh. 27:11) E dọ̀n we wá ede dè.—w20.02, w. 12.

Whetẹnu lẹ wẹ mí dona nọ dọho podọ whetẹnu lẹ wẹ mí dona nọ nabọẹ?

Homẹ mítọn nọ hùn nado dọho gando Jehovah go. Mí nọ dọho whenue mí mọdọ mẹde to afọ ṣì ze. Mẹho lẹ nọ dọho nado na ayinamẹ eyin e biọ domọ. Mí ma nọ dọho nado dindona nudọnamẹ gigọ́ lẹ (kavi de yé gbà) gando otò he mẹ azọ́n mítọn yin alọhẹndotena te lẹ go. Mí ma nọ de whẹho aṣli tọn lẹ gbà.—w20.03, w. 20, 21.

Nawẹ owẹ̀n he Joẹli mọ to Joẹli weta 2tọ mẹ lẹ gbọnvona dehe go Osọhia weta 9 donù lẹ gbọn?

Joẹli 2:20-29 dọ dọ Jiwheyẹwhe yàn owẹ̀n lọ lẹ dogbé, bo dopà dọ emi na suahọ nuhe yé hẹngble lẹ tọn. Enẹgodo, Jiwheyẹwhe kọ̀n gbigbọ etọn jẹgbonu. Adà dọdai lọ tọn ehelẹ mọ hẹndi to whenue Babilọninu lẹ wá tọ́nawhàn Islaeli, bosọ mọ hẹndi devo to enẹgodo. Osọhia 9:1-11 yí mẹyiamisisadode lẹ jlẹdo owẹ̀n lẹ go dile yé to owẹ̀n whẹdida tọn Jiwheyẹwhe tọn lẹ lá sọta titonu ehe, podọ ehe nọ dotukla mẹhe to adà aihọn lọ tọn mẹ lẹ taun.—w20.04, w. 3-6.

Mẹnu wẹ yin ahọlu agewaji tọn lọ to egbehe?

Russie po otò he hopódona ẹn lẹ po wẹ. Yé tindo nuyiwadomẹji tlọlọ do omẹ Jiwheyẹwhe tọn lẹ ji, bo hẹnalọdotena azọ́n yẹwhehodidọ tọn lọ bosọ dohia dọ emi gbẹwanna Kunnudetọ lẹ. Ahọlu agewaji tọn ko to agbàwhlẹn hẹ ahọlu hùwaji tọn.—w20.05, w. 13.

Be jẹhẹnu ṣinẹnẹ he yin sislẹ to Galatianu lẹ 5:22, 23 mẹ lẹ kẹdẹ wẹ yin adà he “sinsẹ́n gbigbọ tọn” bẹhẹn lẹ ya?

Lala. Gbigbọ wiwe nọ gọalọna mí nado wleawuna jẹhẹnu dagbedagbe devo lẹ taidi dodowiwa. (Efe. 5:8, 9)—w20.06, w. 17.

Owù tẹwẹ to e mẹ nado nọ to nudọnamẹ he gando mí go lẹ zedo nọtẹn Intẹnẹt tọn lẹ ji?

Nuhe yin zizedo nọtẹn Intẹnẹt tọn ji de sọgan dohia dọ a nọ ze dewe daga, bo ma yin whiwhẹnọ.—w20.07, w. 6, 7.

Etẹwẹ Klistiani lẹ sọgan plọn sọn whèhutọ azọ́nyọnẹntọ lẹ dè?

Yé nọ wazọ́n to whenue podọ to fie yé gán mọ whèvi hù te. Yé nọ yin azọ́nplọn nado yí azọ́nwanu he jẹ lẹ zan. Yé nọ yí adọgbigbo do wazọ́n eyin ninọmẹ aimẹ tọn diọ. Mí gán wà nudopolọ to lizọnyizọn mítọn mẹ.—w20.09, w. 5.

Aliho tẹlẹ mẹ wẹ mí gán gọalọna Biblu plọntọ mítọn lẹ nado hẹn owanyi yetọn na Jehovah siso deji te?

Mí gán na yé tuli nado nọ hia Biblu egbesọegbesọ bo nọ lẹnayihamẹpọn do nuhe yé hia ji. Podọ mí gán plọn yé nado nọ hodẹ̀.—w20.11, w. 4.

Etẹwẹ hodidọ lọ: “Mẹlẹpo na yin hinhẹnwa ogbẹ̀ to Klisti mẹ” zẹẹmẹdo?—1 Kọl. 15:22.

Apọsteli Paulu ma to didọ dọ gbẹtọvi lẹpo wẹ na yin finfọnsọnku gba. Klistiani yiamisisadode lẹ wẹ e to alọdlẹndo, yèdọ mẹhe “yin hinhẹn zun wiwe to kọndopọ mẹ hẹ Klisti Jesu” lẹ. (1 Kọl. 1:2; 15:18)—w20.12, w. 5, 6.

Etẹwẹ mẹyiamisisadode lẹ na wà to whenue yé ‘na yin didiọ, to nukunwhiwhe dopo mẹ, to opẹ̀n godo tọn lọ whenu’?—1 Kọl. 15:51-53.

Yé na gọalọna Klisti nado yí opò gànyuu tọn do plan gbẹtọ lẹ taidi lẹngbọhọtọ de. (Osọ. 2:26, 27)—w20.12, w. 12, 13.