Jehovah dotuhomẹna Islaelivi lẹ nado yin omẹ wiwe lẹ. Enẹwutu, e dọna yé dọmọ: “Hiẹ ma dona to yìyì pé to omẹ towe lẹ ṣẹnṣẹn nado to mẹhẹngble. Hiẹ ma dona yangbé ogbẹ̀ gbẹtọ hatọ towe tọn. Yẹn wẹ Jehovah.”—Lev. 19:2, 16.

“Yangbé” yin lẹdogbedevomẹ he sọgbe de na hodidọ dowhenu tọn lọ to Heblugbe mẹ, amọ́ etẹwẹ e zẹẹmẹdo? Owe alọdlẹndonu tọn Ju lẹ tọn de he dọhodo owe Levitiku tọn ji dọmọ: “Adà wefọ lọ tọn ehe . . . vẹawu nado yin lilẹdogbèdevomẹ, na e ma bọawu nado mọnukunnujẹ hodidọ Heblugbe tọn [he yin yiyizan tofi] mẹ, ehe to paa mẹ zẹẹmẹdo ‘ma nado ṣite deji, ṣite to apá na, kavi ṣite sẹpọ.’”

Weyọnẹntọ delẹ dọ dọ, hodidọ ehe tindo kanṣiṣa hẹ wefọ he jẹnukọn lọ he dọmọ: “Hiẹ ma dona nọ yin mawadodonọ to whẹdida towe mẹ. Hiẹ ma dona do mẹnukuntahopọn hia wamọnọ kavi do nukundagbe hia adọkunnọ. Hiẹ dona nọ yí dodowiwa do dawhẹ gbẹtọ hatọ towe tọn.” (Lev. 19:15) Eyin mọ wẹ, gbedide he to wefọ 16tọ lọ mẹ ma nado “yangbé” mẹde tọn gán ko zẹẹmẹdo dọ, omẹ Jiwheyẹwhe tọn lẹ ma dona tafu azọ́nwatọ hatọ de to whẹho whẹdidọ tọn, ajọwiwa tọn kavi whẹndo tọn lẹ mẹ, podọ yé ma dona gada whẹho lẹ na ale mẹdetiti tọn. Nugbo wẹ dọ mí ma dona nọ wà onú mọnkọ lẹ, amọ́, aliho he sọgbe hugan de tin nado mọnukunnujẹ hodidọ ehe he to wefọ 16tọ mẹ lọ mẹ.

Doayi adà bẹjẹeji tọn wefọ lọ tọn go. Jiwheyẹwhe degbena omẹ etọn lẹ ma nado nọ to yìyì pé nado hẹnmẹgble. Hẹn do ayiha mẹ dọ mẹhẹngble ma yin mẹnudidọ paa, dile etlẹ yindọ mẹnudidọ mọnkọ gán sọ fọ́n nuhahun lẹ dote. (Howh. 10:19; Yẹwh. 10:12-14; 1 Tim. 5:11-15; Jak. 3:6) Mẹhẹngbletọ de nọ saba desọn ojlo mẹ bo nọ dọ nuhe na hẹn yinkọ dagbe mẹdevo tọn gble. Mẹhẹngbletọ de gán dekunnu lalo sọta mẹdevo, eyin mọwiwà tlẹ gán ze ogbẹ̀ mẹlọ tọn do owù mẹ. Flindọ sunnu mẹhẹngbletọ lẹ wẹ dekunnu lalo sọta Naboti, ehe zọ́n bọ e yin zannu dlan do to aliho mawadodo tọn mẹ. (1 Ahọ. 21:8-13) Na nugbo tọn, mẹhẹngbletọ de gán yangbé ogbẹ̀ mẹdevo tọn, dile adà awetọ Levitiku 19:16 tọn dọ do.

Humọ, nado hẹn mẹdevo gble to aliho kanyinylan tọn mẹ gán do obá he mẹ yè gbẹwanna mẹlọ jẹ hia. To 1 Johanu 3:15 mẹ, mí hia dọmọ: “Hlọnhutọ de wẹ mẹdepope he gbẹwanna mẹmẹsunnu etọn, podọ mì yọnẹn dọ ogbẹ̀ madopodo ma nọ gbọṣi hlọnhutọ de mẹ gba.” E jẹna ayidego dọ whenue Jiwheyẹwhe ko dọ nuhe to wefọ 16tọ lọ mẹ lẹ godo, e yidogọ dọmọ: “Hiẹ ma dona gbẹwanna nọvisunnu towe to ahun towe mẹ.”—Lev. 19:17.

Enẹwutu, avase sinsinyẹn de wẹ gbedide ayidego tọn he to Levitiku 19:16 mẹ lẹ yin na Klistiani lẹ. Mí dona nọavùnte sọta awujijona linlẹn ylankan lẹ, podọ sọta mẹdevo hinhẹngble. Do glido, eyin mí “yangbé” mẹde tọn gbọn dotẹnmẹ nina wangbẹna kavi nuvẹun nado sisẹ́ mí nado hẹn ẹn gble dali, ehe gán yin kunnudenu lọ dọ mí gbẹwanna mẹlọ. Klistiani lẹ dona dapana enẹ mlẹnmlẹn.—Mat. 12:36, 37.