Whenue Jehovah degbena gbẹtọvi lẹ nado “gọ́ aigba ji bo dugán do e ji,” ewọ dohia dọ aigba lọ blebu na wá lẹzun paladisi de. (Jen. 1:28) Gbedide dowhenu tọn ehe sọ gando mẹhe na dugu aigba tọn lẹ go. Amọ́, aigba ma na yin paladisi de to bẹjẹeji, na jipa Edẹni tọn masọ tin ba wutu. Nususu na tin nado wà to bẹjẹeji nado klọ adà aigba lọ tọn he yin hinhẹngble todin lẹ wé. E họnwun dọ azọ́n pligidi de wẹ enẹ na yin!

Ehe flin mí azọ́n he Islaelivi lẹ dona wà whenue yé lẹkọ sọn Babilọni. Aigba yetọn ko gbọ̀gbé petepete na owhe 70. Amọ́, Isaia dọ dọdai dọ po alọgọ Jehovah tọn po, yé na penugo nado vọ́ ẹ jlado. Dọdai lọ dọmọ: “E na hẹn danfafa etọn nado taidi Edẹni podọ dankló etọn taidi jipa Jehovah tọn.” (Isa. 51:3) Jehovah gọalọna Islaelivi lẹ bọ e pà yé. Mọdopolọ, po alọgọ Jehovah tọn po, mẹhe na dugu aigba tọn lẹ na penugo nado dugán deji. Podọ etlẹ yin todin, a gán dohia dọ a jlo na do mahẹ to azọ́n enẹ mẹ.

 Aliho dopo nado wàmọ wẹ nado nọ wà nuhe go a pé sọgbe hẹ lẹnpọn dagbe nado hẹn owhé po lẹdo towe po do wiweji podọ do titoji. A gán wàmọ mahopọnna nuhe kọmẹnu towe lẹ to wiwà. A gán sọ gọalọ nado hẹn Plitẹnhọ Ahọluduta tọn po Plidopọ tọn he to lẹdo towe mẹ po do wiweji podọ do ninọmẹ dagbe mẹ. Eyin ninọmẹ towe na we dotẹnmẹ, a gán sọ doalọwemẹ nado gọalọ to azọ́n kọgbọ tọn mẹ to nugbajẹmẹji lẹ whenu. Gbọnmọ dali, a na dohia dọ emi jlo nado gọalọ eyin hudo tin. Kanse dewe dọ, ‘Be n’gán wleawuna azọ́nyinyọnẹn delẹ he n’na yizan eyin n’do lẹblanulọkẹyi lọ nado dugu aigba tọn ya?’

Tlolo to whenue viyọnnu Jailu tọn yin finfọnsọnku godo, Jesu dọ dọ nude ni yin nina ẹn nado dù. (Malku 5:42, 43) E gán ko nọma biọ azọ́n susu nado penukundo viyọnnu owhe 12 mẹvi enẹ go. Amọ́, lẹnnupọndo nuhe e na biọ ji whenue Jesu na hẹn opagbe etọn di he dọmọ: “Mẹhe to yọdò oflin tọn lẹ mẹ lẹpo na sè ogbè etọn bo tọ́njẹgbonu.” (Joh. 5:28, 29) Dile etlẹ yindọ Biblu ma na nudọnamẹ gigọ́ lẹ, mí gán yí nukun homẹ tọn do mọdọ mẹhe na yin finfọnsọnku lẹ na do hudo alọgọ tọn nado mọ núdùdù, adọtẹn po avọ̀ po. Be a gán dohia etlẹ yin todin dọ a to gbesisọ mẹ nado gọalọ ya? Kanbiọ delẹ die he ji a gán lẹnnupọndo.

Eyin yè lá dọ nugopọntọ lẹdo tọn na dla agun he mẹ a te pọ́n, be a nọ ze yinkọ dai nado yí jonọ etọn ya? Whenue azọ́ndenamẹ mẹhe to sinsẹ̀nzọn whenu-gigọ́ tọn mẹ to Bẹtẹli lẹ tọn diọ bọ yé wá nado sẹ̀n to agun towe mẹ kavi eyin nugopọntọ lẹdo tọn de doalọtena azọ́ndenamẹ etọn, be a gán gọalọna yé nado mọ adọtẹn ya? Eyin plidopọ daho kavi vonọtaun de na yin bibasi to lẹdo towe mẹ, be a gán ze dewe jo nado wazọ́n jẹnukọnna plidopọ lọ kavi to vivọnu etọn kavi nado dokuavọna afọzedaitọ lẹ ya?

Sọgbe hẹ Owalọ lẹ 24:15, mí to nukundo dọ gbẹtọ liva susu lẹ na yin finfọnsọnku. Susu to yé mẹ wẹ na yin mẹhe ma ko tindo dotẹnmẹ lọ nado yọ́n Jehovah lẹ. Dotẹnmẹ enẹ na hundote na yé to fọnsọnku yetọn godo. a Nugbonọ lẹ, enẹ wẹ devizọnwatọ Jiwheyẹwhe tọn numimọnọ lẹ na tindo mahẹ to azọ́n mẹpinplọn tọn mọnkọ mẹ. (Isa. 11:9) Charlotte he dọyẹwheho to Europe, Amérique du Sud po Aflika po to jejeji pọ́n ojlẹ enẹ. E dọ po homẹhunhun po dọ: “N’to jejeji nado plọnnu gbẹtọ lẹ to fọnsọnku whenu. Eyin n’hianu gando mẹhe nọgbẹ̀ wayi de go, n’nọ saba dọ dọ: ‘Eyin omẹ ehe ko yọ́n Jehovah wẹ, gbẹzan etọn gán ko gbọnvo pete.’ N’to jejeji nado dọhona mẹhe na yin finfọnsọnku lẹ gando nuhe gbọ yé go lẹ go.”

Devizọnwatọ nugbonọ Jehovah tọn he tlẹ nọgbẹ̀ whẹpo Jesu do wá aigba ji lẹ na tindo nususu nado plọn. Ayajẹ po lẹblanulọkẹyi daho de po wẹ e na yin nado basi zẹẹmẹ hẹndi dọdai he Daniẹli kàn dai, amọ́ bo ma mọnukunnujẹ yé mẹ lẹ tọn na ẹn. (Dan. 12:8) Kavi etẹwẹ dogbọn alọgigọna Luti po Naomi po nado plọn lehe Mẹsia lọ yin apadewhe hukan whẹndo tọn yetọn tọn do dali? Ayajẹnu nankọ die e na yin nado do mahẹ to tito mẹpinplọn lẹdo aihọn pé tọn enẹ mẹ, podọ mí na vò sọn kọgbidinamẹnu po ayihafẹsẹnamẹnu he to aihọn ehe mẹ lẹpo po si!

Nawẹ a gán dohia todin dọ a to gbesisọ mẹ nado do mahẹ to tito enẹ mẹ gbọn? Dopo to aliho dagbe hugan he mẹ a gán wàmọ te wẹ nado dovivẹnu nado hẹn nugopipe mẹpinplọn tọn towe lẹ pọnte dogọ, podọ nado nọ do mahẹ whẹwhẹ to azọ́n yẹwhehodidọ lẹdo aihọn pé tọn he to yìyì to alọnu lọ mẹ. (Mat. 24:14) Eyin owhe kavi ninọmẹ devo lẹ tlẹ zọ́n bọ nuhe a gán wà to alọnu lẹ do dogbó, vivẹnudido towe gán dohia dọ a to gbesisọ mẹ nado plọnnu mẹhe na yin finfọnsọnku lẹ.

Mọwẹ, kanbiọ titengbe de die, Be a to jejeji nugbonugbo nado dugu aigba tọn ya? Be a to nukọnpọnhlan nado dugán do aigba ji, penukundo mẹhe na yin finfọnsọnku lẹ go bosọ plọnnu yé ya? A gán dohia dọ emi ko wleawufo nado wàmọ, eyin a nọ yí dotẹnmẹ he hundote na we to egbehe lẹ zan nado do mahẹ to azọ́n mọnkọtọn he a na wà to whenue a na dugu aigba tọn lẹ mẹ!