Be a yí sọwhiwhe do hia zinjẹgbonu Atọ̀họ̀-Nuhihọ́ lọ Tọn agọe tọn lẹ ya? Eyọn, pọ́n eyin a sọgan na gblọndo kanbiọ he bọdego ehelẹ tọn:

Nawẹ mí na mọaleyi gbọn eyin mí nọ yí whenu zan nado dọhona Jehovah, dotoaina ẹn bosọ lẹnnupọndo ewọ ji?

Mí na basi nudide dagbe lẹ, hẹn mẹpinplọn mítọn pọnte dogọ, yise mítọn na lodo dogọ, podọ owanyi mítọn na Jehovah na siso dogọ.—w22.01, w. 30, 31.

Nawẹ mí na mọaleyi gbọn eyin mí plọn nado nọ dejido Jehovah po afọzedaitọ etọn lẹ po go?

Din wẹ ojlẹ lọ nado plọn nado nọ dejido aliho he mẹ Jiwheyẹwhe nọ wà nulẹ te go, bo ma nọ do ayihaawe gando anademẹ po nudide mẹho lẹ tọn po go. Whenue nukunbibia daho lọ na gbajẹgbonu, mí na wleawufo nado setonu eyin mí tlẹ mọ anademẹ he taidi nuhe paṣamẹ kavi ma sọgbe hẹ lẹnpọn dagbe lẹ yí.—w22.02, w. 4-6.

Etẹ na dọ wẹ angẹli lọ te whenue e dọhona Zekalia gando ‘nujlẹkàn he na to alọ ayimatẹn-gán lọ Zelubabẹli tọn mẹ’ go? (Zek. 4:8-10)

Numimọ lọ hẹn omẹ Jiwheyẹwhe tọn lẹ deji dọ tẹmpli he ma dọ̀n ayidonugo sọmọ bo to yinyin gbigbá lọ na yin tadona bo nasọ sọgbe hẹ nujinọtedo Jiwheyẹwhe tọn lẹ.—w22.03, w. 16, 17.

Nawẹ mí gán yin ‘apajlẹ de to hodidọ mẹ’ gbọn? (1 Tim. 4:12)

Mí nọ yí homẹdagbe po sisi po do dọho to lizọnyizọn mítọn mẹ, nọ yí ahun lẹpo do jihàn, nọ na gblọndo whẹwhẹ to opli lẹ ji, nọ dọ nugbo bo nọ dọho to aliho de mẹ nado jlọ mẹdevo lẹ dote bosọ nọ dapana hogbe mẹzunzun tọn lẹ.—w22.04, w. 6-9.

Naegbọn gbekanlin (ahọluduta) ẹnẹ he yin nùdego to Daniẹli weta 7tọ mẹ lẹ do tindo awusọhia dopolọ hẹ dehe yin nùdego to Osọhia 13:1, 2 mẹ?

Gbekanlin he go Osọhia weta 13tọ donù lọ ma nọtena ahọluduta tangan de taidi Lomu gba. Kakatimọ, e nọtena huhlọn aihọn tọn lẹpo he ko dugán do gbẹtọvi lẹ ji.—w22.05, w. 9.

Aliho titengbe tẹ mẹ wẹ mí nọ do jidide mítọn to whẹdida Jiwheyẹwhe tọn mẹ hia te?

Eyin mẹde zùn mí, ṣinuwado mí, kavi waylando sọta mí, mí nọ tẹnpọn ma nado gblehomẹ kavi hẹnmẹdohomẹ, amọ́ mí nọ jo whẹho lẹ do alọ Jehovah tọn mẹ. Ewọ na jla nuhe ylando ko hẹngble lẹpo do.—w22.06, w. 10, 11.

Etẹwẹ mẹmẹsunnu he jlo na hodẹ̀ to opli de ji dona hẹn do ayiha mẹ?

Odẹ̀ ma dona nọ yin yiyizan nado na ayinamẹ agun lọ kavi nado basi nulila. Titengbe jẹnukọnna opli de, e ma biọ “ohó susu” didọ. (Mat. 6:7)—w22.07, w. 24, 25.

Linlẹn tẹ mẹ wẹ “mẹhe wà nuylankan lẹ” na yin finfọnsọnku “na fọnsọnku whẹdida tọn” te? (Joh. 5:29)

Yé ma na mọ whẹdida whẹgbledomẹ tọn de yí to dodonu nuhe yé ko wà wayi tọn ji. Yé na yin gbigbejepọn sọgbe hẹ pọndohlan po walọyizan yetọn po to fọnsọnku yetọn godo.—w22.09, w. 18.

Tudohomẹnamẹ he whànmẹ tẹwẹ J. F. Rutherford na to plidopọ septembre 1922 tọn de ji?

To Plidopọ Cedar Point, Ohio tọn de ji to États-Unis, e dọmọ: “Ahọlu lọ to gandu! Mìwlẹ wẹ lilátọ etọn lẹ. Enẹwutu mì lá, mì lá, mì lá Ahọlu lọ po Ahọluduta etọn po!”—w22.10, w. 3-5.

Sọgbe hẹ Isaia weta 30tọ, aliho atọ̀n tẹlẹ mẹ wẹ Jiwheyẹwhe nọ gọalọna mí nado doakọnnanu te?

Weta ehe dohia dọ (1) e nọ dotoaina mí bosọ nọ na gblọndo odẹ̀ mítọn lẹ tọn, (2) e nọ na mí anademẹ lẹ, podọ (3) e nọ dona mí to alọnu din podọ e nasọ wàmọ to sọgodo.—w22.11, w. 9.

Naegbọn mí gán wá tadona kọ̀n dọ hogbe he to Salmu lẹ 37:10, 11, 29 mẹ lẹ ko mọ hẹndi wayi bo nasọ mọ hẹndi to sọgodo?

Nuhe Davidi dọ lẹ do ninọmẹ awuvivi tọn he wá aimẹ to Islaeli lẹ hia, taidi to gandudu Sọlomọni tọn whenu. Jesu dlẹnalọdo paladisi he ja de bo yihodọ sọn wefọ 11tọ mẹ. (Mat. 5:5; Luku 23:43)—w22.12, w. 8-10, 14.