HOSỌ OPLỌN TỌN 49
Mí Gán Nọgbẹ̀ Kakadoi
“Ehe wẹ ogbẹ̀ madopodo.”—JOH. 17:3.
OHÀN 147 Opagbe Ogbẹ̀ Madopodo Tọn Yin Dido
BLADOPỌ a
1. Nawẹ ayihamẹlinlẹnpọn do opagbe ogbẹ̀ madopodo tọn he Jehovah do na mí ji nọ yinuwado mí ji gbọn?
JEHOVAH dopà dọ mẹhe setonuna emi lẹ na mọ “ogbẹ̀ madopodo.” (Lom. 6:23) Eyin mí lẹnayihamẹpọn do opagbe he Jehovah do na mí ji, ayihaawe ma tin dọ owanyi he mí do na ewọ nọ sinyẹn dogọ. Lẹnnupọndo ehe ji: Otọ́ olọn mẹ tọn mítọn yiwanna mí sọmọ bọ mí ma na yin kinklan sọn ewọ go pọ́n gbede.
2. Nawẹ opagbe ogbẹ̀ madopodo tọn nọ gọalọna mí gbọn?
2 Opagbe ogbẹ̀ madopodo tọn he Jiwheyẹwhe do na mí nọ gọalọna mí nado doakọnna whlepọn mítọn alọnu tọn lẹ. Etlẹ yin whenue kẹntọ mítọn lẹ sìn okú dán na mí, mí ma nọ jogbe gbede. Etẹwutu? Whẹwhinwhẹ́n dopo wẹ yindọ, mí yọnẹn dọ eyin mí yin nugbonọ na Jehovah kakajẹ okú, ewọ na fọ́n mí sọnku po todido lọ po ma nado sọ kú gbede ba. (Joh. 5:28, 29; 1 Kọl. 15:55-58; Heb. 2:15) Naegbọn mí gán kudeji dọ e yọnbasi nado nọgbẹ̀ kakadoi? Lẹnnupọndo whẹwhinwhẹ́n he bọdego ehelẹ ji.
JEHOVAH YIN MADOPODO
3. Naegbọn mí gán kudeji dọ Jehovah penugo nado hẹn mí dogbẹ̀ kakadoi? (Salmu lẹ 102:12, 24, 27)
3 Mí yọnẹn dọ Jehovah gán hẹn mí dogbẹ̀ kakadoi, na ewọ wẹ Asisa ogbẹ̀ tọn, podọ dọ na e na tin kakadoi wutu. (Salm. 36:9) Doayi wefọ Biblu tọn vude poun go he dohia dọ Jehovah ko tin sọn ojlẹ madopodo lẹ bo nasọ nọgbẹ̀ kakadoi. Salmu lẹ 90:2 dọ dọ Jehovah tin “sọn madopodo jẹ madopodo.” Salmu lẹ 102tọ dọ onú mọnkọ de. (Hia Salmu lẹ 102:12, 24, 27.) Podọ yẹwhegán Habakuku wlan gando Otọ́ olọn mẹ tọn mítọn go dọmọ: “Jehovah E, be hiẹ ma ko tin sọn madopodo ya? Jiwheyẹwhe ṣie E, Omẹ Wiwe ṣie, hiẹ ma nọ kú.”—Hab. 1:12.
4. Be mí dona nọ hanú eyin e nọ vẹawuna mí nado mọnukunnujẹ linlẹn lọ mẹ dọ Jehovah ma tindo bẹjẹeji wẹ ya? Basi zẹẹmẹ.
4 Be e nọ vẹawuna we nado mọnukunnujẹ linlẹn lọ mẹ dọ Jehovah yin “Jiwheyẹwhe kakadoi” wẹ ya? (Isa. 40:28) Numọtolanmẹ mọnkọ ma yin nuyọyọ de. Elihu dọ gando Jiwheyẹwhe go dọmọ: “Sọha owhe etọn tọn zẹ̀ nuhe yè sọgan mọnukunnujẹemẹ go.” (Jobu 36:26) Amọ́, e ma yindọ mí ma mọnukunnujẹ nude mẹ wẹ zọ́n bọ nulọ do yin lalo gba. Di apajlẹ, dile etlẹ yindọ mí ma gán mọnukunnujẹ lehe hinhọ́n nọ gbayipe do mẹ to gigọ́ mẹ, be ehe zẹẹmẹdo dọ hinhọ́n ma tin wẹ ya? Paali! Mọdopolọ, míwu gbẹtọvi lẹ sọgan nọma mọnukunnujẹemẹ gbede lehe e yọnbasi do dọ Jehovah ma tindo bẹjẹeji bo nasọ tin kakadoi. Amọ́, ehe ma zẹẹmẹdo dọ Jiwheyẹwhe ma na tin kakadoi gba. Nugbo lọ gando Mẹdatọ lọ go ma nọ sinai do nuhe mẹ mí gán mọnukunnujẹ po dehe mẹ mí ma gán mọnukunnujẹ po ji gba. (Lom. 11:33-36) Podọ, e ko tin whẹpo nudepope to wẹkẹ lọ mẹ nido wá aimẹ, ehe bẹ owhè po sunwhlẹvu lẹ po hẹn. Mí kudeji dọ Jehovah wẹ “Mẹhe basi aigba gbọn huhlọn etọn dali.” Podọ, e ko tin whẹpo do “dlẹn olọn” jẹgbonu. (Jel. 51:15; Owalọ 17:24) Whẹwhinwhẹ́n devo tẹ wutu wẹ mí gán kudeji dọ e yọnbasi nado nọgbẹ̀ kakadoi?
MÍ YIN DIDÁ NADO NỌGBẸ̀ KAKADOI
5. Todido tẹwẹ asu po asi po tintan lọ tindo?
5 Jehovah dá nutogbẹ̀ lẹ do aigba ji bo na yé nugopipe gbẹninọ tọn he do dogbó de, amọ́ e ma yinmọ na gbẹtọvi lẹ. E na yé todido vonọtaun lọ nado nọgbẹ̀ kakadoi. Amọ́, Jehovah na avase Adam dọmọ: “Na nuhe dù atin oyọnẹn dagbe po oylan po tọn, hiẹ ma dona dù sinsẹ́n etọn, na to azán he gbè hiẹ dù sọn e mẹ te, na jide tọn, hiẹ na kú.” (Jen. 2:17) Eyin Adam po Evi po ko setonuna Jehovah wẹ, yé ma na ko kú. E sọgbe hẹ lẹnpọn dagbe nado wá tadona kọ̀n dọ Jehovah ni ko na yé dotẹnmẹ to nukọn mẹ nado dù sọn “atin ogbẹ̀ tọn lọ” mẹ. Ehe na ko zẹẹmẹdo dọ yé do jidevọnamẹ etọn dọ yé na “nọgbẹ̀ kakadoi.” b—Jen. 3:22.
6, 7. (a) Nudevo tẹwẹ dohia dọ gbẹtọvi lẹ ma yin didá nado kú? (b) Yanwle tẹlẹ wẹ a to nukọnpọnhlan nado doafọna? (Pọ́n yẹdide lọ lẹ.)
6 E jẹna ayidego dọ dodinnanutọ delẹ nọ donù kunnudenu lẹnunnuyọnẹn tọn go dọ apọ̀n mítọn do nugopipe lọ nado bẹ nudọnamẹ pli hú lehe mí gán wà do to gbẹzan mítọn mẹ todin. To 2010, hosọ de dọ dọ apọ̀n mítọn gán hẹn nudọnamẹ he sù sọ nudi gigaoctets livi awe daa. Enẹ wẹ tito televiziọn ji tọn he dẹn na ganhihò livi donù atọ̀n (yèdọ na owhe 300 linlán). (Scientific American Mind). E yọnbasi taun dọ sọhayinanu enẹ ni whè tlala hú nugopipe apọ̀n mítọn tọn. Amọ́, e dohia dọ Jehovah wleawuna apọ̀n mítọn nado hẹn nudọnamẹ he sù tlala hú dehe mí gán bẹpli to owhe 70 kavi 80 poun gblamẹ.—Salm. 90:10.
7 Jehovah sọ dá mí po ojlo sinsinyẹn lọ po nado nọgbẹ̀ kakadoi. Biblu dọ gando gbẹtọvi lẹ go dọ Jiwheyẹwhe ko “yí madopodo do ahun yetọn mẹ.” (Yẹwh. 3:11) Dopo to nuhe zọ́n bọ mí nọ pọ́n okú hlan taidi kẹntọ mítọn lẹ mẹ niyẹn. (1 Kọl. 15:26) Eyin mí bẹ azọ̀n sinsinyẹn de, be mí nọ kẹalọyi ninọmẹ lọ domọ poun bo nọ johodo wẹ ya? Paali. To paa mẹ, mí nọ yì dotowhé, bo nọ nù amasin to whedelẹnu nado duto azọ̀n lọ ji. Na nugbo tọn, mí nọ wà nuhe go mí pé lẹpo sọgbe hẹ lẹnpọn dagbe nado dapana okú. Podọ, eyin mẹyiwanna mítọn de kú, vlavo mẹlọ yin jọja kavi mẹho, be e ma nọ hẹn awufiẹsa sinsinyẹn he dẹn-to-aimẹ wá mí ji ya? (Joh. 11:32, 33) Matin ayihaawe, Mẹdatọ owanyinọ mítọn ma na ko na mí ojlo po nugopipe lọ po nado nọgbẹ̀ kakadoi eyin lẹndai etọn na gbẹtọvi lẹ ma yindọ yé ni nọgbẹ̀ kakadoi. Amọ́, mí sọ tindo whẹwhinwhẹ́n he whànmẹ humọ devo lẹ nado kudeji dọ mí gán nọgbẹ̀ kakadoi. Mì gbọ mí ni gbadopọnna nuyiwa Jehovah tọn he wayi po egbezangbe tọn delẹ po he dohia dọ ewọ ma ko diọ lẹndai dowhenu tọn etọn.
Na mí tindo todido nado nọgbẹ̀ kakadoi wutu, homẹ mítọn nọ hùn nado yí nukun homẹ tọn do pọ́n nuhe mí na penugo bo wà to sọgodo lẹ (Pọ́n hukan 7tọ) c
LẸNDAI JEHOVAH TỌN MA KO DIỌ
8. Jide tẹwẹ Isaia 55:11 na mí na nuhe dù lẹndai Jehovah tọn na mí?
8 Dile etlẹ yindọ Adam po Evi po waylando bosọ hẹn okú wá kúnkan yetọn lẹ ji, Jehovah ma diọlinlẹn gando lẹndai etọn go. (Hia Isaia 55:11.) Lẹndai etọn wẹ gbẹ́ yindọ gbẹtọvi nugbonọ lẹ ni nọgbẹ̀ kakadoi. Tadona enẹ nkọ nọ họnwun, eyin mí lẹnnupọndo nuhe Jehovah ko dọ bosọ wà nado hẹn lẹndai etọn di lẹ ji.
9. Opà tẹwẹ Jiwheyẹwhe do? (Daniẹli 12:2, 13)
9 Jehovah dopà dọ emi na fọ́n oṣiọ lẹ sọnku bo hùn dotẹnmẹ dote na yé nado nọgbẹ̀ kakadoi. (Owalọ 24:15; Titu 1:1, 2) Dawe nugbonọ lọ Jobu kudeji dọ Jehovah do ojlo vẹkuvẹku lọ nado fọ́n mẹhe ko kú lẹ sọnku. (Jobu 14:14, 15) Yẹwhegán Daniẹli yọnẹn dọ gbẹtọvi lẹ na yin finfọnsọnku po dotẹnmẹ lọ po nado nọgbẹ̀ kakadoi. (Salm. 37:29; hia Daniẹli 12:2, 13.) Ju he nọgbẹ̀ to ojlẹ Jesu tọn mẹ lẹ lọsu yọnẹn dọ Jehovah gán na “ogbẹ̀ madopodo” devizọnwatọ nugbonọ etọn lẹ. (Luku 10:25; 18:18) Jesu dọho gando opagbe ehe go whlasusu, podọ Otọ́ etọn fọ́n ewọ lọsu sọnku.—Mat. 19:29; 22:31, 32; Luku 18:30; Joh. 11:25.
Jidide tẹwẹ azọnjiawu fọnsọnku tọn he Elija wà nọ na we? (Pọ́n hukan 10tọ)
10. Etẹwẹ fọnsọnku he wá aimẹ to hohowhenu lẹ dohia? (Pọ́n yẹdide lọ.)
10 Jehovah wẹ Gbẹ̀namẹtọ lọ, podọ ewọ tindo huhlọn nado hẹn gbẹtọvi lẹ gọwá ogbẹ̀. E na huhlọn yẹwhegán Elija nado fọ́n visunnu asuṣiọsi Zalefati tọn lọ tọn sọnku. (1 Ahọ. 17:21-23) To nukọn mẹ, po alọgọ Jehovah tọn po, yẹwhegán Eliṣa hẹn visunnu nawe Ṣunẹminu lọ tọn gọwá ogbẹ̀. (2 Ahọ. 4:18-20, 34-37) Fọnsọnku enẹlẹ po devo lẹ po dohia dọ Jehovah tindo huhlọn nado hẹn gbẹtọvi lẹ gọwá ogbẹ̀. To whenue Jesu to aigba ji, e dohia dọ Otọ́ emitọn ko na emi huhlọn mọnkọ. (Joh. 11:23-25, 43, 44) Todin, Jesu to olọn mẹ bọ ‘aṣẹ lẹpo ko yin nina ẹn to olọn mẹ podọ to aigba ji.’ Enẹwutu, e tin to otẹn dagbe mẹ nado hẹn opagbe lọ di dọ “mẹhe to yọdò oflin tọn lẹ mẹ lẹpo” na yin finfọnsọnku po todido lọ po nado nọgbẹ̀ kakadoi.—Mat. 28:18; Joh. 5:25-29.
11. Nawẹ ofligọ lọ hẹn ẹn yọnbasi na mí nado nọgbẹ̀ kakadoi gbọn?
11 Naegbọn Jehovah do dike bọ Visunnu yiwanna etọn kú okú awufiẹsa tọn? Jesu do whẹwhinwhẹ́n lọ hia bo dọmọ: “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.” (Joh. 3:16) Jiwheyẹwhe hẹn ẹn yọnbasi na mí nado nọgbẹ̀ kakadoi whenue e ze Visunnu etọn jo taidi ofligọ de nado suahọ ylando mítọn lẹ tọn. (Mat. 20:28) Apọsteli Paulu basi bladopọ adà titengbe lẹndai Jiwheyẹwhe tọn ehe tọn whenue e dọmọ: “To whenuena e yindọ mẹdopo gblamẹ wẹ okú gbọn wá, mẹdopo gblamẹ wẹ fọnsọnku oṣiọ lẹ tọn lọsu gbọn wá ga. Na kẹdẹdile mẹlẹpo to kúkú to Adam mẹ, mọdopolọ wẹ mẹlẹpo na yin hinhẹnwa ogbẹ̀ to Klisti mẹ do ga.”—1 Kọl. 15:21, 22.
12. Nawẹ Ahọluduta lọ na gọalọ nado hẹn lẹndai Jehovah tọn di do ota mítọn mẹ gbọn?
12 Jesu plọn hodotọ etọn lẹ nado nọ hodẹ̀ dọ Ahọluduta Jiwheyẹwhe tọn ni wá, podọ na ojlo Jiwheyẹwhe tọn ni yin wiwà to aigba ji. (Mat. 6:9, 10) Apadewhe lẹndai Jiwheyẹwhe tọn wẹ yindọ gbẹtọvi lẹ ni nọgbẹ̀ kakadoi to aigba ji. Nado wà ehe dotana, Jehovah ko de Visunnu etọn taidi Ahọlu Ahọluduta Mẹsia tọn lọ tọn. Jiwheyẹwhe ko to gbẹtọ 144000 lẹ bẹpli sọn aigba ji nado wazọ́n dopọ hẹ Jesu nado hẹn ojlo Jiwheyẹwhe tọn di.—Osọ. 5:9, 10.
13. Etẹwẹ Jehovah to wiwà to alọnu, podọ nawẹ enẹ gando gowe gbọn?
13 Jehovah ko to “gbẹtọ susugege de” bẹpli to alọnu bosọ to azọ́nplọn yé nado yin mẹjidugando Ahọluduta etọn tọn lẹ. (Osọ. 7:9, 10; Jak. 2:8) Mahopọnna dọ suhugan gbẹtọ lẹ tọn wẹ wangbẹna po awhàn po ko klan to egbehe, mẹhe yin apadewhe “gbẹtọ susugege lọ” tọn lẹ dona dovivẹnu sinsinyẹn nado de wangbẹna wunmẹ lẹpo sẹ̀ sọn ahun yetọn mẹ. To yẹhiadonu-liho, yé ko to ohí yetọn lẹ yí do tùn glepọnu lẹ. (Mika 4:3) Kakati yé ni nọ do mahẹ to awhàn lẹ mẹ, yé to alọgọna gbẹtọvi lẹ nado mọ “ogbẹ̀ nujọnu tọn lọ,” bosọ nọ plọnnu yé gando Jiwheyẹwhe nugbo lọ po lẹndai etọn lẹ po go. (1 Tim. 6:19) Hagbẹ whẹndo tọn lẹ gán nọ diọnukunsọ yé, kavi yé gán nọ jiya to akuẹzinzan-liho na yé nọ nọgodona Ahọluduta Jiwheyẹwhe tọn wutu, amọ́ Jehovah nọ hẹn ẹn diun dọ yé tindo nuhe sin hudo yé do lẹ. (Mat. 6:25, 30-33; Luku 18:29, 30) Nugbo enẹlẹ nọ hẹn mí deji dọ Ahọluduta Jiwheyẹwhe tọn tin nugbo, podọ e na zindonukọn nado to lẹndai Jehovah tọn hẹndi.
SỌGODO DAGBEDAGBE DE TO TEPỌN MÍ
14, 15. Nawẹ opagbe Jehovah tọn nado de okú sẹ̀ kakadoi na yin hinhẹndi to godo mẹ gbọn?
14 Jesu ko yin Ahọlu to olọn mẹ to alọnu, podọ e na hẹn opagbe he Jehovah ko do lẹpo di. (2 Kọl. 1:20) Bẹsọn 1914, Jesu ko to awhàngba do kẹntọ etọn lẹ ji. (Salm. 110:1, 2) Ewọ po gandutọgbẹ́ etọn lẹ po na dotana awhàngbigba yetọn to madẹnmẹ bo na và mẹylankan lẹ sudo.—Osọ. 6:2.
15 To Gandudu Owhe Fọtọ́n tọn Jesu tọn whenu, oṣiọ lẹ na yin finfọnsọnku bọ gbẹtọvi tonusetọ lẹ na yin hinhẹn jẹ pipé kọ̀n. To mẹtẹnpọn godo tọn lọ godo, mẹhe Jehovah dawhẹna taidi dodonọ lẹ “na dugu aigba tọn, yé nasọ nọgbẹ̀ to e ji kakadoi.” (Salm. 37:10, 11, 29) Homẹhunnu wẹ e na yin dọ “kẹntọ godo tọn, yèdọ okú na yin hinhẹn zun ovọ́.”—1 Kọl. 15:26.
16. Etẹwẹ dona yin mẹwhinwhàn tintan he wutu mí do to Jehovah sẹ̀n?
16 Dile mí ko mọ do, todido mítọn nado nọgbẹ̀ kakadoi sinai do Ohó Jiwheyẹwhe tọn ji gligli. Todido enẹ gán gọalọna mí nado hẹn nugbonọ-yinyin mítọn go to azán godo tọn he vẹawu ehelẹ mẹ. Amọ́ nado hẹn homẹ Jehovah tọn hùn, mẹwhinwhàn mítọn ma dona yin ojlo lọ poun nado nọgbẹ̀ kakadoi. Whẹwhinwhẹ́n tintan he wutu mí nọ hẹn nugbonọ-yinyin mítọn na Jehovah po Jesu po go wẹ yindọ mí yiwanna yé sisosiso. (2 Kọl. 5:14, 15) Owanyi enẹ nọ whàn mí nado hodo apajlẹ yetọn bosọ má todido mítọn hẹ mẹdevo lẹ. (Lom. 10:13-15) Dile mí to pinplọn nado dapana ṣejannabi bosọ yin alọtlútọ, mí nọ lẹzun gbẹtọ alọpa he Jehovah jlo na jihọntọn hẹ kakadoi lẹ.—Heb. 13:16.
17. Azọngban tẹwẹ dopodopo mítọn lẹ tindo? (Matiu 7:13, 14)
17 Be mí na tin to mẹhe na nọgbẹ̀ kakadoi lẹ mẹ ya? Jehovah ko hùn dotẹnmẹ enẹ dote na mí. Todin, azọngban mítọn wẹ nado gbọṣi aliho he nọ planmẹ yì ogbẹ̀ mẹ lọ ji. (Hia Matiu 7:13, 14.) Nawẹ ogbẹ̀ mítọn na ṣí whenue mí na nọgbẹ̀ kakadoi? Mí na gbadopọnna gblọndo kanbiọ enẹ tọn to hosọ he bọdego mẹ.
OHÀN 141 Ogbẹ̀ Yin Nunina He Jiawu De
a Be a to nukọnpọnhlan nado nọgbẹ̀ kakadoi ya? Jehovah ko dopà dọ to gbèdopo, mí na penugo nado nọgbẹ̀ bo ma hanú gbede gando okú go. Hosọ ehe na gbadopọnna whẹwhinwhẹ́n delẹ he wutu mí gán kudeji mlẹnmlẹn dọ Jehovah na de opà etọn.
b Pọ́n apotin lọ “ Hogbe lọ ‘Kakadoi’ to Biblu Mẹ.”
c ZẸẸMẸ YẸDIDE DE TỌN: Mẹmẹsunnu mẹhomẹ de yí nukun homẹ tọn do to pinpọn nudelẹ he sin vivi e na dù to whenue e na nọgbẹ̀ kakadoi.
