Be a yí sọwhiwhe do hia zinjẹgbonu Atọ̀họ̀-Nuhihọ́ lọ Tọn agọe tọn lẹ ya? Eyọn, pọ́n eyin a sọgan na gblọndo kanbiọ he bọdego ehelẹ tọn:

Etẹwẹ e nọ biọ nado ‘diọ ayiha mẹtọn’? (Lom. 12:2)

E nọ bẹ nususu hẹn hú nado wà onú dagbe susu to gbẹzan mẹtọn mẹ. E nọ bẹ gbẹtọ-yinyin homẹ tọn mítọn gbigbejepọn gọna diọdo lẹ bibasi nado nọgbẹ̀ sọgbe hẹ nujinọtedo Jiwheyẹwhe tọn lẹ dile mí penugo do hẹn.—w23.01, w. 8, 9.

Nawẹ mí gán nọ nọ̀ jlẹkaji whenue mí to nujijọ aihọn tọn lẹ pọ́n gbọn?

Ojlo mítọn wẹ nado yọ́n lehe nujijọ alọnu tọn aihọn tọn lẹ to dọdai lẹ hẹndi do. Kakati nado nọ pàhodọ, yèdọ nude he gán hẹn kinklan wá, mí na wà dagbe nado nọ ze hodọdopọ mítọn lẹ sinai do nuhe titobasinanu Jehovah tọn wleawuna lẹ ji. (1 Kọl. 1:10)—w23.02, w. 16.

Nawẹ baptẹm Jesu tọn gbọnvona baptẹm hodotọ etọn lẹ tọn gbọn?

Jesu yin jiji to akọta he yin kinklandowiwe na Jiwheyẹwhe de mẹ, enẹwutu e ma biọ dọ ni klan ede do wiwe na Jehovah kẹdẹdile míwlẹ nọ wà do. Mẹpipe wẹ Jesu, yèdọ dawe de he ma tindo ylando depope. E ma biọ dọ ni lẹnvọjọ sọn ylando depope mẹ.—w23.03, w. 5.

Nawẹ mí gán gọalọna mẹdevo lẹ nado nọ na gblọndo to opli lẹ ji gbọn?

Mí gán nọ na gblọndo he to glido lẹ, bo na dotẹnmẹ mẹdevo lẹ nado do mahẹ ga. Mí gán sọ dapana hodidọ do nuagokun susu lẹ ji. Gbọnmọ dali, nuagokun devo lẹ na pò he ji mẹdevo lẹ na dọhodo.—w23.04, w. 23.

Etẹwẹ “Aliho Wiwe-Yinyin Tọn” he yin nùdego to Isaia 35:8 mẹ dlẹnalọdo?

To tintan whenu, alihogbó yẹhiadonu tọn ehe dlẹnalọdo aliho he Ju lẹ gbọn sọn Babilọni wá otò yetọn mẹ. Bọ to agọe pete lo? Owhe kanweko susu lẹ jẹnukọnna 1919, azọ́n awuwle tọn ko yin wiwà—ehe bẹ lẹdogbedevomẹ po zinjẹgbonu Biblu tọn lẹ po hẹn. Omẹ Jiwheyẹwhe tọn lẹ ko to gbejizọnlinzin gbọn “Aliho Wiwe-Yinyin Tọn” ji to paladisi gbigbọmẹ tọn he nọ planmẹ yì dona Ahọluduta lọ tọn lẹ kọ̀n mẹ—w23.05, w. 15-19.

Yọnnu yẹhiadonu tọn awe tẹlẹ go wẹ Howhinwhẹn lẹ weta 9tọ na ayinamẹ gando?

Howhinwhẹn lẹ dọho gando “yọnnu nulunọ” he oylọ-basinamẹ etọn nọ planmẹ yì “Yọdò” mẹ de go, podọ gando yọnnu nuyọnẹntọ de he yin zẹẹmẹ basina taidi “nuyọnẹn nugbo,” yèdọ mẹhe oylọ-basinamẹ etọn nọ planmẹ jẹ “aliho nukunnumọjẹnumẹ tọn” podọ ogbẹ̀ tọn ji de go. (Howh. 9:1, 6, 13, 18)—w23.06, w. 22-24.

Nawẹ Jiwheyẹwhe do whiwhẹ po lẹnpọn dagbe po hia whenue e to nuyiwa hẹ Lọti gbọn?

Jehovah na anademẹ Lọti nado họ̀n sọn Sodọmi bo yì lẹdo osó tọn lẹ mẹ. Amọ́, whenue Lọti vẹvẹ dọ emi na yì bẹta do Zoali, Jiwheyẹwhe kẹalọyi obiọ etọn.—w23.07, w. 21.

Etẹwẹ asi de gán wà eyin alọwlemẹ etọn nọ pọ́n yẹdide gblewa tọn lẹ?

Yọnnu lọ dona nọ flindọ e ma yin owhẹ̀ emitọn. E dona ze ayiha do haṣinṣan etọn hẹ Jiwheyẹwhe ji bo nọ lẹnayihamẹpọn do kandai Biblu tọn he dọho gando yọnnu he jẹflumẹ bọ Jiwheyẹwhe miọnhomẹna lẹ go ji. Yọnnu lọ gán gọalọna alọwlemẹ etọn nado dapana ninọmẹ he nọ whlemẹpọn taun lẹ.—w23.08, w. 14-17.

Whenue mẹde jẹagọdo nuyise mítọn lẹ, nawẹ zinzin gán gọalọna mí nado do walọmimiọn hia gbọn?

Mí gán pọ́n kanbiọ lọ kavi agọjẹdomẹ lọ hlan taidi aliho de nado yọ́n linlẹn kavi ahunmẹdunamẹnu mẹlọ tọn. Gbọnmọ dali, mí na wleawufo nado yinuwa po walọmimiọn po.—w23.09, w. 17.

Etẹwẹ mí gán plọn sọn Malia dè na nuhe dù huhlọn mimọyi?

Whenue Malia sè dọ emi na lẹzun onọ̀ Mẹsia lọ tọn, e mọ huhlọn yí sọn mẹdevo lẹ dè. Gabliẹli po Elizabẹti po yí Owe-wiwe lẹ zan nado na tuli Malia. Mílọsu gán mọ huhlọn yí sọn sinsẹ̀n-basitọ hatọ lẹ dè.—w23.10, w. 15.

Nawẹ Jehovah gán na gblọndo na odẹ̀ mítọn lẹ gbọn?

E dopà nado dotoaina odẹ̀ mítọn lẹ bo pọ́n lehe yé do kanṣiṣa hẹ lẹndai etọn do. (Jel. 29:12) E gán na gblọndo obiọ dopolọ lẹ tọn to aliho voovo mẹ, amọ́ e na nọ gọalọna mí to whelẹponu.—w23.11, w. 21, 22.

Lomunu lẹ 5:2 donù “todido” go, bọ naegbọn e sọ yin hodọdeji to wefọ 4tọ mẹ?

Whenue mẹde sè wẹndagbe lọ, e gán wleawuna todido lọ nado duvivi ogbẹ̀ tọn to paladisi mẹ to aigba ji. Amọ́, dile e to pipehẹ nukunbibia lẹ, bo to akọndona yé, bosọ to ayido nukundagbe Jiwheyẹwhe tọn go, e yọnbasi dọ todido etọn ni lodo bosọ họnwun na ẹn dogọ.—w23.12, w. 12, 13.