1, 2. Sọgbe hẹ Matiu 5:11, nukun tẹwẹ mí dona nọ yí do pọ́n whlepọn lẹ?

JESU dopà dọ hodotọ emitọn lẹ na do ayajẹ nugbonugbo. E sọ na avase dọ mẹhe yiwanna emi lẹ na pehẹ whlepọn lẹ. (Mat. 10:22, 23; Luku 6:20-23) Mí nọ jaya dọ mí yin devi Klisti tọn lẹ. Amọ́, nawẹ e nọ ṣí na mí eyin hagbẹ whẹndo tọn mítọn lẹ tẹnpọn nado diọnukunsọ mí, aṣẹpatọ lẹ dohomẹkẹn mí, bọ azọ́nwatọgbẹ́ kavi klasigbẹ́ mítọn lẹ gbidikọna mí nado wà nue ma sọgbe? Ayihaawe ma tin dọ nulinlẹnpọn do ninọmẹ mọnkọ lẹ ji gán do magbọjẹ na mí.

² To paa mẹ, suhugan mẹlẹ tọn ma nọ mọ homẹkẹn taidi whẹwhinwhẹ́n de nado jaya. Etomọṣo, nue Ohó Jiwheyẹwhe tọn dọna mí nado wà pẹẹ niyẹn. Di apajlẹ, devi Jakọbu kàn dọ mí dona nọ pọ́n ẹn hlan di ayajẹ, whenue mí to pipehẹ whlepọn lẹ, kakati enẹ ni nọ húagbọ́ mí. (Jak. 1:2, 12) Podọ, Jesu dọ dọ mí dona nọ jaya etlẹ yin whenue yè dohomẹkẹn mí. (Hia Matiu 5:11.) Nawẹ mí gán hẹn ayajẹ mítọn go mahopọnna whlepọn lẹ gbọn? Mí gán plọn nususu eyin mí lẹnnupọndo nudelẹ he Jakọbu dọ to wekanhlanmẹ etọn hlan Klistiani dowhenu tọn lẹ mẹ ji. Jẹnukọn whẹ́, mì gbọ mí ni dọhodo avùnnukundiọsọmẹnu he Klistiani enẹlẹ pehẹ lẹ ji.

3. Etẹwẹ jọ ojlẹ vude to whenue Jakọbu lẹzun devi Jesu tọn godo?

³ Ojlẹ kleun de to whenue Jakọbu he yin nọvisunnu-daa Jesu tọn lẹzun devi godo, homẹkẹn fọ́n sọta Klistiani he to Jelusalẹm lẹ. (Owalọ 1:14; 5:17, 18) Podọ, whenue devi Stefani yin hùhù, Klistiani susu wẹ họ̀n sọn tòdaho lọ mẹ, bo “gbàpe gbọn agbegbe Jude po Samalia tọn lẹ po ji,” kaka yì fie dẹn  taun lẹ taidi Kiplu po Antioku po. (Owalọ 7:58–8:1; 11:19) Saa ko yí nukun homẹ tọn do pọ́n nuhahun he devi lẹ dona ko doakọnna. Etomọṣo, yé yí jeje do dọyẹwheho wẹndagbe lọ tọn to fidepope he yé yì, podọ agun lẹ yin didoai to fisusu to Ahọluigba Lomu tọn mẹ. (1 Pita 1:1) Amọ́, ojlẹ nuhahun sinsinyẹn tọn devo lẹ gbẹ́ to tepọn Klistiani dowhenu tọn lẹ.

4. Whlepọn devo tẹlẹ wẹ Klistiani dowhenu tọn lẹ doakọnna?

⁴ Klistiani dowhenu tọn lẹ doakọnna whlepọn voovo lẹ. Di apajlẹ, to nudi owhe 50 W.M., Ahọluigbagán Lomu tọn Klaudiu degbe dọ Ju lẹpo ni tọ́n sọn Lomu. Enẹwutu, Ju he lẹzun Klistiani lẹ to dandannu glọ nado jo owhé yetọn lẹ do bo yì sawhé do fidevo. (Owalọ 18:1-3) To nudi owhe 61 W.M., apọsteli Paulu wlan dọ Klistiani hatọ etọn lẹ yin vivlẹko to gbangba, yin zizedo gànmẹ, bọ nutindo yetọn lẹ yin bibẹ yì. (Heb. 10:32-34) Podọ, dile e yindo na mẹdevo lẹ, Klistiani lẹ doakọnna ohẹ́n po awutu po.—Lom. 15:26; Flp. 2:25-27.

5. Kanbiọ tẹlẹ wẹ mí na mọ gblọndo na?

⁵ To whenue Jakọbu kàn wekanhlanmẹ etọn jẹnukọnna owhe 62 W.M., e yọ́n whlepọn he mẹ mẹmẹsunnu po mẹmẹyọnnu etọn lẹ po to jujugbọn lẹ ganji. Jehovah gbọdo Jakọbu nado kanwehlan Klistiani enẹlẹ bo na yé ayinamẹ yọ́n-na-yizan lẹ he na gọalọna yé nado hẹn ayajẹ yetọn go, etlẹ yin to whenue yé to pipehẹ whlepọn lẹ. Mì gbọ mí ni gbadopọnna wekanhlanmẹ Jakọbu tọn bo na gblọndo na kanbiọ ehelẹ: Ayajẹ tẹ hodọ wẹ Jakọbu te to wekanhlanmẹ etọn mẹ? Etẹwẹ gán hò ayajẹ enẹ yí sọn Klistiani de si? Podọ, nawẹ nuyọnẹn, yise po adọgbigbo po gán gọalọna mí nado hẹn ayajẹ mítọn go mahopọnna whlepọn depope he mí pannukọn gbọn?

6. Sọgbe hẹ Luku 6:22, 23, naegbọn Klistiani de gán jaya whenue e to pipehẹ whlepọn lẹ?

⁶ Mẹsusu sọgan lẹndọ yé na do ayajẹ titengbe eyin yé do agbasalilo dagbe, akuẹ susu gọna jijọho to whẹndo mẹ. Amọ́, ayajẹ wunmẹ he hodọ Jakọbu te yin adà sinsẹ́n gbigbọ Jiwheyẹwhe tọn de, bo ma sinai do ninọmẹ mítọn lẹ ji. (Gal. 5:22) Klistiani de nọ do ayajẹ, kavi nọ do ayajẹ nujọnu tọn eyin e yọnẹn dọ emi nọ hẹn homẹ Jehovah tọn hùn, bosọ nọ hodo apajlẹ Jesu tọn. (Hia Luku 6:22, 23; Kol. 1:10, 11) Kẹdẹdile miyọ́n gomiyọngban de tọn nọ to jiji do, ayajẹ wunmẹ ehe nọ to jiji to ahun Klistiani de tọn mẹ. E ma nọ yẹ̀ pò whenue mí to azọ̀njẹ, kavi whenue akuẹ hán mí. Podọ, mẹṣanko kavi nukundiọsọmẹ hagbẹ whẹndo tọn lẹ kavi mẹdevo lẹ tọn ma nọ hò e ṣí. Kakati miyọ́n ehe ni ṣí, e nọ to jiji dogọ whedepopenu he nukundiọsọmẹtọ lẹ tẹnpọn nado hò e ṣí. Whlepọn yise tọn he mí nọ pehẹ lẹ nọ dohia dọ mí yin devi nugbo Klisti tọn lẹ. (Mat. 10:22; 24:9; Joh. 15:20) Abajọ Jakọbu do wlan dọmọ: “Mẹmẹsunnu ṣie lẹ emi, mì nọ pọ́n ẹn hlan di ayajẹ nugbonugbo, to whenuena mì pehẹ whlepọn voovo lẹ.”—Jak. 1:2.

7, 8. Dagbe tẹwẹ whlepọn lẹ nọ wà na yise mítọn?

⁷ Jakọbu donù whẹwhinwhẹ́n devo go he wutu Klistiani lẹ nọ wleawufo nado pehẹ whlepọn he tlẹ sinyẹn lẹ. E dọmọ: “Nuhọakuẹ-yinyin yise mìtọn tọn he yin whiwhlepọn ehe, nọ dekọtọn do akọndonanu mẹ.” (Jak. 1:3) Whlepọn lẹ gán yin yiyijlẹdo miyọ́n he yè nọ yí do tùn ohí de go. Eyin yè hẹn ohí lọ gbọn miyọ́n mẹ bọ e hẹ̀ bo wá fá, e nọ sinyẹn dogọ. Mọdopolọ, whenue mí doakọnna whlepọn lẹ, yise mítọn nọ lodo dogọ. Enẹwutu wẹ Jakọbu do dọ dọ: “Mì gbọ akọndonanu ni wazọ́n etọn dotana, na mìwlẹ nido sọgan sọgbe bosọ pegan mlẹnmlẹn.” (Jak. 1:4) Whenue mí mọdọ whlepọn lẹ hẹn yise mítọn lodo dogọ, mí gán doakọnna yé po ayajẹ po.

⁸ To wekanhlanmẹ Jakọbu tọn mẹ, e sọ donù nuhahun delẹ go he gán hò ayajẹ mítọn yí. Nuhahun tẹlẹ wẹ, podọ nawẹ mí gán duto yé ji gbọn?

9. Naegbọn mí do dó hudo nuyọnẹn tọn?

⁹ Nuhahun lọ: Whenue mí ma yọ́n nue mí na wà. Whenue mí to jujugbọn whlepọn de mẹ, mí nọ jlo na lẹhlan Jehovah na alọgọ nado bayi nudide he na hẹn homẹ etọn hùn lẹ, bo hẹn ale wá na mẹmẹsunnu po mẹmẹyọnnu mítọn lẹ po, bo nasọ gọalọna mí nado hẹn tenọgli mítọn go. (Jel. 10:23) Mí do hudo nuyọnẹn tọn nado yọ́n nue mí na wà, podọ nue mí dona dọ na mẹhe to nukundiọsọ mí lẹ. Eyin mí ma yọ́n nue mí na wà, mí gán mọdọ wà-gbọn-de-ma-tin to ninọmẹ mítọn mẹ bo gán yawu hẹn ayajẹ mítọn bu.

10. Etẹwẹ Jakọbu 1:5 dọ dọ mí dona wà nado mọ nuyọnẹn yí?

 ¹⁰ Pọngbọ lọ: Nọ biọ nuyọnẹn sọn Jehovah dè. Nado doakọnna whlepọn mítọn lẹ po ayajẹ po, nutintan he mí dona wà wẹ nado biọ Jehovah to odẹ̀ mẹ dọ ni na mí nuyọnẹn he sin hudo mí do nado bayi nudide dagbe lẹ. (Hia Jakọbu 1:5.) Nawẹ mí dona yinuwa gbọn, eyin e di na mí dọ Jehovah ma na gblọndo odẹ̀ mítọn lẹ tọn to afọdopolọji? Jakọbu dọ dọ, mí dona nọ “to bibiọ Jiwheyẹwhe zọnmii.” Jehovah ma nọ gblehomẹ, eyin mí to nuyọnẹn biọ ẹ mapote. E ma na gblewhẹdo mí. Eyin mí hodẹ̀ hlan Otọ́ olọn mẹ tọn mítọn, e “nọ yí alọtútlú do na” mí nuyọnẹn nado doakọnna whlepọn mítọn lẹ. (Salm. 25:12, 13) E yọ́n whlepọn mítọn lẹ, e nọ sè vivẹ́ hẹ mí, bosọ wleawufo nado gọalọna mí. Matin ayihaawe, whẹwhinwhẹ́n de niyẹn nado jaya! Amọ́, nawẹ Jehovah nọ na mí nuyọnẹn gbọn?

11. Onú devo tẹwẹ mí gán wà nado mọ nuyọnẹn yí?

¹¹ Jehovah nọ na mí nuyọnẹn gbọn Ohó etọn gblamẹ. (Howh. 2:6) Nado mọ nuyọnẹn enẹ yí, mí dona nọ plọn Ohó Jiwheyẹwhe tọn po owe sinai do Biblu ji lẹ po. Amọ́, mí dona wà onú susu hú oyọnẹn bibẹpli poun. Mí dona yí nuyọnẹn Jiwheyẹwhe tọn do yizan mẹ to gbẹzan mítọn mẹ, bo nọ wanu sọgbe hẹ ayinamẹ etọn. Jakọbu wlan dọmọ: “Mì lẹzun basitọ ohó lọ tọn lẹ, e ma yin sisètọ lẹ kẹdẹ gba.” (Jak. 1:22) To whenue mí yí ayinamẹ Jiwheyẹwhe tọn do yizan mẹ, mí nọ lẹzun jijọho-dintọ, lẹnpọn dagbenọ, podọ lẹblanunọ dogọ. (Jak. 3:17) Jẹhẹnu enẹlẹ nọ gọalọna mí nado doakọnna whlepọn depope bo ma hẹn ayajẹ mítọn bu.

12. Naegbọn e yin nujọnu dọ mí ni yọ́n Biblu ganji?

¹² Ohó Jiwheyẹwhe tọn nọ yinuwa taidi mẹpọ́nnu de, bo nọ gọalọna mí nado mọ nue ji mí dona wazọ́n do gọna lehe mí dona wà ẹ do.  (Jak. 1:23-25) Di apajlẹ, to whenue mí ko plọn Ohó Jiwheyẹwhe tọn godo, mí gán mọdọ mí dona nọ dava míde. Po alọgọ Jehovah tọn po, mí nọ plọn nado wà dẹẹdẹ whenue mí to nuyiwa hẹ gbẹtọ he gán do adán nukun na mí lẹ, kavi pehẹ nuhahun he gán hẹn homẹgble mí lẹ. Na mí yin walọmimiọnnọ wutu, mí nọ yinuwa to aliho he pọnte de mẹ eyin mí pehẹ nuhahun lẹ. Mí nọ penugo nado lẹnnupọn ganji, bo bayi nudide dagbe hugan lẹ. (Jak. 3:13) Lehe e yin nujọnu do sọ dọ mí ni yọ́n Biblu ganji!

13. Naegbọn mí dona plọnnu sọn apajlẹ mẹhe go Biblu donù lẹ tọn mẹ?

¹³ To whedelẹnu, mí o nọ ṣinuwa whẹpo do nọ wá plọnnu sọn e mẹ. Amọ́, enẹ ma yin aliho dagbe lọ nado plọnnu. Aliho he pọnte nado do nuyọnẹn wẹ nado plọnnu sọn kọdetọn dagbe po nuṣiwa mẹdevo lẹ tọn po mẹ. Abajọ Jakọbu dotuhomẹna mí nado nọ lẹnnupọndo apajlẹ mẹhe go Biblu donù delẹ tọn ji taidi Ablaham, Lahabi, Jobu po Elija po. (Jak. 2:21-26; 5:10, 11, 17, 18) Devizọnwatọ nugbonọ Jehovah tọn enẹlẹ penugo bo doakọnna whlepọn he gán o hò ayajẹ yetọn yí lẹ. Apajlẹ akọndonanu tọn yetọn dohia dọ mílọsu gán wà nudopolọ po alọgọ Jehovah tọn po.

14, 15. Naegbọn mí ma dona nọ dovọ́na ayihaawe he mí nọ do lẹ?

¹⁴ Nuhahun lọ: Eyin mí do ayihaawe gando nuyise mítọn lẹ go. Sọn ojlẹ de mẹ jẹ devo mẹ, e gán nọ vẹawuna mí nado mọnukunnujẹ nue Ohó Jiwheyẹwhe tọn dọ de mẹ. Kavi Jehovah sọgan nọma na gblọndo odẹ̀ mítọn lẹ tọn to aliho he mẹ mí donukun te. Ehe gán zọ́n bọ mí na jẹ ayihaawe do ji. Eyin mí nọ dovọ́na ayihaawe he mí nọ do lẹ, yé gán dekanpona yise mítọn bo hẹn haṣinṣan mítọn hẹ Jehovah gble. (Jak. 1:7, 8) Podọ, yé tlẹ sọgan zọ́n bọ mí na hẹn todido sọgodo tọn mítọn bu.

¹⁵ Apọsteli Paulu yí todido sọgodo tọn mítọn jlẹdo húnsingàn de go. (Heb. 6:19) Húnsingàn de nọ hẹn tọjihun de dote to yujẹhọn de whenu, bo nọ glọnalina ẹn ma nado yì gbà do osé lẹ go. Amọ́, húnsingàn de nọ yọ́n-na-yizan kiki eyin gẹdẹ he yè yí do sìn in do tọjihun de go ma wẹ́n. Kẹdẹdile gẹdẹ he yè yí do sìn húnsingàn de ma na ló eyin e jẹkò do, mọ wẹ yise mítọn ma na lodo do niyẹn, eyin mí nọ do ayihaawe. To whenue mẹhe do ayihaawe de pehẹ nukundiọsọmẹ, e gán nọma sọ yise ba dọ Jehovah na hẹn opagbe etọn lẹ di. Eyin yise mítọn miọn, mí na hẹn todido mítọn bu ga. Dile Jakọbu dọ do, mẹe nọ do ayihaawe “tin taidi agbówhẹn ohù tọn he jẹhọn to hinhẹn dánpe bo to yigọyigọ-dona.” (Jak. 1:6) E họnwun dọ mẹe to ninọmẹ mọnkọ mẹ ma gán do ayajẹ gbede!

16. Etẹwẹ mí dona wà eyin mí do ayihaawe?

¹⁶ Pọngbọ lọ: Duto ayihaawe he a nọ do lẹ ji; hẹn yise towe lodo. Ma nọ to awuwhle mapote blo. To azán yẹwhegán Elija tọn lẹ gbè, omẹ Jehovah tọn lẹ do ayihaawe. Elija dọna yé dọmọ: “Nawẹ e na dẹnsọ bọ mìwlẹ na gbẹ́ to ayihaawe tindo? Eyin Jehovah wẹ Jiwheyẹwhe nugbo lọ, mì hodo e; amọ́ eyin Baali wẹ, mì bosọ hodo e!” (1 Ahọ. 18:21) Ehe sọ yin nugbo to egbehe. Mí dona bayi dodinnanu nado hẹn ẹn họnwun na míde dọ Jehovah wẹ Jiwheyẹwhe, dọ Biblu wẹ Ohó etọn, podọ dọ Kunnudetọ Jehovah tọn lẹ wẹ omẹ etọn lẹ. (1 Tẹs. 5:21) Mọwiwà na de ayihaawe he mí nọ do lẹ sẹ̀ bosọ hẹn yise mítọn lodo. Eyin mí do hudo alọgọ tọn nado duto ayihaawe mítọn lẹ ji, mí gán dọna mẹho lẹ. Mí dona yinuwa po nujikudo po nado hẹn ayajẹ mítọn go to sinsẹ̀nzọn Jehovah tọn mẹ!

17. Etẹwẹ gán jọ eyin mí masọ do adọgbigbo ba?

¹⁷ Nuhahun lọ: Gbigbọjọ. Biblu dọ dọ: “Eyin hiẹ gbọjọ to azán ayimajai tọn gbè, huhlọn towe ma na sọtẹ́n.” (Howh. 24:10) Hogbe Heblugbe  tọn he yin lilẹdo “gbọjọ” gán zẹẹmẹdo “nado hẹn adọgbigbo bu.” Eyin a masọ do adọgbigbo ba, a ma nasọ do ayajẹ ba.

18. Etẹwẹ e zẹẹmẹdo nado doakọnnanu?

¹⁸ Nọ ganjẹ Jehovah go nado mọ adọgbigbo he a nado doakọnnanu. Mí do hudo adọgbigbo tọn nado doakọnna whlepọn lẹ. (Jak. 5:11) Hogbe he Jakọbu yizan na “akọndonanu” bẹ linlẹn mẹhe nọte gligli masẹafọ to otẹn etọn mẹ tọn hẹn. Mí gán lẹnnupọndo awhànfuntọ de ji he yí adọgbigbo do nọte gligli pannukọn kẹntọ lẹ, bo gbẹ́ ma nado sẹtẹn mahopọnna lehe mẹgbeyinyan lọ sinyẹn sọ.

19. Etẹwẹ mí gán plọn sọn apajlẹ apọsteli Paulu tọn mẹ?

¹⁹ Apọsteli Paulu ze apajlẹ ayidego tọn de dai na nuhe dù adọgbigbo po akọndidonanu po. To whedelẹnu, ewọ yin madogánnọ. Amọ́ e doakọnnanu, na e ganjẹ Jehovah go nado mọ huhlọn he sin hudo e do yí. (2 Kọl. 12:8-10; Flp. 4:13) Mí gán mọ huhlọn po adọgbigbo dopolọ po yí, eyin mí yí whiwhẹ do kẹalọyi dọ mí do hudo alọgọ Jehovah tọn.—Jak. 4:10.

20, 21. Nujikudo tẹwẹ mí gán do?

²⁰ Mí gán kudeji dọ whlepọn he mí nọ pehẹ lẹ ma yin yasanamẹ sọn Jehovah dè. Jakọbu hẹn mí deji dọ: “To whenuena mẹde tin to whlepọn glọ, mì dike e dọ dọ: ‘Jiwheyẹwhe wẹ to whiwhle mi pọ́n’ blo. Na Jiwheyẹwhe ma sọgan yin whiwhlepọn po nuylankan lẹ po, mọjanwẹ ewọ lọsu ma nọ whlé mẹdepope pọ́n to aliho enẹ mẹ.” (Jak. 1:13) To whenue mí do nujikudo enẹ, mí nọ dọnsẹpọ Otọ́ owanyinọ olọn mẹ tọn mítọn dogọ.—Jak. 4:8.

²¹ Jehovah “ma nọ diọ.” (Jak. 1:17) E nọgodona Klistiani owhe kanweko tintan whenu tọn lẹ to whlepọn yetọn lẹ mẹ, podọ e nasọ wà nudopolọ na mílọsu ga. Nọ biọ alọgọ Jehovah tọn vẹkuvẹku nado mọ nuyọnẹn, yise po adọgbigbo po. E na na gblọndo odẹ̀ towe lẹ tọn. To whenẹnu, a gán kudeji dọ e na gọalọna we nado hẹn ayajẹ towe go dile a to akọndona whlepọn lẹ!