HOSỌ OPLỌN TỌN 7
OHÀN 15 Mì Pà Plọnji Jehovah Tọn!
Jonamẹ Jehovah Tọn—Nuhe E Zẹẹmẹdo Na We
“Dè we wẹ jona nugbo tin te.”—SALM. 130:4.
NUHE E BẸHẸN
Eyin mí gbadopọnna nuyijlẹdonugo ojlofọndotenamẹ tọn he to Biblu mẹ delẹ, e na gọalọna mí nado hẹn pinpẹn nutọn mítọn na jona nugbo he Jehovah nọ dohia dopodopo mítọn siso dogọ.
1. Naegbọn e gán vẹawu nado yọ́n obá he mẹ gbẹtọvi lẹ nọ jonamẹ jẹ?
“N’KO JONA WE.” Lehe hogbe ehelẹ gán fakọnamẹ do sọ titengbe eyin a yọnẹn dọ emi dọ kavi wà nude he gbleawuna mẹde! Amọ́ etẹwẹ hodidọ lọ “n’ko jona we” zẹẹmẹdo na taun tọn? Be didọ mẹhe a gbleawuna lọ te dọ họntọnjiji mìtọn ko gọ̀ jẹ lehe e te do dai petepete ya? Kavi didọ e te poun dọ emi ma jlo na dọhodo whẹho lọ ji ba? E gán vẹawu nado yọ́n obá he mẹ gbẹtọvi lẹ nọ jonamẹ jẹ.
2. Nawẹ jonamẹ Jehovah tọn yin zẹẹmẹ basina to Owe-wiwe lẹ mẹ gbọn? (Sọ pọ́n nudọnamẹ odò tọn.)
2 Aliho he mẹ Jehovah nọ jona míwu gbẹtọvi mapenọ lẹ te gbọnvo taun na lehe mí nọ jona ode awetọ do. Jonamẹ Jehovah tọn ma pé awe. Salmu-kantọ lọ dọ gando Jehovah go dọ: “Dè we wẹ jona nugbo tin te, na gbẹtọ lẹ nido nọ dibusi we.” a (Salm. 130:4) Mọwẹ, jonamẹ Jehovah tọn wẹ “jona nugbo.” Ewọ ze nujinọtedo he yiaga hugan lẹ dai gando nuhe jonamẹ zẹẹmẹdo nugbonugbo go. To ninọmẹ delẹ mẹ, Biblu-kantọ lẹ yí hogbe Heblugbe tọn de na jonamẹ zan ehe ma yin yiyizan pọ́n gbede nado dlẹnalọdo jonamẹ gbẹtọvi tọn.
3. Nawẹ jonamẹ Jehovah tọn gbọnvona mítọn gbọn? (Isaia 55:6, 7)
3 Eyin Jehovah jona mẹde, ylando omẹ enẹ tọn nọ yin súnsúnsún sẹ̀ petepete. Haṣinṣan he gble lọ sọ nọ gọjẹ otẹn etọn mẹ mlẹnmlẹn. Mí nọ yọ́n pinpẹn etọn taun dọ Jehovah nọ jona mí whlasusu podọ mlẹnmlẹn.—Hia Isaia 55:6, 7.
4. Nawẹ Jehovah gọalọna mí nado mọnukunnujẹ jonamẹ nugbo mẹ gbọn?
4 Eyin jonamẹ Jehovah tọn gbọnvona mítọn, nawẹ míwu gbẹtọvi mapenọ lẹ gán mọnukunnujẹ nuhe jonamẹ nugbo yin mẹ gbọn? Jehovah yí nuyijlẹdonugo he fọnjlodotenamẹ bosọ basi zẹẹmẹ jonamẹ etọn tọn lẹ zan nado gọalọna mí. To hosọ ehe mẹ, mí na gbadopọnna delẹ to yé mẹ. Yé na dohia mí lehe Jehovah de ylando sẹ̀ bosọ gọ̀ haṣinṣan he ylando ko hẹngble lẹ jlado to ojlẹ dopolọ mẹ do. Dile mí to dogbapọnna apajlẹ ehelẹ, mí na hẹn pinpẹn nutọn mítọn na Otọ́ owanyinọ mítọn siso deji, yèdọ mẹhe do jonamẹ etọn hia to aliho susu tlala mẹ.
JEHOVAH NỌ DE YLANDO SẸ̀
5. Etẹwẹ nọ jọ eyin Jehovah jona ylando mítọn lẹ?
5 To Biblu mẹ, ylando lẹ nọ saba yin yiyijlẹdo agbàn pinpẹn lẹ go. Ahọlu Davidi basi zẹẹmẹ ylando etọn lẹ tọn to aliho ehe mẹ: “Nuṣiwa ṣie lẹ ko ṣinyọ́n ota na mi pete; yé hú agbọ́ mi taidi agbàn pinpẹn tlala de.” (Salm. 38:4) Amọ́ Jehovah nọ jona ylando ylanwatọ he lẹnvọjọ lẹ tọn lẹ. (Salm. 25:18; 32:5) Hogbe Heblugbe tọn lọ he yin lilẹ́ do “jona” zẹẹmẹdo nado ‘ze daga’ kavi nado ‘ze.’ Mí gán pọ́n Jehovah hlan taidi dawe huhlọnnọ de he ze agbàn ylando mítọn lẹ tọn sọn abọ́ ji na mí bosọ ze yé yì olá.
‘Jona’ (Salm. 32:5)
6. Nawẹ fie Jehovah nọ ze ylando mítọn lẹ yì dẹn sọ?
6 Nuyijlẹdonugo devo do lehe Jehovah nọ ze ylando mítọn lẹ dẹn do mí do sọ hia. Salmu lẹ 103:12 dọna mí dọ: “Dile whèzẹtẹn dẹn do whèyihọ do, mọ wẹ ewọ hẹn sẹ́nhẹngba mítọn lẹ dẹn do mí do.” Whèzẹtẹn wẹ dẹn do whèyihọ hugan. Ofi awe ehelẹ ma gán dukosọ na yede pọ́n gbede. To hogbe devo mẹ, Jehovah nọ ze ylando mítọn lẹ dẹn do mí hugan nuhe mí gán lẹn. Aliho he vọ́ jidenamẹ nankọ die nado basi zẹẹmẹ jonamẹ etọn tọn!
“Dile whèzẹtẹn dẹn do whèyihọ do” (Salm. 103:12)
7. Nawẹ Biblu basi zẹẹmẹ nuhe Jehovah nọ yí ylando mítọn lẹ do wà tọn gbọn? (Mika 7:18, 19)
7 Dile etlẹ yindọ Jehovah nọ ze ylando mítọn lẹ dẹn do mí to yẹhiadonu-liho, be e gbẹ́ nọ hẹn yé go wẹ ya? Paali. Ahọlu Hẹzekia dọ gando Jehovah go dọmọ: “Hiẹ ko bẹ ylando ṣie lẹpo dlan godo towe.” Kavi sọgbe hẹ nudọnamẹ odò tọn lọ, “hiẹ ko de ylando ṣie lẹpo sẹ̀ sọn nukọn towe.” (Isa. 38:9, 17; Odò.) Nuyijlẹdonugo ehe dohia dọ Jehovah nọ bẹ ylando mẹhe lẹnvọjọ lẹ tọn dlan sọn nukọn etọn. Hodidọ ehe gán sọ yin didọ to aliho ehe mẹ: “Hiẹ ko de [ylando ṣie lẹ] sẹ̀ taidi dọ yé ma ko jọ nkọtọn.” Biblu sọ zinnudo nuagokun ehe ji po nuyijlẹdonugo devo he to Mika 7:18, 19 mẹ po. (Hia.) To finẹ, e yin didọ gando Jehovah go dọ e nọ bẹ ylando mítọn lẹ dlan hùzànmẹ. To hohowhenu, e ma nọ yọnbasi na mẹde nado gọ̀ nuhe ko yin zizedlan hùzànmẹ de mọ.
“Hiẹ ko bẹ ylando ṣie lẹpo dlan godo towe” (Isa. 38:17)
“Hiẹ na bẹ ylando yetọn lẹpo dlan hùzànmẹ” (Mika 7:19)
8. Etẹwẹ mí ko plọn kakajẹ din?
8 Gbọn nuyijlẹdonugo ehelẹ gblamẹ, mí plọn dọ eyin Jehovah jona mí, e nọ de agbàn ylando tọn mítọn lẹ sọn mí ji. Na nugbo tọn dile Davidi dọ do, “ayajẹnọ wẹ mẹhe walọ sẹ́nhẹngba tọn yetọn lẹ ko yin jijona yé bọ ylando yetọn lẹ ko yin nuṣinyọndo; ayajẹnọ wẹ mẹhe Jehovah ma na hia ylando etọn dokọna to aliho depope mẹ.” (Lom. 4:7, 8) Jonamẹ nugbo niyẹn!
JEHOVAH NỌ SÚNSÚN YLANDO SẸ̀
9. Nuyijlẹdonugo tẹwẹ Jehovah yizan nado basi zẹẹmẹ obá he mẹ jonamẹ etọn gbloada jẹ tọn?
9 Jehovah yí nuyijlẹdonugo devo zan nado gọalọna mí nado yọ́n pinpẹn lehe ewọ nọ súnsún ylando mẹhe lẹnvọjọ lẹ tọn sẹ̀ gbọn avọ́sinsan ofligọ lọ tọn gblamẹ do tọn. To yẹhiadonu-liho, e yin didọ gando Jehovah go dọ ewọ nọ klọ́ ylando ehelẹ sẹ̀. Ehe nọ zọ́n bọ ylandonọ lọ nọ yin kiklọ́we. (Salm. 51:7; Isa. 4:4; Jel. 33:8) Jehovah lọsu basi zẹẹmẹ kọdetọn afọdide ehe tọn dọmọ: “Dile etlẹ yindọ ylando mìtọn lẹ divẹẹ ṣẹ́ṣẹ́, yé na yin hinhẹn zun wewe di osin-agó; dile etlẹ yindọ yé bia di ahóvọ̀, yé na wé di sekanfun.” (Isa. 1:18) E nọ vẹawu taun nado de sinmẹ vẹẹ kavi ahó sọn avọ̀ de mẹ. Amọ́ po nuyijlẹdonugo ehe po, Jehovah hẹn mí deji dọ ylando mítọn lẹ gán yin kiklọ́ sẹ̀ mlẹnmlẹn sọmọ bọ yé ma nasọ yin mimọ ba.
“Dile etlẹ yindọ ylando mìtọn lẹ divẹẹ ṣẹ́ṣẹ́, yé na yin hinhẹn zun wewe di osin-agó” (Isa. 1:18)
10. Nuyijlẹdonugo devo tẹwẹ Jehovah yizan nado do obá he mẹ jonamẹ etọn yiaga jẹ hia?
10 Dile mí dọ do to hosọ he wayi mẹ, ylando lẹ sọ nọ yin yiyijlẹdo “ahọ́” lẹ go. (Mat. 6:12; Luku 11:4) Enẹwutu, whedepopenu he mí waylando do Jehovah, e nọ taidi dọ mí to míde tlọ do ahọ́ mẹ dogọ wẹ nkọ. Mí duahọ daho de do e! Amọ́ eyin Jehovah jona mí, e nọ taidi dọ e zẹhudo ahọ́ he mí dù lọ ji wẹ nkọ. Ewọ ma nọ biọ dọ yè ni suahọ ylando he e ko jonamẹ lẹ tọn. Nuyijlẹdonugo he fakọnamẹ nankọ die nado basi zẹẹmẹ lehe agbọ́ mítọn nọ jẹdò do tọn whenue Jehovah jona mí!
“Jo ahọ́ mítọn lẹ na mí” (Mat. 6:12)
11. Etẹ na dọ wẹ Biblu te whenue e dọ dọ ylando mítọn lẹ nọ yin ‘súnsúnsún sẹ̀’? (Owalọ lẹ 3:19)
11 Jehovah ma nọ zẹhudo ahọ́ kavi ylando mítọn lẹ ji poun, amọ́ e sọ nọ súnsún yé sẹ̀. (Hia Owalọ lẹ 3:19.) Mí ni dọ dọ mẹde zẹhù gbọn sọha akuẹ he a dù do e de tọn ji. Ahọ́ lọ gán gbẹ́ yin mimọ mahopọnna ohù lọ. Amọ́ nado súnsún nude sẹ̀ gbọnvo taun. Nado mọnukunnujẹ nuyijlẹdonugo ehe mẹ, mí dona flindọ to hohowhenu akán, gọmu po osin po wẹ nọ yin ṣiṣakadopọ nado wleawuna wesin he nọ saba yin yiyizan. Mẹde gán yí tekan fifá de do súnsún nuhe yin kinkan lọ sẹ̀. Enẹwutu, whenue ahọ́ de yin ‘súnsúnsún sẹ̀,’ e nọ wayi pete. Ohia nuhe yin kinkandai lọ tọn depope ma gán sọ yin mimọ ba. E nọ taidi dọ kandai lọ ma tin pọ́n wẹ nkọ. Lehe homẹ mítọn nọ hùn do sọ nado yọnẹn dọ e ma yindọ Jehovah nọ zẹhudo ylando mítọn lẹ ji kẹdẹ wẹ gba, amọ́ e sọ nọ súnsún yé sẹ̀ mlẹnmlẹn!—Salm. 51:9.
“Na yè nido súnsún ylando mìtọn lẹ sẹ̀” (Owalọ 3:19)
12. Etẹwẹ nuyijlẹdonugo he gando aslọ titli de go zẹẹmẹdo na mí?
12 Jehovah yí nuyijlẹdonugo mọnkọ de zan nado basi zẹẹmẹ lehe e nọ súnsún ylando lẹ sẹ̀ do tọn. E dọmọ: “Yẹn na súnsún sẹ́nhẹngba towe lẹ sẹ̀ taidi po aslọ de po bo na súnsún ylando towe lẹ sẹ̀ taidi po aslọ titli de po.” (Isa. 44:22) Eyin Jehovah jonamẹ, e nọ taidi dọ e yí aslọ titli de do ṣinyọnnudo sẹ́nhẹngba mítọn lẹ na yé nido busẹ sọn nukun ji petepete wẹ nkọ.
“Yẹn na súnsún sẹ́nhẹngba towe lẹ sẹ̀ taidi po aslọ de po” (Isa. 44:22)
13. Eyin Jehovah jo ylando mítọn lẹ na mí, nawẹ e nọ ṣí na mí?
13 Etẹwẹ ehe zẹẹmẹdo na mí? Eyin Jehovah jo ylando mítọn lẹ na mí, mí ma dona nọ do numọtolanmẹ whẹhuhu tọn gando ylando enẹlẹ go na pipotọ gbẹzan mítọn tọn. Gbọn ohùn Jesu Klisti tọn gblamẹ, ahọ́ mítọn lẹ ko yin hùzẹdeji mlẹnmlẹn. Kandai ahọ́ enẹlẹ tọn lọsu ma tlẹ gán yin mimọ ba. Nuhe jonamẹ nugbo he wá sọn Jehovah dè nọ zẹẹmẹdo na mí niyẹn eyin mí lẹnvọjọ sọn ylando mítọn lẹ mẹ.
JEHOVAH KẸALỌYI MÍ WHLADOPO DOGỌ TAIDI HỌNTỌN
Jonamẹ he Otọ́ olọn mẹ tọn mítọn dohia nọ na mí dotẹnmẹ nado tindo haṣinṣan dagbe de hẹ ewọ (Pọ́n hukan 14tọ)
14. Naegbọn mí gán dejido jonamẹ Jehovah tọn go? (Sọ pọ́n yẹdide lọ lẹ.)
14 Jona nugbo he nọ wá sọn Jehovah dè nọ hùn dotẹnmẹ dote na mí nado tindo haṣinṣan dagbe de hẹ ewọ. E nọ gọalọna mí nado dapana numọtolanmẹ whẹhuhu tọn tintindo zẹjlẹgo. Mí ma dona dibu dọ Jehovah nọ hẹn mí do homẹ bo nọ to aliho de dín nado sayana mí. Enẹ ma gán jọ pọ́n gbedegbede. Naegbọn mí gán dejido Jehovah go eyin e dọ dọ emi jona mí? Yẹwhegán Jelemia yihodọ sọn nuhe Jehovah dọ mẹ bo dọmọ: “Yẹn na jona nuṣiwa yetọn, yẹn ma nasọ flin ylando yetọn ba.” (Jel. 31:34) Whenue apọsteli Paulu to alọdlẹndo hogbe ehelẹ, e yí hodidọ mọnkọ de zan bo dọmọ: “Yẹn ma nasọ flin ylando yetọn lẹ ba.” (Heb. 8:12) Amọ́, etẹwẹ enẹ zẹẹmẹdo na taun tọn?
“Yẹn ma nasọ flin ylando yetọn ba” (Jel. 31:34)
15. Linlẹn tẹ mẹ wẹ Jehovah masọ nọ flin ylando mítọn lẹ te ba?
15 To Biblu mẹ, hogbe lọ “flin” ma nọ zẹẹmẹdo to whelẹponu dọ mẹde to nulẹnpọn do nuhe ko jọ wayi de ji. Kakatimọ, e gán zẹẹmẹdo dọ mẹde ni yinuwa. Dopo to sẹ́nhẹngbatọ he yin whiwhè do núgo to apá na Jesu lẹ mẹ basi obiọ ehe: “Jesu, flin mi whenue hiẹ na biọ Ahọluduta towe mẹ.” (Luku 23:42, 43) E ma to bibiọ poun dọ Jesu ni flin emi to ojlẹ enẹ mẹ gba. Gblọndo Jesu tọn dohia dọ ewọ na yinuwa nado fọ́n sẹ́nhẹngbatọ ehe sọnku. Enẹwutu to whelọnu lo, eyin Jehovah dọ dọ emi masọ flin ylando mítọn lẹ ba, nuhe dọ e te wẹ yindọ emi ma na yinuwa hẹ mí sọgbe hẹ ylando enẹlẹ. E ma na sayana mí to nukọn mẹ na ylando he e ko jona mí lẹ.
16. Nawẹ Biblu basi zẹẹmẹ tundote he jona nugbo nọ hẹnwa tọn gbọn?
16 Biblu yí nuyijlẹdonugo devo zan nado gọalọna mí nado mọnukunnujẹ tundote he nọ wá sọn jona nugbo mẹ lọ mẹ. Na ninọmẹ po ayilinlẹn ylando tọn mítọn po wutu, mí taidi “afanumẹ na ylando.” Amọ́ na jonamẹ Jehovah tọn wutu, mí taidi afanumẹ he ko yin “tuntundote sọn ylando mẹ.” (Lom. 6:17, 18; Osọ. 1:5) Mọwẹ, jonamẹ Jehovah tọn nọ hẹn mí tindo numọtolanmẹ awuvivi tọn lọ dọ mí ko yin tuntundote sọn kanlinmọgbenu.
“Mìwlẹ ko yin tuntundote sọn ylando mẹ” (Lom. 6:18)
17. Nawẹ jonamẹ nọ dekọtọn do azọ̀nhẹngbọ mẹ gbọn? (Isaia 53:5)
17 Hia Isaia 53:5. To nuyijlẹdonugo godo tọn he ji mí na dọhodo lọ mẹ, mí yin yiyijlẹdo mẹhe to azọ̀n ylankan de jẹ go. Na avọ́sinsan ofligọ lọ tọn he Jehovah wleawuna gbọn Visunnu etọn gblamẹ wutu, e yin didọ gando mí go to yẹhiadonu-liho dọ mí yin azọ̀nhẹngbọna. (1 Pita 2:24) Ofligọ lọ vọ́ haṣinṣan mítọn hẹ Jehovah he ko yin hinhẹngble gbọn azọ̀n gbigbọmẹ tọn dali lọ jlado mlẹnmlẹn. Kẹdẹdile mẹhe yin azọ̀nhẹngbọna sọn azọ̀n sinsinyẹn de mẹ nọ jaya taun do, mílọsu nọ jaya eyin mí yin azọ̀nhẹngbọna to gbigbọ-liho bosọ gọ̀ nukundagbe etọn mọyi na ewọ jona mí wutu.
“Awugble etọn lẹ wutu wẹ míwlẹ do yin azọ̀nhẹngbọna” (Isa. 53:5)
NUHE JONAMẸ JEHOVAH TỌN ZẸẸMẸDO NA MÍ
18. Etẹwẹ mí ko plọn to whenue mí gbadopọnna nuyijlẹdonugo Biblu tọn voovo he dọhodo jonamẹ Jehovah tọn ji lẹ godo? (Sọ pọ́n apotin lọ “Lehe Jehovah Nọ Jona Mí Do.”)
18 Etẹwẹ mí ko plọn to whenue mí gbadopọnna nuyijlẹdonugo Biblu tọn he dọhodo jonamẹ Jehovah tọn ji lẹ godo? Eyin ewọ jonamẹ e nọ wàmọ mlẹnmlẹn, podọ kakadoi. Ehe nọ zọ́n bọ mí nọ tindo haṣinṣan dagbe de hẹ Otọ́ olọn mẹ tọn mítọn. To ojlẹ dopolọ mẹ, mí nọ flindọ nunina de wẹ jona nugbo yin. Owanyi Jehovah tọn po nukundagbe majẹhẹ etọn he e nọ dohia gbẹtọvi ylandonọ lẹ po wẹ nọ hẹn ẹn yọnbasi. E ma yin jlọjẹ de he gbẹtọvi lẹ gán biọ.—Lom. 3:24.
19. (a) Etẹ sin pinpẹn wẹ mí dona yọnẹn? (Lomunu lẹ 4:8) (b) Etẹ ji wẹ mí na dọhodo to hosọ he bọdego mẹ?
19 Hia Lomunu lẹ 4:8. Lehe dopodopo mítọn dona yọ́n pinpẹn etọn dọ Jehovah yin Jiwheyẹwhe he nọ do “jona nugbo” hia do sọ! (Salm. 130:4) Amọ́ eyin mí na mọ jonamẹ yí, enẹ nọ sinai do onú titengbe de ji. Jesu dọmọ: “Eyin mì ma jo sẹ́nmẹjijẹ gbẹtọ lẹ tọn na yé, mọdopolọ Otọ́ mìtọn olọn tọn ma na jo sẹ́nmẹjijẹ mìtọn lẹ na mì.” (Mat. 6:14, 15) Eyin mọ wẹ, e họnwun dọ nujọnu wẹ e yin dọ mí ni hodo apajlẹ jonamẹ tọn Jehovah tọn. Amọ́, nawẹ mí gán wàmọ gbọn? Hosọ mítọn he bọdego na do nuhe enẹ bẹhẹn hia mí.
OHÀN 46 Mí Dopẹna We, Jehovah
a Hodidọ dowhenu tọn Heblugbe tọn de yí hogbe lọ “jona lọ” zan ehe dohia dọ ehe wẹ yin jona nugbo dopo lọ, dile etlẹ yindọ jona wunmẹ devo lẹ tin. Lẹdogbedevomẹ Biblu tọn susu ma do vogbingbọn titengbe ehe hia, amọ́ Owe-Wiwe lẹ—Lẹdogbedevomẹ Aihọn Yọyọ Tọn wàmọ, ehe zọ́n bọ nuhe to Salmu lẹ 130:4 mẹ gbọnvona nuhe to lẹdogbedevomẹ diẹ lẹ mẹ.
