Mary po asu etọn John a po nọ nọ̀ awà aihọn lọ tọn de ji fie wẹndagbe lọ gán yin lilá na azọ́nwatọ jonọ susu he wá sọn Philippines lẹ te. To azọ̀n bẹplamẹ COVID-19 tọn whenu, Mary penugo bo bẹ plọnmẹ Biblu lẹ jẹeji e ma yin to otò he mẹ e nọ nọ̀ kẹdẹ, amọ́ to awà aihọn lọ tọn devo lẹ ji ga. Nawẹ e pà ẹ gbọn?

Mary nọ kanse Biblu plọntọ etọn lẹ dọ, “Be a yọ́n mẹdelẹ he jlo na plọn Biblu ya?” Eyin yé dọ mọwẹ, e nọ biọ to yé si nado do emi hia yé. Kanbiọ kleun ehe kinkanse nọ saba do kọdetọn dagbe. Etẹwutu? Na mẹhe yiwanna Ohó Jiwheyẹwhe tọn lẹ nọ jlo na má nuhe yé plọn lẹ hẹ hagbẹ whẹndo tọn gọna họntọn he sin onú nọ duahunmẹna yé lẹ. Kọdetọn tẹwẹ kanbiọ ehe kinkanse ko hẹnwa?

Biblu plọntọ Mary tọn de he nọ yin Jasmin do omẹ ẹnẹ devo he jlo na plọn Biblu lẹ hia Mary. Kristine he yin dopo to yé mẹ duvivi nupinplọn etọn tọn sọmọ bọ e biọ to Mary si nado nọ plọnnu hẹ ẹ whla awe to osẹ dopodopo mẹ. Whenue Mary kanse e eyin e yọ́n mẹdelẹ he jlo na plọn Biblu, Kristine dọmọ, “Gbau, n’na do họntọn ṣie lẹ hia we.” To osẹ kleun delẹ gblamẹ, Kristine do Mary hia họntọn etọn ẹnẹ delẹ he jlo na plọnnu. To nukọn mẹ, Kristine do Mary hia họntọn etọn devo lẹ, bọ delẹ to yé mẹ sọ do e hia mẹdevo lẹ.

Kristine sọ jlo dọ whẹndo emitọn he to Philippines ni plọn Biblu. Enẹwutu, e dọho gandego na viyọnnu etọn Andrea. To tintan whenu, Andrea nọ lẹndọ ‘Kunnudetọ lẹ yin sinsẹ̀n klandovo de, yé ma yise to Jesu mẹ, podọ dọ Alẹnu Hoho lọ kẹdẹ wẹ yé nọ zan.’ Amọ́ to nupinplọn dopo poun godo, pọndohlan agọ̀ etọn diọ. To oplọn etọn lẹ whenu, e nọ dọ dọ “Eyin Biblu janwẹ dọ, be nugbo wẹ!”

To nukọn mẹ, Andrea do Mary hia họntọn etọn lẹ gọna azọ́nwatọgbẹ́ de he bẹ nupinplọn jẹeji. Podọ, Mary ma yọnẹn dọ tanyin Andrea tọn Angela he yin nukuntọ́nnọ nọ to todoaina nupinplọn yetọn. Enẹgodo to gbèdopo, Angela biọ to Andrea si nado do emi hia Mary, podọ ewọ lọsu biọ nado plọn Biblu. Angela yiwanna nuhe plọn e te. To osun dopo gblamẹ, e hẹn wefọ susu lẹ do tamẹ bosọ jlo nado nọ plọnnu whla ẹnẹ to sẹmẹsẹmẹ! Po alọgọ Andrea tọn po, Angela jẹ opli lẹ hodo ji to gbesisọ mẹ gbọn nuyizan hodọdopọ video ji tọn gblamẹ.

Whenue Mary sè dọ asu Kristine tọn Joshua ma nọ dẹn do yé eyin e to nuplọn hẹ Kristine,  Mary kanse e eyin e na jlo nado hopódona yé. Joshua dọmọ, “N’na dotoai poun wẹ, amọ́ ma kàn kanbiọ depope sè mi blo; eyin e ma yinmọ, n’na tọ́n sọn oplọn lọ tẹnmẹ.” To nukunwhiwhe atọ́n tintan nupinplọn lọ tọn lẹ gblamẹ, e kàn kanbiọ sè hugan lehe Kristine nọ wà do bosọ jlo na zindonukọn to hodọdopọ sinai do Biblu ji lọ mẹ.

Kanbiọ kleun he Mary nọ kanse dekọtọn do plọnmẹ Biblu susu lẹ mẹ. Enẹwutu, e basi tito bọ kunnudetọ hatọ lẹ nọ penukundo oplọn susu to yé mẹ tọn go. To bladopọ mẹ, Mary bẹ plọnmẹ Biblu 28 jẹeji to otò voovo ẹnẹ mẹ.

Jasmin, Biblu plọntọ tintan he go mí donù to numimọ ehe mẹ yí baptẹm to avril 2021. Kristine yí baptẹm to mai 2022 bo lẹkọyi Philippines nado nọpọ́ hẹ whẹndo etọn. Nuplọntọ awe devo lẹ yí baptẹm ga to mẹhe Kristine dohia Mary lẹ mẹ. Angela yí baptẹm to osun delẹ godo, podọ e to sinsẹ̀n todin taidi gbehosọnalitọ whepoponu tọn. Asu Kristine tọn, Joshua po viyọnnu yetọn Andrea po gọna nuplọntọ susu devo lẹ to nukọnyiyi basi taun.

To owhe kanweko tintan whenu, wẹndagbe lọ yawu gbayipe to hagbẹ whẹndo tọn po họntọn lẹ po ṣẹnṣẹn. (Joh. 1:41, 42a; Owalọ 10:24, 27, 48; 16:25-33) Naegbọn a ma na nọ kanse Biblu plọntọ towe lẹ po jlodotọ devo lẹ po dọ, “Be mì yọ́n mẹdevo de he na jlo nado plọn Biblu ya?” Mẹnu wẹ yọ́n plọnmẹ Biblu sọha he gán bẹjẹeji po kanbiọ kleun he mẹdepope gán kanse ehe po?