1, 2. Etẹwẹ angẹli de dọna yọnnu lọ lẹ to yọdò Jesu tọn kọ̀n, podọ anademẹ tẹwẹ Jesu lọsu na yé?

AFỌNNU fuu wẹ, to nisan 16, owhe 33 W.M. Pipli yọnnu budisi Jiwheyẹwhe tọ́ lẹ tọn he gọ́ na awubla de dedo yọdò he mẹ oṣiọ Oklunọ Jesu Klisti tọn yin zizedo to azán awe die lọ kọ̀n. To whenue yé wá ṣiọditẹn lọ po linlẹn lọ po nado sá nuwhẹ́nkun lẹ po amisisa owán gblingblinnọ lẹ po na oṣiọ Jesu tọn, e paṣa yé nado mọ yọdò lọ to ovọ́! Angẹli de dọna devi lọ lẹ dọ Jesu ko yin finfọn sọn oṣiọ lẹ mẹ, bo yidogọ dọmọ: “E ko jẹnukọnna mì jei Galili. Finẹ wẹ mìwlẹ na mọ ẹn te.”—Mat. 28:1-7; Luku 23:56; 24:10.

² To whenue yọnnu lọ lẹ tlọ́n yọdò lọ kọ̀n, Jesu lọsu dọnsẹpọ yé bo na yé anademẹ ehe dọmọ: “Mì yì bo dọna mẹmẹsunnu ṣie lẹ, na yé nido yì Galili, podọ finẹ wẹ yé na mọ mi te.” (Mat. 28:10) Jesu dona ko tindo anademẹ titengbe delẹ na devi etọn lẹ, na opli ehe wẹ onú tintan he sin tito e basi to fọnsọnku etọn godo!

3, 4. Naegbọn mí sọgan dọ dọ gbedide he yin kinkandai to Matiu 28:19, 20 mẹ ma yin nina apọsteli lẹ kẹdẹ? (Pọ́n yẹdide he to wepa ji.)

³ Hia Matiu 28:16-20. To opli he Jesu basi tito etọn lọ tẹnmẹ, e zinnudo azọ́n titengbe he devi etọn lẹ na wà to owhe kanweko tintan whenu lọ ji, yèdọ azọ́n dopolọ he mí to wiwà to egbé. Jesu dọmọ: “Enẹwutu, mì yì bo hẹn gbẹtọ lẹ sọn akọta lẹpo mẹ zun devi lẹ, . . . bo nọ plọn yé nado payi nuhe yẹn ko degbe etọn na mì lẹpo go.”

⁴ Jesu jlo dọ hodotọ emitọn lẹpo ni nọ dọyẹwheho. E ma yin apọsteli nugbonọ 11 lẹ kẹdẹ wẹ e na gbedide ehe gba. Naegbọn  mí sọgan dọ mọ po jide po? Na taun tọn, be apọsteli etọn lẹ kẹdẹ wẹ tin to osó enẹ ji to Galili whenue gbedide lọ yin nina nado hẹn gbẹtọ lẹ zun devi ya? Flindọ angẹli lọ dọna yọnnu lọ lẹ dọmọ: “[Galili] wẹ mìwlẹ na mọ ẹn te.” Enẹwutu, yọnnu nugbonọ lọ lẹ lọsu dona ko tin to nujijọ enẹ tẹnmẹ. Ṣigba, e sọ pò mẹdevo lẹ. Apọsteli Paulu dehia dọ Jesu “sọawuhia nuhe hugan mẹmẹsunnu 500 to ojlẹ dopo mẹ.” (1 Kọl. 15:6) To fitẹ?

5. Etẹwẹ mí plọn sọn 1 Kọlintinu lẹ 15:6 mẹ?

⁵ Mí tindo whẹwhinwhẹ́n dagbe susu nado lẹndọ opli he yin bibasi to Galili, ehe go Matiu weta 28 donù lọ wẹ apọsteli Paulu tindo to linlẹn mẹ. Whẹwhinwhẹ́n tẹlẹ wẹ? Tintan, Galili wẹ suhugan devi Jesu tọn lẹ tọn wá sọn. Enẹwutu, e na sọgbe hẹ lẹnpọn dagbe hugan nado pli hẹ gbẹtọgun de do osó de ji to Galili, kakati nido yin owhé de gbè to Jelusalẹm. Awetọ, Jesu he yin finfọnsọnku lọ ko pli hẹ apọsteli 11 lẹ wayi do owhé de gbè to Jelusalẹm. Eyin Jesu jlo na na anademẹ apọsteli lẹ kẹdẹ nado dọyẹwheho bosọ hẹn gbẹtọ lẹ zun devi, e sọgan ko wàmọ to Jelusalẹm, kakati nado biọ to yewlẹ, yọnnu lẹ po mẹdevo lẹ po si nado wá pé emi do Galili.—Luku 24:33, 36.

6. Nawẹ Matiu 28:20 dohia dọ gbedide lọ nado hẹn gbẹtọ lẹ zun devi gando azán mítọn gbè go gbọn, podọ obá tẹ mẹ wẹ gbẹtọ lẹ to tonusena gbedide enẹ jẹ?

⁶ Doayi whẹwhinwhẹ́n titengbe atọ̀ntọ devo go. Gbedide Jesu tọn nado hẹn gbẹtọ lẹ zun devi ma nọte do Klistiani he nọgbẹ̀ to owhe kanweko tintan whenu lẹ kẹdẹ ji. Nawẹ mí wagbọn do yọnẹn? Jesu dotana anademẹ he e na hodotọ etọn lẹ po hogbe ehelẹ po: “Yẹn tin po mì po to azán lẹpo gbè kakajẹ vivọnu titonu lọ tọn.” (Mat. 28:20) Kẹdẹdile Jesu dọ do, to egbehe azọ́n gbẹtọ lẹ hinhẹn zun devi tọn lọ to nukọnyi taun. Lẹnnupọndo ehe ji! To owhe dopodopo mẹ, nudi gbẹtọ 300 000 wẹ nọ yí baptẹm bo nọ lẹzun Kunnudetọ Jehovah tọn, podọ devi Jesu Klisti tọn lẹ!

7. Etẹwẹ mí na gbadopọnna todin, podọ etẹwutu?

⁷ Mẹsusu wẹ nọ plọn Biblu bo nọ yinukọn jẹ baptẹm kọ̀n. Ṣigba, e taidi dọ mẹdelẹ he mí nọ plọn Biblu hẹ to gbesisọ mẹ nọ whleawu nado lẹzun devi. Yé nọ yiwanna oplọn lọ, amọ́ yé ma to nukọnyi nado jẹ baptẹm kọ̀n. Eyin a to anadena plọnmẹ Biblu de, mí kudeji dọ ojlo towe wẹ nado gọalọna nuplọntọ towe nado yí nuhe plọn e te lẹ do yizan mẹ, podọ nado lẹzun devi Klisti tọn de. Hosọ ehe na dọhodo lehe mí gán jẹ ahun nuplọntọ lọ tọn mẹ, gọna lehe mí sọgan gọalọna ẹn nado yinukọn to gbigbọ-liho do ji. Naegbọn e do yin nujọnu nado dọhodo whẹho ehe ji? Whẹwhinwhẹ́n lọ wẹ yindọ, nupinplọn lọ na wá jẹ fide bọ e gán biọ dọ mí ni basi dide eyin mí na zindonukọn to oplọn lọ mẹ kavi lala.

8. Naegbọn e sọgan yin avùnnukundiọsọmẹnu de nado jẹ ahun nuplọntọ lẹ tọn mẹ?

⁸ Ojlo Jehovah tọn wẹ yindọ gbẹtọ lẹ ni sẹ̀n emi, na yé yiwanna emi wutu. Enẹwutu, yanwle mítọn wẹ nado gọalọna nuplọntọ mítọn lẹ nado mọnukunnujẹemẹ dọ Jehovah nọ hò dopodopo yetọn tọn pọ́n sisosiso, podọ dọ e yiwanna yé taun. Mí nọ jlo na gọalọna yé nado mọ Jehovah taidi “otọ́ tọṣiọvi lẹ tọn podọ mẹhe nọ basi hihọ́na asuṣiọsi lẹ.” (Salm. 68:5) Eyin nuplọntọ towe lẹ wá mọnukunnujẹ owanyi he Jiwheyẹwhe tindo na yé mẹ, e yọnbasi dọ enẹ ni yinuwado yé ji sisosiso, podọ owanyi he yelọsu tindo na ẹn na jideji. E sọgan nọ vẹawuna nuplọntọ delẹ nado mọ Jehovah taidi Otọ́ owanyinọ de, na otọ́ jọnun yetọn ma do owanyi po mẹtọnhopọn po hia yé wutu. (2 Tim. 3:1, 3) Enẹwutu, dile a to anadena oplọn lọ, nọ zinnudo jẹhẹnu Jehovah tọn he dọnmẹdogo lẹ ji. Gọalọna nuplọntọ towe lẹ nado  mọnukunnujẹemẹ dọ Jiwheyẹwhe owanyinọ mítọn jlo dọ yé ni mọ ogbẹ̀ madopodo, podọ ewọ to gbesisọ mẹ nado gọalọna yé na enẹ nido pà yé. Nudevo tẹwẹ mí sọgan wà?

9, 10. Owe tẹlẹ wẹ mí dona yizan to whenue mí to anadena plọnmẹ Biblu lẹ, podọ naegbọn e dona yin owe enẹlẹ?

⁹ Nọ yí owe lọ lẹ “Etẹwẹ Biblu Sọgan Plọn Mí?” po “Hẹn Dewe Do Owanyi Jiwheyẹwhe Tọn Mẹ” po zan. Owe enẹlẹ yin awuwlena titengbe nado gọalọna mí nado jẹ ahun nuplọntọ mítọn lẹ tọn mẹ. Di apajlẹ, weta 1 owe lọ Plọn Mí tọn na gblọndo kanbiọ delẹ tọn taidi: Be Jiwheyẹwhe nọ hò mítọn pọ́n ya kavi kanylantọ de wẹ e yin?, Numọtolanmẹ tẹwẹ Jiwheyẹwhe nọ tindo eyin gbẹtọ lẹ to yaji?, Be hiẹ sọgan yin họntọn Jehovah tọn ya? Etẹwẹ lo na nuhe dù owe lọ Owanyi Jiwheyẹwhe Tọn? Owe enẹ na gọalọna nuplọntọ lọ nado yọ́n lehe nunọwhinnusẹ́n Biblu tọn lẹ yíyí-do-yizan mẹ sọgan hẹn gbẹzan etọn pọnte bosọ dọ̀n ẹn sẹpọ Jehovah dogọ do. Eyin a tlẹ ko plọn owe ehelẹ hẹ mẹdevo lẹ, nọ wleawu ganji na oplọn dopodopo bosọ nọ hẹn nuhudo tangan nuplọntọ lọ tọn lẹ do ayiha mẹ.

 ¹⁰ Ṣigba, mí ni dọ dọ nuplọntọ lọ do ojlo na hosọ de he yin dogbapọnna to owe de mẹ, he ma tin to Azọ́nwanu Mẹpinplọn tọn mítọn lẹ mẹ. Vlavo a sọgan na ẹn tuli nado hia owe enẹ na ede, na a nido sọgan zindonukọn nado deanana oplọn lọ to dopo to owe he yin nùdego wayi lẹ mẹ.

11. Whetẹnu wẹ mí dona jẹ dẹ̀ho ji to bẹjẹeji po vivọnu oplọn de tọn po, podọ nawẹ mí sọgan fọ́n whẹho enẹ dote gbọn?

¹¹ Nọ bẹ oplọn lọ jẹeji po odẹ̀ po. Nuhe nọ saba yọ́n hugan wẹ nado jẹ dẹ̀ho ji to bẹjẹeji po vivọnu oplọn de tọn po dile e sọgan yawu yọnbasi do, yèdọ to osẹ tintan lẹ gblamẹ, whenue mí ko jẹ oplọn gbesisọ tọn de basi ji godo. Mí dona gọalọna nuplọntọ lọ nado yọnẹn dọ gbigbọ Jiwheyẹwhe tọn kẹdẹ wẹ gán gọalọna mí nado mọnukunnujẹ Ohó Jiwheyẹwhe tọn mẹ. Mẹplọntọ delẹ nọ fọ́n whẹho odẹ̀ tọn dote gbọn Jakọbu 1:5 hihia dali, he dọmọ: “Eyin depope to mì mẹ gbọagba nuyọnẹn tọn, gbọ e ni nọ to bibiọ Jiwheyẹwhe zọnmii.” Enẹgodo, mẹplọntọ lọ nọ kanse nuplọntọ lọ dọ, “Nawẹ mí sọgan biọ nuyọnẹn Jiwheyẹwhe gbọn?” Nuplọntọ lọ sọgan kọngbedopọ dọ mí dona hodẹ̀ hlan Jiwheyẹwhe.

12. Nawẹ mí sọgan yí Salmu lẹ 139:2-4 zan gbọn nado gọalọna nuplọntọ de nado hẹn odẹ̀ etọn lẹ pọnte?

¹² Nọ plọn Biblu plọntọ towe lehe ewọ na nọ hodẹ̀ do. Vọ́ jide na ẹn dọ Jehovah nọ jlo na sè odẹ̀ ahundopo tọn etọn lẹ. Basi zẹẹmẹ na ẹn dọ to odẹ̀ mẹdetiti tọn mítọn lẹ mẹ, mí sọgan dọ nuhe to ahun ji na mí lẹ na Jehovah, yèdọ nudelẹ he mí sọgan whleawu nado dọna gbẹtọvi depope. To popolẹpo mẹ, Jehovah nọ yọ́n linlẹn he whlá to ahun mítọn mẹ lẹ. (Hia Salmu lẹ 139:2-4.) Mí sọgan sọ na tuli nuplọntọ mítọn nado nọ biọ alọgọ Jiwheyẹwhe tọn nado diọ ayilinlẹn agọ̀ etọn lẹ bosọ duto aṣa ylankan lẹ ji. Di apajlẹ, mí ni dọ dọ mẹhe ko to nuplọn na ojlẹ de yiwanna whedudu de he wá sọn aṣa kosi tọn lẹ mẹ. E yọnẹn dọ e ma sọgbe, ṣigba nugbo lọ wẹ yindọ ewọ yiwanna adà whedudu lọ tọn delẹ. Na ẹn tuli nado dọ numọtolanmẹ tangan etọn lẹ na Jehovah, podọ nado vẹ̀ Jiwheyẹwhe nado gọalọna ẹn nado yiwanna nuhe ewọ yiwanna lẹ kẹdẹ.—Salm. 97:10.

13. (a) Naegbọn mí dona nọ basi oylọna nuplọntọ mítọn lẹ wá opli lẹ dile e gán yawu yọnbasi do? (b) Nawẹ a sọgan gọalọna nuplọntọ de nado voawu dogọ to Plitẹnhọ Ahọluduta tọn mẹ gbọn?

¹³ Nọ basi oylọna nuplọntọ towe wá opli lẹ dile e gán yawu yọnbasi do. Nuhe nuplọntọ towe nọ sè bosọ nọ mọ to opli Klistiani tọn lẹ ji sọgan yinuwado ahun etọn ji bo gọalọna ẹn nado yinukọn. Do video lọ Etẹwẹ Nọ Jọ to Plitẹnhọ Ahọluduta Tọn? hia ẹ, bosọ yí zohunhun do basi oylọna ẹn nado nọ hodo we wá opli lẹ. Eyin e yọnbasi, a gán ze e wá kavi na ẹn húndokuẹ. Nudagbe wẹ e yin nado nọ biọ to wẹnlatọ voovo lẹ si nado plan we yì oplọn lọ tẹnmẹ. Gbọnmọ dali, nuplọntọ towe na jẹakọ hẹ mẹdevo lẹ to agun lọ mẹ, podọ enẹ sọgan zọ́n bọ e na voawu dogọ to whenue e wá opli lẹ.

14. Etẹwẹ sọgan whàn nuplọntọ de nado yinukọn to gbigbọ-liho?

¹⁴ Yanwle mítọn wẹ nado gọalọna Biblu plọntọ mítọn nado yinukọn to gbigbọ-liho. (Efe. 4:13) To whenue mẹde kẹalọyi nado plọn Biblu, e sọgan yindọ nuhe to ahunmẹduna ẹn hugan wẹ ale he e na mọyi sọn oplọn lọ mẹ. Ṣigba, dile owanyi etọn na Jehovah to jijideji, e sọgan jẹ nulẹnpọn ji do lehe ewọ gán gọalọna mẹdevo lẹ do ji, etlẹ yin mẹhe ko tin to agun lọ mẹ lẹ. (Mat. 22:37-39) To ojlẹ he sọgbe mẹ, ma whleawu nado donù lẹblanulọkẹyi lọ nado nọ nọgodona azọ́n Ahọluduta lọ tọn to akuẹzinzan-liho go blo.

15. Nawẹ mí sọgan gọalọna nuplọntọ de nado yinuwa to aliho dagbe mẹ gbọn to whenue nuhahun lẹ fọ́n?

 ¹⁵ Nọ plọn Biblu plọntọ towe nuhe e sọgan wà eyin nuhahun lẹ fọ́n. Di apajlẹ, mí ni dọ dọ nuplọntọ towe he yin wẹnlatọ he ma ko yí baptẹm de, dọna we dọ mẹde gbleawuna emi to agun lọ mẹ. Kakati nado yíwhẹ̀ do mẹde ji, naegbọn a ma na basi zẹẹmẹ afọdide sinai do Owe-wiwe ji he e sọgan ze lẹ tọn na ẹn? E sọgan jona mẹmẹsunnu lọ, kavi eyin e ma gán jo whẹho lọ do domọ poun, e sọgan yí homẹdagbe gọna owanyi do dọnsẹpọ ẹ po yanwle lọ po nado ‘duale mẹmẹsunnu lọ tọn.’ (Yijlẹdo Matiu 18:15 go.) Gọalọna nuplọntọ towe nado wleawuna nuhe e na dọ. Dohia ẹ lehe e gán yí azọ́nwanu lọ JW Library^®, Anademẹwe Dodinnanu Tọn, po jw.org^® po zan do nado mọ aliho yọ́n-na-yizan he mẹ e sọgan didẹ ninọmẹ lọ te lẹ. Lehe azọ́nplọnmẹ he e mọyi jẹnukọnna baptẹm lẹ sù sọ, mọ wẹ pọninọ hẹ mẹdevo lẹ to agun lọ mẹ na bọawuna ẹn dogọ to nukọn mẹ do niyẹn.

16. Ale tẹlẹ wẹ to e mẹ nado nọ basi oylọna wẹnlatọ devo lẹ wá oplọn lọ tẹnmẹ?

¹⁶ Nọ basi oylọna mẹdevo lẹ to agun lọ mẹ—gọna nugopọntọ lẹdo tọn to dlapọn etọn whenu—wá oplọn lọ tẹnmẹ. Etẹwutu? Gbọnvona whẹwhinwhẹ́n he yin nùdego to aga lẹ, wẹnlatọ devo lẹ sọgan na alọgọ de nuplọntọ towe, ehe hiẹ lọsu ma tin to otẹn dagbe mẹ hugan nado na ẹn. Di apajlẹ, mí ni dọ dọ nuplọntọ lọ ko dovivẹnu whlasusu nado jo azọ̀-nùnù do bọ e ma pà ẹ. Basi oylọna Kunnudetọ de—vlavo mẹde he wá duto aṣa mọnkọ ji to whenue e ko gboawupo whlasusu godo—nado hodo we sọyi oplọn lọ tẹnmẹ. Kunnudetọ hatọ towe enẹ sọgan penugo nado na ayinamẹ he yọ́n-na-yizan lẹ, ehe sin hudo nuplọntọ lọ tindo. Eyin a ma voawu nado deanana oplọn lọ to whenue mẹmẹsunnu numimọnọ de to finẹ, bo biọ to e si nado deanana oplọn lọ to gbenẹgbe. Depope he whẹho lọ yin, dike nuplọntọ lọ ni nọ mọaleyi sọn numimọ mẹdevo lẹ tọn mẹ. Flindọ, yanwle mítọn wẹ nado gọalọna nuplọntọ lọ nado yinukọn to gbigbọ-liho.

17, 18. Etẹlẹ ji wẹ a dona lẹnnupọndo whenue a to nudide basi eyin vlavo a dona doalọtena oplọn de?

¹⁷ Eyin nuplọntọ towe ma to nukọnyi, bọ e jẹ fie e na jẹ, e sọgan biọ dọ a ni kanse dewe dọ, ‘Be n’dona doalọtena oplọn lọ wẹ ya?’ To whenue a to ninọmẹ lọ gbeje pọ́n, a dona lẹnnupọndo nugopipe mẹlọ tọn ji. E nọ biọ whenu susu to mẹdelẹ si nado yinukọn hú lehe e nọ yindo na mẹdevo lẹ. Kanse dewe dọ: ‘Be nuplọntọ ṣie to nukọnyi dile e jẹ do sọgbe hẹ ninọmẹ etọn ya?’ ‘Be e ko jẹ ‘ayipa’ nuhe e to pinplọn lẹ go ji kavi to yé yido yizan mẹ ya?’ (Mat. 28:20) Nuplọntọ de sọgan yinukọn vudevude, ṣigba nukọnyiyi etọn dona yin to gbesisọ mẹ.

¹⁸ Bọ etẹwẹ lo, eyin mẹhe a ko to nuplọn hẹ na ojlẹ de ma dohia sọmọ dọ emi yọ́n pinpẹn oplọn lọ tọn? Lẹnnupọndo ninọmẹ ehe ji: Nuplọntọ towe ko fó owe lọ Plọn Mí, podọ vlavo e ko bẹ owe lọ Owanyi Jiwheyẹwhe Tọn jẹeji, ṣigba  e ma ko wá opli agun tọn dopo tata, kavi etlẹ yin Oflin! Podọ e ma nọ saba basi oplọn lọ na numadinu lẹ wutu. To ninọmẹ mọnkọ mẹ, e na yọ́n dọ a ni tindo hodọdopọ nujọnu tọn de hẹ nuplọntọ lọ. *

19. Etẹwẹ a sọgan dọna mẹde he e taidi dọ e ma yọ́n pinpẹn oplọn lọ tọn, podọ etẹlẹ ji wẹ a dona lẹnnupọndo?

¹⁹ Nado bẹjẹeji, a sọgan kanse e dọ: ‘Etẹwẹ a lẹndọ e na yin avùnnukundiọsọmẹnu daho hugan na we eyin a jlo na lẹzun Kunnudetọ Jehovah tọn?’ Nuplọntọ lọ sọgan gblọn dọ, ‘N’ma gbẹ́ nado plọn Biblu, amọ́ n’ma na lẹzun Kunnudetọ Jehovah tọn gbede!’ Eyin pọndohlan etọn niyẹn to whenue e ko plọnnu na ojlẹ de godo, be whẹwhinwhẹ́n depope tin nado zindonukọn to oplọn enẹ mẹ ya? To alọ devo mẹ, e sọgan yindọ whla tintan die he nuplọntọ towe dọ nuhe to aliglọnna ẹn na we. Di apajlẹ, e sọgan nọ mọdọ emi ma na penugo gbede nado dọyẹwheho sọn whédegbè jẹ whédegbè. Todin he a yọ́n numọtolanmẹ etọn, enẹ na gọalọna we dogọ nado na ẹn alọgọ he jẹ.

20. Nawẹ nukunnumimọjẹ Owalọ lẹ 13:48 mẹ sọgan gọalọna mí nado yọnẹn eyin vlavo mí dona zindonukọn nado to anadena oplọn de gbọn?

²⁰ E blawu nado dọ, amọ́ nuplọntọ delẹ nọ yinuwa taidi Islaelivi azán Ezekiẹli tọn gbè tọn lẹ. Jehovah dọna Ezekiẹli gando yé go dọmọ: “Pọ́n! Hiẹ taidi ohàn owanyi tọn de na yé, taidi mẹhe yí ogbè milomilo de do to hànji bo yí azọ́nyinyọnẹn do to núhò to hànjinu de ji. Yé na sè ohó towe lẹ, ṣigba depope to yé mẹ ma na yinuwa sọgbe hẹ yé.” (Ezek. 33:32) E sọgan vẹawuna mí nado dọna mẹde dọ mí na doalọtena oplọn etọn. Amọ́, “gli wẹ ojlẹ he pò lọ.” (1 Kọl. 7:29) Kakati nado to whenu hẹngu nado deanana oplọn he ma to nukọnyi de, mí dona dín mẹdevo he nọ dohia dọ emi “tindo ninọmẹ ahun mẹ tọn he jẹna ogbẹ̀ madopodo.”—Hia Owalọ lẹ 13:48.

21. Etẹwẹ yin hosọ owhe tọn mítọn na 2020, podọ naegbọn e do sọgbe?

²¹ To owhe 2020 gblamẹ, hosọ owhe tọn mítọn na gọalọna mí nado hẹn azọ́n mẹhẹnzun devi tọn mítọn pọnte dogọ. E bẹ delẹ to hogbe he Jesu yizan to opli ayidego tọn enẹ tẹnmẹ to osó de ji to Galili lẹ mẹ hẹn, dọmọ: “Enẹwutu, mì yì bo hẹn gbẹtọ lẹ . . . zun devi lẹ, bosọ nọ baptizi yé.”—Mat. 28:19.