TO ONÚ hoho-sẹdotẹn otò he go Biblu donù lẹ tọn to Jerusalem, zannu he ji nukinkan tin te de to finẹ he yin awuwlena to owhe 700 jẹ 600 J.W.M. Zannu lọ yin mimọ to yọwhé de he ma dẹn do Hebron to Israël. Nukinkan he deji lọ hia dọ: “Dindọn wẹ na Hagaf visunnu Hagav tọn gbọn Yahweh Sabaot dali.” Nawẹ nukinkan ehe nọgodona Biblu gbọn? E dohia dọ yinkọ Jiwheyẹwhe tọn Jehovah he yin kinkan po wekun lọ lẹ YHWH po to Heblugbe hohowhenu tọn mẹ yin yinyọnẹn ganji bosọ nọ yin yiyizan to paa mẹ to ojlẹ Biblu tọn lẹ mẹ. Na nugbo tọn, nukinkan devo lẹ he yin mimọ to yọwhé lẹ dohia dọ mẹhe nọ saba pli do finẹ kavi họ̀n whlá do finẹ lẹ do aṣa lọ nado nọ kàn yinkọ Jiwheyẹwhe tọn gọna yinkọ mẹdetiti tọn he bẹ wunmẹ yinkọ Jiwheyẹwhe tọn hẹn lẹ do adó lẹ go.

To whenue mẹplọntọ Rachel Nabulsi he nọ wazọ́n to Wehọmẹ Alavọ tọn Géorgie tọn to hodọdo nukinkan enẹlẹ ji, e dọ dọ: “E jẹna ayidego dọ yinkọ lọ YHWH yin yiyizan whlasusu. . . . Kandai lẹ po nukinkan lẹ po dohia dọ to ojlẹ Islaeli po Juda po tọn mẹ, mẹlọ he nọ yin YHWH ma yin mẹdepope poun.” Ehe nọgodona Biblu, fie yinkọ Jiwheyẹwhe tọn he nọ yin kinkan po wekun Heblugbe tọn lọ lẹ YHWH po sọawuhia te whla fọtọ́n susu lẹ. To paa mẹ, yinkọ Jiwheyẹwhe tọn nọ sọawuhia to yinkọ mẹdetiti tọn lẹ mẹ.

Hogbe lọ lẹ “Yahweh Sabaot” he yin kinkando zannu lọ ji zẹẹmẹdo “Jehovah awhànpa lẹ tọn.” Enẹwutu, e taidi dọ gbọnvona yinkọ Jiwheyẹwhe tọn, hodidọ lọ “Jehovah awhànpa lẹ tọn” sọ nọ yin yiyizan to ojlẹ Biblu tọn lẹ mẹ. Ehe lọsu dohia dọ, e sọgbe dọ Biblu ni yí hodidọ lọ “Jehovah awhànpa lẹ tọn” zan, ehe sọawuhia whla 283 to Owe-wiwe Heblu tọn lẹ mẹ, titengbe to kandai Isaia, Jelemia po Zekalia po tọn lẹ mẹ.