1-3. Avùnnukundiọsọmẹnu tẹlẹ wẹ gán hẹn omẹ Jehovah tọn lẹ nado kùn dasin?

 WHETẸNU wẹ a viavi gbọngodo? To whedelẹnu, mí nọ kùn dasin ayajẹ tọn. Amọ́ to paa mẹ, mí nọ saba viavi na awubla he to ahun mítọn mẹ wutu. Di apajlẹ, mí gán viavi whenue mẹyiwanna mítọn de kú. Lorilei, yèdọ mẹmẹyọnnu de to États-Unis dọmọ: “To whedelẹnu, awufiẹsa he okú viyọnnu ṣie tọn hẹnwa na mi nọ sinyẹn sọmọ bọ e taidi dọ nudepope ma gán miọnhomẹna mi wẹ nkọ. To ojlẹ enẹlẹ mẹ, n’nọ kanse dee eyin awufiẹsa ṣie na wá doalọte.” *

² Mí gán nọ kùn dasin na whẹwhinwhẹ́n devo lẹ wutu. Hiromi, he yin gbehosọnalitọ de to Japon dọ dọ: “Sọn ojlẹ de mẹ jẹ devo mẹ, ojlo matindo mẹhe n’nọ dukosọna to lizọnyizọn lọ mẹ lẹ tọn nọ hù awàkan mẹ na mi. To whedelẹnu, po dasin po to nukun mẹ, n’nọ biọ Jehovah dọ ni gọalọna mi nado mọ mẹde he to nugbo lọ dín.”

³ Be numọtolanmẹ dopolọ lẹ wẹ hiẹ lọsu nọ tindo to whedelẹnu ya? E gán yinmọ na susu mítọn. (1 Pita 5:9) Ojlo mítọn wẹ nado “yí ayajẹ do sẹ̀n Jehovah,” amọ́ mí gán to sinsẹ̀n ẹn po dasin po, na awubla, gbigbọjọ kavi na ninọmẹ flumẹjijẹ tọn de whlé nugbonọ-yinyin mítọn na Jiwheyẹwhe pọ́n wutu. (Salm. 6:6; 100:2) Nawẹ mí gán dudeji gbọn whenue numọtolanmẹ mọnkọ lẹ húagbọ́ mí?

4. Etẹwẹ mí na gbadopọnna to hosọ ehe mẹ?

⁴ Mí gán plọnnu sọn apajlẹ Jesu tọn mẹ. To whedelẹnu, uwọ lọsu jugbọn ninọmẹ sinsinyẹn lẹ mẹ he zọ́n bọ e “kùn dasin.” (Joh. 11:35; Luku 19:41; 22:44; Heb. 5:7) Mì gbọ mí ni gbadopọnna nujijọ enẹlẹ. Dile mí to mọwà, mí na mọ nudelẹ he mí  gán plọn. Mí nasọ gbadopọnna aliho dagbe delẹ he mẹ mí gán duto nuhahun he nọ zọ́n bọ mí nọ kùn dasin lẹ te ji.

5. Etẹwẹ kandai he to Johanu 11:32-36 mẹ plọn mí gando Jesu go?

⁵ To avivọ-whenu owhe 32 W.M., họntọn vivẹ́ Jesu tọn Lazalọsi jẹazọ̀n bo kú. (Joh. 11:3, 14) Dawe lọ do nọviyọnnu awe delẹ he nọ yin Malia po Malta po, podọ Jesu yiwanna whẹndo ehe taun. Yọnnu awe lọ lẹ jẹflumẹ petepete whenue nọvisunnu yiwanna yetọn kú. To okú Lazalọsi tọn godo, Jesu zingbejizọnlin yì gbètato Bẹtani tọn mẹ, fie Malia po Malta po nọ nọ̀. Whenue Malta sè dọ Jesu ja, e họnwezun yì pé e. Yí nukun homẹ tọn do pọ́n numọtolanmẹ awubla tọn he e tindo whenue e dọ dọ: “Oklunọ, eyin hiẹ ko tin tofi wẹ, nọvisunnu ṣie ma na ko kú.” (Joh. 11:21) Ojlẹ kleun de whenue Jesu mọ bọ Malia po mẹdevo lẹ po to avivi godo, e “kùn dasin.”—Hia Johanu 11:32-36.

6. Naegbọn Jesu do viavi to nujijọ enẹ whenu?

⁶ Naegbọn Jesu do viavi to nujijọ enẹ whenu? Étude perspicace des Écritures dọ dọ: “Okú họntọn etọn Lazalọsi tọn po awubla he mẹ e dekọtọn do na nọviyọnnu Lazalọsi tọn lẹ po wẹ hẹn Jesu nado ‘wẹnhun bosọ kùn dasin.’” * Jesu gán ko to nulẹnpọndo awufiẹsa he họntọn vivẹ́ etọn Lazalọsi na ko pehẹ whenue e to azọ̀njẹ lẹ ji, bo na ko yí nukun homẹ tọn do pọ́n lehe e na ko ṣí na dawe lọ whenue e doayi e go dọ gbigbọ emitọn jlo na nọte. Nudevo he gán ko sọ zọ́n bọ Jesu kùn dasin wẹ yindọ, e mọ obá he mẹ okú Lazalọsi tọn yinuwado Malia po Malta po ji jẹ. Eyin họntọn kavi hagbẹ whẹndo tọn vivẹ́ towe de ko kú, ayihaawe ma tin dọ numọtolanmẹ mọnkọ lẹ wẹ a na ko tindo. Pọ́n onú atọ̀n delẹ he a gán plọn sọn nujijọ ehe mẹ.

7. Etẹwẹ dasin he Jesu kùn na họntọn etọn lẹ tọn wutu plọn mí gando Jehovah go?

⁷ Jehovah nọ mọnukunnujẹ numọtolanmẹ towe lẹ mẹ. Jesu yin “apajlẹ pipé” Otọ́ etọn  tọn. (Heb. 1:3) Whenue Jesu viavi, e do numọtolanmẹ Otọ́ etọn tọn lẹ hia. (Joh. 14:9) Eyin a to akọndona okú mẹyiwanna de tọn, a gán deji dọ Jehovah nọ doayi awubla towe lẹ go bọ onú towe sọ nọ biọlanmẹna ẹn sisosiso. E jlo na hẹnazọ̀ngbọna ahun towe he ko jẹflumẹ.—Salm. 34:18; 147:3.

8. Naegbọn mí gán kudeji dọ Jesu na fọ́n mẹyiwanna mítọn lẹ sọnku?

⁸ Jesu do ojlo nado fọ́n mẹyiwanna towe lẹ sọnku. Ojlẹ kleun de whẹpo Jesu do viavi, e hẹn Malta deji dọmọ: “Nọvisunnu towe na fọ́n.” Malta yí Jesu sè. (Joh. 11:23-27) Taidi sinsẹ̀n-basitọ nugbonọ Jehovah tọn de, ayihaawe ma tin dọ Malta na ko yọnẹn dọ yẹwhegán Elija po Eliṣa po fọ́n mẹdelẹ sọnku owhe kanweko susu lẹ jẹnukọn. (1 Ahọ. 17:17-24; 2 Ahọ. 4:32-37) Podọ, e yọnbasi dọ e na ko sọ sèho gando azọ́njiawu fọnsọnku tọn he Jesu wà lẹ go. (Luku 7:11-15; 8:41, 42, 49-56) Hiẹ lọsu gán kudeji dọ a na vọ́ mẹyiwanna towe he ko kú lẹ mọ whladopo dogọ. Dasin he Jesu kùn whenue e to homẹmiọnna họntọn etọn he to awubla sinsinyẹn mẹ lẹ yin kunnudenu lọ dọ fọnsọnku nọ duahunmẹna ẹn sisosiso!

9. Taidi Jesu, nawẹ a gán nọ nọgodona mẹhe to aluẹmẹ lẹ gbọn? Na apajlẹ.

⁹ A gán nọ nọgodona mẹhe to aluẹmẹ lẹ. Gbọnvona dọ Jesu viavi hẹ Malta po Malia po, e sọ dotoaina yé bo vọ́ jide na yé. Mí gán nọ wà nudopolọ na mẹhe to aluẹmẹ lẹ. Dan, yèdọ mẹho agun tọn de to Australie dọmọ: “Whenue asi e kú, n’do hudo godonọnamẹ tọn. Asu po asi po susu wẹ ze yede jo to okle po ozán po nado dotoaina mi. Yé ma nọ glọnalina mi nado blawu, podọ dasin ṣie lẹ ma dotukla yé. Yé sọ gọalọna mi to aliho yọ́n-na-yizan lẹ mẹ, taidi nado klọ mọto ṣie, nado whleahi, podọ nado dànú na mi eyin n’ma penugo nado wà onú enẹlẹ na dee. Humọ, yé nọ saba hodẹ̀ hẹ mi. Yé dohia dọ họntọn nugbo podọ nọvisunnu he ‘go yè sọgan dejido to ojlẹ ayimajai tọn lẹ mẹ’ wẹ emi yin.”—Howh. 17:17.

10. Basi zẹẹmẹ nujijọ he yin kinkandai to Luku 19:36-40 mẹ tọn.

¹⁰ Jesu wá Jelusalẹm to Nisan 9tọ, owhe 33 W.M. Dile e sẹpọ tòdaho lọ, gbẹtọgun de pli, podọ mẹlẹ tẹ́ awugbó yetọn lẹ do aliji to nukọn etọn nado dohia dọ yé kẹalọyi i taidi Ahọlu yetọn. E họnwun dọ nujijọ ayajẹ tọn de wẹ enẹ yin. (Hia Luku 19:36-40.) Enẹwutu, devi etọn lẹ gán ko nọma donukun nuhe jọ bọdego. “To whenue [Jesu] dọnsẹpọ, e pọ́n tòdaho lọ bo viavi do e ji.” Po dasin po to nukun mẹ, Jesu dọ dọdai nugbajẹmẹji sinsinyẹn he to tepọn tòmẹnu Jelusalẹm tọn lẹ tọn.—Luku 19:41-44.

11. Naegbọn Jesu do viavi na tòmẹnu Jelusalẹm tọn lẹ tọn wutu?

¹¹ Jesu sè vivẹ́ to ahun mẹ, na e yọnẹn dọ mahopọnna dọ mẹlẹ yí emi po zohunhun po, suhugan Ju lẹ tọn ko dohia dọ yé ma na kẹalọyi owẹ̀n Ahọluduta lọ tọn. Taidi kọdetọn de, Jelusalẹm na yin vivasudo, bọ Ju depope he na lùntọ́n na yin pinplan yì kanlinmọgbenu. (Luku 21:20-24) E blawu dọ kẹdẹdile Jesu ko dọ do jẹnukọn, suhugan omẹ lọ lẹ tọn wẹ gbẹ́ ẹ dai. Nawẹ mẹlẹ nọ yinuwa do to paa mẹ gando owẹ̀n Ahọluduta lọ tọn go to lẹdo towe mẹ? Eyin omẹ vude poun wẹ nọ yọ́n pinpẹn vivẹnu he a nọ do nado plọn yé nugbo lọ tọn, etẹwẹ dasin Jesu tọn lẹ gán plọn we? Pọ́n onú atọ̀n devo lẹ he mí gán plọn.

12. Etẹwẹ dasin he Jesu kùn do ota gbẹtọvi hatọ etọn lẹ tọn mẹ plọn mí gando Jehovah go?

 ¹² Jehovah nọ hò gbẹtọ lẹ tọn pọ́n. Dasin Jesu tọn lẹ nọ flin mí obá he mẹ Jehovah nọ hò gbẹtọ lẹ tọn pọ́n jẹ. “E ma jlo dọ mẹdepope ni yin vivasudo ṣigba jlo dọ mẹlẹpo ni wá lẹnvọjọ kọ̀n.” (2 Pita 3:9) To egbehe, mí nọ dohia dọ mí yiwanna kọmẹnu mítọn lẹ eyin mí nọ sinyẹnlin dile mí to avọ́sinsan lẹ basi nado jẹ ahun yetọn mẹ po wẹndagbe lọ po.—Mat. 22:39. *

13, 14. Nawẹ Jesu do awuvẹmẹ hia gbẹtọ lẹ gbọn, podọ nawẹ mí gán wleawuna jẹhẹnu enẹ gbọn?

¹³ Jesu wazọ́n sinsinyẹn to lizọnyizọn lọ mẹ. E do owanyi etọn na gbẹtọ lẹ hia gbọn dotẹnmẹ hundote lẹpo yiyizan nado plọnnu yé madoalọte dali. (Luku 19:47, 48) Etẹwẹ whàn ẹn nado wàmọ? Jesu tindo awuvẹmẹ na yé. To ojlẹ delẹ mẹ, mẹsusu jlo na sè ohó Jesu tọn sọmọ bọ ewọ po devi etọn lẹ po “ma penugo nado tlẹ dùnú.” (Malku 3:20) E tlẹ sọ wleawufo nado plọnnumẹ to zánmẹ, yèdọ ojlẹ de he yọ́n na todoaitọ etọn de hugan. (Joh. 3:1, 2) Suhugan mẹhe dotoaina Jesu to tintan whenu lẹ tọn ma lẹzun devi etọn lẹ. Amọ́, todoaitọ etọn lẹpo wẹ e dekunnuna mlẹnmlẹn. To egbehe, mí nọ jlo na hùn dotẹnmẹ lọ dote na mẹlẹpo nado sè wẹndagbe lọ. (Owalọ 10:42) Nado jẹ yanwle enẹ kọ̀n, e gán biọ dọ mí ni basi vọjlado gando aliho he mẹ mí nọ dọyẹwheho te go.

¹⁴ Nọ wleawufo nado basi vọjlado he e biọ lẹ. Eyin mí nọ diọ ojlẹ he mẹ mí nọ dọyẹwheho te, mí gán mọ mẹdelẹ he na kẹalọyi wẹndagbe lọ. Gbehosọnalitọ de he nọ yin Matilda dọmọ: “Yẹn po asu ṣie po nọ tẹnpọn nado yì gbẹtọ lẹ dè to ojlẹ voovo lẹ mẹ. To zánfinfọ́n, mí nọ yì aigba-denamẹ ajọwiwa tọn lẹ ji. To whèmẹ, whenue mẹsusu nọ to yidọn-yide yetọn lẹ basi, mí nọ saba yí kẹkẹvi kunnudide tọn lẹ zan. To whèjai, mí nọ mọdọ e nọ yọ́n taun nado yì mẹlẹ dè to owhé yetọn lẹ gbè.” Kakati nado tẹdo tito he yọ́n na mí de go, mí dona wleawufo nado vọ́ tito mítọn jlado nado dọyẹwheho to whenue e yọnbasi dogọ te dọ mí ni dukosọna gbẹtọ lẹ. Eyin mí nọ wàmọ, mí gán deji dọ homẹ Jehovah tọn na hùn.

15. Sọgbe hẹ Luku 22:39-44, etẹwẹ jọ to ozán godo tọn he Jesu yizan to aigba ji mẹ?

¹⁵ To zánmẹ to Nisan 14tọ owhe 33 W.M., Jesu yì jipa Gẹtsemani tọn mẹ. To finẹ, e dọ nuhe to ahun ji na ẹn lẹpo na Jehovah. (Hia Luku 22:39-44.) Ojlẹ awusinyẹn tọn enẹlẹ mẹ wẹ Jesu “yí avi sinsinyẹn po dasin lẹ po do basi ovẹvivẹ” lẹ te. (Heb. 5:7) Etẹ go wẹ Jesu hodẹ̀ gando to ozán godo tọn he jẹnukọnna okú etọn mẹ? E hodẹ̀ bo biọ huhlọn nado hẹn nugbonọ-yinyin etọn na Jehovah go bo wà ojlo Etọn. Jehovah doayi awufiẹsa Visunnu etọn tọn go bosọ sè odẹ̀ etọn, podọ e do angẹli de hlan nado na ẹn huhlọn.

16. Naegbọn Jesu do jẹflumẹ whenue e to dẹ̀ho to jipa Gẹtsemani tọn mẹ?

¹⁶ Ayihaawe ma tin dọ Jesu viavi to whenue e to dẹ̀ho to jipa Gẹtsemani tọn mẹ, na linlẹn lọ tata dọ ewọ na yin pinpọnhlan di nuzántọ de hẹn ẹn jẹflumẹ taun wutu. E sọ mọnukunnujẹ azọngban pinpẹn he e tindo mẹ, enẹ wẹ nado suwhẹna oyín Otọ́ etọn tọn. Eyin a to pipehẹ ninọmẹ flumẹjijẹ tọn he whlé nugbonọ-yinyin towe na Jehovah pọ́n de, etẹwẹ a gán plọn sọn dasin Jesu tọn lẹ mẹ? Pọ́n nuplọnmẹ atọ̀n devo lẹ.

17. Etẹwẹ mí gán plọn sọn gblọndo he Jehovah na na odẹ̀ vẹkuvẹku Jesu tọn lẹ mẹ?

¹⁷ Jehovah nọ dotoaina ovẹvivẹ towe lẹ. Jehovah dotoaina odẹ̀ vẹkuvẹku Jesu tọn lẹ. Etẹwutu? Na nuhe duahunmẹna Jesu hugan wẹ nado hẹn nugbonọ-yinyin etọn na Otọ́ etọn go bosọ suwhẹna oyín Etọn. Eyin nuhe nọ duahunmẹna mí hugan wẹ nado hẹn nugbonọ-yinyin mítọn na Jehovah go bosọ suwhẹna oyín etọn, e na nọ na gblọndo na odẹ̀ he mí nọ hò nado biọ alọgọ lẹ.—Salm. 145:18, 19.

18. Aliho tẹlẹ mẹ wẹ Jesu taidi họntọn mẹtọnhopọntọ de te?

¹⁸ Jesu nọ mọnukunnujẹ numọtolanmẹ towe lẹ mẹ. Whenue mí jẹflumẹ, lehe homẹ mítọn nọ hùn do sọ eyin họntọn mẹtọnhopọntọ de miọnhomẹna mí, titengbe họntọn de he ko pehẹ nuhahun mítọn nkọ lẹ. Họntọn mọnkọ wẹ Jesu yin. E yọ́n nuhe e zẹẹmẹdo nado jẹflumẹ bo do hudo alọgọ tọn. E yọ́n madogán mítọn lẹ, podọ e nọ hẹn ẹn diun dọ mí mọ  alọgọ he sin hudo mí do “to ojlẹ sisọ mẹ.” (Heb. 4:15, 16) Kẹdẹdile Jesu kẹalọyi alọgọ angẹli de tọn to jipa Gẹtsemani tọn mẹ do, mí dona to gbesisọ mẹ nado kẹalọyi alọgọ he Jehovah nọ wleawuna lẹ. Mí gán mọ alọgọ enẹlẹ yí gbọn owe, video, hodidọ kavi dlapọn tulinamẹ tọn he mẹho agun tọn kavi họntọn he whèwhín de basi na mí gblamẹ.

19. Nawẹ a gán mọ huhlọn yí gbọn whenue a to pipehẹ ninọmẹ flumẹjijẹ tọn de he whlé nugbonọ-yinyin towe na Jiwheyẹwhe pọ́n? Na apajlẹ.

¹⁹ Jehovah na na we ‘jijọho etọn.’ Nawẹ Jehovah na na mí huhlọn gbọn? Whenue mí hodẹ̀, mí na tindo “jijọho Jiwheyẹwhe tọn he yiaga hugan nukunnumọjẹnumẹ lẹpo.” (Flp. 4:6, 7) Jijọho he Jehovah nọ namẹ nọ hòhuwhẹ ahun mítọn bo nọ gọalọna mí nado lẹnnupọn to aliho he sọgbe mẹ. Pọ́n lehe enẹ yin nugbo do to whẹho mẹmẹyọnnu de he nọ yin Luz tọn mẹ. E dọmọ: “N’diahi hẹ numọtolanmẹ ṣokẹdẹninọ tọn. To whedelẹnu, numọtolanmẹ enẹlẹ nọ zọ́n bọ n’nọ lẹndọ Jehovah ma yiwanna mi. Amọ́, eyin enẹ jọ, n’nọ dọ numọtolanmẹ ṣie na Jehovah to afọdopolọji. Odẹ̀ nọ gọalọna mi nado dava numọtolanmẹ ṣie lẹ.” Dile numimọ mẹmẹyọnnu ehe tọn dohia do, odẹ̀ gán gọalọna mí nado do jijọho.

20. Etẹlẹ wẹ mí plọn sọn dasin Jesu tọn lẹ mẹ?

²⁰ Lehe nuhe mí plọn sọn dasin Jesu tọn lẹ mẹ miọnhomẹnamẹ bosọ yọ́n-na-yizan do sọ! Mí yin nuflin nado nọ nọgodona họntọn mítọn he to aluẹmẹ lẹ, podọ nado deji dọ Jehovah po Jesu po ma na jo mí do eyin mẹyiwanna mítọn de kú. Mí yin tulina nado nọ yí awuvẹmẹ do dọyẹwheho bo nọ plọnmẹ, na Jehovah Jiwheyẹwhe po Jesu Klisti po nọ do jẹhẹnu dagbedagbe ehe hia wutu. Podọ, e miọnhomẹna mí nado yọnẹn dọ Jehovah po Visunnu vivẹ́ etọn po nọ mọnukunnujẹ numọtolanmẹ po madogán mítọn lẹ po mẹ, bosọ nọ jlo na gọalọna mí nado doakọnna yé. Mì gbọ mí ni zindonukọn nado nọ yí nuhe mí plọn lẹ do yizan mẹ kakajẹ azán he gbè Jehovah na hẹn opà homẹmiọnnamẹ tọn etọn di nado “súnsún dasin lẹpo sẹ̀ sọn nukun [mítọn] mẹ”!—Osọ. 21:4.