1, 2. (a) Whetẹnu na taun tọn wẹ mí nọ flin mẹyiwanna he ko kú de? (b) Etẹwẹ Jesu zedai to ozán he jẹnukọnna okú etọn mẹ?

 MAHOPỌNNA lehe e ko dẹnsọ bọ mẹyiwanna mítọn lẹ kú, mí gbẹ́ nọ to yé flin. Azán he gbè yé kú nọ saba hẹn mí flin onú titengbe delẹ gando yé go.

² To whemẹwhemẹ, mí nọ pli to pọmẹ hẹ gbẹtọ livi susu lẹ lẹdo aihọn pé to azán he jẹdo azán he gbè mẹhe mí yiwanna taun de kú te ji, yèdọ Jesu Klisti. (1 Pita 1:8) Mí nọ pli dopọ nado flin mẹlọ he ze ogbẹ̀ etọn jo taidi ofligọ de nado whlẹn mí sọn ylando po okú po si. (Mat. 20:28) Na nugbo tọn, Jesu jlo dọ hodotọ emitọn lẹ ni nọ flin okú emitọn. To ozán he jẹnukọnna okú etọn mẹ, e ze tenu-núdùdù vonọtaun de dai bo degbe dọmọ: “Mì nọ wà ehe to oflin ṣie mẹ.” *—Luku 22:19.

3. Etẹwẹ mí na gbadopọnna to hosọ ehe mẹ?

³ Omẹ vude poun to mẹhe nọ wá Hùnwhẹ Oflin okú Klisti tọn tẹnmẹ lẹ mẹ wẹ do todido olọn mẹ tọn. Amọ́, gbẹtọ livi susu he do todido aigba ji tọn lẹ wẹ sọ nọ wá ga. To hosọ ehe mẹ, mí na gbadopọnna whẹwhinwhẹ́n delẹ he wutu pipli awe lọ lẹ nọ to jejeji nado yì Oflin to whemẹwhemẹ. Mí nasọ dọhodo ale he mọwiwà nọ hẹnwa na mí lẹ ji. Jẹnukọn whẹ́, mì gbọ mí ni gbadopọnna whẹwhinwhẹ́n delẹ he wutu mẹyiamisisadode lẹ nọ yì Oflin lọ.

4. Naegbọn mẹyiamisisadode lẹ nọ do mahẹ to akla po ovẹn lọ po mẹ to Oflin lọ whenu?

⁴ To whemẹwhemẹ, mẹyiamisisadode lẹ nọ to jejeji nado yì Oflin lọ taidi mahẹtọ lẹ. Naegbọn e do sọgbe dọ yé ni dù akla lọ bosọ nù ovẹn lọ? Nado na gblọndo kanbiọ ehe tọn, lẹnnupọndo nuhe jọ to ozán godo tọn he Jesu yizan to aigba ji mẹ ji. To núdùdù Juwayi tọn godo, Jesu ze nuhe wá yin yinyọnẹn taidi Tenu-Núdùdù Oklunọ tọn dai. E ze akla po ovẹn po na apọsteli nugbonọ etọn 11 lẹ bo dọna yé nado dù bosọ nù. Jesu dọhona yé gando alẹnu kavi gbekọndopọ awe delẹ go, enẹ wẹ alẹnu yọyọ lọ po alẹnu Ahọluduta lọ tọn po. * (Luku 22:19, 20, 28-30) Alẹnu ehelẹ hùn dotẹnmẹ dote na apọsteli lọ lẹ gọna omẹ sọha kleun de nado lẹzun ahọlu lẹ po yẹwhenọ lẹ po to olọn mẹ. (Osọ. 5:10; 14:1) Pipotọ mẹyiamisisadode lẹ tọn * he to alẹnu awe ehelẹ mẹ kẹdẹ wẹ gán do mahẹ to akla lọ po ovẹn lọ po mẹ to Oflin lọ whenu.

5. Etẹwẹ mẹyiamisisadode lẹ yọnẹn gando todido he yin nina yé go?

⁵ Whẹwhinwhẹ́n devo he wutu mẹyiamisisadode lẹ nọ to jejeji nado yì Oflin lọ wẹ yindọ: Hùnwhẹ ehe nọ hùn dotẹnmẹ dote na yé nado lẹnnupọndo todido yetọn ji. Jehovah ko na yé todido jiawu de, enẹ wẹ nado duvivi ogbẹ̀ jọmaku po magble po tọn to olọn mẹ, bo sẹ̀n to apá na Jesu Klisti he yin gigopana lọ gọna pipotọ 144 000 lẹ tọn, podọ hú popolẹpo nado penugo bo mọ Jehovah Jiwheyẹwhe lọsu! (1 Kọl. 15:51-53; 1 Joh. 3:2) Mẹyiamisisadode lẹ yọnẹn dọ yé ko yin oylọ-basina nado duvivi lẹblanulọkẹyi enẹlẹ tọn to olọn mẹ. Amọ́, nado yin alọkẹyi do olọn mẹ, yé dona hẹn nugbonọ-yinyin yetọn go kakajẹ okú. (2 Tim. 4:7, 8) Ayajẹnu daho wẹ e nọ yin na mẹyiamisisadode lẹ nado lẹnnupọndo todido olọn mẹ tọn yetọn ji. (Titu 2:13) Etẹwẹ dogbọn “lẹngbọ devo lẹ” dali? (Joh. 10:16) Etẹwẹ yin delẹ to whẹwhinwhẹ́n he wutu yé nọ yì Oflin lẹ mẹ?

6. Naegbọn lẹngbọ devo lẹ nọ yì Oflin to whemẹwhemẹ?

⁶ Lẹngbọ devo lẹ nọ yì Oflin lọ tẹnmẹ, e ma yin taidi mahẹtọ lẹ gba, amọ́ taidi nupọntọ lẹ. To 1938, mẹhe do todido aigba ji tọn lẹ yin oylọ-basina whla tintan wá Oflin. Atọ̀họ̀-Nuhihọ́ lọ Tọn 1^er mars 1938 dọ dọ: “Nuhe yọ́n bosọ sọgbe taun wẹ e na yin dọ [lẹngbọ devo] lẹ ni nọ tin to opli enẹ tẹnmẹ nado pọ́n nuhe na yin wiwà lẹ. . . . Ojlẹ ayajẹ tọn de wẹ e dona yin, podọ mọ wẹ e nọ yin na yelọsu ga.” Dile homẹ jonọ he yin oylọ-basina nado nọ hùnwhẹ alọwle tọn de tẹnmẹ lẹ tọn nọ hùn do, homẹ lẹngbọ devo lẹ tọn nọ hùn nado wá Oflin lọ tẹnmẹ taidi nupọntọ lẹ.

7. Naegbọn lẹngbọ devo lẹ nọ to jejeji na hodidọ Oflin tọn?

⁷ Lẹngbọ devo lẹ lọsu nọ lẹnnupọndo todido yetọn ji. Yé nọ to jejeji na hodidọ Oflin tọn lọ, na e nọ zinnudo nuhe Klisti po gandutọgbẹ́ etọn 144 000 lẹ po na wà na gbẹtọvi nugbonọ lẹ to Gandudu Owhe Fọtọ́n tọn lọ whenu ji wutu. To anademẹ Jesu Klisti he yin Ahọlu yetọn tọn glọ, gandutọ olọn mẹ tọn enẹlẹ na gọalọ nado diọ aigba lọ zun paladisi de bo hẹn gbẹtọvi tonusetọ lẹ jẹ pipé kọ̀n. Ayajẹnu wẹ e nọ yin na nupọntọ livi susu he wá Oflin lọ tẹnmẹ lẹ nado yí nukun homẹ tọn do mọ  hẹndi sọgodo tọn dọdai Biblu tọn lẹ tọn taidi dehe to Isaia 35:5, 6; 65:21-23; gọna Osọhia 21:3, 4 mẹ lẹ. Eyin yé mọ yede po mẹyiwanna yetọn lẹ po hlan aihọn yọyọ enẹ mẹ, todido yetọn na sọgodo gọna gbemima yetọn ma nado doalọtena Jehovah sinsẹ̀n gbede nọ yin hinhẹn lodo.—Mat. 24:13; Gal. 6:9.

8. Etẹwẹ yin whẹwhinwhẹ́n devo he wutu lẹngbọ devo lẹ nọ yì Oflin?

⁸ Lẹnnupọndo whẹwhinwhẹ́n devo he wutu lẹngbọ devo lẹ nọ yì Oflin lọ ji. Yé nọ jlo na do owanyi po godonọnamẹ yetọn po hia mẹyiamisisadode lẹ. Ohó Jiwheyẹwhe tọn dọ dọdai dọ haṣinṣan pẹkipẹki de na tin to mẹyiamisisadode lẹ po mẹhe do todido aigba ji tọn lẹ po ṣẹnṣẹn. Gbọnna? Mì gbọ mí ni dọhodo apajlẹ delẹ ji.

9. Etẹwẹ dọdai he to Zekalia 8:23 mẹ dohia gando numọtolanmẹ he lẹngbọ devo lẹ nọ do na mẹyiamisisadode lẹ go?

⁹ Hia Zekalia 8:23. Dọdai ehe do numọtolanmẹ he lẹngbọ devo lẹ nọ tindo na mẹmẹsunnu po mẹmẹyọnnu yiamisisadode yetọn lẹ po hia to aliho he whànmẹ de mẹ. Hodidọ lọ lẹ “Ju de” po “mì” po to alọdlẹndo pipli dopolọ, enẹ wẹ pipotọ mẹyiamisisadode lẹ tọn. (Lom. 2:28, 29) “Sunnu ao sọn ogbè akọta lẹ tọn lẹpo mẹ” lọ lẹ nọtena lẹngbọ devo lẹ. Yé yí nugbonọ-yinyin do “tẹdo” mẹyiamisisadode lẹ go “gligli” bo nọ kọnawudopọ hẹ yé to sinsẹ̀n-bibasi wiwe-ṣeke mẹ. Enẹwutu, lẹngbọ devo lẹ nọ do owanyi sisosiso yetọn na mẹyiamisisadode lẹ hia bo nọ pli hẹ yé to whèjai Oflin tọn lọ.

10. Etẹwẹ Jehovah wà nado hẹn dọdai he to Ezekiẹli 37:15-19, 24, 25 mẹ lọ di?

¹⁰ Hia Ezekiẹli 37:15-19, 24, 25. Nado hẹn dọdai ehe di, Jehovah ko kọ̀n mẹyiamisisadode lẹ po lẹngbọ devo lẹ po dopọ to aliho de mẹ bọ nudepope ma gán hẹn pọninọ yetọn gble. Dọdai lọ donù owhlẹ awe go. Mẹhe do todido olọn mẹ tọn lẹ taidi owhlẹ he ji yè kàn do dọ “na Juda” (hẹnnu he mẹ ahọlu Islaeli tọn lẹ yin didesọn), podọ mẹhe do todido aigba ji tọn lẹ taidi owhlẹ he ji yè kàn do dọ “Eflaimi tọn.” * Jehovah na kọ̀n pipli awe lọ lẹ dopọ bọ yé na lẹzun “owhlẹ dopo.” Ehe dohia dọ yé to sinsẹ̀n to pọmẹ to anademẹ Ahọlu dopo, yèdọ Klisti Jesu tọn glọ. To whemẹwhemẹ, mẹyiamisisadode lẹ po lẹngbọ devo lẹ po nọ yì Oflin, e ma yin taidi pipli voovo awe, amọ́ taidi “lẹngbọpa dopo” to anademẹ “lẹngbọhọtọ dopo” tọn glọ.—Joh. 10:16.

11. Aliho titengbe tẹ mẹ wẹ “lẹngbọ” he yin nùdego to Matiu 25:31-36, 40 mẹ lẹ nọ nọgodona mẹmẹsunnu Klisti tọn lẹ te?

¹¹ Hia Matiu 25:31-36, 40. To apajlẹ ehe mẹ, “lẹngbọ lẹ” nọtena dodonọ he to gbẹnọ to ojlẹ opodo tọn mẹ bo tindo todido aigba ji tọn lẹ, enẹ wẹ lẹngbọ devo lẹ. Yé nọ yí nugbonọ-yinyin do nọgodona pipotọ mẹmẹsunnu yiamisisadode Klisti tọn lẹ tọn, titengbe gbọn alọgigọna yé nado hẹn azọngban daho de di dali, enẹ wẹ azọ́n yẹwhehodidọ po mẹhẹnzun devi tọn lọ po lẹdo aihọn pé.—Mat. 24:14; 28:19, 20.

12, 13. Aliho devo tẹlẹ mẹ wẹ lẹngbọ devo lẹ nọ do godonọnamẹ yetọn na mẹmẹsunnu Klisti tọn lẹ hia te?

¹² To whemẹwhemẹ, to osẹ he jẹnukọnna Oflin lọ lẹ mẹ, lẹngbọ devo lẹ nọ do godonọnamẹ yetọn na mẹmẹsunnu Klisti tọn lẹ hia bo nọ do mahẹ gigọ́ to nujijla lẹdo aihọn pé de mẹ nado basi oylọna jlodotọ lẹ wá Oflin lọ. (Pọ́n apotin lọ “ Be A to Awuwledaina Ojlẹ Oflin Tọn lọ Ya?”) Yé sọ nọ gọalọ nado basi tito he e biọ lẹpo na Oflin lọ nido yin bibasi to agun lẹpo mẹ lẹdo aihọn pé, dile etlẹ yindọ mahẹtọ depope ma nọ tin to suhugan agun lẹ  tọn mẹ. Homẹ lẹngbọ devo lẹ tọn nọ hùn taun nado nọgodona mẹmẹsunnu Klisti tọn lẹ to aliho enẹlẹ mẹ. Lẹngbọ ehelẹ yọnẹn dọ Jesu nọ pọ́n nuhe yé wà na mẹmẹsunnu yiamisisadode etọn lẹ hlan taidi dọ ewọ wẹ yé wà na tlọlọ nkọ.—Mat. 25:37-40.

¹³ Etẹwẹ yin whẹwhinwhẹ́n devo lẹ he wutu mímẹpo nọ yì hùnwhẹ Oflin tọn tẹnmẹ mahopọnna todido mítọn?

14. Nawẹ Jehovah po Jesu po ko do owanyi daho hia mí gbọn?

¹⁴ Mí nọ yọ́n pinpẹn owanyi he Jehovah po Jesu po dohia mí tọn. Jehovah ko do owanyi etọn hia mí to aliho susu lẹ mẹ, amọ́ dopo tin he jẹna ayidego hugan dehe pò lẹpo. Jiwheyẹwhe mítọn ko do owanyi matin ṣejannabi etọn hia gbọn Visunnu vivẹ́ etọn didohlan nado jiya bo kú na mí dali. (Joh. 3:16) Mí yọnẹn dọ Jesu lọsu do owanyi daho hia whenue e desọn ojlo mẹ bo ze ogbẹ̀ etọn jo do ota mítọn mẹ. (Joh. 15:13) Mí ma gán suahọ owanyi he Jehovah po Jesu po dohia mí tọn pọ́n gbede. Amọ́, mí gán do pinpẹn nutọn hia gbọn aliho he mẹ mí nọ nọgbẹ te egbesọegbesọ dali. (Kol. 3:15) Podọ mí nọ yì hùnwhẹ Oflin tọn nado flin owanyi he yé do na mí bosọ dohia dọ mí yiwanna yé.

15. Naegbọn mẹyiamisisadode lẹ po lẹngbọ devo lẹ po nọ yọ́n pinpẹn nunina ofligọ lọ tọn taun?

¹⁵ Mí nọ yọ́n pinpẹn nunina ofligọ lọ tọn taun. (Mat. 20:28) Mẹyiamisisadode lẹ nọ yọ́n pinpẹn ofligọ lọ tọn taun, na enẹ wẹ hẹn todido vonọtaun yetọn yọnbasi wutu. Yise yetọn to avọ́sinsan Klisti tọn mẹ zọ́n bọ Jehovah lá yé di dodonọ bosọ kẹalọyi yé taidi ovi etọn lẹ. (Lom. 5:1; 8:15-17, 23) Lẹngbọ devo lẹ lọsu nọ yọ́n pinpẹn ofligọ lọ tọn. To dodonu yise yetọn to ohùn Klisti tọn he yin sinsọndai lọ mẹ ji, yé tindo teninọ dagbe to Jiwheyẹwhe nukọn, yé gán wà sinsẹ̀nzọn wiwe de na ẹn, podọ yé do todido lọ nado “jugbọn nukunbibia daho lọ mẹ.” (Osọ. 7:13-15) Dopo to aliho he mẹ mẹyiamisisadode lẹ po lẹngbọ devo lẹ po nọ do pinpẹn nutọn hia na ofligọ lọ te wẹ gbọn Oflin lọ yìyì to whemẹwhemẹ dali.

16. Whẹwhinwhẹ́n devo tẹ wutu wẹ mí nọ yì Oflin?

¹⁶ Whẹwhinwhẹ́n devo he wutu mí nọ yì Oflin lọ wẹ yindọ mí nọ jlo na setonuna Jesu. Mahopọnna todido sọgodo tọn mítọn, dopodopo mítọn nọ hẹn gbedide he Jesu na to ozán he mẹ e ze Oflin lọ dai te do ayiha mẹ, e dọmọ: “Mì nọ wà ehe to oflin ṣie mẹ.”—1 Kọl. 11:23, 24.

17. Nawẹ Oflin lọ nọ gọalọna mí nado dọnsẹpọ Jehovah dogọ gbọn?

¹⁷ Mí nọ dọnsẹpọ Jehovah dogọ. (Jak. 4:8) Dile mí ko plọn do, Oflin lọ nọ hùn dotẹnmẹ dote na mí nado lẹnnupọndo todido he Jehovah na mí ji bosọ lẹnayihamẹpọn do owanyi daho etọn na mí ji. (Jel. 29:11; 1 Joh. 4:8-10) To whenue mí lẹnnupọndo todido dejidego mítọn na sọgodo po owanyi nugbo Jiwheyẹwhe tọn na mí po ji, owanyi mílọsu tọn na Jehovah nọ siso dogọ podọ haṣinṣan mítọn hẹ ẹ nọ lodo dogọ.—Lom. 8:38, 39.

18. Etẹwẹ ayihamẹlinlẹnpọn do apajlẹ Jesu tọn ji nọ whàn mí nado wà?

¹⁸ Mí nọ yin whinwhàn nado hodo apajlẹ Jesu tọn. (1 Pita 2:21) To azán he jẹnukọnna Oflin lọ lẹ gblamẹ, mí nọ gbadopọnna kandai Biblu tọn he gando osẹ godo tọn he Jesu yizan to aigba ji, okú etọn po fọnsọnku etọn po go lẹ. Enẹgodo, to whèjai Oflin tọn lọ, hodidọ lọ nọ flin mí owanyi he Jesu do na mí. (Efe. 5:2; 1 Joh. 3:16) Dile mí to nuhia gando apajlẹ  mẹde-yido-sanvọ́ tọn he Jesu zedai go bosọ to ayihamẹlẹnpọn deji, mí nọ yin whinwhàn nado “to zọnlinzin zọnmii kẹdẹdile omẹ enẹ zinzọnlin do.”—1 Joh. 2:6.

19. Nawẹ mí gán gbọṣi owanyi Jiwheyẹwhe tọn mẹ gbọn?

¹⁹ Mí tlẹ nọ magbe hugan gbede pọ́n nado gbọṣi owanyi Jiwheyẹwhe tọn mẹ. (Juda 20, 21) Mí nọ gbọṣi owanyi Jiwheyẹwhe tọn mẹ eyin mí wà nuhe go mí pé lẹpo nado setonuna ẹn, klan yinkọ etọn do wiwe bosọ hẹn homẹ etọn hùn. (Howh. 27:11; Mat. 6:9; 1 Joh. 5:3) Oflin lọ yìyì nọ zọ́n bọ mí nọ magbe dogọ nado nọgbẹ to azán dopodopo ji taidi dọ mí to didọna Jehovah dọ ‘N’jlo na gbọṣi owanyi towe mẹ kakadoi’ wẹ nkọ!

20. Whẹwhinwhẹ́n dagbe tẹlẹ wẹ mí do nado nọ yì Oflin lọ?

²⁰ Vlavo mí do todido lọ nado nọgbẹ kakadoi to olọn mẹ kavi to aigba ji, mí do whẹwhinwhẹ́n dagbe lẹ nado nọ yì Oflin lọ. Eyin mí pli to whemẹwhemẹ to azán enẹ ji, mí nọ flin okú mẹyiwanna de tọn, enẹ wẹ Jesu Klisti. Hú popolẹpo, mí nọ flin nuyiwa owanyi tọn daho hugan lọ, enẹ wẹ owanyi he Jehovah dohia mí bo ze Visunnu etọn jo taidi ofligọ de. To owhe 2022 tọn mẹ, Oflin lọ na yin bibasi to vendredi 15 avril to họyiyi owhè tọn godo. Mí yiwanna Jehovah po Visunnu etọn po. Enẹwutu, to azán he jẹdo azán he gbè Jesu kú te ji, nudepope ma gán yin nujọnu na mí hugan nado tin to Oflin lọ tẹnmẹ.