HOSỌ OPLỌN TỌN 4
Jehovah Nọ Dona Vivẹnudido Mítọn Nado Yì Oflin
“Mì nọ wà ehe to oflin ṣie mẹ.”—LUKU 22:19.
OHÀN 19 Tenu-Núdùdù Oklunọ Tọn
BLADOPỌ a
1, 2. Naegbọn mí nọ yì Oflin to whemẹwhemẹ?
SỌN nudi owhe 2 000 die, Jesu ze ogbẹ̀ etọn jo do ota mítọn mẹ na mí nido mọ ogbẹ̀ madopodo. To ozán he jẹnukọnna okú Jesu tọn mẹ, e degbena hodotọ etọn lẹ nado nọ flin nuyiwa owanyi tọn etọn gbọn akla po ovẹn po yiyizan nado basi hùnwhẹ kleun de dali.—1 Kọl. 11:23-26.
2 Mí nọ setonuna gbedide Jesu tọn na mí yiwanna ẹn taun wutu. (Joh. 14:15) To whemẹwhemẹ to ojlẹ Oflin tọn mẹ, mí nọ dohia dọ mí yọ́n pinpẹn nuhe e wà tọn gbọn whenu yiyizan nado hodẹ̀ bo lẹnayihamẹpọn do nuhe okú etọn zẹẹmẹdo ji dali. Mí sọ nọ yí homẹhunhun do dó mahẹ dogọ to lizọnyizọn lọ mẹ, bo nọ na tuli mẹsusu dile e gán yọnbasi do nado wá kọnawudopọ hẹ mí to nujijọ vonọtaun enẹ whenu. Podọ na nugbo tọn, mí nọ magbe ma nado dike nudepope ni glọnalina mí nado yì Oflin.
3. Etẹwẹ mí na gbadopọnna to hosọ ehe mẹ?
3 To hosọ ehe mẹ, mí na gbadopọnna aliho atọ̀n he mẹ omẹ Jehovah tọn lẹ ko dovivẹnu ayidego tọn lẹ te nado flin okú Jesu tọn: 1) yé nọ basi hùnwhẹ lọ to aliho he mẹ Jesu degbena yé nado nọ basi i te mẹ, (2) yé nọ basi oylọna mẹdevo lẹ wá Oflin lọ, podọ (3) yé nọ basi Oflin lọ mahopọnna ninọmẹ sinsinyẹn lẹ.
MÍ NỌ BASI HÙNWHẸ LỌ TO ALIHO HE MẸ JESU DEGBÈ NADO NỌ BASI I TE MẸ
4. Nugbo tẹlẹ wẹ nọ họnwun to whemẹwhemẹ to Oflin whenu, podọ naegbọn nugbo ehelẹ do yin nujọnu taun na mí? (Luku 22:19, 20)
4 To whemẹwhemẹ to Oflin lọ whenu, mí nọ dotoaina hodidọ sinai do Biblu ji de he nọ na gblọndo kanbiọ delẹ tọn to aliho he họnwun mẹ. Mí nọ plọn nuhewutu gbẹtọvi lẹ do dó hudo ofligọ de tọn gọna lehe okú mẹdopo tọn gán suahọ ylando mẹsusu tọn do tọn. Yè nọ flin mí nuhe akla lọ po ovẹn lọ po nọtena gọna mẹhe dona do mahẹ to yé mẹ lẹ. (Hia Luku 22:19, 20.) Podọ, mí nọ lẹnayihamẹpọn do dona he to sẹdotẹnmẹ na mẹhe tindo todido aigba ji tọn lẹ ji. (Isa. 35:5, 6; 65:17, 21-23) Mí dona nọ ylọ nugbo ehelẹ dọ nujọnu taun. Gbẹtọ liva susu lẹ wẹ ma mọnukunnujẹ yé mẹ, podọ yé ma yọ́n obá he mẹ avọ́sinsan Jesu tọn họakuẹ jẹ. Yé masọ nọ basi hùnwhẹ Oflin okú etọn tọn to aliho he mẹ e degbe dọ ni nọ yin bibasi te mẹ. Etẹwutu?
5. To whenue suhugan apọsteli lẹ tọn ko kú godo, nawẹ mẹlẹ jẹ Oflin okú Jesu tọn basi ji gbọn?
5 Tlolo to okú suhugan apọsteli Jesu tọn lẹ tọn godo, mẹhe ylọ yede dọ Klistiani lẹ lìn biọ agun lọ mẹ. (Mat. 13:24-27, 37-39) Yé “nọ slokọna nuplọnmẹ lẹ nado dọ̀n devi lẹ dogodo yede tọn.” (Owalọ 20:29, 30) Dopo to nuhe Klistiani lalo enẹlẹ “slokọna” lẹ mẹ wẹ yindọ, yé wá jẹ pinplọn mẹlẹ ji dọ Jesu ma ze agbasa etọn jo “whladopo podọ kakadoi . . . nado hẹn ylando mẹsusu tọn,” dile Biblu dọ do gba, amọ́ dọ avọ́sinsan etọn dona nọ yin bibasi whẹwhẹ. (Heb. 9:27, 28) To egbehe, ahunjijlọnọ susu wẹ yí nuplọnmẹ lalo enẹ sè. Yé nọ pli do sinsẹ̀nhọ lẹ mẹ whẹwhẹ, to whedelẹnu to azán lẹpo ji, nado basi nuhe wá yin yiylọdọ “Avọ́sinsan Amísa Tọn.” b Sinsẹ̀n devo lẹ nọ basi hùnwhẹ Oflin okú Jesu tọn dopo vlavo, amọ́ suhugan hagbẹ sinsẹ̀n tọn yetọn lẹ tọn wẹ ma yọ́n nukaka de gando nuhe avọ́sinsan Jesu tọn wadotana go. Mẹdelẹ gán kanse dọ, ‘Be okú Jesu tọn zẹẹmẹdo dọ ylando ṣie lẹ gán yin jijona nugbonugbo a?’ Naegbọn yé do nọ kàn kanbiọ enẹ sè? To ninọmẹ delẹ mẹ, mẹhe nọ do ayihaawe dọ ylando lẹ ma gán yin jijona gbọn avọ́sinsan Jesu tọn gblamẹ lẹ wẹ nọ diọlinlẹnna yé. Nawẹ hodotọ nugbo Jesu tọn lẹ ko gọalọna gbẹtọ lẹ nado mọnukunnujẹ nugbo lọ mẹ gbọn?
6. To 1872, tadona tẹ kọ̀n wẹ pipli Biblu plọntọ lẹ tọn de wá?
6 To vivọnu owhe kanweko 19tọ tọn, pipli Biblu plọntọ lẹ tọn de he Charles Taze Russell yin nukọntọ na jẹ dogbapọnna Owe-wiwe lẹ ji po sọwhiwhe po. Yé jlo na yọ́n nugbo lọ gando nuhọakuẹ-yinyin avọ́sinsan Jesu tọn go gọna lehe okú etọn dona nọ yin finflin do. To 1872, yé wá tadona he sinai do Biblu ji lọ kọ̀n dọ Jesu hẹn ofligọ de yọnbasi na gbẹtọvi lẹpo nugbonugbo. Yé ma hẹn nuhe yé plọn lẹ na yede. Kakatimọ, yé hẹn onú ehelẹ zun yinyọnẹn na mẹdevo lẹ gbọn owe lẹ, linlinnamẹwe lẹ po alọnuwe lẹ po gblamẹ. Podọ e ma dẹn bọ yé jẹ apajlẹ Klistiani owhe kanweko tintan tọn lẹ tọn hodo ji bo nọ pli whladopo gee to whemẹ nado basi Oflin.
7. Nawẹ mí nọ mọaleyi sọn dodinnanu Biblu plọntọ he jẹnukọn lẹ tọn mẹ gbọn?
7 To egbehe, mí nọ mọaleyi sọn dodinnanu he Klistiani ahunjijlọnọ ehelẹ basi sọn owhe susu die lẹ mẹ. Gbọnna? Po dona Jehovah tọn po, mí ko mọnukunnujẹ nugbo lọ mẹ gando avọ́sinsan Jesu tọn go gọna nuhe avọ́sinsan enẹ wadotana lẹ. (1 Joh. 2:1, 2) Mí sọ plọn dọ Biblu donù todido awe go na gbẹtọvi he nọ hẹn homẹ Jiwheyẹwhe tọn hùn lẹ, enẹ wẹ ogbẹ̀ jọmaku to olọn mẹ na mẹdelẹ, podọ ogbẹ̀ madopodo to aigba ji na gbẹtọvi livi susu devo lẹ. Mí nọ dọnsẹpọ Jehovah dogọ dile mí to nulẹnpọndo obá he mẹ ewọ yiwanna mí jẹ ji gọna lehe dopodopo mítọn nọ mọaleyi sọn avọ́sinsan Jesu tọn mẹ do. (1 Pita 3:18; 1 Joh. 4:9) Enẹwutu, taidi mẹmẹsunnu mítọn nugbonọ he jẹnukọn lẹ, mí nọ basi oylọna mẹdevo lẹ nado wá kọnawudopọ hẹ mí to hùnwhẹ Oflin tọn tẹnmẹ to aliho he mẹ Jesu degbe dọ e ni nọ yin bibasi te.
MÍ NỌ BASI OYLỌNA MẸDEVO LẸ WÁ OFLIN LỌ
Etẹwẹ a gán wà nado tindo mahẹ gigọ́ to nujijla oylọ-basinamẹ Oflin tọn mẹ? (Pọ́n hukan 8-10tọ) e
8. Etẹwẹ omẹ Jehovah tọn lẹ ko wà nado basi oylọna mẹdevo lẹ wá Oflin? (Pọ́n yẹdide lọ.)
8 Sọn owhe susu lẹ die wẹ omẹ Jehovah tọn lẹ ko nọ basi oylọna mẹdevo lẹ wá Oflin. To bẹjẹeji owhe 1881 tọn, yè basi oylọna mẹmẹsunnu po mẹmẹyọnnu po he to États-Unis lẹ nado pli dopọ to owhé mẹmẹsunnu de tọn gbè to Allegheny to Pennsylvanie na nujijọ vonọtaun enẹ. To nukọn mẹ, agun dopodopo wẹ nọ pli na ede nado basi Oflin. To mars 1940, yè dọna wẹnlatọ lẹ dọ yé gán basi oylọna mẹdepope he do ojlo hia to aigba-denamẹ yetọn ji. To 1960, Bẹtẹli zín oylọ-basinamẹwe lẹ jẹgbonu na agun lẹ whla tintan. Sọn whenẹnu, oylọ-basinamẹwe Oflin tọn liva susu lẹ wẹ ko yin mimá. Naegbọn mí nọ yí whenu susu zan sọmọ bo nọ dovivẹnu nado basi oylọna mẹdevo lẹ?
9, 10. Mẹnu lẹ wẹ nọ mọaleyi sọn vivẹnudido mítọn nado ylọ mẹlẹ wá Oflin mẹ? (Johanu 3:16)
9 Dopo to whẹwhinwhẹ́n he wutu mí nọ basi oylọna mẹdevo lẹ nado wá kọnawudopọ hẹ mí to hùnwhẹ Oflin tọn bibasi mẹ lẹ mẹ wẹ yindọ mí nọ jlo dọ mẹhe wá whla tintan lẹ ni plọn nugbo lọ gando nuhe Jehovah po Jesu po ko wà na dopodopo mítọn go. (Hia Johanu 3:16.) Todido mítọn wẹ yindọ nuhe yé mọ bosọ sè to Oflin lọ whenu lẹ na whàn yé nado plọnnu dogọ, podọ nado lẹzun devizọnwatọ Jehovah tọn lẹ. Amọ́, mẹdevo lẹ sọ nọ mọaleyi sọn Oflin lọ mẹ ga.
10 Mí sọ nọ basi oylọna mẹhe masọ to Jehovah sẹ̀n ba lẹ. Mí nọ wàmọ nado flin yé dọ Jiwheyẹwhe gbẹ́ yiwanna yé. Mẹsusu wẹ nọ kẹalọyi oylọ-basinamẹ mítọn, podọ homẹ mítọn nọ hùn taun nado mọ yé. Hùnwhẹ Oflin tọn wiwá nọ flin yé lehe yé ko duvivi sinsẹ̀n-bibasi na Jehovah tọn do tọn wayi. Lẹnnupọndo apajlẹ Monica tọn ji. c E gọ̀jẹ yẹwhehodọ ji taidi wẹnlatọ de to azọ̀n bẹplamẹ COVID-19 tọn whenu. To whenue e ko yì Oflin 2021 tọn godo, e dọmọ: “Oflin vonọtaun de wẹ Oflin ehe yin na mi. Whla tintan die to owhe 20 gblamẹ he n’penugo bo dekunnuna mẹlẹ bosọ basi oylọna yé wá Oflin. N’wà nuhe go n’pé lẹpo nado basi oylọna gbẹtọ lẹ, na n’yọ́n pinpẹn nuhe Jehovah po Jesu po wà do ota ṣie mẹ tọn taun wutu.” (Salm. 103:1-4) Vlavo mẹlẹ kẹalọyi oylọ-basinamẹ mítọn kavi lala, mí nọ dovivẹnu nado ylọ yé wá Oflin lọ, to yinyọnẹn mẹ dọ vivẹnudido mítọn lẹ nọ sù to nukun Jehovah tọn mẹ.
11. Nawẹ Jehovah nọ dona vivẹnudido mítọn nado basi oylọna mẹlẹ wá Oflin gbọn? (Hagai 2:7)
11 Jehovah ko dona vivẹnudido mítọn nado basi oylọna mẹlẹ wá Oflin. To 2021, mahopọnna alọhẹndotenamẹ azọ̀n bẹplamẹ COVID-19 tọn lẹ, gbẹtọ 21 367 603 wẹ wá Oflin. Ehe yin nudi donù awe daa sọha Kunnudetọ Jehovah tọn lẹ tọn lẹdo aihọn pé! Na nugbo tọn, e ma yin sọha lọ poun wẹ yin nujọnu na Jehovah. E sọ nọ tindo ojlo to mẹhe wá lẹ dopodopo mẹ. (Luku 15:7; 1 Tim. 2:3, 4) Mí kudeji dọ Jehovah nọ yí azọ́n oylọ-basinamẹ tọn mítọn zan nado gọalọna mí nado mọ ahunjijlọnọ lẹ.—Hia Hagai 2:7.
MÍ NỌ BASI OFLIN LỌ MAHOPỌNNA NINỌMẸ SINSINYẸN LẸ
Jehovah nọ dona vivẹnudido mítọn lẹ nado basi Oflin (Pọ́n hukan 12tọ) f
12. Ninọmẹ tẹlẹ wẹ gán hẹn ẹn vẹawuna mí nado basi Oflin? (Pọ́n yẹdide lọ.)
12 Jesu dọ dọdai dọ to azán godo tọn lẹ mẹ, mí na pehẹ ninọmẹ sinsinyẹn wunmẹ lẹpo, yèdọ nukundiọsọmẹ whẹndo tọn, homẹkẹn, awhàn, azọ̀nylankan po onú devo lẹ po. (Mat. 10:36; Malku 13:9; Luku 21:10, 11) To whedelẹnu, ninọmẹ ehelẹ gán hẹn ẹn vẹawuna mí nado nọ basi hùnwhẹ Oflin okú Jesu tọn. Etẹwẹ mẹmẹsunnu po mẹmẹyọnnu mítọn lẹ po ko wà nado duto avùnnukundiọsọmẹnu mọnkọ lẹ ji, podọ nawẹ Jehovah gọalọna yé gbọn?
13. Nawẹ Jehovah dona adọgbigbo po gbemima Artem tọn po nado basi Oflin whenue e to gànpamẹ gbọn?
13 Gànpamẹninọ. Mẹmẹsunnu mítọn he to gànpamẹ na yise yetọn wutu lẹ nọ wà nuhe go yé pé lẹpo nado basi hùnwhẹ Oflin okú Jesu tọn. Lẹnnupọndo apajlẹ Artem tọn ji. To 2020 to ojlẹ Oflin lọ tọn mẹ, e yin súsú do gànhọ he gbló na nudi mẹtlu 4 to awà etọn lẹpo ji de mẹ, ehe nọ hẹn nudi gàntọ atọ́n. Mahopọnna dọ e to gànpamẹ, e penugo bo mọ nudelẹ he e na yizan taidi yẹhiadonu Oflin tọn lẹ, podọ e basi tito nado na hodidọ Oflin tọn lọ na ede. Amọ́, gàntọ hatọ etọn lẹ nọ nù azọ̀ bosọ nọ yí hogbe gbigble lẹ zan taun. Etẹwẹ e wà? E kanse yé eyin yé gán doalọtena hogbe gbigble lẹ yiyizan gọna azọ̀-nùnù na gànhiho dopo poun. E paṣa Artem dọ gàntọ-hatọ etọn lẹ yigbe ma nado nù azọ̀ kavi yí hogbe gbigble lẹ zan to Oflin lọ whenu. Artem dọmọ: “N’dọna yé dọ n’na dọhona yé gando Oflin lọ go.” Dile etlẹ yindọ yé dọ dọ emi ma jlo na sè nude gando nujijọ lọ go, whenue yé ko mọ bọ Artem basi Oflin lọ godo, yé kàn nususu biọ ẹ gandego.
14. Vivẹnu tẹlẹ wẹ yin dido nado basi Oflin lọ mahopọnna azọ̀n bẹplamẹ COVID-19 tọn?
14 Azọ̀n bẹplamẹ COVID-19 tọn. Whenue azọ̀n bẹplamẹ ehe gbajẹgbonu, omẹ Jehovah tọn lẹ ma gán sọ basi Oflin nukun sọ nukun ba. Amọ́, enẹ ma glọnalina yé nado basi Oflin. d Agun he gán yì Intẹnẹt ji lẹ basi Oflin lọ gbọn hodọdopọ video ji tọn gblamẹ. Bọ gbẹtọ livi susu he ma gán yì Intẹnẹt ji lẹ lo? To otò delẹ mẹ, tito yin bibasi na mẹlẹ nido pọ́n hodidọ lọ to televiziọn ji kavi nado sè to ladio ji. Humọ, alahọ lẹ yí hodidọ lọ do kànji to ogbè 500 linlán mẹ, na mẹhe tlẹ to lẹdo he to olá lẹ mẹ lẹ nido penugo bo basi Oflin lọ. Podọ mẹmẹsunnu nugbonọ lẹ basi tito na hoyidokanji lọ lẹ nido yin nina mẹhe do hudo yetọn lẹ.
15. Etẹwẹ a plọn sọn apajlẹ Biblu plọntọ de he nọ yin Sue tọn mẹ?
15 Nukundiọsọmẹ whẹndo tọn. Na mẹdelẹ, nuhe hẹn ẹn vẹawuna yé hugan nado basi Oflin lọ wẹ nukundiọsọmẹ whẹndo tọn. Lẹnnupọndo apajlẹ Biblu plọntọ de he nọ yin Sue tọn ji. To 2021, to azán he jẹnukọnna Oflin lọ gbè, Sue dọna mẹhe nọ plọn Biblu hẹ ẹ dọ, na nukundiọsọmẹ he pehẹ emi te to whégbè wutu, emi ma na penugo bo wá Oflin lọ. Mẹhe to Biblu plọn hẹ ẹ hia Luku 22:44 na ẹn. Enẹgodo, e basi zẹẹmẹ na ẹn dọ whenue mí pehẹ nuhahun lẹ, mí dona nọ hodo apajlẹ Jesu tọn bo nọ lẹhlan Jehovah to odẹ̀ mẹ bosọ nọ deji mlẹnmlẹn do Ewọ go. To wunkẹngbe, Sue wleawuna yẹhiadonu Oflin tọn lẹ, bosọ pọ́n tito Sinsẹ̀n-Bibasi Afọnnu tọn vonọtaun lọ to jw.org ji. To whèjai enẹ, whenue e to edeṣo to ohọ̀ etọn mẹ, e hodo tito-to-whinnu Oflin lọ tọn gbọn alokan ji. To nukọn mẹ, Sue kanwehlan mẹhe nọ plọn Biblu hẹ ẹ bo dọmọ: “A na mi tuli taun to osọ he wayi. N’wà nuhe go n’pé lẹpo nado wá Oflin lọ, podọ Jehovah wà dehe pò. N’ma gán basi zẹẹmẹ ayajẹ po pinpẹn nutọn ṣie po tọn!” Be a lẹndọ Jehovah gán gọalọna we eyin a pehẹ ninọmẹ mọnkọ de ya?
16. Naegbọn mí gán kudeji dọ Jehovah na dona vivẹnudido mítọn lẹ nado yì Oflin lọ? (Lomunu lẹ 8:31, 32)
16 Vivẹnu he mí nọ do nado basi hùnwhẹ Oflin okú Jesu tọn lẹ nọ sù to nukun Jehovah tọn mẹ taun. Mí gán kudeji dọ e na dona mí eyin mí nọ dohia dọ mí yọ́n pinpẹn nuhe e wà na mí tọn. (Hia Lomunu lẹ 8:31, 32.) Enẹwutu, mì gbọ mí ni magbe nado yì Oflin owhe ehe tọn, bosọ wà nuhe go mí pé lẹpo nado yidogọna mahẹ he mí nọ do to nuwiwa gbigbọmẹ tọn lẹ mẹ to ojlẹ Oflin tọn lọ mẹ.
OHÀN 18 Mí Yọ́n Pinpẹn Ofligọ lọ Tọn
a To mardi 4 avril 2023, gbẹtọ livi susu lẹ lẹdo aihọn pé na basi hùnwhẹ Oflin okú Klisti tọn. Mẹsusu lẹ wẹ na wá whla tintan. Mẹdevo lẹ he ko yin Kunnudetọ zohunhunnọ wayi bo masọ yì Oflin lọ pọ́n lẹ na wá kọnawudopọ hẹ mí whla tintan to owhe susu lẹ godo. Mẹdevo lẹ dona duto avùnnukundiọsọmẹnu tangan lẹ ji nado penugo bo wá. Depope he ninọmẹ towe yin, a gán kudeji dọ homẹ Jehovah tọn na hùn dọ a dovivẹnu nado wá otẹn lọ mẹ.
b Sinsẹ̀nnọ lẹ yise dọ to hùnwhẹ ehe whenu, akla po ovẹn lọ po nọ diọzun agbasa po ohùn Klisti tọn po. Na nugbo tọn, yé nọ lẹndọ agbasa po ohùn Jesu tọn po nọ yin yíyí do sanvọ́ whedepopenu he mẹde do mahẹ to hùnwhẹ ehe mẹ.
c Yinkọ delẹ ko yin didiọ.
d Sọ pọ́n hosọ lọ lẹ “Le Mémorial de 2021” to jw.org ji to flansegbe mẹ.
