HOSỌ OPLỌN TỌN 5
“Owanyi He Klisti Tindo Nọ Whàn Mí”
“Owanyi he Klisti tindo nọ whàn mí, . . . na mẹhe to ogbẹ̀ lẹ ma nado nọgbẹ̀ na yede ba.”—2 KỌL. 5:14, 15.
OHÀN 13 Klisti, Apajlẹ Mítọn
BLADOPỌ a
1, 2. (a) Numọtolanmẹ tẹwẹ mí gán do eyin mí lẹnnupọndo gbẹzan po lizọnyizọn Jesu tọn po ji? (b) Etẹwẹ mí na gbadopọnna to hosọ ehe mẹ?
WHENUE mí hẹn mẹyiwanna mítọn de bu to okú mẹ, mí nọ jẹdò etọn taun! To tintan whenu, mí gán wá pò na awubla kẹdẹ eyin mí lẹnnupọndo azán he jẹnukọnna okú etọn lẹ ji, titengbe eyin mẹyiwanna mítọn lọ mọ awufiẹsa whẹpo do kú. Amọ́, dile ojlẹ to yìyì, mí gán do ayajẹ jẹ obá de mẹ eyin mí lẹnnupọndo nude he e plọn mí kavi nude he e wà kavi dọ nado na mí tuli kavi nado whẹ́n nukiko na mí ji.
2 Mọdopolọ, mí nọ blawu eyin mí hianu gando awufiẹsa po okú Jesu tọn po go. To ojlẹ Oflin tọn mẹ, na taun tọn mí nọ yí whenu zan nado lẹnnupọndo lehe avọ́sinsan Jesu tọn họakuẹ na mí do ji. (1 Kọl. 11:24, 25) Amọ́, homẹ mítọn nọ hùn taun eyin mí lẹnnupọndo nuhe Jesu dọ bosọ wà lẹpo ji whenue e to aigba ji. Mí sọ nọ mọ tuli yí ga eyin mí lẹnnupọndo nuhe e to wiwà to alọnu gọna nuhe e na wà na mí to sọgodo lẹ ji. Ayihamẹlinlẹnpọn do onú ehelẹ gọna owanyi he e do na mí ji gán whàn mí nado nọ do pinpẹn nutọn hia to aliho dagbe lẹ mẹ dile mí na mọ do to hosọ ehe mẹ.
PINPẸN-NUTỌN-YINYỌNẸN NỌ WHÀN MÍ NADO HODO JESU
3. Whẹwhinwhẹ́n tẹlẹ wẹ mí do nado yọ́n pinpẹn ofligọ lọ tọn?
3 Nulinlẹnpọn do gbẹzan po okú Jesu tọn po ji nọ whàn mí nado wleawuna pinpẹn-nutọn-yinyọnẹn. To lizọnyizọn aigba ji tọn etọn blebu whenu, Jesu plọnnu gbẹtọ lẹ gando dona he Ahọluduta Jiwheyẹwhe tọn na hẹnwa lẹ go. Mí nọ yọ́n pinpẹn nugbo he gando Ahọluduta lọ go ehelẹ tọn taun. Mí nọ dopẹ́ dọ ofligọ lọ yin awuwlena, na e hùn dotẹnmẹ dote na mí nado duvivi haṣinṣan pẹkipẹki de tọn hẹ Jehovah po Jesu po wutu. Mẹhe do yise hia to Jesu mẹ lẹ lọsu tindo todido lọ nado nọgbẹ̀ kakadoi, podọ nado mọ mẹyiwanna yetọn he ko kú lẹ whladopo dogọ. (Joh. 5:28, 29; Lom. 6:23) Mí ma wà nudepope nado jẹna dona ehelẹ; mọ mí ma gán suahọ nuhe Jiwheyẹwhe po Klisti po wà na mí tọn pọ́n gbede. (Lom. 5:8, 20, 21) Amọ́, mí gán do pinpẹn-nutọn-yinyọnẹn sisosiso mítọn hia yé. Gbọnna?
Nawẹ ayihamẹlinlẹnpọn do apajlẹ Malia Magdaleni tọn ji whàn we nado nọ do pinpẹn nutọn hia gbọn? (Pọ́n hukan 4, 5tọ)
4. Nawẹ Malia Magdaleni dohia dọ emi yọ́n pinpẹn nuhe Jesu wà na ẹn tọn gbọn? (Pọ́n yẹdide lọ.)
4 Lẹnnupọndo apajlẹ yọnnu Ju de he nọ yin Malia Magdaleni tọn ji. Ninọmẹ sinsinyẹn de mẹ jugbọn wẹ e te, na aovi ṣinawe to yadona ẹn wutu. E dona ko mọdọ wà-gbọn-de-ma-tin. Enẹwutu, yí nukun homẹ tọn do pọ́n lehe e na ko yọ́n pinpẹn etọn do sọ whenue Jesu tún in dote sọn nuyiwadomẹji aovi lẹ tọn si! Pinpẹn-nutọn-yinyọnẹn whàn ẹn nado lẹzun hodotọ etọn, podọ nado yí whenu, huhlọn po nutindo etọn lẹ po zan nado nọgodona lizọnyizọn lọ. (Luku 8:1-3) Dile etlẹ yindọ Malia yọ́n pinpẹn nuhe Jesu wà na ẹn tọn, e gán ko nọma yọnẹn dọ Jesu na sọ wà nuhe klo humọ taun de na ẹn to nukọn mẹ. E na ze ogbẹ̀ etọn jo do gbẹtọvi lẹ tamẹ, “na mẹdepope he do yise hia to ewọ mẹ” nido sọgan tindo ogbẹ̀ madopodo. (Joh. 3:16) Etomọṣo, Malia do pinpẹn nutọn etọn hia na Jesu gbọn nugbonọ-yinyin etọn gblamẹ. Whenue Jesu to awufiẹsa mẹ to yatin ji, Malia ṣite to apá na ẹn, nado nọgodona ewọ po mẹdevo lẹ po to numọtolanmẹ-liho. (Joh. 19:25) To okú Jesu tọn godo, Malia po yọnnu awe devo lẹ po hẹn nuwhẹ́nkun lẹ wá yọdò lọ kọ̀n na ṣiọdidi etọn. (Malku 16:1, 2) Jehovah suahọ Malia taun na nugbonọ-yinyin etọn. E do ayajẹ lọ nado mọ Jesu he yin finfọnsọnku lọ bosọ dọho hẹ ẹ, yèdọ lẹblanulọkẹyi de he suhugan devi lẹ tọn ma tindo.—Joh. 20:11-18.
5. Nawẹ mí gán dohia dọ mí yọ́n pinpẹn nuhe Jehovah po Jesu po ko wà na mí lẹ tọn gbọn?
5 Mílọsu gán dohia dọ mí yọ́n pinpẹn nuhe Jehovah po Jesu po ko wà na mí lẹpo tọn eyin mí nọ yí whenu, huhlọn po nutindo mítọn lẹ po do nọgodona azọ́n Ahọluduta lọ tọn. Di apajlẹ, mí gán ze míde jo nado gbá nọtẹn sinsẹ̀n-bibasi wiwe-ṣeke tọn lẹ podọ nado hẹn yé do ninọmẹ dagbe mẹ.
OWANYI NA JEHOVAH PO JESU PO NỌ WHÀN MÍ NADO YIWANNA MẸDEVO LẸ
6. Naegbọn mí gán dọ dọ ofligọ lọ yin nunina de na dopodopo mítọn?
6 Eyin mí lẹnnupọndo obá he mẹ Jehovah po Jesu po yiwanna mí jẹ ji, mílọsu nọ yin whinwhàn nado yiwanna yé. (1 Joh. 4:10, 19) Owanyi he mí tindo na yé sọ nọ jideji titengbe whenue mí mọnukunnujẹemẹ dọ Jesu kú do ota mítọn mẹ tlọlọ. Apọsteli Paulu kẹalọyi ehe, podọ e do pinpẹn nutọn etọn hia whenue e kanwehlan Galatianu lẹ dọmọ: “Visunnu Jiwheyẹwhe tọn . . . yiwanna mi bo ze ede jo do ota ṣie mẹ.” (Gal. 2:20) To dodonu ofligọ lọ tọn ji Jehovah ko dọ̀n we sẹpọ ede, na a nido sọgan yin họntọn etọn. (Joh. 6:44) Be homẹ towe ma hùn nado yọnẹn dọ Jehovah mọ nudagbe de to hiẹ mẹ bosọ suahọ daho hugan lọ, na a nido sọgan yin hihia do họntọn etọn lẹ mẹ ya? Be ehe ma hẹn owanyi towe na Jehovah po Jesu po siso dogọ ya? Mí na wà dagbe nado kanse míde dọ, ‘Etẹwẹ owanyi enẹ na whàn mi nado wà?’
Owanyi mítọn na Jiwheyẹwhe po Klisti po nọ whàn mí nado nọ do mahẹ to owẹ̀n Ahọluduta lọ tọn lilá na gbẹtọ wunmẹ lẹpo mẹ (Pọ́n hukan 7tọ)
7. Dile yẹdide lọ dohia do, nawẹ dopodopo mítọn gán dohia dọ mí yiwanna Jehovah po Jesu po gbọn? (2 Kọlintinu lẹ 5:14, 15; 6:1, 2)
7 Owanyi mítọn na Jiwheyẹwhe po Klisti po nọ whàn mí nado do owanyi hia mẹdevo lẹ. (Hia 2 Kọlintinu lẹ 5:14, 15; 6:1, 2.) Aliho de nado do owanyi mítọn hia wẹ nado yí zohunhun do dó mahẹ to azọ́n yẹwhehodidọ tọn lọ mẹ. Mí nọ dọhona mẹdepope he mí dukosọ hẹ. Mí ma nọ de mẹdepope dovo, na sinmẹ agbasa tọn, akọ̀, fihe mẹlọ wá sọn kavi na e yin adọkunnọ kavi wamọnọ wutu. Gbọnmọ dali, mí nọ yinuwa to kọndopọ mẹ hẹ lẹndai Jehovah tọn lọ dọ “gbẹtọ wunmẹ lẹpo ni yin whinwhlẹngán bo wá oyọnẹn he pegan nugbo tọn kọ̀n.”—1 Tim. 2:4.
8. Nawẹ mí gán dohia dọ mí yiwanna mẹmẹsunnu po mẹmẹyọnnu mítọn lẹ po gbọn?
8 Mí sọ nọ dohia dọ mí yiwanna Jiwheyẹwhe po Klisti po eyin mí nọ yiwanna mẹmẹsunnu po mẹmẹyọnnu mítọn lẹ po. (1 Joh. 4:21) Mí nọ tindo ojlo nujọnu tọn to yé mẹ bosọ nọ nọgodona yé to whlepọn lẹ whenu. Mí nọ miọnhomẹna yé whenue yé hẹn mẹyiwanna yetọn de bu to okú mẹ, nọ dla yé pọ́n whenue yé to azọ̀njẹ bosọ nọ wà nuhe go mí pé lẹpo nado na tuli yé to whenue yé gbọjọ. (2 Kọl. 1:3-7; 1 Tẹs. 5:11, 14) Mí ma nọ gọ̀n odẹ̀ ma hò na yé, na mí yọnẹn dọ “ovẹ̀ dodonọ tọn nọ wazọ́n taun.”—Jak. 5:16.
9. Aliho devo tẹ mẹ wẹ mí gán dohia dọ mí yiwanna mẹmẹsunnu po mẹmẹyọnnu mítọn lẹ po te?
9 Mí sọ nọ dohia dọ mí yiwanna mẹmẹsunnu po mẹmẹyọnnu mítọn lẹ po eyin mí nọ dovivẹnu nado nọ nọ̀ jijọho mẹ hẹ yé. Mí nọ tẹnpọn nado hodo apajlẹ jonamẹ Jehovah tọn. Eyin Jehovah desọn ojlo mẹ bo dike Visunnu etọn ni kú na ylando mítọn lẹ, be mí ma dona wleawufo nado nọ jona mẹmẹsunnu po mẹmẹyọnnu mítọn lẹ po to whenue yé ṣinuwa do mí ya? Mí ma na jlo na taidi afanumẹ ylankan he hó Jesu dọ to apajlẹ etọn de mẹ lọ. Etlẹ yin to whenue ogán etọn ko jo ahọ́ daho de do na ẹn godo, afanumẹ ehe gbẹ́ nado jo ahọ́ he whè tlala he afanumẹ hatọ etọn dù do e na ẹn. (Mat. 18:23-35) Eyin a ko tindo dẹ́sọ-dẹ́mẹ hẹ mẹde to agun lọ mẹ, be a gán ze afọdide tintan lọ nado basi jijọho whẹpo do wá Oflin ya? (Mat. 5:23, 24) Mọwiwà na dohia dọ a yiwanna Jehovah po Jesu po sisosiso.
10, 11. Nawẹ mẹho lẹ gán dohia dọ yé yiwanna Jehovah po Jesu po gbọn? (1 Pita 5:1, 2)
10 Nawẹ mẹho agun tọn lẹ gán nọ dohia dọ yé yiwanna Jehovah po Jesu po gbọn? Aliho titengbe dopo wẹ nado nọ penukundo nuhudo lẹngbọ Jesu tọn lẹ tọn go. (Hia 1 Pita 5:1, 2.) Jesu hẹn nuagokun ehe họnwun na apọsteli Pita. To whenue Pita ko mọ́n Jesu whla atọ̀n godo, e taidi dọ e to jijlo vẹkuvẹku nado dohia dọ emi yiwanna Jesu. To fọnsọnku Jesu tọn godo, e kanse Pita dọmọ: “Simọni visunnu Johanu tọn, be hiẹ yiwanna mi ya?” Ayihaawe ma tin dọ Pita na ko wà nuhe go e pé lẹpo nado dohia dọ emi yiwanna Ogán emitọn. Jesu dọna Pita dọmọ: “Nọ yìn lẹngbọ pẹvi ṣie lẹ.” (Joh. 21:15-17) Podọ to pipotọ gbẹzan Pita tọn mẹ, e yí owanyi do penukundo lẹngbọ Oklunọ tọn lẹ go, bo gbọnmọ dali dohia dọ emi yiwanna Jesu.
11 Mẹho agun tọn lẹ emi, nawẹ mì gán dohia to ojlẹ Oflin tọn lọ mẹ gbọn dọ ohó he Jesu dọna Pita yin nujọnu na mì? Mì gán do obá he mẹ mì yiwanna Jehovah po Jesu po jẹ hia, eyin mì nọ tindo mahẹ whẹwhẹ to azọ́n lẹngbọhọtọ tọn mẹ bosọ nọ dovivẹnu sinsinyẹn nado gọalọna mẹhe gbọjọ lẹ nado lẹkọwa Jehovah dè. (Ezek. 34:11, 12) Mì gán sọ nọ do ojlo hia to Biblu plọntọ lẹ po mẹyọyọ he wá Oflin lẹ po mẹ, bo wà nuhe go mì pé lẹpo nado hẹn devi sọgodo tọn ehelẹ voawu.
OWANYI NA KLISTI NỌ WHÀN MÍ NADO YIN ADỌGBOTỌ
12. Naegbọn nulinlẹnpọn do nuhe Jesu dọ to ozán he jẹnukọnna okú etọn mẹ ji gán na mí adọgbigbo? (Johanu 16:32, 33)
12 To ozán he jẹnukọnna okú Jesu tọn mẹ, e dọna devi etọn lẹ dọmọ: “To aihọn mẹ, mì na nọ tindo nukunbibia, ṣigba mì gboadọ! N’ko gbawhàn aihọn tọn.” (Hia Johanu 16:32, 33.) Etẹwẹ gọalọna Jesu nado yí adọgbigbo do pannukọn kẹntọ etọn lẹ bo yin nugbonọ kakajẹ okú? Jidide do Jehovah go wẹ. Na Jesu yọnẹn dọ hodotọ emitọn lẹ na pehẹ whlepọn mọnkọ lẹ wutu, e biọ to Jehovah si nado họ́ yé. (Joh. 17:11) Naegbọn ehe do nọ na mí adọgbigbo? Na Jehovah dohuhlọn hú kẹntọ mítọn lẹpo wutu. (1 Joh. 4:4) Nudepope ma nọ whlá do e. Mí kudeji dọ eyin mí nọ ganjẹ Jehovah go, mí gán duto obu mítọn lẹ ji bo yin adọgbotọ.
13. Nawẹ Josẹfu Alimate tọn do adọgbigbo hia gbọn?
13 Lẹnnupọndo apajlẹ Josẹfu Alimate tọn ji. Ju lẹ nọ na ẹn sisi taun. E yin hagbẹ Sanhedlin tọn de, yèdọ whẹdatẹn daho Ju lẹ tọn. Amọ́ to lizọnyizọn aigba ji tọn Jesu tọn whenu, Josẹfu ma do adọgbigbo hia paali. Johanu dọ dọ “na obu etọn na Ju lẹ wutu, [e] yin devi Jesu tọn de to nuglọ.” (Joh. 19:38) Dile etlẹ yindọ Josẹfu tindo ojlo to owẹ̀n Ahọluduta lọ tọn mẹ, e ma dín dọ mẹlẹ ni yọnẹn dọ e tindo yise to Jesu mẹ. Matin ayihaawe, e dibu dọ emi na hẹn otẹn nukundeji he mẹ emi tin te bu. Depope he whẹho lọ yin, Biblu dọna mí dọ to okú Jesu tọn godo, Josẹfu wá “tindo adọgbigbo bo yì Pilati dè bosọ biọ oṣiọ Jesu tọn.” (Malku 15:42, 43) Josẹfu masọ tẹnpọn nado whlá dọ emi yin devi Jesu tọn ba.
14. Etẹwẹ a dona wà eyin a to ahidi hẹ obu gbẹtọ tọn?
14 Be hiẹ lọsu ko dibuna gbẹtọ pọ́n taidi Josẹfu wẹ ya? To wehọmẹ kavi to azọ́nmẹ, be winyan nọ hù we to whedelẹnu nado do dewe hia di dopo to Kunnudetọ Jehovah tọn lẹ mẹ wẹ ya? Be a nọ to awuwhle nado lẹzun wẹnlatọ kavi nado yí baptẹm, na a to budi na nuhe mẹdevo lẹ gán lẹn wutu wẹ ya? Ma dike numọtolanmẹ enẹlẹ ni glọnalina we nado wà nuhe a yọnẹn dọ e sọgbe blo. Nọ hodẹ̀ vẹkuvẹku hlan Jehovah. Biọ to e si nado na we adọgbigbo nado wà ojlo etọn. Dile a to mimọ lehe Jehovah to gblọndo na na odẹ̀ towe lẹ do, a na do huhlọn bosọ gboadọ dogọ.—Isa. 41:10, 13.
OWANYI NỌ WHÀN MÍ NADO TO JEHOVAH SẸ̀N ZỌNMII
15. To whenue Jesu ko sọawuhia devi etọn lẹ godo, etẹwẹ ayajẹ yetọn whàn yé nado wà? (Luku 24:52, 53)
15 Devi lẹ blawu taun whenue Jesu kú. Ze dewe do otẹn yetọn mẹ. Gbọnvona dọ họntọn yiwanna yetọn wẹ kú, yé sọ do numọtolanmẹ lọ dọ yé hẹn todido bu. (Luku 24:17-21) Amọ́ to whenue Jesu sọawuhia yé, e yí whenu zan nado gọalọna yé nado mọnukunnujẹ azọngban etọn to hẹndi dọdai Biblu tọn lẹ tọn mẹ. E sọ deazọ́n titengbe de na yé nado wà. (Luku 24:26, 27, 45-48) Azán 40 to whenue Jesu ko yì olọn mẹ godo, awubla devi lẹ tọn lẹzun ayajẹ daho. Homẹ yetọn hùn taun, na yé yọnẹn dọ Ogán yetọn to ogbẹ̀ bosọ wleawufo nado gọalọna yé nado hẹn azọ́ndenamẹ yọyọ yetọn di. Ayajẹ yetọn whàn yé nado to Jehovah pà madoalọte.—Hia Luku 24:52, 53; Owalọ 5:42.
16. Nawẹ mí gán hodo apajlẹ devi Jesu tọn lẹ tọn gbọn?
16 Nawẹ mí gán hodo apajlẹ devi Jesu tọn lẹ tọn gbọn? Mí gán do ayajẹ eyin mí nọ basi sinsẹ̀n hlan Jehovah e ma yin to ojlẹ Oflin tọn kẹdẹ mẹ, amọ́ to owhe lọ blebu gblamẹ. Ehe nọ biọ dọ mí ni ze Ahọluduta Jiwheyẹwhe tọn do otẹn tintan mẹ to gbẹzan mítọn mẹ. Di apajlẹ, mẹsusu ko vọ́ tito agbasazọ́n tọn yetọn basi nado nọ do mahẹ to lizọnyizọn lọ mẹ, yì opli lẹ bosọ nọ basi sinsẹ̀n-bibasi whẹndo tọn to gbesisọ mẹ. Mẹdelẹ tlẹ ko de ma nado do nutindo agbasa tọn he mẹdevo lẹ nọ pọnhlan taidi dandannu lẹ, na yé nido sọgan yọ́n-na-yizan dogọ to agun mẹ kavi na yé nido sẹ̀n to fie nuhudo wẹnlatọ Ahọluduta lọ tọn lẹ sù te. Dile etlẹ yindọ mí nọ do hudo akọndonanu tọn nado to Jehovah sẹ̀n zọnmii, e dopà dọ emi na dona mí susugege eyin mí ze onú Ahọluduta lọ tọn lẹ do otẹn tintan mẹ to gbẹzan mítọn mẹ.—Howh. 10:22; Mat. 6:32, 33.
To ojlẹ Oflin tọn lọ gblamẹ, nọ yí whenu zan nado lẹnayihamẹpọn do nuhe Jehovah po Jesu po ko wà do ota towe mẹ ji (Pọ́n hukan 17tọ)
17. Etẹwẹ a magbe nado wà to ojlẹ Oflin tọn ehe mẹ? (Pọ́n yẹdide lọ.)
17 Mí to nukọnpọnhlan nado basi hùnwhẹ Oflin tọn to mardi 4 avril. Amọ́, ma nọte kakajẹ whenẹnu whẹpo do lẹnnupọndo gbẹzan po okú Jesu tọn po gọna owanyi he ewọ po Jehovah po dohia mí ji blo. Nọ yí dotẹnmẹ depope he hundote na we to ojlẹ Oflin tọn lọ blebu gblamẹ zan nado wàmọ. Di apajlẹ, nọ de whenu dovo nado hia bosọ lẹnayihamẹpọn do nujijọ he to apotin lọ “Osẹ Godo Tọn He Jesu Yizan to Aigba Ji” mẹ lẹ ji, ehe tin to Nudọnamẹ Dogọ B12 glọ to Lẹdogbedevomẹ Aihọn Yọyọ Tọn mẹ. Dile a to mọwà, dín adà Biblu tọn he na hẹn pinpẹn nutọn towe, owanyi, adọgbigbo gọna ayajẹ towe jideji lẹ. Enẹgodo, lẹnnupọndo aliho tangan he mẹ a gán do pinpẹn-nutọn-yinyọnẹn ahundopo tọn towe hia te lẹ ji. A gán kudeji dọ Jesu na yọ́n pinpẹn nuhe a nọ wà nado flin in to ojlẹ Oflin tọn ehe mẹ lẹpo tọn.—Osọ. 2:19.
OHÀN 17 “Yẹn Jlo”
a To ojlẹ Oflin tọn mẹ, mí nọ yin tulina nado lẹnnupọndo gbẹzan po okú Jesu tọn po ji gọna owanyi he ewọ po Otọ́ etọn po dohia mí. Mọwiwà gán whàn mí nado yinuwa. Hosọ ehe na dọhodo aliho dagbe delẹ he mẹ mí gán do pinpẹn nutọn mítọn na ofligọ lọ hia te ji gọna lehe mí na do owanyi mítọn na Jehovah po Jesu po hia do. Mí nasọ mọ lehe mí gán yin whinwhàn nado nọ yiwanna mẹmẹsunnu po mẹmẹyọnnu mítọn lẹ po, nọ do adọgbigbo hia bosọ nọ mọ ayajẹ to sinsẹ̀nzọn mítọn mẹ do.
