1. Naegbọn azán Oflin tọn do yin azán titengbe hugan owhe lọ tọn? (Luku 22:19, 20)

 NA OMẸ Jehovah tọn lẹ, Oflin okú Klisti tọn wẹ yin azán titengbe hugan owhe lọ tọn. Nujijọ ehe kẹdẹ wẹ Jesu degbena hodotọ etọn lẹ tlọlọ nado nọ flin. (Hia Luku 22:19, 20.) Mí nọ to nukọnpọnhlan Oflin lọ na whẹwhinwhẹ́n susu lẹ wutu. Mì gbọ mí ni gbadopọnna delẹ to yé mẹ.

2. Etẹwẹ yin whẹwhinwhẹ́n delẹ he wutu mí nọ to nukọnpọnhlan na Oflin lọ?

² Oflin lọ nọ gọalọna mí nado lẹnayihamẹpọndo nujọnu-yinyin ofligọ lọ tọn ji. E nọ flin mí aliho voovo he mẹ mí gán do pinpẹn-nutọn-yinyọnẹn mítọn hia na avọ́sinsan Jesu tọn te lẹ. (2 Kọl. 5:14, 15) E sọ nọ hùn dotẹnmẹ dote na mí nado duvivi “tulinina ode awetọ” tọn hẹ mẹmẹsunnu po mẹmẹyọnnu mítọn lẹ po. (Lom. 1:12) To whemẹwhemẹ, susu mẹhe ko gbọjọ lẹ tọn wẹ nọ wá Oflin lọ. Delẹ to yé mẹ tlẹ nọ yin whinwhàn nado lẹkọwa Jehovah dè, na yè dokuavọna yé po zohunhun po wutu. Podọ, jlodotọ susu lẹ wẹ nọ yin whinwhàn nado jẹ zọnlinzin ji to aliho ogbẹ̀ tọn lọ ji, na nuhe yé mọ bosọ sè lẹ wutu. Abajọ bọ Oflin lọ do yin nujijọ vonọtaun de na mí!

3. Nawẹ Oflin lọ nọ kọ̀n pipli mẹmẹsunnu tọn lẹdo aihọn pé tọn mítọn dopọ gbọn? (Sọ Pọ́n yẹdide lọ.)

³ Sọ lẹnnupọndo lehe Oflin lọ nọ kọ̀n pipli mẹmẹsunnu lẹ tọn lẹdo aihọn pé tọn mítọn dopọ do ji. Kunnudetọ Jehovah tọn lẹ nọ pli dopọ dile owhè jẹ họyì ji vudevude lẹdo aihọn pé. Mímẹpo wẹ nọ dotoaina hodidọ de he nọ zinnudo nujọnu-yinyin ofligọ lọ tọn ji. Mí nọ ji ohàn pipà tọn awe, nọ ze  yẹhiadonu lẹ gbọn nukọnna mẹlẹ bosọ nọ yí ahundopo do dọ “niṣẹ” to vivọnu odẹ̀ ẹnẹ he nọ yin hihò lọ lẹ tọn. To nudi gànhiho 24 gblamẹ, agun lẹpo wẹ nọ basi hùnwhẹ ehe to aliho dopolọ mẹ. Be a gán yí nukun homẹ tọn do pọ́n ayajẹ Jehovah po Jesu po tọn to whenue yé mọ bọ mí topọ bo to gbégbòna yé to aliho ehe mẹ ya?

4. Etẹ ji wẹ mí na dọhodo to hosọ ehe mẹ?

⁴ To hosọ ehe mẹ, mí na dọhodo kanbiọ ehelẹ ji: Nawẹ mí gán wleawudaina ahun mítọn na Oflin lọ gbọn? Nawẹ mí gán gọalọna mẹdevo lẹ nado mọaleyi sọn e mẹ gbọn? Podọ, nawẹ mí gán gọalọna mẹhe ko gbọjọ lẹ gbọn? Gblọndo kanbiọ ehelẹ tọn na gọalọna mí nado wleawufo na nujijọ vonọtaun ehe.

NAWẸ MÍ GÁN WLEAWUDAINA AHUN MÍTỌN NA OFLIN LỌ GBỌN?

5. (a) Naegbọn mí dona nọ lẹnayihamẹpọndo nujọnu-yinyin ofligọ lọ tọn ji? (Salmu lẹ 49:7, 8) (b) Etẹwẹ a plọn sọn video lọ Naegbọn Jesu Do Kú? mẹ?

⁵ Aliho titengbe dopo he mẹ mí sọgan wleawudaina ahun mítọn na Oflin lọ te wẹ gbọn ayihamẹlinlẹnpọn do nujọnu-yinyin avọ́sinsan ofligọ Jesu Klisti tọn ji dali. Eyin mítọn kẹdẹ wẹ, e ma gán pà mí gbede nado yí míde sọn ylando po okú po si. (Hia Salmu lẹ 49:7, 8; sọ pọ́n video lọ Naegbọn Jesu Do Kú?) a Enẹwutu, Jehovah basi tito bọ Jesu ze ogbẹ̀ etọn jo nado whlẹn mí. Podọ avọ́sinsan daho wẹ ehe biọ to Jehovah po Jesu po si. (Lom. 6:23) Dile mí to ayihamẹlẹnpọn do nuhe Jehovah po Jesu po yí do sanvọ́ ji, mọ wẹ pinpẹn-nutọn-yinyọnẹn mítọn na ofligọ lọ na jideji dogọ do niyẹn. Mí na gbadopọnna delẹ poun to nuhe ofligọ lọ biọ to Jehovah po Jesu po si lẹ mẹ. Amọ́ jẹnukọn whẹ́, etẹwẹ ofligọ lọ zẹẹmẹdo?

6. Etẹwẹ ofligọ lọ zẹẹmẹdo, podọ naegbọn Jesu do suahọ Ofligọ lọ tọn?

⁶ Ofligọ yin akuẹ de he yè nọ sú nado gọ̀ nude họ̀. Sunnu tintan lọ Adam yin didá taidi mẹpipe de. Amọ́, whenue e waylando, e hẹn todido ogbẹ̀ madopodo tọn he ewọ po ovi etọn lẹ po tindo jlọjẹ na lọ bu. Nado gọ̀ nuhe Adam hẹnbu lọ họ̀, Jesu ze ogbẹ̀ pipé etọn jo taidi avọ́sinsan de. To gbẹzan Jesu tọn blebu whenu to aigba ji, “e ma waylando depope, mọjanwẹ oklọ ma yin mimọ to onù etọn mẹ” do niyẹn. (1 Pita 2:22) To whenue Jesu kú, ogbẹ̀ pipé etọn sọzẹn pẹẹ hẹ ogbẹ̀ he Adam hẹnbu lọ.—1 Kọl. 15:45; 1 Tim. 2:6.

7. Etẹwẹ yin delẹ to whlepọn he Jesu pehẹ whenue e to aigba ji lẹ mẹ?

⁷ Jesu setonuna Otọ́ olọn mẹ tọn etọn to aliho pipé mẹ, mahopọnna whlepọn susu he e pehẹ to aigba ji lẹ. To whenue Jesu to pẹvi, e dona litaina aṣẹpipa mẹjitọ etọn he yin mapenọ lẹ tọn, mahopọnna dọ ewọ yin mẹpipe de. (Luku 2:51) To whenue Jesu to aflanmẹ, e dona nọavùnte sọta kọgbidinamẹ depope he gán sisẹ́ ẹ nado vẹtoli kavi ma nado yin nugbonọ. Podọ to whenue Jesu whẹ́n, e dona nọavùnte sọta mẹtẹnpọn Satani Lẹgba tọn lẹ, kakajẹ mẹgbeyinyan tlọlọ lọ ma nado yin nugbonọ na Jiwheyẹwhe ji. (Mat. 4:1-11) Satani magbe nado hẹn Jesu waylando, gbọnmọ dali e ma na penugo nado suahọ ofligọ lọ tọn.

8. Whlepọn devo tẹlẹ wẹ Jesu doakọnna?

⁸ To lizọnyizọn aigba ji tọn Jesu tọn whenu, e doakọnna whlepọn devo lẹ. Kẹntọ etọn lẹ dohomẹkẹn ẹn, bosọ tẹnpọn nado hù i. (Luku 4:28, 29; 13:31) E dona doakọnna awugbopo hodotọ etọn lẹ tọn. (Malku 9:33, 34) Whenue e to owhẹ̀ nukọn, yè sayana ẹn bosọ ṣàn ẹn kò. Enẹgodo, e jiya awufiẹsa sinsinyẹn tọn bosọ  yin hùhù taidi sẹ́nhẹngbatọ de. (Heb. 12:1-3) Ewọ dona doakọnna adà godo tọn whlepọn etọn tọn na ede, enẹ wẹ matin hihọ́-basinamẹ Jehovah tọn. b—Mat. 27:46.

9. Etẹwẹ yin numọtolanmẹ mítọn gando avọ́sinsan Jesu tọn go? (1 Pita 1:8)

⁹ E họnwun dọ ofligọ lọ biọ avọ́sinsan daho to Jesu si. Be owanyi mítọn na Jesu ma nọ siso dogọ eyin mí lẹnayihamẹpọndo onú planplan he e desọn ojlo mẹ bo yí do sanvọ́ do ota mítọn mẹ lẹ ji ya?—Hia 1 Pita 1:8.

10. Etẹwẹ ofligọ lọ biọ to Jehovah si?

¹⁰ Etẹwẹ dogbọn Jehovah dali? Etẹwẹ e desọn ojlo mẹ nado yí do sanvọ́, na Jesu nido suahọ ofligọ lọ tọn? Jehovah po Jesu po wẹ tindo haṣinṣan otọ́ de po visunnu etọn po tọn he sinyẹn hugan lọ. (Howh. 8:30) Pọ́n lehe e na ko yinuwado Jehovah ji sọ dile e mọ bọ Jesu to akọndona whlepọn susu lẹ to aigba ji. Ayihaawe ma tin dọ e na ko vẹawuna Jehovah taun dile e mọ bọ yè to nuyiwa hẹ Visunnu etọn to aliho agọ̀ mẹ, gbẹ́ ẹ dai bosọ to whiwhle e pọ́n.

11. Na apajlẹ de nado dohia nuhe na ko yin numọtolanmẹ Jehovah tọn whenue e mọ bọ Jesu to yinyin hùhù.

¹¹ Mẹjitọ depope he ovi ko kú do pọ́n nọ mọnukunnujẹ awufiẹsa sinsinyẹn he enẹ nọ hẹnwa mẹ. Mí do yise dolido to fọnsọnku mẹ, amọ́ enẹ ma nọ de awufiẹsa he okú mẹyiwanna de tọn nọ hẹnwa sẹ̀. Apajlẹ ehe na gọalọna mí nado mọnukunnujẹ lehe e dona ko ṣí na Jehovah whenue e mọ bọ Visunnu yiwanna etọn jiya bo kú to owhe 33 W.M. mẹ. c—Mat. 3:17.

12. Etẹwẹ mí gán wà to ojlẹ he jẹnukọnna Oflin lọ lẹ mẹ?

¹² Kakajẹ whenue Oflin lọ na yin bibasi, naegbọn a ma na basi tito oplọn mẹdetiti tọn kavi Sinsẹ̀n-Bibasi Whẹndo tọn de tọn he na sinai do ofligọ lọ ji? Zan Anademẹwe Dodinnanu Tọn kavi owe sinai do Biblu ji devo lẹ nado gbadopọnna hosọ lọ to gigọ́ mẹ. d Humọ, hẹn ẹn diun dọ a hodo tito Biblu hihia tọn na ojlẹ Oflin tọn he nọ sọawuhia to Nuplọnwe Opli Gbẹzan Tọn mítọn mẹ. Podọ, to azán Oflin tọn lọ gbè, ma wọnji nado pọ́n tito-to-whinnu vonọtaun Sinsẹ̀n-Bibasi Afọnnu Tọn blo. Eyin mí wleawuna ahun mítọn na Oflin lọ, mí na to otẹn dagbe mẹ nado gọalọna mẹdevo lẹ nado mọaleyi sọn e mẹ ga.—Ẹzla 7:10.

 GỌALỌNA MẸDEVO LẸ NADO MỌALEYI

13. Etẹwẹ yin afọdide tintan he mí dona ze nado gọalọna mẹdevo lẹ na yé nido mọaleyi sọn Oflin lọ mẹ?

¹³ Nawẹ mí gán gọalọna mẹdevo lẹ nado mọaleyi sọn Oflin lọ mẹ gbọn? E họnwun dọ afọdide tintan lọ wẹ nado basi oylọna yé. Gbọnvona dọ mí na basi oylọna mẹhe mí nọ dukosọna to lizọnyizọn lọ mẹ whẹwhẹ lẹ, mí gán sọ basi todohukanji mẹdevo he mí na basi oylọna lẹ tọn. Ehe gán bẹ hẹnnumẹ, azọ́nwatọgbẹ́, wehọmẹvigbẹ́ mítọn lẹ po mẹdevo lẹ po hẹn. Eyin mí ma tlẹ do oylọ-basinamẹwe lọ susu, mí gán do alọdlẹndonu etọn hlan mẹlẹ gbọn nuyizan lẹtliki tọn ji. E sọgan paṣa mí nado mọdọ mẹsusu wẹ gán de nado wá!—Yẹwh. 11:6.

14. Na apajlẹ gando lehe oylọ-bibasina mẹde tlọlọ nọ tindo kọdetọn dagbe do go.

¹⁴ Ma yí nukunpẹvi do pọ́n oylọ-bibasina mẹde tlọlọ wá Oflin lọ gbede blo. To gbèdopo, e paṣa mẹmẹyọnnu de he tin to whẹndo he klan to sinsẹ̀n-liho de mẹ whenue asu etọn dọna ẹn po homẹhunhun po dọ emi to tito basi nado zọnhẹ ẹ yì Oflin lọ. Naegbọn e do paṣa ẹ? Na whlasusu wẹ e ko basi oylọna ẹn wayi bọ e ma wá pọ́n gbede. Amọ́, naegbọn e do yigbe nado wá todin? E dọ dọ, “na n’yin oylọ-basina tlọlọ wutu wẹ,” yèdọ gbọn mẹho agun tọn he e jẹakọ hẹ ganji de dali. Asu lọ yì Oflin owhe enẹ tọn, podọ owhe susu lẹ to enẹgodo ga.

15. Etẹwẹ mí jlo na hẹn do ayiha mẹ dile mí to oylọ-basina mẹlẹ wá Oflin lọ?

¹⁵ Hẹn do ayiha mẹ dọ mẹhe mí basi oylọna lẹ gán jlo na kàn kanbiọ lẹ sè—titengbe eyin yé ma ko wá opli mítọn de pọ́n. Mí nọ wà dagbe nado lẹnnupọndo kanbiọ he yé gán kanse lẹ ji jẹnukọn bosọ wleawudai nado na gblọndo yetọn. (Kol. 4:6) Di apajlẹ, mẹdelẹ gán kanse dọ: ‘Nawẹ nujijọ lọ na yì do?’ ‘Nawẹ e na dẹnsọ?’ ‘Etẹ n’gán do dó wá?’ ‘Be n’dona sú akuẹ whẹpo do wá nujijọ lọ tẹnmẹ wẹ ya?’ ‘Yè nọ ṣinyan agbánmẹ-kuẹ wẹ ya?’ Whenue mí to oylọ-basina mẹde nado wá Oflin lọ, mí gán kanse poun dọ, “Be a do kanbiọ de ya?” podọ enẹgodo mí na na gblọndo na kanbiọ depope he mẹlọ gán kanse. Mí gán sọ zan video lọ lẹ  Flin Okú Jesu Tọn gọna Etẹwẹ Nọ Jọ to Plitẹnhọ Ahọluduta Tọn Mẹ? nado gọalọna mẹlọ nado mọnukunnujẹ lehe opli mítọn lẹ nọ yì do mẹ. Podọ nupinplọn 28​tọ owe lọ Duvivi Ogbẹ̀ Tọn Kakadoi! tọn sọ bẹ nuagokun voovo lẹ hẹn ehe ji mí gán dọhodo hẹ ẹ.

16. Kanbiọ devo tẹlẹ wẹ mẹhe wá Oflin lọ lẹ gán jlo na kanse?

¹⁶ To whenue jlodotọ yọyọ lẹ ko wá Oflin lọ godo, yé gán gbẹ́ do kanbiọ devo lẹ. E gán paṣa yé nuhewutu omẹ kleun de poun wẹ do mahẹ to yẹhiadonu lọ lẹ mẹ kavi nuhewutu mẹdepope ma wàmọ. Yé gán sọ jlo na yọ́n whla nẹmu he mí nọ basi hùnwhẹ Oflin tọn lọ. Podọ yé gán sọ jlo na yọnẹn eyin aliho dopolọ mẹ wẹ opli Kunnudetọ Jehovah tọn lẹ tọn lẹpo nọ yin bibasi te. Dile etlẹ yindọ suhugan nuagokun ehelẹ tọn ko nọ yin hodọdeji to hodidọ Oflin tọn lọ whenu, mẹyọyọ lẹ gán do hudo zẹẹmẹ devo lẹ tọn dogọ. Hosọ lọ “Naegbọn Kunnudetọ Jehovah Tọn lẹ Ma Nọ Basi Hùnwhẹ Tenu-Núdùdù Oklunọ Tọn to Aliho Dopolọ mẹ hẹ Sinsẹ̀n He Pò Lẹ?” he to jw.org ji gán gọalọna mí nado na gblọndo na delẹ to kanbiọ yetọn lẹ mẹ. Mí jlo na wà nuhe go mí pé lẹpo—jẹnukọnna Oflin lọ, to Oflin lọ whenu podọ to godo etọn—nado gọalọna ‘mẹhe tindo ninọmẹ ahun mẹ tọn he jẹ lẹ’ nado mọaleyi sọn hùnwhẹ ehe mẹ.—Owalọ 13:48.

GỌALỌNA MẸHE KO GBỌJỌ LẸ

17. Nawẹ mẹho agun tọn lẹ gán gọalọna mẹhe ko gbọjọ lẹ gbọn? (Ezekiẹli 34:12, 16)

¹⁷ To ojlẹ Oflin tọn lọ mẹ, nawẹ mẹho lẹ gán gọalọna mẹhe ko gbọjọ lẹ gbọn? Mì dohia yé dọ onú yetọn nọ duahunmẹna emi. (Hia Ezekiẹli 34:12, 16.) Jẹnukọnna Oflin lọ, mì hẹn ẹn diun dọ mì dọho hẹ susu yetọn dile e sọgan yọnbasi do. Mì hẹn yé deji dọ emi yiwanna yé bosọ jlo na gọalọna yé to aliho depope he mẹ emi penugo te. Mì basi oylọna yé wá Oflin lọ. Eyin yé wá, mì dokuavọna yé po zohunhun po. To Oflin lọ godo, mì nọ kàn mẹmẹsunnu po mẹmẹyọnnu vivẹ́ ehelẹ po sè, bo na yé alọgọ gbigbọmẹ tọn he yé do hudo etọn nado lẹkọwa Jehovah dè lẹ.—1 Pita 2:25.

18. Nawẹ mímẹpo gán gọalọna mẹhe ko gbọjọ lẹ gbọn? (Lomunu lẹ 12:10)

 ¹⁸ Hagbẹ agun lọ tọn lẹpo wẹ gán gọalọna mẹhe ko gbọjọ bo wá Oflin lọ lẹ. Gbọnna? Mí na wàmọ, eyin mí yí owanyi, homẹdagbe po sisi po do yinuwa hẹ yé. (Hia Lomunu lẹ 12:10.) Mì nọ flindọ lẹngbọ vivẹ́ ehelẹ gán nọ whleawu nado gọ̀ opli bẹ. Vlavo yé nọ hanú dọ mẹlẹ ma na yí emi ganji. e Enẹwutu ma nọ kàn kanbiọ he na dowinyan yé lẹ sè kavi dọ nuhe gán gbleawuna yé lẹ blo. (1 Tẹs. 5:11) Yisenọ hatọ mítọn lẹ wẹ mẹmẹsunnu po mẹmẹyọnnu ehelẹ po yin. Homẹ mítọn nọ hùn nado basi sinsẹ̀n dopọ hẹ yé whladopo dogọ!—Salm. 119:176; Owalọ 20:35.

19. Ale tẹlẹ wẹ nọ wá sọn okú Jesu tọn finflin mẹ?

¹⁹ Mí dopẹ́ dọ Jesu degbena mí nado nọ basi hùnwhẹ Oflin okú etọn tọn to whemẹwhemẹ, podọ mí mọnukunnujẹ nuhewutu e do yin nujọnu sọmọ mẹ. Eyin mí yì Oflin lọ, mí nọ wà dagbe na míde podọ na mẹdevo lẹ to aliho susu lẹ mẹ. (Isa. 48:17, 18) Owanyi mítọn na Jehovah po Jesu po nọ jideji. Mí nọ do obá he mẹ mí yọ́n pinpẹn nuhe yé wà na mí tọn jẹ hia. Mí nọ hẹn haṣinṣan mítọn hẹ yisenọ hatọ lẹ lodo dogọ. Podọ mí gán gọalọna mẹdevo lẹ nado plọn lehe yelọsu lẹ gán mọaleyi sọn dona ofligọ lọ tọn lẹ mẹ do. Enẹwutu, mì gbọ mí ni wà nuhe go mí pé lẹpo nado wleawufo na Oflin owhe ehe tọn—yèdọ azán titengbe hugan owhe lọ tọn!