1. Etẹwẹ nọ wá ayiha mẹ na we eyin a lẹnnupọndo Jehovah ji?

 BE A ko tẹnpọn nado lẹnnupọndo nuhe go yè gán yí Jehovah jlẹdo ji pọ́n ya? Whenue a to hodọna ẹn to odẹ̀ mẹ, etẹwẹ nọ wá ayiha towe mẹ? Mahopọnna dọ mí ma gán mọ Jehovah, Biblu dlẹnalọdo e to aliho voovo lẹ mẹ. Jehovah yin yiylọdọ “owhè po awọ̀yinu de” po, podọ “miyọ́n nuvasudotọ de.” (Salm. 84:11; Heb. 12:29) To numimọ de mẹ, Ezekiẹli basi zẹẹmẹ Jehovah tọn taidi zannu safili tọn, ogàn sisẹ́ podọ taidi sisẹ́ aidowhẹdo de tọn. (Ezek. 1:26-28) Delẹ to aliho he mẹ Jehovah yin zẹẹmẹ basina te ehelẹ mẹ sọgan hẹn awuji mí kavi tlẹ dobuna mí.

2. Etẹwẹ sọgan glọnalina mẹdelẹ nado dọnsẹpọ Jehovah?

² Na mí ma gán mọ Jehovah wutu, e gan nọ vẹawuna mí nado yise dọ e yiwanna mí. Mẹdelẹ lẹndọ Jehovah ma gán yiwanna yé pọ́n gbede, na nuhe ko jọ do yé go wayi to gbẹzan yetọn mẹ lẹ wutu. Vlavo na otọ́ yetọn ma do owanyi hia yé gbede wutu. Jehovah nọ mọnukunnujẹ numọtolanmẹ mọnkọ lẹ mẹ bosọ yọ́n lehe yé nọ yinuwado mí ji do. Nado sọgan gọalọna mí, e de jẹhẹnu dagbedagbe etọn lẹ hia to Ohó etọn mẹ.

3. Naegbọn mí dona lẹnnupọn sisosiso do owanyi Jehovah tọn ji?

³ Hogbe dagbe he basi zẹẹmẹ Jehovah tọn hugan wẹ owanyi. (1 Joh. 4:8) Jehovah wẹ owanyi. Jẹhẹnu ehe wẹ nọ whàn ẹn nado wà nuhe e nọ wà lẹpo. Owanyi Jiwheyẹwhe tọn sinyẹn bosọ dohuhlọn sọmọ bọ e tlẹ nọ dlẹnkan na ẹn jẹ mẹhe ma yiwanna ẹn lẹ dè. (Mat. 5:44, 45) To hosọ ehe mẹ, mí na dọho susu do Jehovah po owanyi etọn po ji. Dile mí to nuplọn gando Jiwheyẹwhe mítọn go sọ, mọ wẹ mí na yiwanna ẹn dogọ do niyẹn.

JEHOVAH YIWANNA MÍ SISOSISO

4. Numọtolanmẹ tẹwẹ owanyi sisosiso Jehovah tọn nọ hẹn we tindo? (Sọ pọ́n yẹdide lọ.)

⁴ “Jehovah tindo owanyi sisosiso.” (Jak. 5:11) To Biblu mẹ, ewọ yí ede jlẹdo onọ̀ he yiwanna ovi etọn sisosiso de go. (Isa.  66:12, 13) Saa yí nukun homẹ tọn do pọ́n onọ̀ de he to nukunpedo ovi pẹvi etọn go po owanyi po. E yí owanyi do hẹn ẹn do alọmẹ to afọ etọn lẹ ji, bo to hodọna ẹn dẹẹdẹ, enẹ wẹ po ogbè fifá po. Whenue ovi lọ dawhá kavi to awufiẹsa mẹ, e hẹn ẹn diun dọ e mọ nuhe sin hudo e do. Whenue mí to awufiẹsa mẹ, mí gán dejido owanyi Jehovah tọn go. Salmu-kantọ lọ wlan dọmọ: “Whenue magbọjẹ lẹ húagbọ́ mi, hiẹ miọnhomẹna mi bo hẹn kọgbọ wá na mi.”—Salm. 94:19.

5. Etẹwẹ owanyi nugbo Jehovah tọn zẹẹmẹdo na we?

⁵ Nugbonọ wẹ Jehovah. (Salm. 103:8) E ma nọ gbẹkọ mí go eyin mí ṣinuwa. Whlasusu wẹ akọta Islaeli tọn hẹn Jehovah jẹflumẹ; etomọṣo to hogbe he bọdego ehelẹ mẹ, e do owanyi etọn he ma nọ gboawupo hia omẹ etọn he lẹnvọjọ lẹ, e dọmọ: “Hiẹ lẹzun nuhọakuẹ to nukun ṣie mẹ . . . , hiẹ yin gbégbòna, bọ yẹn ko sọ yiwanna we.” (Isa. 43:4, 5) Owanyi Jiwheyẹwhe tọn ma ko diọ. Mí sọgan ganjẹ e go to whelẹponu. Eyin mí tlẹ jai jẹ nuṣiwa sinsinyẹn de mẹ, Jehovah ma nọ gbẹ́ mí dai. Eyin mí lẹnvọjọ bo lẹkọ do Jehovah dè, mí na mọdọ owanyi etọn na mí ma diọ. E dopà dọ “ewọ na jonamẹ to gigọ́ mẹ.” (Isa. 55:7) Biblu basi zẹẹmẹ jonamẹ ehe tọn taidi “ojlẹ kọfanamẹ tọn . . . sọn Jehovah lọsu titi dè.”—Owalọ 3:19.

6. Etẹwẹ Zekalia 2:8 plọn mí gando Jehovah go?

⁶ Hia Zekalia 2:8. Na Jehovah yiwanna mí wutu, e nọ mọnukunnujẹ numọtolanmẹ mítọn lẹ mẹ bosọ nọ jlo vẹkuvẹku nado basi hihọ́na mí. E nọ gbleawuna ẹn whenue mí yin awugblena. Eyin mọ wẹ, mí gán voawu nado hodẹ dọmọ: “Basi hihọ́na mi taidi nukunzìn towe.” (Salm. 17:8) Awutugonu titengbe he họakuẹ de wẹ nukun yin. Enẹwutu, whenue Jehovah yí mí jlẹdo nukunzìn etọn lẹ go, didọ e te to linlẹn de mẹ dọ ‘Mẹdepope he gbleawuna mìwu omẹ ṣie lẹ gbleawuna nuhọakuẹ ṣie lẹ.’

7. Naegbọn mí do hudo nado hẹn jidide mítọn to owanyi Jehovah tọn mẹ sinyẹn deji dogọ?

⁷ Jehovah jlo dọ mí ni kudeji dọ emi yiwanna dopodopo mítọn lẹ. Ṣigba e yọnẹn dọ na nuhe mí ko pehẹ wayi lẹ wutu, mí sọgan to nuhà eyin e na yiwanna mí. Kavi mí sọgan to pipehẹ ninọmẹ de to alọnu din he to whiwhle jidide mítọn to owanyi Jehovah tọn mẹ pọ́n. Etẹwẹ na hẹn jidide mítọn sinyẹn deji? Lehe Jehovah do owanyi etọn hia Jesu,  mẹyiamisisadode lẹ po mílọsu lẹ po do yinyọnẹn gán gọlaọna mí.

LEHE JEHOVAH DO OWANYI ETỌN HIA DO

8. Naegbọn Jesu do kudeji dọ Otọ́ emitọn yiwanna emi?

⁸ Na owhe madosọha lẹ, Jehovah po Visunnu yiwanna etọn po wleawuna haṣinṣan owanyi tọn he siso taun de na ode awetọ. Haṣinṣan yetọn wẹ dehe ko dẹn-to-aimẹ hugan to wẹkẹ lọ mẹ. Jehovah do owanyi he e do na Jesu hia to aliho he họnwun mẹ dile mí hia do to Matiu 17:5 mẹ. Jehovah sọgan ko dọ poun dọ ‘Ehe wẹ mẹhe yẹn kẹalọyi.’ Etomọṣo e jlo dọ mí ni yọ́n obá he mẹ emi yiwanna Jesu jẹ, enẹwutu e ylọ ẹ dọ “Visunnu ṣie, mẹyiwanna lọ.” Homẹ Jehovah tọn hùn do Jesu go, titengbe na e desọn ojlo mẹ bo ze ogbẹ̀ etọn jo wutu. (Efe. 1:7) Podọ Jesu ma tindo ayihaawe depope gando numọtolanmẹ he Otọ́ etọn tindo na ẹn lẹ go. Owanyi he Jehovah do na Jesu họnwun na ẹn taun. Whlasusu wẹ e dọ po nujikudo po dọ Otọ́ lọ yiwanna emi.—Joh. 3:35; 10:17; 17:24.

9. Hogbe tẹwẹ basi zẹẹmẹ owanyi he Jehovah tindo na mẹyiamisisadode lẹ tọn? Basi zẹẹmẹ. (Lomunu lẹ 5:5)

⁹ Jehovah sọ dohia dọ emi yiwanna mẹyiamisisadode lẹ. (Hia Lomunu lẹ 5:5.) Doayi hogbe he yin yiyizan nado do obá he mẹ Jehovah yiwanna yé jẹ hia go. Mí hia dọ Jehovah hẹn ahun yetọn “gọ́” po owanyi etọn po. Owe alọdlẹndonu tọn de yí owanyi Jiwheyẹwhe tọn jlẹdo tọ̀sisa de go. Apajlẹ huhlọnnọ nankọ die he do lehe owanyi Jehovah tọn na mẹyiamisisadode lẹ klo do sọ hia! Mẹyiamisisadode lẹ yọnẹn dọ ‘Jiwheyẹwhe yiwanna’ yé. (Juda 1) Apọsteli Johanu dọ numọtolanmẹ yetọn whenue e wlan dọ: “Mì pọ́n owanyi he nkọ Otọ́ ko dohia mí, dọ mí nido yin yiylọdọ ovi Jiwheyẹwhe tọn lẹ!” (1 Joh. 3:1) Be mẹyiamisisadode lẹ kẹdẹ wẹ Jehovah yiwanna ya? Lala, Jehovah ko do owanyi etọn hia dopodopo mítọn.

10. Etẹwẹ yin kunnudenu he klohugan owanyi he Jehovah tindo na we tọn?

¹⁰ Etẹwẹ yin kunnudenu owanyi tọn he klohugan Jehovah tọn na mí? Ofligọ lọ wẹ, enẹ wẹ nuyiwa owanyi tọn he jiawu hugan to wẹkẹ lọ mẹ! (Joh. 3:16; Lom. 5:8) Jehovah namẹ Visunnu họakuẹ etọn bo dike bọ e kú do ota gbẹtọvi lẹpo tọn mẹ na ylando mítọn lẹ nido sọgan yin jijona bọ mí gán yin họntọn Etọn lẹ. (1 Joh. 4:10) Lehe mí to ayihamẹlẹnpọn do ahọ́ he Jehovah po Jesu po sú ji sọ, mọ wẹ mí gán mọnukunnujẹ obá he mẹ yé yiwanna dopodopo mítọn jẹ do mẹ niyẹn. (Gal. 2:20) Ofligọ lọ ma yin súsú poun na whẹdida dodo Jehovah tọn biọ domọ wutu wẹ gba. Nunina owanyi tọn de wẹ. Jehovah ko do owanyi etọn hia mí gbọn nuhe họakuẹ na ẹn hugan yíyí do sanvọ́ dali, enẹ wẹ Jesu. Jehovah dike bọ Visunnu etọn jiya bo kú do ota mítọn mẹ.

11. Etẹwẹ mí plọn sọn Jelemia 31:3 mẹ?

¹¹ Dile mí ko mọ do wayi, Jehovah ma hẹn numọtolanmẹ etọn lẹ na ede, amọ́ e sọ do obá he mẹ e yiwanna mí jẹ hia. (Hia Jelemia 31:3.) Jehovah ko dọ̀n mí wá ede dè, na e yiwanna mí wutu. (Yijlẹdo Deutelonomi 7:7, 8 go.) Nudepope podọ mẹdepope ma gán klan mí sọn owanyi enẹ go. (Lom. 8:38, 39) Numọtolanmẹ tẹwẹ owanyi ehe nọ hẹn we tindo? Hia Salmu lẹ 23​tọ bo pọ́n lehe owanyi Jehovah tọn po mẹtọnhopọn sisosiso etọn po yinuwado Davidi ji do, gọna lehe e gán wà nudopolọ na mílọsu do.

NUMỌTOLANMẸ TẸWẸ OWANYI JEHOVAH TỌN NỌ HẸN WE TINDO?

12. Nawẹ a sọgan basi bladopọ Salmu lẹ 23​tọ tọn gbọn?

¹² Hia Salmu lẹ 23:1-6. Salmu lẹ 23​tọ yin ohàn de he do jidide to owanyi Jehovah tọn po mẹtọnhopọn sisosiso etọn po mẹ hia. Davidi he kàn salmu ehe basi zẹẹmẹ haṣinṣan pẹkipẹki he tin to ewọ po Lẹngbọhọtọ etọn Jehovah po ṣẹnṣẹn tọn. Davidi mọ ede to hihọ́  glọ na e dike bọ Jehovah deanana ẹn wutu, podọ e sọ ganjẹ Ewọ go mlẹnmlẹn. Davidi yọnẹn dọ Jehovah na do owanyi hia emi to gbẹzan emitọn lẹpo mẹ. Etẹwẹ hẹn ẹn tindo nujikudo sọmọ?

13. Naegbọn Davidi do kudeji dọ Jehovah na penukundo emi go?

¹³ “Yẹn ma na jẹdò nudepope tọn.” Davidi mọdọ nude ma whèdo emi, na nukunpedomẹgo Jehovah tọn ma doalọte to gbẹzan etọn mẹ wutu. Davidi sọ duvivi họntọnjihẹmẹ po nukundagbe Jehovah tọn po tọn. Enẹ wẹ zọ́n bọ e kudeji dọ mahopọnna nudepope he sọgodo na bẹhẹn, Jehovah na zindonukọn nado to pekọhẹnwana nuhudo emitọn lẹpo. Jidide Davidi tọn to owanyi sisosiso Jehovah tọn mẹ dohuhlọn hugan nuhe gán dobuna ẹn depope, podọ e nọ na ẹn ayajẹ nujọnu tọn po pekọ po.—Salm. 16:11.

14. Nawẹ Jehovah gán gbọn owanyi dali penukundo mí go gbọn?

¹⁴ Jehovah nọ yí owanyi do penukundo mí go, titengbe eyin nuylankan lẹ jọ do mí go to gbẹzan mítọn mẹ. Claire a he sẹ̀n to Bẹtẹli na owhe 20 linlán, do numọtolanmẹ flumẹjijẹ tọn whenue whẹndo etọn pehẹ nuhahun sinsinyẹn lẹ debọdo-dego. Otọ́ etọn to azọ̀n asaku-awàku tọn jẹ, dopo to nọviyọnnu etọn lẹ mẹ yin didesẹ sọn agun mẹ, whẹndo etọn tindo nuhahun akuẹ tọn bọ owhé yetọn yin yíyí sọn yé si. Nawẹ Jehovah do mẹtọnhopọn owanyinọ etọn hia yé gbọn? Claire dọmọ: “Jehovah hẹn ẹn diun dọ whẹndo ṣie mọ nuhe sin hudo e tindo to whelẹponu. Whlasusu wẹ nuhe Jehovah na mí lẹ nọ zẹ̀ nudepope he mí gán ko donukun go! N’nọ saba lẹnnupọndo ojlẹ he mẹ n’duvivi owanyi sisosiso Jehovah  tọn te lẹ ji bosọ nọ yọ́n pinpẹn yetọn taun. Ojlẹ ehelẹ finflin ko gọalọna mi ma nado jogbe to whlepọn lẹ whenu.”

15. Naegbọn Davidi do dó numọtolanmẹ kọfanamẹ tọn? (Sọ pọ́n yẹdide lọ.)

¹⁵ “E nọ fakọna mi.” To whedelẹnu Davidi jẹflumẹ, na nuhahun gọna whlepọn he pehẹ e te lẹpo wutu. (Salm. 18:4-6) Etomọṣo, owanyi sisosiso po nukunpedomẹgo Jehovah tọn po fakọna ẹn. Jehovah plan họntọn etọn he ko vọgán lọ yì “fie amakikọ sù te” podọ yì “gbọjẹtẹn he gọ́ na osin.” Taidi kọdetọn de, Davidi vọ́ huhlọn mọyi bosọ penugo nado zindonukọn.—Salm. 18:28-32.

16. Nawẹ owanyi Jehovah tọn ko fakọna we gbọn?

¹⁶ Mọdopolọ to egbehe, “owanyi nugbo Jehovah tọn wẹ zọ́n bọ mí ma [nọ] dọ̀n” whenue mí pehẹ whlepọn po avùnnukundiọsọmẹnu lẹ po. (Avi. 3:22; Kol. 1:11) Lẹnnupọndo apajlẹ Rachel tọn ji. E jẹflumẹ taun whenue asu etọn jo ewọ po Jehovah po do to COVID-19 whenu. Nawẹ Jehovah gọalọna ẹn gbọn? E dọmọ: “Jehovah hẹn ẹn diun dọ mẹlẹ do owanyi hia mi. E whàn họntọn lẹ nado nọ yí whenu zan dopọ hẹ mi, nado nọ hẹn núdùdù wá na mi, nọ do wekanhlanmẹ dagbe po wefọ lẹ po hlan mi, nọ konu do mi bosọ nọ to nuflin mi to whelẹponu dọ Jehovah nọ hò ṣie pọ́n. N’nọ dopẹna Jehovah to whelẹponu dọ e na mi whẹndo daho owanyinọ mọnkọ.”

17. Naegbọn Davidi “ma na dibuna owù depope”?

¹⁷ “N’ma na dibuna owù depope, na hiẹ tin hẹ mi.” Ogbẹ̀ Davidi tọn nọ saba tin to owù mẹ, podọ e sọ tindo kẹntọ huhlọnnọ susu lẹ. Amọ́, owanyi Jehovah tọn zọ́n bọ e nọ mọ ede to hihọ́ glọ bosọ vò. Davidi gán mọdọ Jehovah topọ hẹ emi to ninọmẹ lẹpo mẹ, podọ enẹ nọ na ẹn jide. Enẹwutu, e gán jihàn dọmọ: “[Jehovah] whlẹn mi sọn obu ṣie lẹpo mẹ.” (Salm. 34:4) Owhẹ̀ Davidi tọn whẹ́n nado dibu, amọ́ owanyi Jehovah tọn dohuhlọn hú obu etọn lẹ.

18. Nawẹ jidide tintindo to owanyi Jehovah tọn mẹ gán na we huhlọn gbọn to whenue a to budi?

¹⁸ Nawẹ jidide he owanyi Jehovah tọn nọ namẹ nọ na mí huhlọn whenue mí pehẹ ninọmẹ he nọ gbàhundona mí lẹ gbọn? Mẹmẹyọnnu gbehosọnalitọ de he nọ yin Susi dọ lehe e ṣí na ewọ po asu etọn po whenue visunnu yetọn hù ede, e dọmọ: “Adángbomẹ ajiji lẹ nọ vẹawu taun, yé gán zọ́n bọ a na to budi dọ nuhe tlẹ sọ ylan humọ lẹ gán jọ do gowe. Amọ́, owanyi sisosiso Jehovah tọn zọ́n bọ mí mọ míde to hihọ́  glọ, podọ ayiha mítọn sọ jai.” Rachel he go mí donù wayi flindọ: “To zánmẹ gbèdopo whenue n’to awubla mẹ sinsinyẹn bo to nuhà bosọ to budi taun, n’hodẹ̀ hlan Jehovah po avi po. To enẹgodo tlolo, n’mọdọ ewọ hòhuwhẹ ahun ṣie bosọ miọnhomẹna mi dile onọ̀ de nọ wà na viyẹyẹ etọn do, podọ amlọn yí mi. N’ma na wọ̀n ojlẹ enẹ pọ́n gbede.” Mẹho agun tọn de he nọ yin Tasos sẹ̀ngàn na owhe ẹnẹ, na e gbẹ́ nado yì awhàn wutu. Nawẹ Jehovah do owanyi po nukunpedomẹgo etọn po hia ẹ gbọn? E dọmọ: “Jehovah penukundo nuhudo ṣie lẹpo go hugan nuhe n’donukun. Ehe hẹn jidide ṣie lodo dọ n’sọgan ganjẹ ewọ go mlẹnmlẹn. Humọ Jehovah na mi ayajẹ gbọn gbigbọ etọn gblamẹ, mahopọnna dọ gànpamẹninọ nọ hẹn apọṣimẹ taun. Ehe na mi jide dọ lehe n’to azọ́nwadopọ hẹ ẹ sọ, mọ wẹ n’na duvivi dagbewà etọn tọn dogọ do niyẹn. Enẹwutu, n’jẹ ewọ sẹ̀n ji taidi gbehosọnalitọ whepoponu tọn whenue n’gbẹ́ pò to gànmẹ.”

DỌNSẸPỌ JIWHEYẸWHE OWANYINỌ TOWE

19. (a) Nawẹ yinyọnẹn dọ Jiwheyẹwhe yiwanna mí gán yinuwado nuhe mí nọ dọ to odẹ̀ mẹ ji gbọn? (b) Zẹẹmẹ owanyi Jehovah tọn tẹwẹ nọ yinuwado ji we? (Pọ́n apotin lọ “ Hogbe Delẹ He Nọ Gọalọna Mí Nado Mọ Owanyi Sisosiso Jehovah Tọn.”)

¹⁹ Numimọ he ji mí dọhodo wayi lẹpo wẹ dohia dọ Jehovah, yèdọ “Jiwheyẹwhe owanyi tọn,” tin po mí po! (2 Kọl. 13:11) E nọ do ojlo to dopodopo mítọn lẹ mẹ. Mí kudeji dọ ‘owanyi nugbo Etọn wẹ lẹdo’ mí pé. (Salm. 32:10) Lehe mí to ayihamẹlẹnpọn do lehe Jehovah ko do owanyi hia mí sọ do ji, mọ wẹ e nọ yin omẹ nujọnu tọn na mí dogọ bọ mí sọ nọ dọnsẹpọ ẹ dogọ do niyẹn. Mí gán dọnsẹpọ ẹ po awubibọ po bo dọ na ẹn obá he mẹ mí do hudo owanyi etọn tọn jẹ. Mí gán dọ nuhe nọ dobuna mí lẹpo na ẹn bo deji dọ ewọ nọ mọnukunnujẹ yé mẹ bosọ jlo vẹkuvẹku nado gọalọna mí.—Salm. 145:18, 19.

20. Nawẹ owanyi Jehovah tọn nọ dọ̀n mí sẹpọ ewọ dogọ gbọn?

²⁰ Kẹdẹdile miyọ́n nọ na mí yozò to avivọ whenu do, mọ wẹ owanyi sisosiso Jehovah tọn gán miọnhomẹna mí to whenue mí pannukọn whlepọn po nuhahun lẹ po do niyẹn. Gbọnvona dọ owanyi Jehovah tọn dohuhlọn, e sọ gọ́ na awuvẹmẹ. Enẹwutu, nọ kẹalọyi owanyi sisosiso Jehovah tọn to gbẹzan towe mẹ. Podọ, mì gbọ mímẹpo ni yọ́n pinpẹn owanyi Jehovah tọn bo dọmọ: “Yẹn yiwanna Jehovah”!—Salm. 116:1.