BIBLU bẹ hodidọ ahundopo tọn mẹhe “tindo numọtolanmẹ taidi mítọn lẹ nkọ” lẹ tọn susu hẹn. (Jak. 5:17) Di apajlẹ, mí sọgan yawu mọnukunnujẹ tudohomẹnamẹ Paulu tọn he tin to Lomunu lẹ 7:21-24 mẹ he dọmọ: “Whenue yẹn jlo nado wà nuhe sọgbe, nuhe ylan wẹ nọ tin to dè e.  . . . Gbẹtọ tapònọ he yẹn yin!” Numọtolanmẹ ahundopo tọn mọnkọ lẹ nọ vọ́ jide na mí to whenue mí to ahidi hẹ awugbopo mítọn titi lẹ.

Paulu sọ dọho gando numọtolanmẹ ahundopo tọn devo lẹ go ga. To Galatianu lẹ 2:20 mẹ, e do nujikudo etọn hia dọ Jesu “yiwanna [emi] bo ze ede jo do ota [emitọn titi] mẹ!” Be “numọtolanmẹ [enẹ] taidi mítọn lẹ nkọ” ya? Vlavo, e ma nọ yinmọ na mí to whelẹponu.

Eyin mí to ahidi hẹ numọtolanmẹ nuvọ́nọ-yinyin tọn lẹ, na ylando he mí ko wà wayi lẹ wutu, e sọgan nọ vẹawuna mí to whedelẹnu nado kẹalọyi dọ Jehovah yiwanna mí bo nọ jona mí, podọ nado pọ́n avọ́sinsan ofligọ Jesu tọn hlan taidi nunina de he yin bibasi do ota mítọn titi mẹ. Be Jesu jlo nugbonugbo dọ mí ni pọ́n ofligọ lọ hlan to aliho enẹ mẹ ya? Eyin mọ wẹ, etẹwẹ sọgan gọalọna mí nado wàmọ? Mì gbọ mí ni gbadopọnna kanbiọ awe ehelẹ.

Mọwẹ, Jesu jlo dọ mí ni nọ pọ́n avọ́sinsan etọn hlan taidi nunina de he e basi do ota mítọn titi mẹ. Nawẹ mí sọgan tindo nujikudo enẹ gbọn? Yí nukun homẹ tọn do pọ́n nujijọ he yin nùdego to Luku 23:39-43 mẹ. Dawe de yin piplado potin go to apá na Jesu. E kẹalọyi nuhe e ṣiwà wayi lẹ. Danú he e wà lọ dona ko ylan taun, na sẹ́nhẹngbatọ akonka lẹ wẹ nọ yin piplado potin go. Na nuhe dawe lọ wà lẹ vẹna ẹn taun wutu, e vẹ̀ Jesu dọmọ: “Flin mi whenue hiẹ na biọ Ahọluduta towe mẹ.”

Nawẹ Jesu yinuwa gbọn? Yí nukun homẹ tọn do pọ́n awufiẹsa he Jesu na ko mọ whenue ewọ lilẹ́ okọ̀ etọn nado pọ́n dawe lọ. Mahopọnna awufiẹsa sinsinyẹn etọn, e tẹnpọn bo konu do dawe lọ bosọ hẹn ẹn deji dọmọ: “Nugbo wẹ yẹn dọna we to egbé, hiẹ na tin hẹ mi to Paladisi mẹ.” Jesu sọgan ko flinnu dawe lọ poun dọ “Visunnu gbẹtọ tọn wá . . . nado yilizọn namẹ bo ze ogbẹ̀ etọn jo taidi ofligọ de do ota mẹsusu tọn mẹ.” (Mat. 20:28) Amọ́, be a doayi e go dọ Jesu yí homẹdagbe do zinnudeji dọ emi basi avọ́sinsan lọ do ota dawe lọ lọsu tọn mẹ ya? E yí kọnugbè họntọnjihẹmẹ tọn de zan whenue e yí hogbe lọ lẹ “hiẹ” po “mi” po zan. Podọ, e yí hogbe enẹlẹ zan nado dohia dawe lọ dọ ewọ tindo todido nado nọgbẹ̀ to paladisi aigba ji tọn de mẹ.

Matin ayihaawe, Jesu jlo dọ dawe ehe ni kẹalọyi avọ́sinsan emitọn taidi nunina de he emi basi do ota ewọ lọsu tọn mẹ. Eyin Jesu tindo numọtolanmẹ enẹ gando sẹ́nhẹngbatọ he ma tlẹ tindo dotẹnmẹ lọ nado sẹ̀n Jiwheyẹwhe de go, ayihaawe ma tin dọ ewọ na tindo numọtolanmẹ dopolọ na Klistiani de he to Jiwheyẹwhe sẹ̀n. Eyin mọ wẹ, etẹwẹ sọgan gọalọna mí nado wleawuna numọtolanmẹ dagbe mọnkọ gando mídetiti go mahopọnna ylando he mí ko wà wayi lẹ?

Lizọnyizọn Paulu tọn zọ́n bọ ewọ yọ́n pinpẹn avọ́sinsan Jesu tọn. Gbọnna? E dọmọ: “Yẹn dopẹna Klisti Jesu Oklunọ mítọn, mẹhe na mi huhlọn, na ewọ mọ mi di nugbonọ gbọn lizọnyizọn de zizedo alọmẹ na mi dali, dile etlẹ yindọ nùzantọ, homẹkẹndomẹtọ po kanylantọ de po wẹ yẹn yin dai.” (1 Tim. 1:12-14) Azọ́ndenamẹ Paulu tọn vọ́ jide na ẹn dọ Jesu tindo lẹblanu po owanyi po na ẹn bosọ dejido ewọ go. Mọdopolọ, Jesu ze lizọnyizọn de do alọmẹ na dopodopo mítọn. (Mat. 28:19, 20) Be azọ́ndenamẹ enẹ nọ yinuwado mí ji to aliho dopolọ mẹ ya?

Albert lẹkọwa Jehovah dè to agọe, whenue e ko yin didesẹ sọn agun mẹ na nudi owhe 34 godo. E dọmọ: “Ylando ṣie nọ gbọṣi nukọn ṣie to whepoponu. Amọ́, whenue n’to lizọnyizọn lọ mẹ, n’nọ tindo numọtolanmẹ Paulu tọn nkọ dọ n’ko mọ lizọnyizọn de yí sọn Jesu dè tlọlọ. Ehe nọ hẹn mi lodo, bọ n’nọ tindo pọndohlan dagbe de gando dee titi, gbẹzan ṣie po sọgodo ṣie po go.”—Salm. 51:3.

Allan, mẹhe zan gbẹzan sẹ́nhẹngba po danuwiwa po tọn whẹpo do plọn nugbo lọ yigbe dọmọ: “N’gbẹ́ nọ flin awugble he n’hẹnwa na gbẹtọ lẹ. To whedelẹnu, e nọ hẹn mi jẹflumẹ. Amọ́, n’nọ dopẹna Jehovah dọ e na dotẹnmẹ ylandonọ de taidi yẹn nkọ nado hẹn wẹndagbe lọ yì mẹdevo lẹ dè. Eyin n’mọ nuyiwa gbẹtọ lẹ tọn gando wẹndagbe lọ go, e nọ flin mi lehe Jehovah yọ́n bosọ tindo owanyi sọ. N’mọdọ ewọ yí mi zan nado gọalọna mẹdevo he to ahidi hẹ nuylankan he yé wà wayi lẹ ga.”

Lizọnyizọn dopodopo mítọn tọn nọ hùn dotẹnmẹ dote na mí nado yí huhlọn mítọn zan na nuyiwa po linlẹn dagbe lẹ po. E nọ vọ́ jide na mí dọ Jesu tindo lẹblanu po owanyi po na mí, bosọ nọ dejido mí go.

Kakajẹ whenue titonu ylankan Satani tọn na yin vivasudo, ahun mítọn sọgan zindonukọn nado to whẹgbledo mí na nuṣiwa mítọn hoho lẹ wutu. Etẹwẹ na gọalọna mí nado nọavùnte sọta numọtolanmẹ mọnkọ lẹ?

Jean he nọ saba diahi hẹ numọtolanmẹ whẹhuhu tọn na gbẹzan awe he e zan to jọja whenu wutu dọmọ: “Homẹ ṣie nọ hùn dọ ‘Jiwheyẹwhe klohu ahun mítọn.’” (1 Joh. 3:19, 20) Mílọsu sọgan mọ homẹmimiọn yí to yinyọnẹn mẹ dọ Jehovah po Jesu po tindo pọndohlan he yọ́n hugan gando ninọmẹ mapenọ-yinyin tọn mítọn go hugan lehe mílọsu nọ wà do. Flindọ, yé gbọn owanyi dali wleawuna ofligọ lọ, e ma yin na gbẹtọvi pipé lẹ gba, ṣigba na ylandonọ he lẹnvọjọ lẹ.—1 Tim. 1:15.

Mí nọ hẹn ahun mítọn lẹ deji dọ ofligọ lọ yin nina do ota mítọn titi mẹ, whenue mí hodẹ̀ bo lẹnayihamẹpọn do aliho he mẹ Jehovah nọ yinuwa hẹ gbẹtọvi mapenọ lẹ te ji, bosọ wà nuhe go mí pé lẹpo nado hẹn lizọnyizọn he ewọ zedo alọmẹ na mí lọ di. Gbọnmọ dali, a sọgan dọ taidi Paulu dọmọ: Jesu “yiwanna mi bo ze ede jo do ota ṣie mẹ.”