Kunnudenu dohia dọ Jesu lẹzun Yẹwhenọ Daho to whenue e yí baptẹm to owhe 29 W.M. Kunnudenu tẹwẹ? To baptẹm Jesu tọn whenu, e ze ede jo nado yin yíyí-do-sanvọ́ to agbà lọ ji, enẹ wẹ nado wà “ojlo” Jiwheyẹwhe tọn. (Gal. 1:4; Heb. 10:5-10) To whenuena e yindọ agbà yẹhiadonu tọn enẹ ko tin-to-aimẹ bẹsọn whenue Jesu yí baptẹm, tẹmpli daho gbigbọmẹ tọn lọ lọsu—he nọtena tito he yin zizedai na sinsẹ̀n-bibasi wiwe-ṣeke Jehovah tọn to dodonu ofligọ lọ tọn ji—dona ko to aimẹ to ojlẹ enẹ mẹ. Agbà lọ yin adà tangan tẹmpli gbigbọmẹ tọn enẹ tọn de.—Mat. 3:16, 17; Heb. 5:4-6.

To whenue tẹmpli daho gbigbọmẹ tọn lọ ko yin didoai, nuhudo yẹwhenọ daho de tọn tin he na wadevizọn to e mẹ. Enẹwutu, Jehovah “yí gbigbọ wiwe po huhlọn po” do de Jesu. (Owalọ 10:37, 38; Malku 1:9-11) Ṣigba, nawẹ mí sọgan kudeji dọ Jesu ko yin dide taidi Yẹwhenọ Daho jẹnukọnna okú po fọnsọnku etọn po gbọn? Mí na mọ whẹwhinwhẹ́n he dutomẹji de eyin mí gbadopọnna apajlẹ Aalọn gọna mẹjẹmẹtẹnmẹ etọn he sẹ̀n taidi yẹwhenọ daho to Osẹ́n Mose tọn glọ lẹ tọn.

Dile Osẹ́n lọ biọ do, yẹwhenọ daho kẹdẹ wẹ sọgan biọ Fiwiwe Gbaugbau gòhọtúntún lọ tọn, podọ Fiwiwe Gbaugbau tẹmpli he wá yin gbigbá to nukọn mẹ lọ tọn. Họmẹgbòvọ̀ de nọ yin yíyí do gbò Fiwiwe Gbaugbau lọ dovo na Fiwiwe lọ. Yẹwhenọ daho lọ nọ gbọn họmẹgbòvọ̀ enẹ nù to Azán Ovẹsè tọn kẹdẹ gbè. (Heb. 9:1-3, 6, 7) Kẹdẹdile Aalọn po mẹjẹmẹtẹnmẹ etọn lẹ po nọ yin yiyiamisisadode taidi yẹwhenọ daho whẹpo do ‘gbọn họmẹgbòvọ̀ jọnun gòhọtúntún lọ tọn gblamẹ’ do, Jesu dona ko yin dide taidi Yẹwhenọ Daho tẹmpli daho gbigbọmẹ tọn Jehovah tọn jẹnukọnna okú etọn, podọ enẹgodo nado yì nọgbẹ̀ to olọn mẹ, e “gbọn họmẹgbòvọ̀ lọ gblamẹ, enẹ wẹ agbasalan etọn.” (Heb. 10:20) Abajọ, apọsteli Paulu donù Jesu go di mẹhe wá “taidi yẹwhenọ daho” de, podọ enẹgodo, e biọ “gòhọ he klohugan bo yin pipé hugan he ma yin bibasi po alọ po lọ mẹ,” podọ e yì “olọn lẹ lọsu” mẹ.—Heb. 9:11, 24.

Vogbingbọn depope ma tin to whenue alẹnu yọyọ lọ yin hinhẹn lodo po whenue e bẹ azọ́n jẹeji po ṣẹnṣẹn. Etẹwutu? Whenue Jesu hẹji yì olọn mẹ bo ze nuhọakuẹ-yinyin ogbẹ̀ pipé etọn he e yí do sanvọ́ na mí tọn donukọnna Jiwheyẹwhe, dopo to afọdide he hẹn alẹnu yọyọ lọ lodo kavi sọgbe to osẹ́n-liho lẹ mẹ wẹ e ze. Afọdide enẹ po dehe bọdego lẹ po wẹ sọ hẹn ẹn yọnbasi bọ alẹnu lọ do bẹ azọ́n jẹeji. Afọdide tẹlẹ wẹ?

Jẹnukọn whẹ́, Jesu sọawuhia to Jehovah nukọn; bọdego, e ze nuhọakuẹ-yinyin avọ́sinsan etọn tọn donukọnna Jehovah; bọ gbọngodo, Jehovah kẹalọyi nuhọakuẹ-yinyin ohùn Jesu tọn he yin sinsọndai lọ tọn. Alẹnu yọyọ lọ ma ko bẹ azọ́n jẹeji kakajẹ whenue afọdide enẹlẹ yin zize.

Biblu ma dọ ojlẹ tangan he mẹ Jehovah kẹalọyi nuhọakuẹ-yinyin avọ́sinsan Jesu tọn te. Enẹwutu, mí ma gán dlẹnalọdo ojlẹ de na taun tọn he mẹ alẹnu yọyọ lọ yin hinhẹn lodo bosọ bẹ azọ́n jẹeji te. Ṣigba, nuhe mí yọnẹn wẹ yindọ Jesu hẹji yì olọn mẹ azán ao jẹnukọnna Pẹntikọsti. (Owalọ 1:3) To ojlẹ de mẹ to azán kleun enẹlẹ gblamẹ, e ze nuhọakuẹ-yinyin avọ́sinsan etọn tọn donukọnna Jehovah bọ Ewọ kẹalọyi i. (Heb. 9:12) Kunnudenu nugbo ehe tọn họnwun gblegede to Pẹntikọsti owhe 33 W.M tọn. (Owalọ 2:1-4, 32, 33) To whenẹnu, ayihaawe depope ma tin dọ alẹnu yọyọ lọ yin hinhẹn lodo bo ko to azọ́nwa.

To bladopọ mẹ, alẹnu yọyọ lọ yin hinhẹn lodo bosọ bẹ azọ́n jẹeji to whenue Jehovah kẹalọyi nuhọakuẹ-yinyin ohùn Jesu tọn he yin sinsọndai lọ tọn godo. Podọ to whenẹnu wẹ Yẹwhenọ Daho lọ, Jesu jẹ azọ́n ji taidi Whẹgbọtọ alẹnu lọ tọn.—Heb. 7:25; 8:1-3, 6; 9:13-15.