1. Dile e yin nùdego do to 3 Johanu 3, 4 mẹ, etẹwẹ nọ hẹn mí gọ́ na ayajẹ?

BE A gán yí nukun homẹ tọn do pọ́n lehe apọsteli Johanu na ko gọ́ na ayajẹ do to whenue e sè dọ mẹhe e ko gọalọna nado plọn nugbo lọ lẹ zindonukọn to Jehovah sinsẹ̀n mẹ po nugbonọ-yinyin po ya? Yé pehẹ nuhahun susu lẹ, podọ Johanu wazọ́n sinsinyẹn nado hẹn yise Klistiani nugbonọ enẹlẹ tọn lodo, yèdọ mẹhe e nọ pọnhlan di ovi gbigbọmẹ tọn etọn lẹ. Mọdopolọ, mílọsu nọ gọ́ na ayajẹ to whenue ovi mítọn jọnun lẹ kavi ovi gbigbọmẹ tọn mítọn lẹ klan yede do wiwe hlan Jehovah bo to sinsẹ̀n ẹn zọnmii.—Hia 3 Johanu 3, 4.

2. Etẹwẹ yin yanwle wekanhlanmẹ he Johanu kàn lẹ tọn?

² To owhe 98 W.M, e yọnbasi dọ Johanu tin to Efesu kavi fie sẹpọ finẹ. Ewọ sọgan ko sẹtẹn jẹ finẹ to whenue e yin tuntundote sọn gànpamẹ to lopo Patmos tọn ji godo. Diblayin to ojlẹ enẹ mẹ wẹ gbigbọ wiwe Jehovah tọn gọalọna ẹn nado kàn wekanhlanmẹ atọ̀n delẹ. Yanwle wekanhlanmẹ enẹlẹ tọn wẹ nado whàn Klistiani nugbonọ lẹ na yé nido hẹn yise yetọn to Jesu mẹ lodo bo to zọnlinzin zọnmii to nugbo lọ mẹ.

3. Kanbiọ tẹlẹ wẹ mí na mọ gblọndo na?

³ Johanu wẹ yin apọsteli godotọ he pò togbẹ̀ to ojlẹ lọ mẹ, podọ nuyiwadomẹji ylankan he mẹplọntọ lalonọ lẹ to tintindo do agun lẹ ji duahunmẹna ẹn sinsinyẹn. * (1 Joh. 2:18, 19, 26) Atẹṣitọ enẹlẹ sọalọakọ́n dọ yé yọ́n Jiwheyẹwhe, ṣigba yé ma nọ setonuna gbedide Jehovah tọn lẹ. Mì gbọ mí ni gbadopọnna ayinamẹ gbọdo he Johanu na. Dile mí to mọwà mí na mọ gblọndo na kanbiọ atọ̀n ehelẹ: Etẹwẹ e zẹẹmẹdo nado to zọnlinzin to nugbo lọ mẹ? Aliglọnnamẹnu tẹlẹ wẹ mí nọ pehẹ? Podọ nawẹ mí sọgan  gọalọna ode awetọ nado gbọṣi nugbo lọ mẹ gbọn?

4. Sọgbe hẹ 1 Johanu 2:3-6; gọna 2 Johanu 4, 6, etẹwẹ zọnlinzinzin to nugbo lọ mẹ bẹhẹn?

⁴ Nado to zọnlinzin to nugbo lọ mẹ, mí dona yọ́n nugbo he to Ohó Jiwheyẹwhe tọn, Biblu mẹ lẹ. Humọ, mí dona “nọ payi gbedide [Jehovah tọn] lẹ go,” enẹ wẹ nado nọ setonuna yé. (Hia 1 Johanu 2:3-6; 2 Johanu 4, 6.) Jesu ze apajlẹ pipé tonusisena Jehovah tọn dai. Enẹwutu, dopo to aliho titengbe he mẹ mí nọ setonuna Jehovah te lẹ mẹ wẹ nado nọ hodo afọdòmẹ Jesu tọn lẹ pẹkipẹki dile e yọnbasi do.—Joh. 8:29; 1 Pita 2:21.

5. Nujikudo tẹlẹ wẹ mí dona tindo?

⁵ Nado to zọnlinzin zọnmii to nugbo lọ mẹ, mí dona kudeji dọ Jehovah wẹ yin Jiwheyẹwhe nugbo tọn, podọ dọ nuhe e dọna mí to Ohó etọn Biblu mẹ lẹpo wẹ yin nugbo. Mí sọ dona kudeji dọ Jesu wẹ yin Mẹsia dopagbe lọ. Mẹsusu to egbehe wẹ nọ tindo ayihaawe dọ Jesu ko yin amisisayidode taidi Ahọlu Ahọluduta Jiwheyẹwhe tọn. Johanu na avase dọ “mẹklọtọ susu” wẹ tin he sọgan hẹn mẹhe ma ko wleawufo nado yiavùnlọna nugbo lọ gando Jehovah po Jesu po go lẹ buali. (2 Joh. 7-11) Johanu wlan dọmọ: “Mẹnu wẹ yin lalonọ lọ adavo mẹhe mọ́n dọ Jesu wẹ Klisti lọ?” (1 Joh. 2:22) Onú dopo gee he mí sọgan wà ma nado yin kiklọ wẹ nado nọ plọn Ohó Jiwheyẹwhe tọn. Gbọnmọ wiwà kẹdẹ dali wẹ mí na wá yọ́n Jehovah po Jesu po. (Joh. 17:3) Podọ whenẹnu kẹdẹ wẹ mí na kudeji dọ mí ko mọ nugbo lọ.

6. Etẹwẹ yin dopo to aliglọnnamẹnu he jọja Klistiani lẹ nọ pehẹ lẹ mẹ?

⁶ Klistiani lẹpo dona tin to aṣeji ma nado dike tamẹnuplọnmẹ gbẹtọ tọn lẹ ni hẹn yé buali. (1 Joh. 2:26) Klistiani jọja lẹ na taun tọn dona tin to aṣeji gando omọ̀ ehe go. Alexia * he yin mẹmẹyọnnu owhe 25 mẹvi de sọn France dọmọ: “Whenue n’gbẹ́ yin jọja winyanwinyan, pọndohlan aihọn tọn lẹ, taidi nuplọnmẹ nulẹ-tin-yededenu tọn po tamẹnuplọnmẹ gbẹtọ tọn lẹ po nọ ze mi do bẹwlu mẹ. To whedelẹnu, nuplọnmẹ enẹlẹ nọ fọnjlodotena mi. Amọ́ n’wá mọdọ ma gán nọ kẹalọyi nuhe yè nọ plọn mi to wehọmẹ lẹ domọ poun, bo ma na nọ na dotẹnmẹ Jehovah nado dọhona mi ga.” Alexia gbadopọnna owe lọ La vie: comment est-elle apparue? Evolution ou création? To osẹ kleun delẹ gblamẹ, e masọ tindo ayihaawe depope ba. Alexia dọmọ: “N’mọ kunnudenu lẹ na dee dọ nuhe Biblu bẹhẹn lẹ yin nugbo. Podọ e wá  họnwun na mi dọ gbẹninọ sọgbe hẹ nujinọtedo etọn lẹ na na mi ayajẹ po jijọho po.”

7. Etẹwẹ mí dona to aṣeji ma nado joawuna, podọ etẹwutu?

⁷ Klistiani lẹpo, yèdọ yọpọ po mẹho po dona to aṣeji ma nado joawuna gbẹzan awe zinzan. Johanu zinnudeji dọ mí ma sọgan to zọnlinzin to nugbo lọ mẹ bosọ nọ zan gbẹzan fẹnnuwiwa tọn to ojlẹ dopolọ mẹ. (1 Joh. 1:6) Eyin mí jlo na mọ nukundagbe Jiwheyẹwhe tọn todin podọ to sọgodo, nuyiwa mítọn lẹ dona nọ dohia dọ mí yọnẹn dọ nuhe wà mí te lẹpo wẹ to wedede. To linlẹn de mẹ, ylando de ma tin he mí gán whlá di aṣli, na nuhe mí nọ wà lẹpo wẹ Jehovah nọ mọ.—Heb. 4:13.

8. Etẹwẹ mí dona gbẹdai?

⁸ Mí dona gbẹ́ pọndohlan aihọn tọn gando ylando go dai. Apọsteli Johanu wlan dọmọ: “Eyin mí dọ dọ, ‘Mí ma tindo ylando,’ mídelẹ klọ wẹ mí te.” (1 Joh. 1:8) To ojlẹ Johanu tọn mẹ, atẹṣitọ lẹ nọ dọ dọ mẹde sọgan yọnẹn gàn-an bo waylando de, ṣogan bo gbẹ́ tindo haṣinṣan dagbe hẹ Jiwheyẹwhe. To egbehe, mí to gbẹnọ to mẹhe tindo pọndohlan mọnkọ lẹ ṣẹnṣẹn. Mẹsusu wẹ nọ dọ dọ emi yí Jiwheyẹwhe sè, ṣigba yé ma nọ kẹalọyi pọndohlan Jehovah tọn gando ylando go, titengbe dehe gando zanhẹmẹ go. Nuhe Jehovah nọ pọnhlan di walọ gblezọn wẹ yewlẹ nọ ylọdọ nujlomẹ mẹdopodopo tọn kavi gbẹzan he yè gán zan eyin e jlomẹ.

9. Ale tẹwẹ jọja lẹ nọ mọyi eyin yé tẹdo nuyise yetọn he sinai do Biblu ji lẹ go?

⁹ Klistiani jọja lẹ na taun tọn sọgan yin kọgbidina nado kẹalọyi pọndohlan klasigbẹ́ kavi azọ́nwatọgbẹ́ yetọn lẹ tọn gando walọyizan fẹnnuwiwa tọn lẹ go. Nuhe jọ do visunnu de he nọ yin Aleksandar go niyẹn. E dọmọ: “Viyọnnu delẹ to wehọmẹ nọ gbidikọna mi na ma do zanhẹ yé. Yé dọ dọ whenuena e yindọ n’ma to tintọ́n hẹ yọnnu de, be n’dona ko nọ zanhẹ sunnu-gbẹ́ ṣie de niyẹn.” Eyin a pehẹ mẹtẹnpọn mọnkọtọn lẹ, nọ flindọ titẹdo nuyise towe  he sinai do Biblu ji lẹ go na zọ́n bọ a na hẹn sisi mẹdetiti tọn towe go, bosọ basi hihọ́na agbasa towe, linlẹn po numọtolanmẹ towe lẹ po, gọna haṣinṣan towe hẹ Jehovah. Podọ whedepopenu he a nọtegli sọta mẹtẹnpọn de, e na bọawuna we dogọ nado wà nuhe sọgbe. Sọ flindọ pọndohlan agọ̀ he aihọn ehe tindo gando zanhẹmẹ go wá sọn Satani dè. Enẹwutu, eyin a gbẹ́ ma nado jogbe, a “gbawhàn mẹylankan lọ tọn” niyẹn.—1 Joh. 2:14.

10. Nawẹ nuhe 1 Johanu 1:9 dọ nọ gọalọna mí nado sẹ̀n Jehovah po ayihadawhẹnamẹnu wiwe de po gbọn?

¹⁰ Mí yọnẹn dọ Jehovah tindo jlọjẹ lọ nado dọ dọ nuyiwa de yin walọ gblezọn kavi lala. Podọ mí nọ wà nuhe go mí pé lẹpo ma nado jai jẹ ylando mẹ. Eyin e wá jọ bọ mí waylando, mí nọ yigbe ylanwiwa mítọn tọn na Jehovah to odẹ̀ mẹ. (Hia 1 Johanu 1:9.) Podọ whenue mí jai jẹ ylando sinsinyẹn de mẹ, mí nọ dín alọgọ mẹho agun tọn he Jehovah ko de nado penukundo mí go lẹ tọn. (Jak. 5:14-16) Ṣigba, mí ma dona nọ tindo numọtolanmẹ whẹhuhu tọn zẹjlẹgo gando nuhe mí ko ṣiwà wayi lẹ go. Etẹwutu? Na Otọ́ owanyinọ mítọn ko wleawuna avọ́sinsan ofligọ Visunnu etọn tọn, na ylando mítọn lẹ nido sọgan yin jijona. Whenue Jehovah dọ dọ emi na jona ylandonọ he lẹnvọjọ lẹ, nuhe dọ e te họnwun na ẹn. Enẹwutu, nudepope ma gán glọnalina mí nado sẹ̀n Jehovah po ayihadawhẹnamẹnu wiwe de po.—1 Joh. 2:1, 2, 12; 3:19, 20.

11. Nawẹ mí sọgan họ́ míde sọta nuplọnmẹ he gán tindo nuyiwadomẹji ylankan do yise mítọn ji lẹ gbọn?

¹¹ Mí dona gbẹ́ nuplọnmẹ atẹṣitọ lẹ tọn lẹ dai. Sọn bẹjẹeji agun Klistiani tọn gbọ́n wẹ Lẹgba ko to mẹklọtọ susu yizan nado fọ́n ayihaawe dote to ahun devizọnwatọ nugbonọ Jiwheyẹwhe tọn lẹ tọn mẹ. Enẹwutu, mí dona yọ́n lehe yè nọ doayi vogbingbọn he to ohó nugbo po lalo po ṣẹnṣẹn go do. * Kẹntọ mítọn lẹ sọgan yí  Intẹnẹt kavi nọtẹn gbẹdido Intẹnẹt ji tọn lẹ zan nado dekanpona yise mítọn to Jehovah mẹ, gọna owanyi he mí tindo na mẹmẹsunnu mítọn lẹ. Nọ flin mẹhe to godona nujijla oklọ tọn mọnkọ, bo nọ gbẹ́ ẹ dai!—1 Joh. 4:1, 6; Osọ. 12:9.

12. Naegbọn mí dona hẹn pinpẹn-nutọn-yinyọnẹn mítọn na nugbo he mí ko plọn lẹ siso deji?

¹² Nado nọavùnte sọta mẹtẹnpọn Satani tọn lẹ, mí dona hẹn jidide mítọn to Jesu mẹ podọ to azọngban he hẹndi e te to lẹndai Jiwheyẹwhe tọn mẹ sinyẹn deji. Mí sọ dona dejido asisa dopo gee he Jehovah to yiyizan nado deanana mí to egbehe lọ go. (Mat. 24:45-47) Mí nọ hẹn jidide mítọn lodo gbọn Ohó Jiwheyẹwhe tọn pinplọn to gbesisọ mẹ dali. Eyin mí wàmọ, yise mítọn na taidi atin he doadọ̀do ganji de. Paulu zinnudo linlẹn dopolọ ji to whenue e to wekanhlan agun Kolosi tọn. E dọmọ: “Kẹdẹdile mì ko kẹalọyi Klisti Jesu Oklunọ do, mì nọ to zọnlinzin to kọndopọ mẹ hẹ ẹ zọnmii bo doadọ̀do bosọ nọ to yinyin dido daga to ewọ mẹ bo nọ to yinyin hinhẹn lodo to yise mẹ.” (Kol. 2:6, 7) Nudepope ma tin he Satani kavi mẹhe ji ewọ ko yinuwado lẹ sọgan wà nado hẹn Klistiani he yise etọn ko dolido de gbọjọ.—2 Joh. 8, 9.

13. Etẹwẹ mí dona donukun, podọ etẹwutu?

¹³ Mí dona donukun dọ aihọn ni gbẹwanna mí. (1 Joh. 3:13) Johanu flinnu mí dọ “aihọn lọ pete tin to huhlọn mẹylankan lọ tọn glọ.” (1 Joh. 5:19) Dile titonu ehe to dindọnsẹpọ vivọnu, homẹgble Satani tọn to sinsinyẹn deji. (Osọ. 12:12) E ma nọ yí omọ̀ he whlá lẹ taidi ojlo fẹnnuwiwa tọn kavi lalo atẹṣitọ lẹ tọn kẹdẹ zan nado yangbé mítọn gba. E sọ nọ yí aliho kanyinylan tọn he to tlọlọ lẹ zan ga. Satani yọnẹn dọ whenu gli de poun wẹ emi tindo nado tẹnpọn bo doalọtena azọ́n yẹwhehodidọ tọn mítọn kavi nado hù yise mítọn sudo. Enẹwutu, e ma yin nupaṣamẹ de dọ delẹ to azọ́n mítọn lẹ mẹ yin aliglọnna kavi yin alọhẹndotena to otò susu mẹ. Etomọṣo, mẹmẹsunnu po mẹmẹyọnnu mítọn he to otò enẹlẹ mẹ lẹ po ma hònúpla. Yé nọ dohia dọ mahopọnna nudepope he mẹylankan lọ na wà nado yangbé mítọn, mí sọgan gbawhàn!

14. Etẹwẹ yin dopo to aliho he mẹ mí sọgan gọalọna mẹmẹsunnu po mẹmẹyọnnu mítọn lẹ po nado gbọṣi nugbo lọ mẹ te lẹ mẹ?

¹⁴ Nado gọalọna mẹmẹsunnu po mẹmẹyọnnu mítọn lẹ po nado gbọṣi nugbo lọ mẹ, mí dona nọ do awuvẹmẹ hia yé. (1 Joh. 3:10, 11, 16-18) Mí dona nọ yiwanna ode awetọ, e ma yin to whenue nulẹ to yìyì ganji kẹdẹ gba, amọ́ to whenue nuhahun lẹ fọ́n ga. Di apajlẹ, be a yọ́n mẹde he hẹn mẹyiwanna de bu to okú mẹ, bo do hudo homẹmiọnnamẹ kavi alọgọ tangan delẹ tọn ya? Kavi be a sè dọ yisenọ hatọ delẹ hẹn nutindo yetọn lẹ bu to nugbajẹmẹji jọwamọ tọn de godo, bọ e biọ dọ yè ni gọalọna yé na Plitẹnhọ Ahọluduta tọn kavi owhé yetọn lẹ nido yin vivọgbá wẹ ya? Mí nọ do obá he mẹ owanyi po awuvẹmẹ he mí tindo na Klistiani hatọ mítọn lẹ po siso jẹ hia, e ma yin to nuhe mí nọ dọ lẹ kẹdẹ mẹ, ṣigba hú popolẹpo to nuhe mí nọ wà lẹ mẹ ga.

15. Dile 1 Johanu 4:7, 8 dọ do, etẹwẹ mí dona wà?

¹⁵ Mí nọ hodo apajlẹ Otọ́ owanyinọ olọn mẹ tọn mítọn tọn to whenue mí do owanyi hia ode awetọ. (Hia 1 Johanu 4:7, 8.) Aliho titengbe de he mẹ mí nọ do owanyi hia te wẹ nado nọ jona ode awetọ. Di apajlẹ, mẹde sọgan gbleawuna mí bo wá vẹvẹ to godo mẹ. Mí nọ do owanyi hia eyin mí jona ẹn bosọ dogodo nuhe e ṣiwà do mí. (Kol. 3:13) Mẹmẹsunnu de he nọ yin Aldo pehẹ avùnnukundiọsọmẹnu mọnkọ to whenue e sè dọ mẹmẹsunnu he emi nọ na sisi de dọho ylankan do akọ̀ emitọn go. Aldo dọmọ, “N’nọ hodẹ̀ hlan Jehovah gbọzangbọzan  dọ ni gọalọna mi ma nado tindo linlẹn ylankan lẹ gando mẹmẹsunnu ehe go.” Amọ́ Aldo sọ wà nudevo de. E basi dide nado biọ to mẹmẹsunnu lọ si nado wazọ́n hẹ ẹ to lizọnyizọn lọ mẹ. Dile yé to azọ́nwadopọ, Aldo basi zẹẹmẹ lehe nuhe mẹmẹsunnu lọ dọ gbleawuna ẹn do tọn na ẹn. Aldo dọmọ: “Whenue mẹmẹsunnu lọ mọnukunnujẹemẹ dọ ohó ylankan he emi dọ lọ gbleawuna mi, e vẹvẹ. N’doayi e go to kọnugbè etọn mẹ dọ nuhe e dọ wayi lọ wá vẹna ẹn taun. Mí lẹzun họntọn whladopo dogọ, bo dogodo nuhahun lọ.”

16, 17. Etẹwẹ dona yin gbemima mítọn?

¹⁶ Dagbemẹninọ gbigbọmẹ tọn mẹmẹsunnu lẹ tọn to ahunmẹduna apọsteli Johanu sisosiso, podọ ehe sọawuhia hezeheze to ayinamẹ he e na to wekanhlanmẹ gbọdo etọn atọ̀n lẹ mẹ. Lehe e yin tulinamẹnu do sọ nado yọnẹn dọ sunnu po yọnnu po he taidi ewọ nkọ lẹ wẹ yin yiyiamisisadode nado dugán hẹ Klisti!—1 Joh. 2:27.

¹⁷ Mì gbọ mí ni hẹn ayinamẹ he ji mí ko dọhodo lẹ do ayiha mẹ. Mì gbọ mí ni magbe nado to zọnlinzin to nugbo lọ mẹ, bo nọ setonuna Jehovah to adà gbẹzan mítọn tọn lẹpo mẹ. Nọ plọn Ohó etọn bo nọ ganjẹ e go. Nọ hẹn yise towe to Jesu mẹ lodo. Nọ gbẹ́ tamẹnuplọnmẹ gbẹtọ tọn lẹ po nuplọnmẹ atẹṣitọ lẹ tọn po dai. Nọ nọavùnte sọta ojlo lọ nado zan gbẹzan awe podọ nado joawuna ylando. Nọ nọgbẹ̀ sọgbe hẹ nujinọtedo yiaga walọ dagbe tọn Jehovah tọn lẹ. Humọ, mì gbọ mí ni gọalọ nado hẹn mẹmẹsunnu mítọn lẹ lodo gbọn jijona yé whenue yé gbleawuna mí gọna godoninọna yé to nuhudo mẹ dali. To whenẹnu, mahopọnna avùnnukundiọsọmẹnu he mí na pehẹ lẹ, mí na to zọnlinzin zọnmii to nugbo lọ mẹ.