1. Etẹwẹ Jehovah wà tlolo to ylando Adam po Evi po tọn godo? (Jenẹsisi 3:15)

 TLOLO to ylando Adam po Evi po tọn godo, Jehovah na todido kúnkan yetọn lẹ gbọn dọdai ayidego tọn de gblamẹ. Nuhe e dọ yin kinkandai to Jenẹsisi 3:15 mẹ.—Hia.

2. Etẹwẹ jẹna ayidego gando dọdai ehe go?

² Dọdai lọ sọawuhia to owe tintan Biblu tọn mẹ. Amọ́, to aliho de kavi devo mẹ, owe Biblu tọn he pò lẹpo wẹ tindo kanṣiṣa hẹ ẹ. Nuhe yin kinkando Jenẹsisi 3:15 mẹ yin owẹ̀n tangan Biblu tọn. Owe Biblu tọn lẹpo bẹ owẹ̀n dopo gee hẹn, enẹ wẹ yindọ Whlẹngántọ de na yin didohlan nado và Lẹgba po hodotọ ylankan etọn lẹpo po sudo. * Dona jiawu nankọ die na mẹhe yiwanna Jehovah lẹ!

3. Etẹwẹ mí na gbadopọnna to hosọ ehe mẹ?

³ To hosọ ehe mẹ, mí na na gblọndo kanbiọ he bọdego ehelẹ tọn gando dọdai Jenẹsisi 3:15 tọn go: Mẹnu lẹ wẹ yin nùdego to dọdai lọ mẹ? Nawẹ dọdai lọ mọ hẹndi gbọn? Podọ, nawẹ mí nọ mọaleyi sọn e mẹ gbọn?

4. Mẹnu wẹ yin “odàn lọ,” podọ nawẹ mí wagbọn do yọnẹn?

⁴ Mẹhe yin nùdego to dọdai he to Jenẹsisi 3:14, 15 mẹ lẹ bẹ “odàn” de, “kúnkan” odàn lọ tọn, “yọnnu” de, po “kúnkan”  yọnnu lọ tọn po hẹn. Biblu gọalọna mí nado yọ́n mẹhe dopodopo yetọn nọtena. * Mì gbọ mí ni bẹjẹeji po “odàn lọ” po. Odàn jọnun de ma gán mọnukunnujẹ nuhe Jehovah dọ to jipa Edẹni tọn mẹ lọ mẹ. Enẹwutu, mẹhe Jehovah to whẹdana lọ dona ko yin nudida nuyọnẹntọ de. Mẹnu wẹ? Osọhia 12:9 dọ ẹ na mí tlọlọ. To wefọ ehe mẹ, Satani Lẹgba wẹ yin alọdlẹndo taidi “odàn hoho lọ.” Amọ́, mẹnu lẹ wẹ yin kúnkan odàn lọ tọn?

5. Mẹnu lẹ wẹ kúnkan odàn lọ tọn bẹhẹn?

⁵ Eyin Biblu yí hogbe lọ kúnkan zan to yẹhiadonu-liho, e nọ dlẹnalọdo mẹhe nọ hodo apajlẹ mẹde tọn pẹkipẹki sọmọ bo gán yin yiylọdọ ovi mẹlọ tọn lẹ. Enẹwutu, kúnkan odàn lọ tọn bẹ nudida gbigbọnọ gọna gbẹtọvi he nọ diọnukunsọ Jehovah Jiwheyẹwhe po omẹ Etọn lẹ po dile Satani nọ wà do lẹ hẹn. Ehe bẹ angẹli he gbẹ́ azọ́ndenamẹ yetọn dai to olọn mẹ to azán Noa tọn gbè lẹ, gọna gbẹtọvi he nọ yinuwa taidi otọ́ yetọn Lẹgba lẹ hẹn.—Jen. 6:1, 2; Joh. 8:44; 1 Joh. 5:19; Juda 6.

6. Naegbọn yọnnu lọ ma gán ko yin Evi?

⁶ Todin, mì gbọ mí ni pọ́n mẹhe “yọnnu lọ” yin. E ma gán ko yin Evi. Etẹwutu? Lẹnnupọndo whẹwhinwhẹ́n dopo poun ji. Dọdai lọ dọ dọ kúnkan yọnnu lọ tọn na “só” ota odàn lọ tọn. Dile mí ṣẹṣẹ dọ do, odàn lọ yin nudida gbigbọnọ de, enẹ wẹ Satani, podọ gbẹtọvi mapenọ he wá sọn kúnkan Evi tọn mẹ depope ma tindo nugopipe lọ nado và ẹ sudo. Enẹwutu, nawẹ Satani na yin vivasudo gbọn?

7. Dile Osọhia 12:1, 2, 5, 10 dọ do, mẹnu wẹ yin yọnnu he yin nùdego to Jenẹsisi 3:15 mẹ lọ?

⁷ Mẹhe yọnnu he yin nùdego to Jenẹsisi 3:15 mẹ lọ nọtena yin didehia to owe godo  tọn Biblu tọn mẹ. (Hia Osọhia 12:1, 2, 5, 10.) Ehe ma yin yọnnu paa de! Osun tin to afọ yọnnu ehe tọn lẹ glọ bọ jẹgbakun de he yè yí sunwhlẹvu 12 do basi tin to ota na ẹn. E ji visunnu vonọtaun de, enẹ wẹ Ahọluduta Jiwheyẹwhe tọn. Ahọluduta lọ tin to olọn mẹ, enẹwutu, yọnnu lọ lọsu dona ko tin to olọn mẹ. E nọtena adà olọn mẹ tọn titobasinanu Jehovah tọn he bẹ nudida gbigbọnọ nugbonọ etọn lẹ hẹn.—Gal. 4:26.

8. Mẹnu wẹ yin adà tangan kúnkan yọnnu lọ tọn, podọ whetẹnu wẹ e lẹzun adà tangan ehe? (Jenẹsisi 22:15-18)

⁸ Ohó Jiwheyẹwhe tọn sọ gọalọna mí nado yọ́n mẹhe yin adà tangan kúnkan yọnnu lọ tọn. Kúnkan ehe dona yin ovivi jọnun Ablaham tọn de. (Hia Jenẹsisi 22:15-18.) Dile dọdai lọ ko dohia do, Jesu yin kúnkan jọnun tọgbo nugbonọ enẹ tọn. (Luku 3:23, 34) Amọ́, kúnkan lọ dona dohuhlọn hú gbẹtọvi de, na ewọ wẹ na só Satani Lẹgba bo de e sẹ̀ sọn aimẹ wutu. Enẹwutu, whenue Jesu do nudi owhe 30, e yin dide gbọn gbigbọ dali taidi Visunnu Jiwheyẹwhe tọn. To ojlẹ enẹ mẹ, Jesu lẹzun adà tangan kúnkan yọnnu lọ tọn. (Gal. 3:16) To okú po fọnsọnku Jesu tọn po godo, Jiwheyẹwhe “yí gigo po gbégbò po do ṣinyọ́n jẹgbakun na ẹn” bo na ẹn ‘aṣẹ lẹpo to olọn mẹ podọ to aigba ji,’ ehe bẹ aṣẹ lọ “nado gbà azọ́n Lẹgba tọn lẹ” hẹn.—Heb. 2:7; Mat. 28:18; 1 Joh. 3:8.

9, 10. (a) Mẹnu lẹ wẹ sọ yin apadewhe kúnkan yọnnu lọ tọn, podọ whetẹnu wẹ enẹ nọ jọ? (b) Etẹwẹ mí na gbadopọnna bọdego?

⁹ Amọ́, adà awetọ kúnkan lọ tọn de dona tin. Apọsteli Paulu do mẹhe adà kúnkan lọ tọn ehe yin hia whenue e dọna Klistiani Ju po Kosi yiamisisadode lẹ po dọmọ: “Eyin mìwlẹ yin Klisti tọn, be na taun tọn, kúnkan Ablaham tọn wẹ mì yin, yèdọ gudutọ opagbe de tọn lẹ.” (Gal. 3:28, 29) Whenue Jehovah yí gbigbọ wiwe do de Klistiani de, mẹlọ nọ lẹzun apadewhe kúnkan yọnnu lọ tọn. Enẹwutu, kúnkan lọ bẹ Jesu Klisti po gandutọgbẹ́ etọn 144000 lẹ po hẹn. (Osọ. 14:1) Yemẹpo wẹ nọ lẹnnupọn bosọ nọ yinuwa taidi Otọ́ yetọn, enẹ wẹ Jehovah Jiwheyẹwhe.

¹⁰ Todin he mí ko yọ́n mẹhe yin nùdego to Jenẹsisi 3:15 mẹ lẹ, mì gbọ mí ni gbadopọnna lehe Jehovah ko hẹn dọdai ehe di vudevude do to kleun mẹ, gọna lehe mí nọ mọaleyi sọn e mẹ do.

11. Linlẹn tẹ mẹ wẹ yè hẹ̀nadu “afọgbẹn” kúnkan yọnnu lọ tọn te?

¹¹ Sọgbe hẹ dọdai Jenẹsisi 3:15 tọn, odàn lọ na hẹ̀nadu “afọgbẹn” kúnkan yọnnu lọ tọn. Enẹ mọ hẹndi whenue Satani sisẹ́ Ju lẹ po Lomunu lẹ po nado hù Visunnu Jiwheyẹwhe tọn. (Luku 23:13, 20-24) Kẹdẹdile awugble afọgbẹn tọn de gán glọnalina mẹde na ojlẹ de nado zinzọnlin do, okú Jesu tọn ze e do ninọmẹ nudemayiwa tọn mẹ na ojlẹ de, podọ oṣiọ etọn nọ yọdò mẹ na nudi azán atọ̀n.—Mat. 16:21.

12. Whetẹnu wẹ ota odàn lọ tọn na yin sisó, podọ gbọnna?

¹² Jesu ma gán gbọṣi yọdò mẹ, eyin dọdai Jenẹsisi 3:15 tọn na mọ hẹndi. Etẹwutu? Na dile dọdai lọ dọ do, kúnkan lọ na só ota odàn lọ tọn. Ehe dohia dọ Jesu dona yin finfọnsọnku. Podọ nuhe jọ lọ pẹẹ niyẹn! To azán atọ̀ntọ gbè to okú etọn godo, Jesu yin finfọnsọnku taidi nudida gbigbọnọ jọmaku de. To ojlẹ sisọ Jiwheyẹwhe tọn mẹ, Jesu na só ota odàn lọ tọn, enẹ wẹ yindọ e na và Satani sudo. (Heb. 2:14) Mẹhe na dugán hẹ Klisti lẹ na do mahẹ to kẹntọ Jiwheyẹwhe tọn he to aigba ji lẹpo vivasudo mẹ, enẹ wẹ kúnkan odàn lọ tọn.—Osọ. 17:14; 20:4, 10. *

13. Nawẹ mí nọ mọaleyi sọn hẹndi dọdai ehe tọn mẹ gbọn?

¹³ Eyin a yin devizọnwatọ klandowiwe Jiwheyẹwhe tọn de, be a ko to alemọyi sọn hẹndi dọdai ehe tọn mẹ. Jesu wá aigba ji taidi gbẹtọvi de. E do jẹhẹnu Otọ́ etọn tọn lẹ hia to pipé mẹ. (Joh. 14:9) Enẹwutu, gbọn ewọ gblame, mí wá yọ́n Jehovah Jiwheyẹwhe bosọ yiwanna ẹn. Mí ko sọ mọaleyi sọn nuplọnmẹ Jesu tọn po anademẹ etọn lẹ po mẹ dile e to anadena agun Klistiani tọn to egbehe. E plọn mí lehe mí na nọgbẹ̀ to aliho he na gọalọna mí nado mọ nukundagbe Jehovah tọn mẹ do. Podọ, mímẹpo wẹ gán mọaleyi sọn okú Jesu tọn mẹ, enẹ wẹ sọn afọgbẹn etọn he yè hẹ̀nadu mẹ. Gbọnna? To whenue Jesu yin finfọnsọnku, e ze nuhọakuẹ-yinyin ohùn etọn tọn donukọnna Jehovah taidi avọ́sinsan pipé de he “klọ́ mí wé sọn ylando lẹpo mẹ.”—1 Joh. 1:7.

14. Be gbẹtọvi lẹ dona ko donukun dọ dọdai he yin didọ to Edẹni mẹ lọ ni mọ hẹndi to afọdopolọ ji wẹ ya? Basi zẹẹmẹ.

¹⁴ Nuhe Jehovah dọ to jipa Edẹni tọn mẹ lẹ dohia dọ ojlẹ de na juwayi whẹpo dọdai lọ nido mọ hẹndi to gigọ́ mẹ. E na yí whenu to yọnnu lọ si nado wleawuna kúnkan dopagbe lọ,  to Lẹgba si nado bẹ hodotọ etọn lẹ pli, podọ na okẹ̀n (kavi wangbẹna) nido fọ́n to pipli awe lọ lẹ ṣẹnṣẹn. Mí nọ mọaleyi sọn dọdai ehe yinyọnẹn mẹ, na e na mí avase dọ aihọn he ji Satani to gandu do lọ na gbẹwanna sinsẹ̀n-basitọ Jehovah tọn lẹ. To nukọn mẹ, Jesu na avase mọnkọ devi etọn lẹ. (Malku 13:13; Joh. 17:14) Ayihaawe ma tin dọ mí ko mọ hẹndi adà dọdai enẹ tọn, titengbe to owhe 100 agọe tọn lẹ mẹ. Gbọnna?

15. Naegbọn wangbẹna aihọn tọn do sinyẹn deji, amọ́ etẹwutu mí ma do whẹwhinwhẹ́n depope nado dibuna Satani?

¹⁵ Ojlẹ vude to whenue Jesu lẹzun Ahọlu Mẹsia lọ to 1914 godo, Satani yin yinyan sọn olọn mẹ. To alọnu, e yin ginglọn do lẹdo aigba tọn mẹ, bo to tepọn vasudo etọn. (Osọ. 12:9, 12) Amọ́, e ma bla alọ dogo poun. Satani to adidu do omẹ Jiwheyẹwhe tọn lẹ go, podọ e jẹma do yé ji. (Osọ. 12:13, 17) Abajọ aihọn lọ do gbẹwanna omẹ Jiwheyẹwhe tọn lẹ hugan gbede pọ́n. Amọ́, mí ma do whẹwhinwhẹ́n depope nado dibuna Satani po hodotọ etọn lẹ po. Kakatimọ, mí gán do nujikudo dopolọ taidi apọsteli Paulu, mẹhe wlan dọmọ: “Eyin Jiwheyẹwhe tin hẹ mí, mẹnu wẹ na jẹagọdo mí?” (Lom. 8:31) Mí gán deji mlẹnmlẹn do Jehovah go, na dile mí ko mọ do, adà daho hugan dọdai he yin nùdego to Jenẹsisi 3:15 mẹ lọ tọn ko mọ hẹndi.

16-18. Nawẹ nukunnumimọjẹ Jenẹsisi 3:15 mẹ ko hẹn ale wá na Curtis, Ursula po Jessica po gbọn?

¹⁶ Opagbe Jehovah tọn he to Jenẹsisi 3:15 mẹ gán gọalọna mí nado duto whlepọn he mí nọ pehẹ lẹ ji. Mẹdehlan de he nọ nọ̀ Guam bo nọ yin Curtis dọmọ: “To whedelẹnu, n’ko pehẹ whlepọn po flumẹjijẹ po he whlé mẹdezejo ṣie na Jehovah pọ́n. Amọ́, ayihamẹlinlẹnpọn do dọdai he to Jenẹsisi 3:15 mẹ ji ko gọalọna mi nado zindonukọn bo nọ dejido Otọ́ olọn mẹ tọn ṣie go.” Curtis to nukọnpọnhlan azán he gbè Jehovah na hẹn whlepọn mítọn lẹpo wá vivọnu.

¹⁷ Mẹmẹyọnnu de to Bavière he nọ yin Ursula dọ dọ nukunnumimọjẹ Jenẹsisi 3:15 mẹ ko gọalọna emi nado kudeji dọ Biblu yin Ohó gbọdo Jiwheyẹwhe tọn. E mọ lehe dọdai he pò lẹpo tindo kanṣiṣa hẹ dọdai ehe do, podọ enẹ yinuwadeji sisosiso. E yidogọ  dọmọ: “E yinuwado ji e taun, whenue n’plọn dọ Jehovah yinuwa to afọdopolọji na gbẹtọvi lẹ nido tindo todido.”

¹⁸ Jessica he wá sọn Micronésie dọmọ: “N’gán gbẹ́ flin lehe e ṣí na mi tlolo he e họnwun na mi dọ n’ko mọ nugbo lọ! Dọdai he to Jenẹsisi 3:15 mẹ to hẹndi mọ. E gọalọna mi nado flindọ awufiẹsa he mọ mí te to egbehe lẹ ma yin nuhe Jehovah jlo na mí. Dọdai ehe ko sọ hẹn mi kudeji dogọ dọ Jehovah sinsẹ̀n nọ dekọtọn do gbẹzan dagbe mẹ todin, podọ etlẹ yin do gbẹzan dagbe hugan de mẹ to sọgodo.”

19. Naegbọn mí gán kudeji dọ adà godo tọn dọdai lọ tọn na mọ hẹndi?

¹⁹ Dile mí ko mọ do, Jenẹsisi 3:15 to hẹndi mọ to alọnu. Kúnkan yọnnu lọ tọn po kúnkan odàn lọ tọn po ko yin yinyọnẹn hezeheze. Jesu he yin adà tangan kúnkan yọnnu lọ tọn ko jẹgángán sọn awugble afọgbẹn tọn etọn si, podọ todin e yin Ahọlu gigonọ jọmaku de to olọn mẹ. Jehovah ko dibla ṣinyan mẹhe na dugán hẹ Visunnu etọn to olọn mẹ lẹpo. Na adà tintan dọdai lọ tọn ko mọ hẹndi wutu, mí tindo whẹwhinwhẹ́n lẹpo nado deji dọ adà godo tọn lọ, enẹ wẹ ota odàn lọ tọn sisó nasọ mọ hẹndi ga. Lehe e na miọnhomẹna gbẹtọvi nugbonọ lẹ do sọ whenue Satani ma nasọ tin ba! Kakajẹ whenẹnu, ma gbọjọ blo. Nugbonọ wẹ Jiwheyẹwhe mítọn. Gbọn kúnkan yọnnu lọ tọn gblamẹ, e na hẹn dona mayọnjlẹ lẹ wá na “akọta aigba ji tọn lẹpo.”—Jen. 22:18.