HOSỌ OPLỌN TỌN 25
“Yẹnlọsu Wẹ Na Dín Lẹngbọ Ṣie lẹ Mọ”
“Yẹnlọsu wẹ na dín lẹngbọ ṣie lẹ mọ bo nasọ penukundo yé go.”—EZEK. 34:11.
OHÀN 105 “Jiwheyẹwhe Wẹ Owanyi”
BLADOPỌ *
1. Nawẹ Jehovah taidi onọ̀ he tindo ovi to anọ́nù de gbọn?
“BE YỌNNU de sọgan wọn ovi to anọ́nù etọn” ya? Jehovah wẹ kàn kanbiọ enẹ sè to ojlẹ yẹwhegán Isaia tọn mẹ. Jiwheyẹwhe dọna akọta etọn dọmọ: “Eyin yọnnu ehelẹ tlẹ wọn, yẹn ma na wọn we gbede.” (Isa. 49:15) Ewọ ma nọ saba yí ede jlẹdo onọ̀ de go. Amọ́, e wàmọ to ninọmẹ ehe mẹ. Jehovah yí kanṣiṣa he nọ tin to onọ̀ de po ovi etọn po ṣẹnṣẹn zan nado do obá sisosiso he mẹ e yiwanna devizọnwatọ etọn lẹ jẹ hia. Suhugan onọ̀ lẹ tọn wẹ gán mọnukunnujẹ numọtolanmẹ mẹmẹyọnnu de he nọ yin Jasmin tọn mẹ, he dọmọ: “Whenue a tindo ovi to anọ́nù de, haṣinṣan pẹkipẹki de nọ wá aimẹ to hiẹ po e po ṣẹnṣẹn he nọ zindonukọn dile mì togbẹ̀ dẹnsọ.”
2. Etẹwẹ nọ yin numọtolanmẹ Jehovah tọn eyin ovi etọn dopo danbú sọn e dè?
2 Jehovah nọ doayi e go eyin dopo tata to ovi etọn lẹ mẹ doalọtena gbẹdido hẹ agun Klistiani tọn po mahẹ dido to azọ́n yẹwhehodidọ tọn lọ mẹ po. Enẹwutu, pọ́n lehe e na ko nọ biọlanmẹna ẹn do sọ nado mọ bọ devizọnwatọ etọn fọtọ́n susu lẹ nọ gbọjọ * to whemẹwhemẹ.
3. Etẹwẹ yin ojlo Jehovah tọn?
3 Susu to yisenọ hatọ vivẹ́ he ko gbọjọ ehelẹ mẹ nọ lẹkọwa agun mẹ, bọ mí nọ dokuavọna yé po zohunhun po! Jehovah jlo dọ yé ni lẹkọwa, podọ ojlo mílọsu tọn niyẹn. (1 Pita 2:25) Nawẹ mí sọgan gọalọna yé gbọn? Whẹpo mí nado na gblọndo kanbiọ enẹ tọn, e na yọ́n dọ mí ni mọnukunnujẹ nuhewutu mẹdelẹ nọ doalọtena opli lẹ yìyì po mahẹ tintindo to lizọnyizọn lọ mẹ po mẹ.
NAEGBỌN MẸDELẸ NỌ DOALỌTENA JEHOVAH SINSẸ̀N?
4. Nawẹ agbasazọ́n sọgan yinuwado mẹdelẹ ji gbọn?
4 Mẹdelẹ nọ jo yede na agbasazọ́n yetọn pete. Mẹmẹsunnu de to Asie he nọ yin Hung * yigbe dọmọ: “N’wá pò na agbasazọ́n ṣie kẹdẹ. N’gbọn nulú dali klọ dee dọ eyin onú pọnte na mi vude to agbasa-liho, n’na penugo dogọ nado sẹ̀n Jehovah. Enẹwutu, n’nọ wazọ́n na gànhiho susu. N’jẹ opli lẹ gọ̀n ji dopodopo kaka bo wá doalọtena mlẹnmlẹn. E taidi dọ aihọn lọ yin awuwlena to aliho de mẹ nado dọ̀n gbẹtọ lẹ sọn Jiwheyẹwhe dè vudevude.”
5. Nawẹ nuhahun debọdo-dego he mẹmẹyọnnu de pehẹ lẹ yinuwadeji gbọn?
5 Nuhahun lẹ ko húagbọ́ mẹmẹsunnu po mẹmẹyọnnu delẹ po. Anne yin onọ̀ de to Grande-Bretagne bo tindo ovi atọ́n. Anne dọmọ: “Dopo to ovi ṣie lẹ mẹ yin jiji po oblọ agbasa tọn sinsinyẹn delẹ po. To nukọn mẹ, viyọnnu ṣie dopo yin didesẹ sọn agun mẹ bọ visunnu ṣie de sọ bẹ apọ̀nmẹ-zọ̀n. N’jẹflumẹ sọmọ bo doalọtena opli lẹ yìyì po yẹwhehodidọ po. To godo mẹ, n’wá gbọjọ.” Onú Anne po whẹndo etọn po tọn gọna mẹdevo he to pipehẹ nuhahun mọnkọ lẹ tọn nọ biọlanmẹna mí taun!
6. Nawẹ awugbopo nado yí nuhe Kolosinu lẹ 3:13 dọ lẹ do yizan mẹ gán zọ́n bọ mẹde na danbú sọn omẹ Jehovah tọn lẹ mẹ gbọn?
6 Hia Kolosinu lẹ 3:13. Devizọnwatọ Jehovah tọn delẹ ko yin awugblena gbọn yisenọ hatọ de dali. Apọsteli Paulu yigbe dọ to whedelẹnu mí sọgan tindo “whẹwhinwhẹ́n [dolido] nado wọ́” po mẹmẹsunnu de kavi mẹmẹyọnnu de po. Mí tlẹ sọgan ko yin nuyiwa hẹ to aliho agọ̀ mẹ. Eyin mí ma payi, mí gán jẹ mẹhẹndohomẹ ji. Homẹgble sọgan zọ́n bọ mẹde na wá danbú sọn omẹ Jehovah tọn lẹ mẹ. Lẹnnupọndo apajlẹ mẹmẹsunnu Pablo tọn ji he nọ nọ̀ Hùwaji Amelika tọn. Yè sawhẹ lalo dokọna ẹn dọ e jai jẹ ylanwiwa de mẹ, podọ taidi kọdetọn de e hẹn lẹblanulọkẹyi de bu to agun mẹ. Nawẹ e yinuwa gbọn? Pablo dọmọ: “Homẹgble mi, bọ vudevude n’jo agun lọ do.”
7. Etẹwẹ sọgan jọ do mẹde go eyin ayihadawhẹnamẹnu etọn nọ to whẹgbledo e?
7 Ayihadawhẹnamẹnu mẹhe ko gbàsẹ́n Jiwheyẹwhe tọn wayi de tọn sọgan nọ dotukla ẹ, bọ e na nọ mọdọ emi ma jẹna owanyi Jiwheyẹwhe tọn. Eyin mẹlọ tlẹ lẹnvọjọ bọ lẹblanu yin didohia ẹ, e gán nọ lẹndọ emi masọ pegan nado yin dopo to omẹ Jiwheyẹwhe tọn lẹ mẹ ba. Numọtolanmẹ mọnkọ wẹ mẹmẹsunnu de he nọ yin Francisco tindo. E dọmọ: “N’yin wiwọhẹ na n’doalọ to fẹnnuwiwa zanhẹmẹ tọn mẹ wutu. Dile etlẹ yindọ to bẹjẹeji n’gbẹ́ zindonukọn nado to opli lẹ yì, n’wá jẹflumẹ bo mọdọ n’masọ jẹ nado tin to Kunnudetọ Jehovah tọn lẹ ṣẹnṣẹn ba. Ayihadawhẹnamẹnu ṣie nọ gblewhẹdo mi, podọ n’kudeji dọ Jehovah ma ko jona mi. To nukọn mẹ, n’doalọtena gbẹdido hẹ agun lọ.” Numọtolanmẹ tẹwẹ a nọ tindo na yisenọ hatọ he to pipehẹ ninọmẹ he go mí ṣẹṣẹ donù lẹ? Be onú yetọn nọ biọlanmẹna we ya? Hú popolẹpo, numọtolanmẹ tẹwẹ Jehovah nọ tindo na yé?
JEHOVAH YIWANNA LẸNGBỌ ETỌN LẸ
Lẹngbọhọtọ Islaelivi de yí awuvẹmẹ sisosiso do to nukunpedo lẹngbọ he bu de go (Pọ́n hukan 8, 9tọ) *
8. Be Jehovah nọ wọn mẹhe ko sẹ̀n ẹn wayi pọ́n lẹ wẹ ya? Basi zẹẹmẹ.
8 Jehovah ma nọ wọn mẹhe ko sẹ̀n ẹn wayi ṣigba bo wá doalọtena gbẹdido hẹ omẹ etọn lẹ na ojlẹ de lẹ; mọ e ma nọ wọnji azọ́n he yé ko wà to sinsẹ̀nzọn etọn mẹ lẹ go. (Heb. 6:10) Yẹwhegán Isaia basi kandai nuyijlẹdonugo he whànmẹ de tọn nado do lehe Jehovah nọ penukundo omẹ etọn lẹ go do hia. Isaia wlan dọmọ: “Ewọ na penukundo lẹngbọpa etọn go di lẹngbọhọtọ de. E na yí awà etọn do bẹ lẹngbọvu etọn lẹ pli dopọ, bo na bẹ yé do akọ́n etọn nù.” (Isa. 40:11) Etẹwẹ nọ yin numọtolanmẹ Lẹngbọhọtọ Daho lọ tọn eyin lẹngbọ etọn de danbú sọn lẹngbọpa lọ mẹ? Jesu do numọtolanmẹ he Jehovah nọ tindo hia to whenue e kanse devi etọn lẹ dọmọ: “Etẹwẹ mì lẹn? Eyin dawe de tindo lẹngbọ 100 bọ dopo to yé mẹ danbú, be ewọ ma na jo 99 lẹ do osó lẹ ji bo yì dín dopo he to dindanbu lọ ya? Podọ eyin e wá mọ ẹn, nugbo wẹ yẹn dọna mì dọ, ewọ na jaya tlala do e ji hú do 99 he ma danbú lẹ ji.”—Mat. 18:12, 13.
9. To ojlẹ Biblu tọn mẹ, nawẹ lẹngbọhọtọ dagbe lẹ nọ yinuwa hẹ lẹngbọ yetọn lẹ gbọn? (Pọ́n yẹdide he to wepa ji.)
9 Naegbọn e do sọgbe nado yí Jehovah jlẹdo lẹngbọhọtọ de go? Na to ojlẹ Biblu tọn mẹ, lẹngbọhọtọ dagbe de nọ hò lẹngbọ etọn lẹ tọn pọ́n sisosiso wutu. Di apajlẹ, Davidi diahi hẹ kinnikinni de po beali de po nado basi hihọ́na lẹngbọpa etọn. (1 Sam. 17:34, 35) Matin ayihaawe, lẹngbọhọtọ dagbe de nọ doayi e go eyin lẹngbọ etọn dopo tata bu. (Joh. 10:3, 14) Lẹngbọhọtọ mọnkọ na jo lẹngbọ etọn 99 he pò lẹ do hihọ́ glọ to apó de mẹ kavi to lẹngbọhọtọ hatọ etọn lẹ dè nado yì dín dopo he whè lọ. Jesu yí nujlẹdonugo enẹ zan nado plọn mí nugbo titengbe de, e dọmọ: “E ma yin ojlo Otọ́ ṣie he tin to olọn mẹ tọn dọ dopo tata to omẹ pẹvi ehelẹ mẹ ni dọ̀n gba.”—Mat. 18:14.
Lẹngbọhọtọ de to Islaeli hohowhenu tọn to nukunpedo lẹngbọ he danbú de go (Pọ́n hukan 9tọ)
JEHOVAH NỌ DÍN LẸNGBỌ ETỌN LẸ MỌ
10. Sọgbe hẹ Ezekiẹli 34:11-16, etẹwẹ Jehovah dopà nado wà na lẹngbọ etọn he bu lẹ?
10 Jehovah yiwanna dopodopo mítọn, etlẹ yin “omẹ pẹvi” he danbú sọn lẹngbọpa etọn mẹ lẹ. Gbọn yẹwhegán Ezekiẹli gblamẹ, Jiwheyẹwhe dopà dọ emi na dín lẹngbọ emitọn he danbú lẹ mọ bo gọalọna yé nado gọ̀ nuwiwa gbigbọmẹ tọn yetọn lẹ bẹ. E sọ slẹ afọdide tangan he ewọ na ze nado hẹn yé gọwá lẹ, yèdọ afọdide he lẹngbọhọtọ Islaelivi de na ze to paa mẹ eyin lẹngbọ etọn bu. (Hia Ezekiẹli 34:11-16.) Tintan, lẹngbọhọtọ lọ na dín lẹngbọ lọ pé, bọ ehe sọgan biọ whenu po vivẹnudido susu po. Enẹgodo, whenue lẹngbọhọtọ lọ wá mọ lẹngbọ he danbú lọ, e na hẹn ẹn gọwá lẹngbọpa lọ mẹ. Humọ, eyin lẹngbọ lọ gbleawu kavi huvẹ hù i, lẹngbọhọtọ lọ na yí owanyi do gọalọna kanlin madogánnọ ehe, blá apà etọn lẹ, penukundego bosọ na ẹn núdùdù. E nọ biọ dọ mẹho agun tọn lẹ, yèdọ lẹngbọhọtọ “lẹngbọpa Jiwheyẹwhe tọn” lẹ ni ze afọdide dopolọ lẹ nado gọalọna mẹdepope he ko danbú sọn agun lọ mẹ. (1 Pita 5:2, 3) Mẹho lẹ nọ dín yé mọ, nọ gọalọna yé nado lẹkọwa lẹngbọpa lọ mẹ, bosọ nọ do owanyi hia yé gbọn nuhe sin hudo yé do to gbigbọ-liho lẹ nina yé dali. *
11. Etẹ mẹ wẹ lẹngbọhọtọ dagbe de nọ mọnukunnujẹ?
11 Lẹngbọhọtọ dagbe de nọ mọnukunnujẹemẹ dọ lẹngbọ lẹ sọgan danbú. Podọ eyin lẹngbọ de wá danbú sọn apó lọ mẹ, lẹngbọhọtọ lọ ma nọ yinuwa hẹ ẹ po kanyinylan po. Lẹnnupọndo apajlẹ he Jiwheyẹwhe zedai ji to whenue e gọalọna devizọnwatọ etọn delẹ he danbú sọn e dè na ojlẹ de.
12. Nawẹ Jehovah yinuwa hẹ Jona gbọn?
12 Yẹwhegán Jona họ̀nna azọ́ndenamẹ etọn. Mahopọnna enẹ, Jehovah ma zọ̀n plaplaji bo gbẹ́ ẹ dai. Taidi lẹngbọhọtọ dagbe de, Jehovah whlẹn ẹn bo gọalọna ẹn nado mọ huhlọn he sin hudo e tindo nado hẹn azọ́ndenamẹ etọn di. (Jona 2:7; 3:1, 2) To nukọn mẹ, Jiwheyẹwhe yí apajlẹ atinkan de tọn zan do gọalọna Jona nado mọnukunnujẹemẹ dọ ogbẹ̀ gbẹtọvi dopodopo tọn wẹ yin nujọnu. (Jona 4:10, 11) Etẹwẹ ehe plọn mí? Agbọ́ mẹhe lẹzun gbemasọtọ kavi gbọjọ lẹ tọn ma dona nọ yawu pé mẹho lẹ. Kakatimọ, mẹho lẹ nọ tẹnpọn nado mọnukunnujẹ nuhewutu lẹngbọ de do danbú sọn apó lọ mẹ go. Podọ whenue lẹngbọ enẹ lẹkọwa Jehovah dè, mẹho lẹ nọ zindonukọn nado to ojlo nujọnu tọn dohia to ewọ mẹ.
13. Etẹwẹ mí sọgan plọn sọn aliho he mẹ Jehovah yinuwa hẹ mẹhe kàn Salmu lẹ 73tọ te mẹ?
13 Mẹhe kàn Salmu lẹ 73tọ wá gbọjọ to whenue e doayi mẹylankan lẹ go bọ e taidi dọ onú to yinyọ́n na yé. E jẹ ayihaawe tindo ji eyin vlavo ojlo Jiwheyẹwhe tọn wiwà nọ hẹn ale wá nugbo. (Salm. 73:12, 13, 16) Nawẹ Jehovah yinuwa gbọn? E ma gblewhẹdo dawe lọ. Na nugbo tọn, Jiwheyẹwhe hẹn ohó salmu-kantọ enẹ tọn lẹ nado yin kinkando Biblu mẹ. To godo mẹ, salmu-kantọ lọ wá mọdọ nudevo depope ma doale sọ haṣinṣan dagbe de tintindo hẹ Jehovah, na ehe nọ hẹn ogbẹ̀ mẹtọn tindo zẹẹmẹ wutu. (Salm. 73:23, 24, 26, 28) Etẹwẹ yin nuplọnmẹ lọ? Mẹho lẹ ma dona nọ yawu dawhẹna mẹhe jẹ ayihaawe tindo ji gando ale he Jehovah sinsẹ̀n nọ hẹnwa go lẹ. Kakati nado gblewhẹdo yé, mẹho lẹ dona tẹnpọn bo mọnukunnujẹ nuhewutu yé do dọho kavi yinuwa domọ mẹ. To whenẹnu kẹdẹ wẹ mẹho lẹ sọgan gbadopọnna wefọ Biblu tọn delẹ hẹ yé, he na na yé tuli he sin hudo yé do.
14. Naegbọn Elija do dó hudo alọgọ tọn, podọ nawẹ Jehovah nọgodona ẹn gbọn?
14 Yẹwhegán Elija họ̀nna Ahọsi Jezebẹli. (1 Ahọ. 19:1-3) E lẹndọ mẹdevo depope ma pò bo yin yẹwhegán Jehovah tọn, podọ e tindo numọtolanmẹ lọ dọ tukla tata jẹ wẹ emi te. Elija jẹflumẹ sọmọ bo biọ okú na ede. (1 Ahọ. 19:4, 10) Kakati Jehovah ni gblewhẹdo Elija, e hẹn ẹn deji dọ e ma to edeṣo, dọ e sọgan dejido huhlọn Jiwheyẹwhe tọn go, podọ azọ́n susu gbẹ́ pò bọ e na wà. Jehovah yí homẹdagbe do dotoaina ahunmẹdunamẹnu Elija tọn lẹ, bosọ de azọ́n devo lẹ na ẹn dogọ. (1 Ahọ. 19:11-16, 18) Etẹwẹ ehe plọn mí? Mímẹpo, titengbe mẹho agun tọn lẹ dona nọ do homẹdagbe hia lẹngbọ Jehovah tọn lẹ. Vlavo mẹde gblehomẹ wẹo kavi mọdọ emi ma jẹna lẹblanu Jehovah tọn, mẹho lẹ na dotoaina ẹn dile e to nuhe to ahun ji na ẹn lẹ dọtọ́n. Enẹgodo, yé na tẹnpọn nado hẹn lẹngbọ he bu lọ deji dọ e họakuẹ to nukun Jehovah tọn mẹ.
NUKUN TẸWẸ MÍ DONA NỌ YÍ DO PỌ́N LẸNGBỌ JIWHEYẸWHE TỌN HE BU LẸ?
15. Sọgbe hẹ Johanu 6:39, nukun tẹwẹ Jesu yí do pọ́n lẹngbọ Otọ́ etọn tọn lẹ?
15 Nukun tẹwẹ Jehovah jlo dọ mí ni nọ yí do pọ́n lẹngbọ etọn he bu lẹ? Jesu ze apajlẹ dai na mí. E yọnẹn dọ lẹngbọ Jehovah tọn lẹpo wẹ họakuẹ to nukun etọn mẹ, enẹwutu Jesu wà nuhe go e pé lẹpo nado gọalọna “lẹngbọ owhé Islaeli tọn he bu lẹ,” na yé nido lẹkọwa Jehovah dè. (Mat. 15:24; Luku 19:9, 10) Taidi lẹngbọhọtọ dagbe lọ, Jesu sọ wà nuhe go e pé lẹpo ma nado hẹn lẹngbọ Jehovah tọn depope bu.—Hia Johanu 6:39.
16, 17. Nukun tẹwẹ mẹho agun tọn lẹ dona nọ yí do pọ́n alọgigọna mẹhe ko danbú lẹ? (Pọ́n apotin lọ “ Numọtolanmẹ Lẹngbọ He Bu de Tọn Lẹ.”)
16 Apọsteli Paulu dotuhomẹna mẹho agun Efesu tọn lẹ nado hodo apajlẹ Jesu tọn. E dọmọ: “Mì dona gọalọna mẹhe yin madogánnọ lẹ podọ mì dona hẹn ohó Oklunọ Jesu tọn lẹ do ayiha mẹ, to whenue ewọ lọsu dọ dọ: ‘Ayajẹ sù to nunamẹ mẹ hú to mimọyi mẹ.’” (Owalọ 20:17, 35) Na nugbo tọn, mẹho agun tọn lẹ to egbehe tindo azọngban titengbe de to adà ehe mẹ. Salvador, yèdọ mẹho agun tọn de to Espagne dọmọ: “Eyin n’lẹnnupọndo lehe Jehovah nọ penukundo lẹngbọ etọn he danbú lẹ go do ji, enẹ nọ whàn mi nado wà nuhe go n’pé lẹpo bo gọalọna yé. Taidi lẹngbọhọtọ gbigbọmẹ tọn de, n’kudeji dọ Jehovah jlo dọ n’ma penukundo yé go.”
17 Mẹhe go mí donù to hosọ ehe mẹ bọ yé ko danbú lẹpo wẹ mọ alọgọ yí bo lẹkọwa Jehovah dè. To alọnu din, mẹsusu devo he ko danbú lẹ to jijlo nado wà nudopolọ. Hosọ he bọdego na na nudọnamẹ gigọ́ lẹ gando nuhe mí sọgan wà nado gọalọna yé nado lẹkọwa Jehovah dè go.
OHÀN 139 Mọ Dewe Hlan Aihọn Yọyọ lọ Mẹ
^ huk. 5 Naegbọn mẹdelẹ he ko sẹ̀n Jehovah po nugbonọ-yinyin po na owhe susu lẹ nọ wá danbú sọn agun mẹ? Numọtolanmẹ tẹwẹ Jiwheyẹwhe nọ tindo gando yé go? Hosọ ehe na gblọndo kanbiọ enẹlẹ tọn. E sọ dọhodo nuhe mí sọgan plọn sọn aliho he mẹ Jehovah gọalọna mẹdelẹ he danbú sọn e dè na ojlẹ de to hohowhenu te mẹ ji.
^ huk. 2 ZẸẸMẸ HOGBE DE TỌN: Wẹnlatọ he gbọjọ de yin mẹhe masọ na linlin azọ́n yẹwhehodidọ po mẹhẹnzun devi po tọn depope ba na osun ṣidopo kavi humọ. Mahopọnna enẹ, mẹhe ko gbọjọ mọnkọ lẹ gbẹ́ yin mẹmẹsunnu po mẹmẹyọnnu mítọn lẹ po, podọ mí yiwanna yé.
^ huk. 4 Yinkọ delẹ ko yin didiọ.
^ huk. 10 Hosọ he bọdego na dọhodo aliho tangan delẹ ji he mẹ mẹho lẹ sọgan ze afọdide ehelẹ te.
^ huk. 60 ZẸẸMẸ YẸDIDE LẸ TỌN: Na onú lẹngbọ he bu de tọn duahunmẹna lẹngbọhọtọ Islaelivi de wutu, e dín in mọ bo gọalọna ẹn nado lẹkọwa lẹngbọpa lọ mẹ. To egbehe, nudopolọ wẹ lẹngbọhọtọ gbigbọmẹ tọn lẹ nọ wà.
^ huk. 64 ZẸẸMẸ YẸDIDE LẸ TỌN: Mẹmẹyọnnu he gbọjọ de to mọto he ma ko sún de mẹ, bo mọ Kunnudetọ awe delẹ he yí ayajẹ do to mahẹ tindo to kunnudide gbangba tọn mẹ.
