1. Etẹwẹ devi Jesu tọn lẹ dọna gbẹtọgun daho de nado wà to owhe kanweko tintan whenu?

GBẸTỌGUN daho de he bẹ sunnu po yọnnu po he wá sọn otò susu mẹ hẹn bo nọ do ogbè voovo lẹ wẹ pli dopọ. Onú jiawu de jọ to gbenẹgbe. Pipli Ju lẹ tọn de penugo bo dọhona jonọ lẹ to anọ́nù-gbè yetọn lẹ mẹ! Ehe paṣamẹ taun, amọ́ nuhe Ju ehelẹ to didọna yé gọna nuhe apọsteli Pita dọna mẹlẹpo sọ paṣamẹ humọ. Gbẹtọgun lọ plọn dọ yé gán yin whinwhlẹngán eyin yé do yise hia to Jesu Klisti mẹ. Owẹ̀n enẹ yinuwado yé ji sisosiso. Na nugbo tọn, yé yin whinwhàn sọmọ bo kanse dọ: “Etẹwẹ mí dona wà?” Pita gblọn dọmọ: ‘Mì dike dopodopo mìtọn ni yin bibaptizi.’—Owalọ 2:37, 38.

2. Etẹwẹ mí na gbadopọnna to hosọ ehe mẹ? (Pọ́n yẹdide he to wepa ji.)

² Onú vonọtaun de wẹ jọ bọdego. Nudi gbẹtọ 3 000 wẹ yí baptẹm to gbenẹgbe bo lẹzun devi Klisti tọn lẹ. Ehe yin bẹjẹeji azọ́n pligidi gbẹtọ lẹ hinhẹn zun devi tọn he Jesu degbena hodotọ etọn lẹ nado wà tọn. Azọ́n ehe dlẹnkan kakajẹ ojlẹ mítọn mẹ. To egbehe, mí ma gán gọalọna mẹde nado lẹzun devi to gànhiho kleun de poun gblamẹ. E gán yí osun lẹ kavi etlẹ yin owhe dopo kavi humọ to nuplọntọ de si nado jẹ yanwle enẹ kọ̀n. Gbẹtọ lẹ hinhẹn zun devi nọ biọ azọ́n, dile a na ko yọnẹn do eyin a to Biblu plọn hẹ mẹde to alọnu. To hosọ ehe mẹ, mí na gbadopọnna nuhe a gán wà nado gọalọna nuplọntọ towe nado yí baptẹm.

3. Dile Matiu 28:19, 20 dọ do, etẹwẹ nuplọntọ de dona wà nado pegan na baptẹm?

³ Whẹpo nuplọntọ de nido yí baptẹm, e dona yí nuhe Biblu plọn mí lẹ do yizan mẹ. (Hia Matiu 28:19, 20.) Eyin nuplọntọ  de yí nuhe e plọn do yizan mẹ, e nọ taidi “dawe nuyọnẹntọ” lọ he go Jesu donù to apajlẹ etọn mẹ, mẹhe kùn odò he yido taun de nado gbá ohọ̀ etọn do osé ji. (Mat. 7:24, 25; Luku 6:47, 48) Nawẹ mí gán gọalọna nuplọntọ de nado yí nuhe plọn e te do yizan mẹ gbọn? Mì gbọ mí ni gbadopọnna ayinamẹ atọ̀n delẹ.

4. Nawẹ mí gán gọalọna nuplọntọ de nado to vivẹnudo zọnmii nado pegan na baptẹm gbọn? (Sọ pọ́n apotin lọ, “ Gọalọna Nuplọntọ Towe Nado Ze Yanwle lẹ Dai Bosọ Jẹ Yé Kọ̀n.”)

⁴Gọalọna nuplọntọ towe nado ze yanwle lẹ dai. Naegbọn a dona wàmọ? Lẹnnupọndo apajlẹ ehe ji: Eyin a jlo na zingbejizọnlin gaa de, a gán bayi tito nado nọte to ofi dagbedagbe delẹ to ali lọ ji. Enẹ na zọ́n bọ gbejizọnlin lọ ma na dẹn sọmọ to nukun towe mẹ. Mọdopolọ, eyin nuplọntọ de ze yanwle ojlẹ gli tọn lẹ donukọnna ede bosọ jẹ yé kọ̀n, e yọnbayi dogọ dọ ni mọdọ emi gán jẹ yanwle baptẹm tọn kọ̀n. Yí adà lọ “Yanwle” he to owe Duvivi Ogbẹ̀ Tọn Kakadoi! mẹ zan nado gọalọna nuplọntọ towe nado yinukọn. To vivọnu nupinplọn dopodopo tọn, dọhodo lehe yanwle lọ tindo kanṣiṣa hẹ nuhe nuplọntọ towe ṣẹṣẹ plọn do ji. Eyin yanwle devo wẹ a tindo to ayiha mẹ na nuplọntọ towe, kàn ẹn do ofi vọ́tọ he to “Yanwle Devo Lẹ” glọ. Sọn ojlẹ de mẹ jẹ devo mẹ, nọ yí adà nupinplọn tọn ehe zan nado vọ́ dogbapọnna yanwle ojlẹ gli tọn gọna yanwle ojlẹ gaa tọn etọn lẹ.

5. Dile Malku 10:17-22 dohia do, etẹwẹ Jesu dọna dawe adọkunnọ de nado wà, podọ etẹwutu?

⁵Gọalọna nuplọntọ towe nado bayi diọdo lẹ to gbẹzan etọn mẹ. (Hia Malku 10:17-22.) Jesu yọnẹn dọ e na vẹawuna dawe adọkunnọ de nado sà nutindo etọn lẹpo. (Malku 10:23) Ṣogan, e dọna dawe lọ nado bayi diọdo daho ehe to gbẹzan etọn mẹ. Etẹwutu? Na Jesu yiwanna ẹn wutu wẹ. To whedelẹnu, mí gán nọ whleawu nado na tuli nuplọntọ de nado yí  nuhe plọn e te lẹ do yizan mẹ, na mí mọdọ e ma ko wleawufo nado bayi diọdo he yin dandan tọn de wutu. E gán yí whenu to mẹdelẹ si nado dealọ sọn walọ hoho yetọn lẹ mẹ, bo ze gbẹtọ-yinyin yọyọ lọ do. (Kol. 3:9, 10) Amọ́, lehe a yawu dọhodopọ hẹ ẹ tlọlọ do whẹho ehe ji sọ, mọ wẹ nuplọntọ lọ gán yawu jẹ diọdo lẹ bayi ji do niyẹn. Gbọn hodọdopọ mọnkọ gblamẹ, a na dohia dọ onú etọn nọ duahunmẹna we.—Salm. 141:5; Howh. 27:17.

6. Naegbọn mí dona nọ yí kanbiọ mẹhẹnlẹnnupọn tọn lẹ zan?

⁶ Kanbiọ mẹhẹnlẹnnupọn tọn yin kanbiọ de he mí nọ kanse nuplọntọ de nado yọ́n pọndohlan kavi linlẹn etọn gando whẹho de go. Nọ yí kanbiọ mọnkọ de zan nado yọ́n nuhe mẹ nuplọntọ towe mọnukunnujẹ bosọ yise lẹ. Eyin a nọ wàmọ whẹwhẹ, e na bọawuna we dogọ nado dọhodopọ hẹ ẹ do whẹho he gẹdẹ lẹ ji to nukọn mẹ. Kanbiọ mẹhẹnlẹnnupọn tọn susu wẹ owe lọ Duvivi Ogbẹ̀ Tọn Kakadoi! bẹhẹn. Di apajlẹ, nupinplọn 4tọ kanse dọ: “Nawẹ a lẹndọ e nọ ṣí na Jehovah, eyin mí yí yinkọ etọn do ylọ ẹ?” Nupinplọn 9tọ kanse dọ: “Etẹlẹ go wẹ a nọ jlo na hodẹ̀ gando?” To tintan whenu, e gán yí whenu to nuplọntọ towe si nado lẹnnupọndo lehe e na na gblọndo na kanbiọ mẹhẹnlẹnnupọn tọn lẹ do ji. A gán gọalọna ẹn gbọn azọ́npinplọn ẹn nado lẹnnupọndo wefọ po yẹdide he to owe lọ mẹ lẹ po ji dali.

7. Nawẹ mí gán nọ yí apajlẹ jọnun lẹ zan po kọdetọn dagbe po gbọn?

⁷ To whenue nuplọntọ towe ko mọnukunnujẹ nuhe e dona wà mẹ, yí apajlẹ jọnun lẹ zan nado gọalọna ẹn nado wà ẹ. Di dohia, eyin e nọ vẹawuna nuplọntọ towe nado wá opli lẹ, a gán yí video lọ Jehovah Penukundo Go E, he to adà lọ “Pọ́n Nudọnamẹ Devo Lẹ” glọ zan, to nupinplọn 14tọ mẹ. To nupinplọn susu mẹ to owe lọ Duvivi Ogbẹ̀ Tọn Kakadoi! mẹ, a na mọ numimọ mọnkọ lẹ to adà lọ “Dindonanu Dogọ” kavi “Pọ́n Nudọnamẹ Devo Lẹ” glọ. * Payi ma nado nọ yí nuplọntọ towe jlẹdo mẹdevo go gbọn didọ dali dọ, “Eyin e gán pà mẹ-le, be e gán pà hiẹ lọsu ga.” Dike nuplọntọ lọ lọsu ni wá tadona enẹ kọ̀n. Kakatimọ, zinnudo nuagokun titengbe he gọalọna mẹlọ to video lọ mẹ nado yí nuplọnmẹ Biblu tọn lẹ do yizan mẹ ji. Vlavo a gán donù wefọ tangan he gọalọna ẹn kavi onú tangan he e wà go. Whedepopenu he e yọnbayi, nọ dọ̀n ayiha etọn wá lehe Jehovah gọalọna mẹlọ do ji.

8. Nawẹ mí gán gọalọna nuplọntọ mítọn nado yiwanna Jehovah gbọn?

⁸Nọ gọalọna nuplọntọ towe nado yiwanna Jehovah. Gbọnna? Nọ dín dotẹnmẹ hundote lẹ nado dọ̀n ayidonugo etọn wá jẹhẹnu Jehovah tọn lẹ ji. Gọalọna nuplọntọ towe nado nọ mọ Jehovah di Jiwheyẹwhe ayajẹnọ de he nọ gọalọna mẹhe yiwanna ẹn lẹ. (1 Tim. 1:11; Heb. 11:6) Nọ dohia nuplọntọ lọ dọ e na mọaleyi eyin e nọ yí nuhe plọn e te lẹ do yizan mẹ, bosọ bayi zẹẹmẹ na ẹn dọ dohia owanyi Jehovah tọn de wẹ ehe yin. (Isa. 48:17, 18) Nuplọntọ towe na yin whinwhàn dogọ nado bayi diọdo depope he yin dandan tọn, dile owanyi etọn na Jehovah to jijideji.—1 Joh. 5:3.

9. Sọgbe hẹ Malku 10:29, 30, etẹwẹ gán gọalọna mẹde nado bayi avọ́sinsan lẹ bo lẹzun devi he yí baptẹm de?

⁹ Nado pegan na baptẹm, Biblu plọntọ de dona bayi avọ́sinsan lẹ. Taidi dawe adọkunnọ he yin nùdego wayi lọ, e gán biọ dọ nuplọntọ  delẹ ni yí agbasanu yetọn lẹ do sanvọ́. Eyin azọ́n he yé nọ wà ma sọgbe hẹ nunọwhinnusẹ́n Biblu tọn lẹ, etlẹ gán biọ dọ yé ni diọ azọ́n. E gán biọ dọ susu yetọn ni gbà-gbẹ́ họntọn he ma yiwanna Jehovah lẹ tọn. Mẹdevo lẹ gán yin gbigbẹdai gbọn hagbẹ whẹndo tọn yetọn he ma yiwanna Kunnudetọ Jehovah tọn lẹ dali. Jesu dọ dọ e gán vẹawuna mẹdelẹ nado bayi avọ́sinsan mọnkọ lẹ. Amọ́ e dopà dọ, e ma na wá vẹna hodotọ emitọn lẹ dọ yé wàmọ. Jehovah na dona yé susugege bo na na yé whẹndo gbigbọmẹ tọn owanyinọ de. (Hia Malku 10:29, 30.) Nawẹ a gán gọalọna nuplọntọ towe nado mọaleyi sọn nunina dagbedagbe ehe mẹ gbọn?

10. Etẹwẹ a plọn sọn numimọ Manuel tọn mẹ?

¹⁰Jihọntọn hẹ nuplọntọ towe. Nujọnu wẹ e yin dọ a ni dohia nuplọntọ towe dọ onú etọn nọ duahunmẹna we. Etẹwutu? Doayi nuhe Manuel he nọ nọ̀ Mexique dọ go. E flin whenue e gbẹ́ to Biblu plọn bo dọmọ: “Jẹnukọnna oplọn dopodopo, mẹplọntọ ṣie nọ kàn lehe n’te do sè mi janwẹ. E nọ gọalọna mi nado voawu bosọ dọhona ẹn do whẹho devo lẹ ji ma hanú. N’nọ mọdọ onú ṣie nọ duahunmẹna ẹn nugbonugbo.”

11. Nawẹ nuplọntọ mítọn lẹ gán mọaleyi gbọn, eyin mí nọ yí whenu zan dopọ hẹ yé?

¹¹ Nọ yí whenu zan hẹ nuplọntọ towe lẹ, dile Jesu wà do hẹ hodotọ etọn lẹ. (Joh. 3:22) Eyin e yọnbayi, nọ ylọ nuplọntọ towe he ko yinukọn de wá owhé towe gbè nado wá nù kọfanamẹnu kavi dù núdùdù kleun de, kavi nado wá pọ́n tito sunmẹsunmẹ tọn Televiziọn JW tọn de. Nuplọntọ towe gán yọ́n pinpẹn oylọ-bayinamẹ mọnkọ de tọn, titengbe to ojlẹ hùnwhẹ tọn lẹ mẹ, whenue e gán nọ mọ ede to ṣokẹdẹ. Kazibwe he nọ nọ̀ Ouganda dọ dọ: “N’lẹndọ n’plọn nususu gando Jehovah go to ojlẹ he n’yizan dopọ hẹ mẹplọntọ ṣie lẹ whenu, kẹdẹdile n’wà do to oplọn ṣie whenu. N’mọ obá he mẹ Jehovah nọ hò omẹ etọn lẹ tọn pọ́n jẹ, gọna lehe yé do ayajẹ do. Nuhe n’jlo to gbẹzan ṣie mẹ niyẹn.”

12. Naegbọn mí dona nọ plan wẹnlatọ voovo lẹ sọyi plọnmẹ Biblu de tẹnmẹ?

 ¹²Nọ bayi oylọna wẹnlatọ voovo lẹ wá oplọn lọ tẹnmẹ. To whedelẹnu, mí gán mọdọ e bọawu hugan nado nọ yì oplọn de tẹnmẹ míde ṣo kavi nado nọ plan wẹnlatọ dopolọ yì. Dile etlẹ yindọ mọwiwà gán bọawu hugan, e yọnbayi dọ nuplọntọ mítọn ni mọaleyi dogọ eyin sọn ojlẹ de mẹ jẹ devo mẹ mí nọ plan wẹnlatọ voovo lẹ sọyi. Dmitrii he nọ nọ̀ Moldavie dọ dọ: “Wẹnlatọ he wá oplọn ṣie tẹnmẹ lẹ ma nọ bayi zẹẹmẹ nulẹ tọn to aliho dopolọ mẹ. Ehe gọalọna mi nado nọ pọ́n nuhe plọn n’te hlan to aliho voovo lẹ mẹ. Winyankuku ṣie sọ depò whenue n’yì opli whla tintan, na n’ko mọ mẹmẹsunnu po mẹmẹyọnnu susu po pọ́n wutu.”

13. Naegbọn mí dona gọalọna nuplọntọ mítọn nado nọ wá opli lẹ?

¹³Nọ gọalọna nuplọntọ towe nado nọ wá opli lẹ. Etẹwutu? Na Jehovah wẹ degbena sinsẹ̀n-basitọ etọn lẹ nado nọ pli dopọ wutu, podọ ehe yin apadewhe sinsẹ̀n-bibasi mítọn tọn. (Heb. 10:24, 25) Humọ, mẹmẹsunnu po mẹmẹyọnnu mítọn lẹ po yin whẹndo gbigbọmẹ tọn mítọn. Whenue mí pli dopọ hẹ yé to opli lẹ ji, e nọ taidi dọ mí to núdùdù dagbe de dù dopọ to whégbè wẹ nkọ. Eyin a nọ gọalọna nuplọntọ towe nado wá opli lẹ, be alọgọna ẹn wẹ a te nado ze dopo to afọdide titengbe hugan lẹ mẹ nado yí baptẹm. Amọ́, afọdide ehe zize gán vẹawuna ẹn. Nawẹ owe lọ Duvivi Ogbẹ̀ Tọn Kakadoi! gán gọalọna nuplọntọ towe nado duto avùnnukundiọsọmẹnu depope he e sọgan pehẹ ji gbọn?

14. Nawẹ mí gán whàn nuplọntọ mítọn nado nọ wá opli lẹ gbọn?

¹⁴ Nupinplọn 10tọ owe Duvivi Ogbẹ̀ Tọn Kakadoi! tọn gán gọalọna we nado whàn nuplọntọ towe. Wẹnlatọ numimọnọ he si e yin bibiọ te nado tẹ́n nupinplọn ehe pọ́n whẹpo owe lọ do yin didetọn lẹ ko tindo kọdetọn dagbe taun to alọgigọna nuplọntọ yetọn nado nọ wá opli lẹ mẹ. Amọ́, ma nọte kakajẹ nupinplọn 10tọ whẹpo do bayi oylọna nuplọntọ towe wá opli lẹ blo. Yawu bayi oylọna ẹn dile e yọnbayi do bosọ zindonukọn nado nọ wàmọ whẹwhẹ. Aliglọnnamẹnu voovo lẹ wẹ nuplọntọ dopodopo nọ pehẹ. Enẹwutu, nọ na ayidonugo nuhudo nuplọntọ towe tọn lẹ, bo pọ́n eyin a gán gọalọna ẹn to aliho dagbe mẹ. Eyin e ma yawu jẹ opli lẹ wá ji, a dike awàkan mẹ kú we blo. Nọ fahomẹ, amọ́ ma hònúpla blo.

15. Etẹlẹ wẹ gán dobuna nuplọntọ mítọn?

¹⁵ Be a flindọ yè nọ dibu pẹẹde nado lẹzun Kunnudetọ Jehovah tọn de ya? Vlavo a mọdọ emi ma na penugo gbede nado dekunnu to gbangba. Kavi vlavo a dibu dọ whẹndo kavi họntọn towe lẹ gán diọnukunsọ we. Eyin mọ wẹ, a gán mọnukunnujẹ numọtolanmẹ nuplọntọ towe tọn lẹ mẹ. Jesu dohia dọ onú mọnkọ lẹ gán dobunamẹ. Amọ́, e dotuhomẹna hodotọ etọn lẹ ma nado dike obu ni glọnalina yé nado sẹ̀n Jehovah. (Mat. 10:16, 17, 27, 28) Nawẹ Jesu gọalọna hodotọ etọn lẹ nado duto obu yetọn lẹ ji gbọn? Podọ, nawẹ a gán hodo apajlẹ etọn gbọn?

16. Nawẹ mí gán plọnazọ́n nuplọntọ mítọn nado nọ má nuyise etọn lẹ hẹ mẹdevo lẹ gbọn?

¹⁶Nọ plọnazọ́n nuplọntọ towe vudevude nado má nuyise etọn hẹ mẹdevo lẹ. Devi Jesu tọn lẹ gán ko dibu whenue e do yé hlan nado yì dọyẹwheho. Amọ́, Jesu gọalọna yé bo dọ fie yé na dọyẹwheho te gọna nue owẹ̀n yetọn na bẹhẹn na yé. (Mat. 10:5-7) Nawẹ a gán hodo apajlẹ Jesu tọn gbọn? Nọ gọalọna nuplọntọ towe nado yọ́n fie e gán dọyẹwheho te. Di apajlẹ, kanse e eyin e yọ́n mẹde he gán mọaleyi sọn nugbo Biblu tọn tangan de pinplọn mẹ. Enẹgodo, gọalọna ẹn nado wleawuna  nue e na dọ gbọn aliho he bọawu nado má nugbo Biblu tọn enẹ didohia ẹ dali. To ojlẹ sisọ mẹ, a gán bayi zepọn hẹ ẹ gbọn nue to adà lọ lẹ “Mẹdelẹ Nọ Dọ Dọ” po “Mẹde Sọgan Kanse” po glọ to owe Duvivi Ogbẹ̀ Tọn Kakadoi! mẹ yiyizan dali. Whenue a to mọwà, ze ayiha do azọ́npinplọn nuplọntọ towe nado nọ yí Biblu do na gblọndo he ma gẹdẹ lẹ po zinzin po ji.

17. Nawẹ mí gán yí Matiu 10:19, 20, 29-31 zan dile mí to alọgọna nuplọntọ mítọn nado dejido Jehovah go gbọn?

¹⁷Nọ gọalọna nuplọntọ towe nado nọ dejido Jehovah go. Jesu hẹn devi etọn lẹ kudeji dọ Jehovah na gọalọna yé, na Ewọ yiwanna yé wutu. (Hia Matiu 10:19, 20, 29-31.) Nọ flin nuplọntọ towe dọ Jehovah na gọalọna ewọ lọsu. A gán gọalọna ẹn nado nọ ganjẹ Jehovah go gbọn dẹ̀hiho hẹ ẹ gando yanwle etọn lẹ go dali. Franciszek he nọ nọ̀ Pologne dọ dọ: “Mẹplọntọ ṣie nọ saba donù yanwle ṣie lẹ go to odẹ̀ etọn lẹ mẹ. Whenue n’mọ lehe Jehovah na gblọndo na odẹ̀ mẹplọntọ ṣie tọn lẹ do, yẹnlọsu yawu jẹ dẹ̀ho ji. N’mọ alọ Jehovah tọn whenue n’dona biọgbè to azọ́n yọyọ ṣie mẹ nado yì opli lẹ po plidopọ daho po.”

18. Etẹwẹ nọ yin numọtolanmẹ Jehovah tọn gando azọ́n he wà mẹplọntọ lẹ te go?

¹⁸ Onú Biblu plọntọ mítọn lẹ tọn nọ duahunmẹna Jehovah sisosiso. E nọ yọ́n pinpẹn vivẹnu sinsinyẹn he mẹplọntọ lẹ nọ do nado gọalọna mẹlẹ nado dọnsẹpọ ewọ dogọ tọn, podọ e yiwanna yé na azọ́n he wà yé te ehe. (Isa. 52:7) Eyin a ma ko to anadena plọnmẹ Biblu de to alọnu, a gán gbẹ́ gọalọna nuplọntọ lẹ nado pegan na baptẹm, eyin a nọ hodo wẹnlatọ devo lẹ yì oplọn yetọn lẹ.