1. Naegbọn devizọnwatọ Jehovah tọn delẹ gán mọ yede to ṣokẹdẹ to whedelẹnu?

SUHUGAN mítọn wẹ nọ do numọtolanmẹ ṣokẹdẹninọ tọn to whedelẹnu. Na mẹdelẹ, numọtolanmẹ mọnkọ lẹ ma nọ dẹn-to-aimẹ. Na mẹdevo lẹ, yé gán nọ aimẹ dẹn. Mí gán mọ míde to ṣokẹdẹ, eyin gbẹtọ lẹ tlẹ lẹdo mí. E nọ vẹawuna mẹdelẹ nado jihọntọn lẹ to agun yọyọ de mẹ. Mẹdelẹ wá sọn whẹndo he mẹ yè nọ wà nulẹ dopọ te, amọ́ yé nọ wá jiya ṣokẹdẹninọ tọn eyin yé sẹtẹn yì fihe dẹn do hẹnnumẹ yetọn lẹ. Podọ, mẹdevo lẹ nọ jẹdò mẹyiwanna yetọn he ko kú de tọn sinsinyẹn. Humọ, Klistiani delẹ, titengbe mẹhe ṣẹṣẹ mọ nugbo lẹ nọ mọ yede to ṣokẹdẹ, whenue hagbẹ whẹndo yetọn tọn he yin mayisenọ lẹ po họntọn hoho yetọn lẹ po gbẹ́ yé dai kavi diọnukunsọ yé.

2. Kanbiọ tẹlẹ sin gblọndo wẹ mí na mọ?

² Jehovah yọ́n nulẹpo gando mí go, bosọ nọ mọnukunnujẹ ninọmẹ mítọn mẹ ganji. E nọ yọnẹn whenue mí do numọtolanmẹ ṣokẹdẹninọ tọn, podọ e jlo na gọalọna mí nado duto numọtolanmẹ mọnkọ lẹ ji. Nawẹ Jehovah nọ gọalọna mí gbọn? Adà tẹwẹ mílọsu gán yiwà? Podọ, nawẹ mí gán gọalọna mẹdevo he nọ mọ yede to ṣokẹdẹ to agun mítọn mẹ lẹ gbọn? Mì gbọ mí ni dín gblọndo kanbiọ ehelẹ tọn.

3. Nawẹ Jehovah dohia gbọn dọ onú Elija tọn nọ duahunmẹna emi?

³ Jehovah nọ tindo ojlo nujọnu tọn to dagbemẹninọ sinsẹ̀n-basitọ etọn lẹpo tọn mẹ. E ma dẹn do depope mítọn, podọ e nọ doayi e go whenue numọtolanmẹ gbigbọjọ tọn lẹ húagbọ́  mí. (Salm. 145:18, 19) Lẹnnupọndo lehe Jehovah na ayidonugo yẹwhegán etọn Elija do ji. Dawe nugbonọ ehe nọgbẹ̀ to ojlẹ he vẹawu de mẹ to whenuho Islaeli tọn mẹ. Sinsẹ̀n-basitọ Jehovah tọn lẹ to pipehẹ homẹkẹn sinsinyẹn, podọ Elija dín wẹ kẹntọ huhlọnnọ Jiwheyẹwhe tọn lẹ te taun. (1 Ahọ. 19:1, 2) Nue gán ko sọ do magbọjẹ na Elija wẹ numọtolanmẹ lọ dọ ewọ kẹdẹ wẹ yin yẹwhegán he pò bo to Jehovah sẹ̀n. (1 Ahọ. 19:10) To afọdopolọji, Jiwheyẹwhe yí nude wà nado gọalọna Elija. Jehovah do angẹli de hlan nado vọ́ jide na yẹwhegán Etọn dọ e ma to ṣokẹdẹ, dọ Islaelivi susu devo lẹ gbẹ́ pò he nọ dibusi Jiwheyẹwhe!—1 Ahọ. 19:5, 18.

4. Nawẹ Malku 10:29, 30 dohia dọ Jehovah nọ hò devizọnwatọ etọn he gán nọ jẹdò godonọnamẹ mẹdevo lẹ tọn pọ́n gbọn?

⁴ Jehovah nọ mọnukunnujẹemẹ dọ to whenue mí de nado sẹ̀n emi, delẹ to mí mẹ dona yí nususu lẹ do sanvọ́. Delẹ to onú ehelẹ mẹ wẹ alọgọ he mí nọ mọyi sọn hẹnnumẹ mayisenọ po họntọn mítọn hoho lẹ po dè. Vlavo onú enẹlẹ wẹ na ko to ahunmẹduna apọsteli Pita whenue e kanse Jesu to gbèdopo dọmọ: “Míwlẹ ko jo nulẹpo do bo hodo we; todin etẹwẹ mí na mọyi sọn e mẹ taun?” (Mat. 19:27) Jesu yí homẹdagbe do vọ́ jide na devi etọn lẹ dọ yé na mọ whẹndo gbigbọmẹ tọn daho de. (Hia Malku 10:29, 30.) Podọ, Jehovah he yin Tatọ́ whẹndo gbigbọmẹ tọn mítọn tọn dopà dọ emi na gọalọna mẹhe jlo na sẹ̀n emi lẹ. (Salm. 9:10) Lẹnnupọndo onú dagbe delẹ he a gán wà nado mọ alọgọ Jehovah tọn whenue a to ahidi hẹ numọtolanmẹ ṣokẹdẹninọ tọn ji.

5. Ale tẹlẹ wẹ a na mọyi eyin a nọ ze ayiha do lehe Jehovah nọ gọalọna we do ji?

⁵Nọ ze ayiha do lehe Jehovah to alọgọna we do ji. (Salm. 55:22) Mọwiwà na gọalọna we nado hẹn pọndohlan jlẹkaji tọn go gando ninọmẹ towe go. Mẹmẹyọnnu tlẹnnọ de he nọ yin Carol * bọ hagbẹ whẹndo tọn etọn de ma to nugbo mẹ dọmọ: “Nulinlẹnpọn po ayihamẹlinlẹnpọn do lehe Jehovah ko nọgodona mi to whlepọn lẹ mẹ do po ji ko gọalọna mi  nado mọ nugbonugbo dọ n’ma to ṣokẹdẹ. Podọ, ehe nọ vọ́ jide na mi dọ Jehovah na tin hẹ mi to whepoponu.”

6. Nawẹ 1 Pita 5:9, 10 gán na tuli mẹhe to ahidi hẹ numọtolanmẹ ṣokẹdẹninọ tọn lẹ gbọn?

⁶Nọ lẹnnupọndo lehe Jehovah to alọgọna yisenọ hatọ he nọ mọ yede to ṣokẹdẹ lẹ do ji. (Hia 1 Pita 5:9, 10.) Hiroshi, yèdọ mẹmẹsunnu de he ewọ kẹdẹ wẹ yin Kunnudetọ to whẹndo etọn mẹ na owhe susu dọmọ: “To agun mẹ, e họnwun dọ aga ma fá na ohẹ̀ de. Amọ́ nado yọnẹn dọ mímẹpo wẹ to nue go mí pé lẹpo wà nado sẹ̀n Jehovah gán na tuli mẹhe nọ mọ yede to ṣokẹdẹ to nugbo lọ mẹ lẹ.”

7. Nawẹ odẹ̀ gán gọalọna we gbọn?

⁷Nọ hẹn aṣa gbigbọmẹ tọn dagbe lẹ go. Ehe bẹ numọtolanmẹ towe lẹpo didọna Jehovah hẹn. (1 Pita 5:7) Mẹmẹyọnnu jọja de he nọ yin Massiel mọdọ emi klan sọn whẹndo emitọn go to whenue e bayi dide nado sẹ̀n Jehovah. E dọmọ: “Dopo to nue gọalọna mi hugan nado duto ṣokẹdẹninọ ji lẹ mẹ wẹ dẹ̀hiho vẹkuvẹku hlan Jehovah. Otọ́ nujọnu tọn de wẹ e yin na mi, podọ n’nọ hodẹ̀ hlan ẹn whlasusu egbesọegbesọ bo nọ dike ni yọ́n numọtolanmẹ ṣie lẹ.”

8. Nawẹ Ohó Jiwheyẹwhe tọn hihia po ayihamẹlinlẹnpọn deji po gán gọalọna we gbọn?

⁸ Nọ hia Ohó Jiwheyẹwhe tọn whẹwhẹ bo nọ lẹnayihamẹpọn do kandai tangan he zinnudo owanyi Jehovah tọn na we lẹ ji. Bianca, yèdọ mẹmẹyọnnu de he dona doakọnna hodidọ mẹhẹngbọjọ tọn sọn whẹndo etọn dè dọmọ: “Kandai Biblu tọn lẹ gọna otàn gbẹzan tọn devizọnwatọ Jehovah tọn he ko pehẹ ninọmẹ ṣie nkọ lẹ tọn hihia po ayihamẹlinlẹnpọn do yé ji po ko gọalọna mi taun.” Klistiani delẹ ko plọn wefọ he nọ miọnhomẹnamẹ taun lẹ do tamẹ taidi Salmu lẹ 27:10 po Isaia 41:10 po. Mẹdevo lẹ mọdọ todidoai na hoyidokanji nue plọn yé te lọ tọn nọ gọalọna yé ma nado mọ yede to ṣokẹdẹ sọmọ, whenue yé to awuwlena opli lẹ kavi to Biblu hia.

9. Dagbe tẹwẹ opli lẹ yìyì gán wà na we?

⁹ Nọ dovivẹnu nado nọ yì opli lẹ to gbesisọ mẹ. Tito-to-whinnu lọ na na we tuli, podọ a gán sọ jẹakọ hẹ mẹmẹsunnu po mẹmẹyọnnu towe lẹ po. (Heb. 10:24, 25) Massiel he go mí donù wayi dọmọ: “Dile etlẹ yindọ n’nọ kuwinyan taun, n’magbe nado nọ yì opli lẹpo bosọ nọ na gblọndo. Ehe gọalọna mi nado mọdọ n’yin apadewhe agun lọ tọn.”

10. Naegbọn e do yin nujọnu dọ mí ni nọ jihọntọn hẹ Klistiani nugbonọ lẹ?

¹⁰Nọ jihọntọn hẹ Klistiani nugbonọ lẹ. Nọ jihọntọn hẹ mẹhe dè a gán plọnnu sọn to agun lọ mẹ lẹ, etlẹ yin mẹhe owhe kavi ninọmẹ yetọn gbọnvona towe lẹ. Biblu flinnu mí dọ  “yọnhonọ lẹ dè” wẹ nuyọnẹn nọ yin mimọ te. (Jobu 12:12) Mẹhomẹ lẹ gán plọn nususu sọn jọja he yin nugbonọ lẹ dè ga. Jonatani wà mẹho na Davidi taun, ṣogan enẹ ma glọnalina yé nado yin họntọn vivẹ́. (1 Sam. 18:1) Davidi po Jonatani po gọalọna yedelẹ nado sẹ̀n Jehovah mahopọnna nuhahun sinsinyẹn lẹ. (1 Sam. 23:16-18) Irina, yèdọ mẹhe ewọ kẹdẹ wẹ yin Kunnudetọ to whẹndo etọn mẹ to alọnu dọ dọ: “Mẹmẹsunnu po mẹmẹyọnnu mítọn lẹ po gán lẹzun mẹjitọ kavi nọvi gbigbọmẹ tọn lẹ na mí nugbonugbo. Jehovah gán yí yé zan nado súdo nuhudo mítọn lẹ tọn.”

11. Etẹwẹ a dona wà nado jihọntọn vivẹ́ lẹ?

¹¹ Nado jihọntọn yọyọ lẹ gán nọma bọawu, titengbe eyin a nọ kuwinyan. Ratna, yèdọ mẹmẹyọnnu winyankutọ de he plọn nugbo lọ mahopọnna homẹkẹn dọmọ: “N’dona kẹalọyi dọ n’do hudo alọgọ po godonọnamẹ whẹndo gbigbọmẹ tọn ṣie po tọn.” E gán vẹawu nado dọ numọtolanmẹ towe lẹ na mẹdevo de, amọ́ hodọdopọ ahundopo tọn mọnkọ lẹ nọ zọ́n bọ yè nọ jihọntọn vivẹ́ lẹ. Họntọn towe lẹ nọ jlo na na we tuli bosọ gọalọna we, amọ́ a dona dọ nue sin hudo a do na yé whẹ́.

12. Nawẹ lizọnyizọn lọ gán gọalọna we nado jihọntọn dagbe lẹ gbọn?

¹² Dopo to aliho dagbe hugan nado jihọntọn lẹ mẹ wẹ nado nọ tọ́n na lizọnyizọn lọ hẹ Klistiani hatọ lẹ. Carol he yin nùdego wayi dọmọ: “N’ko jihọntọn dagbe susu lẹ, na n’nọ yí whenu zan dopọ hẹ mẹmẹyọnnu lẹ to lizọnyizọn lọ po nuwiwa yẹwhehọluduta tọn devo lẹ po mẹ wutu. Jehovah ko yí họntọn enẹlẹ zan nado gọalọna mi to owhe lẹ gblamẹ.” Vivẹnudido nado jihọntọn hẹ Klistiani nugbonọ lẹ ma nọ yin to ovọ́ mẹ gbede. Jehovah nọ yí yé zan nado gọalọna we, na a nido duto numọtolanmẹ ayimajai tọn delẹ ji, taidi ṣokẹdẹninọ.—Howh. 17:17.

13. Azọngban tẹwẹ mẹlẹpo tindo to agun mẹ?

¹³ Mẹlẹpo wẹ do adà yetọn bo na yiwà to agun mẹ na owanyi po jijọho po nido tin, bọ mẹdepope ma nado nọ mọ ede to ṣokẹdẹ. (Joh. 13:35) Nue mí nọ dọ po nue mí nọ wà lẹ po gán na tuli mẹdevo lẹ taun! Doayi nue mẹmẹyọnnu de dọ go dọmọ: “Whenue n’mọ nugbo, agun lọ lẹzun whẹndo ṣie. N’ma gán ko lẹzun Kunnudetọ Jehovah tọn eyin godonọnamẹ yetọn tọn dẹ́n.” Etẹwẹ a gán wà nado gọalọna mẹhe hagbẹ whẹndo tọn yetọn ma to nugbo mẹ lẹ nado nọ mọ yede di apadewhe agun lọ tọn?

14. Etẹwẹ a gán wà nado jihọntọn hẹ mẹyọyọ lẹ?

¹⁴Nọ ze afọdide tintan lọ nado jihọntọn hẹ mẹdevo lẹ. Onú tintan he mí gán wà wẹ nado nọ yí zohunhun do dokuavọna mẹyọyọ lẹ. (Lom. 15:7) Amọ́, e ma ko pé nado nọ dọnudo yé poun. Mí nọ jlo na vẹ́ hẹ yé dogọ dile ojlẹ to yìyì. Enẹwutu, nọ do owanyi po ojlo nujọnu tọn po hia yé. Nọ tẹnpọn nado yọ́n nue mẹ jugbọn yé te lẹ, amọ́ ma nọ dindona whẹho mẹdetiti tọn yetọn lẹ blo. E gán nọ vẹawuna mẹdelẹ nado dọ numọtolanmẹ yetọn lẹ, enẹwutu nọ payi ma nado gbidikọna yé nado dọho. Kakatimọ, nọ yí zinzin do kàn kanbiọ lẹ sè bo nọ yí homẹfa do dotoaina gblọndo yetọn lẹ. Di apajlẹ, a gán kanse yé, lehe yé mọ nugbo gbọn.

15. Nawẹ Klistiani he whèwhín lẹ gán gọalọna mẹdevo lẹ to agun mẹ gbọn?

¹⁵ Mẹlẹpo to agun mẹ wẹ na whẹ́n to gbigbọ-liho, eyin Klistiani he whèwhín lẹ titengbe mẹho agun tọn lẹ nọ do ojlo hia to yé mẹ. Melissa he onọ̀ etọn plọn whẹ́n to nugbo mẹ dọmọ: “N’yọ́n pinpẹn mẹmẹsunnu he ze yede jo to owhe lẹ gblamẹ nado gọalọna mi taidi otọ́ gbigbọmẹ tọn lẹ tọn  taun. Whedepopenu he n’do hudo mẹhe na dotoaina mi tọn, n’nọ mọ mẹdepope janwẹ.” Mauricio, yèdọ mẹmẹsunnu jọja de he mọdọ emi masọ do mẹde ba whenue mẹhe plọn Biblu hẹ ẹ jo nugbo do dọmọ: “Ojlo nujọnu tọn he mẹho lẹ dohia mi wà dagbe na mi taun. Yé nọ dọho hẹ mi whẹwhẹ. Yé nọ zọnhẹ mi yì lizọnyizọn lọ mẹ, bo nọ má nuhọakuẹ he yé mọ to oplọn mẹdetiti tọn yetọn whenu lẹ hẹ mi, bo tlẹ sọ nọ daihun lanmẹyiya tọn hẹ mi.” Melissa po Mauricio po to sinsẹ̀n todin to sinsẹ̀nzọn whenu-gigọ́ tọn mẹ.

16, 17. Aliho yọ́n-na-yizan tẹlẹ mẹ wẹ mí gán gọalọna mẹdevo lẹ te?

¹⁶Nọ gọalọ to aliho yọ́n-na-yizan lẹ mẹ. (Gal. 6:10) Leo he to sinsẹ̀n taidi mẹdehlan de to fie dẹn do whẹndo etọn dọmọ: “To paa mẹ, nue sin hudo a do lẹpo wẹ nuyiwa homẹdagbe tọn kleun de to ojlẹ sisọ mẹ. N’flin gbèdopo he n’bayi asidan po mọto po. Whenue n’wá lẹkọwa whégbè, n’jẹflumẹ taun. Amọ́ to whenẹnu, asu po asi po de bayi oylọna mi nado wá dù núdùdù kleun de hẹ yé. N’masọ flin nue mí dù, amọ́ n’flindọ yé yí homẹdagbe do dotoaina mi. To whenue mí fó, n’mọ dee mẹ taun!”

¹⁷ Mímẹpo wẹ nọ duvivi nuwiwa yẹwhehọluduta tọn lẹ tọn, taidi plidopọ lẹ, na mí nọ yí whenu zan hẹ mẹdevo lẹ bo nọ dọhodopọ hẹ yé do tito-to-whinnu lọ ji. Etomọṣo, Carol he go mí donù wayi dọmọ: “Plidopọ lẹ wẹ nọ vẹawuna mi hugan.” Etẹwutu? E dọmọ: “Dile etlẹ yindọ mẹmẹsunnu po mẹmẹyọnnu po kanweko susu lẹ kavi fọtọ́n susu lẹ wẹ nọ lẹdo mi, yemẹpo wẹ nọ saba topọ hẹ whẹndo yetọn lẹ. Na yẹn tọn, numọtolanmẹ ṣokẹdẹninọ tọn ma nọ bọawu paali.” Na mẹdelẹ, plidopọ tintan he yé nọ yì to okú alọwlemẹ yetọn tọn godo nọ vẹawuna yé taun. Be a yọ́n mẹde he to pipehẹ nuhahun mọnkọ lẹ ya? Naegbọn a ma na bayi oylọna ẹn nado wá gọna whẹndo towe to nuwiwa yẹwhehọluduta tọn he na bọdego whenu?

18. Nawẹ mí gán yí 2 Kọlintinu lẹ 6:11-13 do yizan mẹ gbọn whenue mí to johẹmẹ?

¹⁸Nọ yí whenu zan hẹ mẹdevo lẹ. Nọ dovivẹnu nado bayi oylọna mẹmẹsunnu po mẹmẹyọnnu lẹ po nado wá gọna we to nuwiwa pọmẹ tọn lẹ whenu, titengbe mẹhe gán nọ mọ  yede to ṣokẹdẹ lẹ. Mí nọ jlo na “hùn ahun [mítọn] lẹ donuvo,” titengbe na omẹ mọnkọ lẹ. (Hia 2 Kọlintinu lẹ 6:11-13.) Melissa he go mí donù wayi dọmọ: “E nọ vivi na mí taun, eyin họntọn lẹ bayi oylọna mí nado wá dla yewlẹ po whẹndo yetọn po pọ́n kavi nado yì disa dopọ hẹ yé.” Be mẹde tin to agun towe mẹ he a gán hẹjó ya?

19. Whetẹnu lẹ wẹ whenu yiyizan hẹ Klistiani hatọ lẹ gán wà dagbe na yé taun?

¹⁹ Ojlẹ delẹ gán tin he mẹ Klistiani hatọ lẹ na nọ yọ́n pinpẹn etọn te taun, eyin mí yí whenu zan dopọ hẹ yé. E nọ vẹawuna mẹdelẹ nado nọpọ́ hẹ hẹnnumẹ mayisenọ yetọn lẹ to whedudu-zan lẹ gbè. Azán delẹ gán nọ vẹawuna mẹdevo lẹ taun, taidi azán he ji mẹyiwanna yetọn de kú te. Eyin mí nọ yí whenu zan dopọ hẹ mẹmẹsunnu po mẹmẹyọnnu po he to pipehẹ ninọmẹ sinsinyẹn mọnkọ lẹ, mí nọ dohia dọ mí to ‘nukunpedo yé go sọn ahun mẹ wá.’—Flp. 2:20.

20. Nawẹ nue Jesu dọ to Matiu 12:48-50 mẹ lẹ gán gọalọna mí gbọn whenue mí mọ míde to ṣokẹdẹ?

²⁰ Nususu wẹ gán zọ́n bọ Klistiani de na nọ do numọtolanmẹ ṣokẹdẹninọ tọn to whedelẹnu. Amọ́, mí ma dona wọn gbede dọ Jehovah nọ mọnukunnujẹ numọtolanmẹ mọnkọ lẹ mẹ ganji. E nọ saba na mí alọgọ he sin hudo mí do gbọn Klistiani hatọ lẹ gblamẹ. (Hia Matiu 12:48-50.) Mílọsu lẹ nọ dohia Jehovah dọ mí yọ́n pinpẹn tito owanyinọ he e bayi enẹ tọn, eyin mí nọ wà nue go mí pé lẹpo nado nọgodona whẹndo gbigbọmẹ tọn mítọn. Mahopọnna numọtolanmẹ depope he mí gán do to whedelẹnu, mí ma to ṣokẹdẹ, na Jehovah tin hẹ mí to whepoponu wutu!