Paulu wlan dọ: “Gbọn osẹ́n gblamẹ, yẹn kú na osẹ́n wutu, na yẹn nido sọgan gọwá ogbẹ̀ na Jiwheyẹwhe wutu.”—Gal. 2:19.

Nuhe Paulu kàn tindo kanṣiṣa hẹ nuagokun titengbe de he ji e to nùzindo na agun he to Galatia lẹ, yèdọ ayimatẹn Lomu tọn de. To finẹ, mẹplọntọ lalo lẹ to nuyiwa do Klistiani delẹ ji. Sunnu enẹlẹ to pinplọnmẹ dọ eyin mẹde na mọ whlẹngán, e dona setonuna nubiọtomẹsi he to Osẹ́n Mose tọn mẹ lẹ, titengbe dehe gando adàgbigbo go. Amọ́, Paulu yọnẹn dọ Jiwheyẹwhe masọ biọ to yisenọ lẹ si nado gboadà ba. Po hoyijlẹdohogo he do huhlọn lẹ po, e gbẹ́ nuplọnmẹ lalo lẹ dai, bo hẹn yise mẹmẹsunnu lẹ tọn lodo to avọ́sinsan ofligọ Jesu Klisti tọn mẹ.—Gal. 2:4; 5:2.

Biblu dọ hezeheze dọ, to whenue mẹde ko kú, e masọ nọ yọ́n nuhe to jijọ lẹdo e lẹ, mọ onú enẹlẹ depope ma gán sọ yinuwadeji ba. (Yẹwh. 9:5) Whenue Paulu dọ dọ: “Yẹn kú na osẹ́n wutu,” nuhe dọ e te wẹ yindọ, Osẹ́n Mose tọn masọ tindo aṣẹ deji ba. Kakatimọ, Paulu kudeji dọ gbọn yise tintindo to avọ́sinsan ofligọ lọ tọn mẹ dali, emi “gọwá ogbẹ̀ na Jiwheyẹwhe wutu.”

Ninọmẹ Paulu tọn diọ “gbọn osẹ́n gblamẹ.” Gbọnna? E ṣẹṣẹ bayi zẹẹmẹ dọ, “e ma yin gbọn azọ́n osẹ́n tọn lẹ dali wẹ gbẹtọ nọ yin lilá di dodonọ, ṣigba gbọn yise to Klisti Jesu mẹ kẹdẹ gblamẹ.” (Gal. 2:16) Na nugbo tọn, Osẹ́n lọ yí adà titengbe de wà. Paulu dọna Galatianu lẹ dọmọ: “E yin yiyidogọ nado hẹn sẹ́nhẹngba lẹ sọawuhia, kakajẹ whenue kúnkan lọ na wá, yèdọ mẹhe opagbe lọ ko yin dido na.” (Gal. 3:19) Mọwẹ, Osẹ́n lọ hẹn ẹn họnwun dọ gbẹtọvi mapenọ lẹ ma gán yìn Osẹ́n lọ to aliho pipé de mẹ, podọ dọ yé do hudo avọ́sinsan pipé de tọn to godo mẹ. Enẹwutu, Osẹ́n lọ planmẹ jẹ “kúnkan lọ” dè, enẹ wẹ Klisti. Eyin mẹde nọ do yise hia to Jesu Klisti mẹ, Jiwheyẹwhe gán lá mẹlọ di dodonọ. (Gal. 3:24) Paulu yin lilá di dodonọ, na gbọn Osẹ́n lọ gblamẹ, ewọ wá kẹalọyi Jesu bosọ tindo yise to ewọ mẹ. Taidi kọdetọn de, Paulu “kú na osẹ́n wutu,” podọ e “gọwá ogbẹ̀ na Jiwheyẹwhe wutu.” Osẹ́n lọ masọ do huhlọn deji ba, amọ́ Jiwheyẹwhe wẹ wàmọ.

Paulu do linlẹn dopolọ hia to wekanhlanmẹ etọn hlan Lomunu lẹ mẹ. E dọmọ: “Mẹmẹsunnu ṣie lẹ emi, mìlọsu lẹ ga ko yin hinhẹn nado kú na Osẹ́n lọ gbọn agbasa Klisti tọn gblamẹ . . . Míwlẹ ko yin tuntundote sọn Osẹ́n lọ glọ, na mí ko kú na nuhe dù nuhe glọnalina mí.” (Lom. 7:4, 6) To wefọ ehelẹ mẹ, podọ to Galatianu lẹ 2:19 mẹ, nue dọ Paulu te ma yin nado kú taidi ylandonọ de he yin whẹdana to Osẹ́n lọ glọ gba. Kakatimọ, mẹdekannujẹ ji wẹ e to nùzindo. Osẹ́n lọ masọ do aṣẹ depope do ewọ po mẹdevo lẹ po ji ba. Yise yetọn to ofligọ Klisti tọn mẹ ko hẹn yé jẹ mẹdekannu.