LISA * dọmọ: “Homẹdagbe mẹmẹsunnu po mẹmẹyọnnu lẹ po tọn wẹ yinuwado ji e hugan.” E yí hogbe enẹlẹ zan nado dlẹnalọdo nuhe dọ̀n ẹn wá nugbo lọ mẹ to tintan whenu. Nudopolọ wẹ jọ do Anne go, mẹhe yigbe dọmọ, “E ma yin nuyise Kunnudetọ lẹ tọn wẹ dọ̀n mi hugan, amọ́ homẹdagbe yetọn wẹ.” To alọnu din, mẹmẹyọnnu awe ehelẹ nọ duvivi Biblu hihia po ayihamẹlinlẹnpọn po tọn, amọ́ homẹdagbe ko yinuwado yé ji taun.

Nawẹ mí gán nọ do homẹdagbe wunmẹ he nọ yinuwado ahun mẹhe lẹdo mí lẹ tọn ji hia gbọn? Mì gbọ mí ni gbadopọnna aliho awe delẹ, enẹ wẹ homẹdagbe didohia to ohó mẹ podọ to walọ mítọn lẹ mẹ. Enẹgodo, mí na dọhodo mẹhe mí dona nọ do homẹdagbe hia lẹ ji.

Asi nugopetọ he yin nùdego to Howhinwhẹn lẹ weta 31tọ mẹ lọ tindo “osẹ́n homẹdagbe tọn” to odẹ́ etọn ji. (Howh. 31:26) E nọ dike “osẹ́n” ehe ni deanana kọnugbè po hodidọ etọn po. Otọ́ lẹ lọsu dona tindo “osẹ́n” ehe to odẹ́ yetọn ji. Suhugan mẹjitọ lẹ tọn wẹ yọnẹn ganji dọ hogbe he sinyẹn de gán yinuwado ovi yetọn ji to aliho agọ̀ mẹ. Eyin mẹjitọ lẹ nọ zan hogbe kànun-kànun lẹ, e yọnbasi dọ ovi yetọn lẹ ma na nọ setonuna nuhe yé dọ. Enẹwutu, nado yọ́n dọnsẹpọ bosọ tindo kọdetọn dagbe dogọ, mẹjitọ lẹ dona dovivẹnu nado nọ dọho po homẹdagbe po.

Vlavo a yin mẹjitọ de kavi lala, nawẹ a gán yí homẹdagbe do deanana odẹ́ towe gbọn? Aṣli lọ tin to adà tintan Howhinwhẹn lẹ 31:26 tọn mẹ he dọmọ: “E nọ kẹnù etọn to nuyọnẹn mẹ.” Ehe nọ biọ dọ mí ni yí nuyọnẹn do gbeje ohó he mí nọ dọ lẹ po kọnugbè mítọn po pọ́n ganji. E na nọ gọalọ taun eyin mí nọ kanse míde dọ, ‘Be nuhe n’jlo na dọ ehe na fọ́n homẹgble dote wẹ ya kavi e na fá ninọmẹ sinsinyẹn de?’ (Howh. 15:1) Mọwẹ, nuyọnẹnnu wẹ e yin nado nọ lẹnnupọn whẹpo do dọho.

Howhinwhẹn devo dọmọ: “Ohó he yè ma lẹnnupọn whẹpo do dọ nọ taidi ohísọmẹ.” (Howh. 12:18) Eyin mí nọ lẹnnupọndo lehe hogbe po kọnugbè mítọn po gán yinuwado mẹdevo lẹ ji do ji, mí na penugo dogọ nado nọ deanana nuhe nọ tọ́n sọn onù mítọn mẹ lẹ. Mọwẹ, “osẹ́n homẹdagbe tọn” yìnyìn na gọalọna mí nado dapana hogbe whánsọmẹ tọn kavi kọnugbè he ma jọmẹ de yiyizan. (Efe. 4:31, 32) Mí na yí hogbe he jọmẹ lẹ po kọnugbè homẹdagbe tọn de po do diọtẹnna linlẹn po ohó agọ̀ lẹ po. Jehovah ze apajlẹ dagbe de dai to adà ehe mẹ to whenue e vọ́ jide na devizọnwatọ etọn Elija he to obu ji lọ. Angẹli he ze afọ Jehovah tọn dai lọ yí “ogbè fifá de [do] dọho do odò.” (1 Ahọ. 19:12) Amọ́, nado yin homẹdagbenọ bẹ nususu hẹn hú nado nọ dọho po homẹdagbe po poun. Mí sọ dona nọ yinuwa po homẹdagbe po. Gbọnna?

Eyin mí nọ hodo apajlẹ Jehovah tọn, ohó homẹdagbe tọn mítọn lẹ na nọ zọnpọ po nuyiwa homẹdagbe tọn lẹ po. (Efe. 4:32; 5:1, 2) Lisa, he go mí donù wayi basi zẹẹmẹ homẹdagbe he Kunnudetọ lẹ dohia ẹ tọn. E dọmọ: “Whenue whẹndo mítọn yin hinhẹn  gánnugánnu nado sẹtẹn to ajiji mẹ, asu po asi po awe to agun lọ mẹ yí gbọjẹ to azọ́nmẹ nado gọalọna mí nado blá agbàn mítọn lẹ. To ojlẹ enẹ mẹ, n’ma tlẹ ko to Biblu plọn!” Nuyiwa homẹdagbe tọn mọnkọ lẹ whàn Lisa nado dindona nugbo lọ dogọ.

Anne, he yin nùdego to bẹjẹeji lọsu yọ́n pinpẹn homẹdagbe he Kunnudetọ lẹ dohia ẹ tọn. E dọmọ: “Na lehe aihọn lọ te wutu, n’nọ do ayihaawe taun. E nọ vẹawuna mi nado dejido mẹlẹ go.” E zindonukọn dọmọ: “Whenue n’dukosọna Kunnudetọ lẹ, n’do ayihaawe gando mẹwhinwhàn yetọn go. N’kanse dee dọ, ‘Naegbọn yé ka do to ojlo dohia mi?’ Amọ́, homẹdagbe nujọnu tọn mẹhe nọ plọn Biblu hẹ mi tọn whàn mi nado dejidego.” Kọdetọn dagbe tẹwẹ ehe hẹnwa? “To nukọn mẹ, n’jẹ nulẹnpọndo nuhe plọn n’te lẹ ji po sọwhiwhe po dogọ.”

Doayi e go dọ nuyiwa owanyi po homẹdagbe po tọn mẹhe to agun lọ mẹ lẹ tọn wẹ yinuwado Lisa po Anne po ji sisosiso, podọ ehe zọ́n bọ yé jlo nado plọnnu gando nugbo lọ go. Homẹdagbe he agun lọ dohia yé gọalọna yé nado hùn ahun yetọn.

Na aṣa he mẹ mẹdelẹ wá sọn wutu, yé gán nọ yí hogbe homẹdagbe tọn lẹ zan bosọ nọ konudomẹ to jọwamọ-liho. Nuyiwa sisi tọn he omẹ ehelẹ nọ dohia na aṣa kavi gbẹtọ-yinyin yetọn wutu enẹlẹ ma ylan. Amọ́, eyin onú enẹlẹ kẹdẹ wẹ nọ whàn mí nado do homẹdagbe hia, e gán nọma yin homẹdagbe Jiwheyẹwhe tọn nkọ dohia wẹ mí te.—Yijlẹdo Owalọ lẹ 28:2 go.

Na nugbo tọn, homẹdagbe Jiwheyẹwhe tọn yin adà sinsẹ́n gbigbọ wiwe etọn tọn. (Gal. 5:22, 23) Enẹwutu, awuwiwlena homẹdagbe nọ biọ dọ yè ni wazọ́n to nuyiwadomẹji gbigbọ enẹ tọn glọ. Enẹ sọgbe hẹ ojlo mítọn nado hodo apajlẹ Jehovah po Jesu po tọn. Podọ, taidi Klistiani lẹ, mí nọ tindo ojlo nujọnu tọn to mẹdevo lẹ mẹ. Enẹwutu, owanyi na Jehovah Jiwheyẹwhe po gbẹtọvi hatọ mítọn lẹ po wẹ nọ whàn mí. To whenẹnu, homẹdagbe mítọn nọ lẹzun jẹhẹnu huhlọnnọ de he wá sọn ahun mẹ, ehe Jiwheyẹwhe kẹalọyi.

To jọwamọ-liho, mí gán nọ do homẹdagbe hia mẹhe ko do homẹdagbe hia mí pọ́n lẹ kavi mẹyinyọnẹn mítọn lẹ. (2 Sam. 2:6) Aliho dopo wẹ nado nọ do pinpẹn nutọn hia yé. (Kol. 3:15) Amọ́, etẹwẹ lo eyin mí mọdọ mẹde ma jẹna nuyiwa homẹdagbe tọn de?

Lẹnnupọndo ehe ji: Jehovah ze apajlẹ dagbe hugan lọ dai gbọn nukundagbe majẹhẹ etọn didohia dali, podọ Ohó etọn plọn mí onú titengbe de gando jẹhẹnu ehe didohia go. Hodidọ lọ “nukundagbe majẹhẹ” yin yiyizan whlasusu to Owe-wiwe Glẹki tọn lẹ mẹ. Nawẹ Jiwheyẹwhe nọ do homẹdagbe hia mí gbọn?

Lẹnnupọndo gbẹtọvi livi susu he Jehovah nọ do homẹdagbe hia gbọn nuhe sin hudo yé do nado nọgbẹ̀ lẹ nina yé lẹ dali lẹ ji. (Mat. 5:45) Na nugbo tọn, etlẹ yin whẹpo gbẹtọvi lẹ do yọ́n Jehovah, ewọ ko do homẹdagbe hia yé. (Efe. 2:4, 5, 8) Di apajlẹ, e na gbẹtọvi lẹpo dagbe hugan etọn, enẹ wẹ Visunnu detọ́n dopo akàn etọn. Apọsteli Paulu wlan dọ Jehovah wleawuna ofligọ lọ “sọgbe hẹ nukundagbe majẹhẹ susugege etọn.” (Efe. 1:7) Humọ, mahopọnna dọ mí nọ waylando bosọ nọ hẹn Jehovah jẹflumẹ, e zindonukọn nado nọ deanana mí bosọ nọ plọnnu mí. Anademẹ po ohó etọn lẹ po taidi “jikun ṣẹ́nṣẹ́n.” (Deut. 32:2) E họnwun dọ mí ma gán suahọ ẹ mlẹnmlẹn na homẹdagbe he e to didohia mí lẹpo. Podọ nugbo lọ wẹ yindọ eyin homẹdagbe Jehovah tọn dẹ́n, mí ma na tindo todido depope na sọgodo.—Yijlẹdo 1 Pita 1:13 go.

Matin ayihaawe, homẹdagbe Jehovah tọn nọ dọ̀n mí sẹpọ ewọ bosọ nọ whàn mí. Taidi kọdetọn de, kakati nado nọ de mẹhe mí na nọ do homẹdagbe hia lẹ, mí dona dovivẹnu nado hodo apajlẹ Jehovah tọn bo nọ do homẹdagbe hia mẹdevo lẹ egbesọegbesọ. (1 Tẹs. 5:15) Eyin mí nọ do homẹdagbe hia to whelẹponu, mí nọ taidi miyọ́n he to jiji de to avivọ-whenu. Mí nọ yin asisa homẹmimiọn tọn na hagbẹ whẹndo tọn mítọn lẹ, azọ́nwatọgbẹ́ lẹ, klasigbẹ́ lẹ, po kọmẹnu mítọn lẹ po.

Lẹnnupọndo mẹdelẹ ji to whẹndo towe mẹ kavi to agun towe mẹ he na mọaleyi sọn ohó po nuyiwa homẹdagbe tọn towe lẹ po mẹ. Na taun tọn, mẹde gán to agun towe mẹ he do hudo alọgọ tọn nado penukundo owhé etọn po jipa etọn po go, kavi nado wazọ́n whẹwhẹ tọn delẹ taidi ahiwhiwhle. Humọ, eyin a dukosọna mẹde to lizọnyizọn lọ mẹ he do hudo alọgọ tọn, be a gán gọalọna ẹn to aliho yọ́n-na-yizan delẹ mẹ ya?

To apajlẹ Jehovah tọn hihodo mẹ, mì gbọ “osẹ́n homẹdagbe tọn” ni nọ deanana ohó po nuyiwa mítọn lẹ po to whepoponu.