Biblu ma dọ. Amọ́, e de nudọnamẹ dagbedagbe delẹ hia he gán ko zọ́n bọ yé basi nudide mọnkọ.

Angẹli de dọna Malia dọ e na mọhò bo jivi. Whenue angẹli lọ dowẹ̀n ehe, Nazalẹti wẹ Malia po Josẹfu po nọ nọ̀, enẹ wẹ to tòdaho Josẹfu tọn mẹ to Galili. (Luku 1:26-31; 2:4) To nukọn mẹ, whenue yé lẹkọ sọn Egipti, yé gọyì Nazalẹti. Finẹ wẹ Jesu whẹ́n te bo lẹzun Nazalẹtinu de. (Mat. 2:19-23) Abajọ mí do nọ yawu flin Jesu, Josẹfu po Malia po eyin yè dọho gando Nazalẹti go.

Malia do hẹnnumẹ de he nọ yin Elizabẹti bo nọ nọ̀ Juda. Elizabẹti yin asi yẹwhenọ Zekalia tọn podọ e wá lẹzun onọ̀ Johanu Baptizitọ lọ tọn. (Luku 1:5, 9, 13, 36) Malia yì dla Elizabẹti pọ́n, bosọ nọ e dè to Juda na osun atọ̀n. Enẹgodo, Malia lẹkọyi Nazalẹti. (Luku 1:39, 40, 56) Enẹwutu, Malia jẹakọ hẹ lẹdo Juda tọn jẹ obá de mẹ.

To nukọn mẹ, Josẹfu setonuna gbedide lọ “nado ze yinkọ dai.” Enẹwutu, Josẹfu zingbejizọnlin sọn Nazalẹti yì Bẹtlẹhẹm he yin “tòdaho Davidi tọn,” podọ fie dọdai de dohia dọ Mẹsia lọ na yin jiji te. (Luku 2:3, 4; 1 Sam. 17:15; 20:6; Mika 5:2) Whenue Malia ko ji Jesu to finẹ godo, Josẹfu ma jlo dọ Malia ni zingbejizọnlin gaa lẹkọyi Nazalẹti po viyẹyẹ lọ po. Yé gbọṣi Bẹtlẹhẹm, he to nudi kilomẹtlu 9 do Jelusalẹm. Gbọnmọ dali, e na ko bọawuna yé nado ze viyẹyẹ yetọn wá tẹmpli mẹ nado basi avọ́nunina he Osẹ́n Mose tọn biọ lẹ.—Lev. 12:2, 6-8; Luku 2:22-24.

Angẹli Jiwheyẹwhe tọn ko dọna Malia jẹnukọn dọ visunnu etọn na mọ “ofìn Davidi” tọn yí, bo nasọ “yin Ahọlu.” Be Josẹfu po Malia po gán ko mọdọ e jẹna ayidego dọ Jesu ni yin jiji to tòdaho Davidi tọn mẹ ya? (Luku 1:32, 33; 2:11, 17) Yé gán ko lẹndọ nuyọnẹnnu wẹ e yin nado gbọṣi finẹ kakajẹ whenue yé yọ́n nuhe Jiwheyẹwhe jlo dọ yé ni wà bọdego.

Mí ma yọ́n ojlẹ nẹmu he yé nọ Bẹtlẹhẹm na to whenue sunwhlẹvu pọntọ lẹ ko wá dla yé pọ́n godo. To ojlẹ enẹ mẹ, whẹndo lọ nọ nọ̀ owhé de gbè, podọ visunnu yetọn masọ yin viyẹyẹ de ba, amọ́ “ovi pẹvi” de. (Mat. 2:11) E taidi dọ kakati yé ni lẹkọyi Nazalẹti, yé sawhé do Bẹtlẹhẹm na ojlẹ de.

Hẹlọdi degbe dọ “yọpọ sunnu lẹpo he tin to Bẹtlẹhẹm . . . bẹsọn owhe awe mẹvi lẹ ji wá odò” ni yin hùhù. (Mat. 2:16) Whenue Jiwheyẹwhe na avase Josẹfu po Malia po gando gbedide ehe go, yé họ̀nyi Egipti po Jesu po bo nọ finẹ kakajẹ whenue Hẹlọdi kú. To nukọn mẹ, Josẹfu plan whẹndo etọn dedo Nazalẹti. Naegbọn yé ma lẹkọyi Bẹtlẹhẹm? Nado dapana visunnu kanylantọ Hẹlọdi tọn Alkẹlausi he to Jude wutu wẹ, podọ nado setonuna avase Jiwheyẹwhe tọn. To Nazalẹti, Josẹfu gán plọn Jesu whẹ́n to hihọ́ mẹ nado yin sinsẹ̀n-basitọ nugbo Jiwheyẹwhe tọn de.—Mat. 2:19-22; 13:55; Luku 2:39, 52.

E taidi dọ Josẹfu kú whẹpo Jesu do hùnali gbẹ̀ninọ to olọn mẹ tọn. Enẹwutu, Josẹfu na yin finfọ́n do aigba ji. Mẹsusu na penugo bo mọ ẹn bosọ plọn nususu sọn e dè gando nuhewutu ewọ po Malia po do gbọṣi Bẹtlẹhẹm whenue Jesu yin jiji godo go.