Nado hẹn homẹ Jehovah tọn hùn, mí dona tindo yise. Amọ́, Biblu dọ dọ “yise ma yin nutindo mẹlẹpo tọn.” (2 Tẹs. 3:2) Whenue apọsteli Paulu dọ mọ, “danuwatọ po mẹylankan lẹ po” he to homẹkẹndo e lẹ hodọ wẹ e te. Amọ́, nuhe e dọ gando yise go tindo zẹẹmẹ he gbloada humọ. Mẹdelẹ nọ de nado dovọ́na kunnudenu he họnwun lọ dọ Mẹdatọ de tin, enẹ wẹ Jiwheyẹwhe. (Lom. 1:20) Mẹdevo lẹ gán sọalọakọ́n dọ emi tindo yise to nude kavi mẹde he tindo huhlọn taun mẹ. Amọ́, yise mọnkọ kẹdẹ ma ko pé nado hẹn homẹ Jehovah tọn hùn.

Mí dona kudeji dọ Jehovah tin, podọ ewọ wẹ “ahọsumẹtọ” mẹhe tindo yise dolido lẹ tọn. (Heb. 11:6) Yise yin adà sinsẹ́n gbigbọ wiwe etọn tọn de. Eyin mẹde nọ hodẹ̀ hlan Jehovah, enẹ sọgan gọalọna ẹn nado mọ gbigbọ wiwe yí. (Luku 11:9, 10, 13) Aṣli lọ nado mọ gbigbọ wiwe yí wẹ nado nọ hia Ohó gbọdo Jiwheyẹwhe tọn. Enẹgodo, mí gán lẹnnupọndo nuhe mí hia ji bosọ dovivẹnu nado yí nuhe mí plọn lẹ do yizan mẹ. To whenẹnu, gbigbọ Jehovah tọn gán yinuwado gbẹzan mítọn ji, bo gbọnmọ dali gọalọna mí nado tindo yise he nọ hẹn homẹ etọn hùn.