HOSỌ OPLỌN TỌN 23
OHÀN 28 Họntọnjiji hẹ Jehovah
Oylọ-basinamẹ Jiawu Jehovah Tọn Nado Yin Jonọ Etọn Lẹ
“Gòhọ ṣie na tin to yé dè, yẹn nasọ yin Jiwheyẹwhe yetọn.”—EZEK. 37:27.
NUHE E BẸHẸN
Hosọ ehe na hẹn pinpẹn-nutọn-yinyọnẹn mítọn na oylọ-basinamẹ Jehovah tọn nado yin jonọ lẹ to gòhọ yẹhiadonu tọn etọn mẹ, gọna aliho he mẹ ewọ nọ penukundo mí go taidi Jonọyitọ mítọn te jideji.
1, 2. Oylọ tẹwẹ Jehovah basina sinsẹ̀n-basitọ nugbonọ etọn lẹ?
MẸNU wẹ Jehovah yin na we? A gán gblọn dọ, ‘Jehovah wẹ Otọ́ ṣie, Jiwheyẹwhe ṣie po Họntọn ṣie po.’ Tẹnmẹ-yinkọ devo lẹ kavi hogbe devo lẹ sọ tin he a gán yí do ylọ Jehovah. Amọ́, be a sọ nọ mọ ewọ taidi Jonọyitọ towe ya?
2 Ahọlu Davidi yí họntọnjiji Jehovah tọn hẹ sinsẹ̀n-basitọ nugbonọ Etọn lẹ jlẹdo haṣinṣan he nọ nọ̀ jonọyitọ de po jonọ etọn lẹ po ṣẹnṣẹn go. E kanse dọmọ: “Jehovah E, mẹnu wẹ sọgan yin jonọ to gòhọ towe mẹ? Mẹnu wẹ sọgan nọ osó wiwe towe ji?” (Salm. 15:1) Hogbe he yin gbigbọdo ehelẹ plọn mí dọ mí gán lẹzun jonọ Jehovah tọn lẹ, enẹ wẹ họntọn etọn lẹ. Be e ma yin oylọ-basinamẹ jiawu de wẹ enẹ yin sọn Jehovah dè ya?
JEHOVAH JLO DỌ MÍ NI YIN JONỌ EMITỌN LẸ
3. Mẹnu wẹ yin jonọ tintan Jehovah tọn, podọ numọtolanmẹ tẹwẹ Jehovah po ewọ po nọ do gando ode awetọ go?
3 Whẹpo Jehovah do dá nulẹ, ewọ doponọ wẹ tin. Amọ́, e wá jẹ fide bọ e yí Visunnu plọnji etọn do gòhọ yẹhiadonu tọn etọn mẹ. Jehovah mọ awuvivi susu to azọngban yọyọ etọn mẹ taidi Jonọyitọ. Biblu dohia dọ ‘homẹ Jehovah tọn nọ hùn taun do’ Visunnu etọn go. Podọ, jonọ tintan etọn lọsu “sọ nọ jaya to nukọn [Jehovah tọn] to whepoponu.”—Howh. 8:30.
4. Nawẹ Jehovah dlẹnkanna gòhọ etọn vudevude gbọn?
4 Enẹgodo, Jehovah dá nudida gbigbọnọ devo lẹ, bo basi oylọna yé nado yin jonọ etọn lẹ ga. Angẹli etọn lẹ nọ yin yiylọdọ “visunnu Jiwheyẹwhe tọn lẹ,” podọ Biblu dọ dọ homẹ yetọn nọ hùn nado topọ hẹ Jehovah. (Jobu 38:7; Dan. 7:10) Na ojlẹ de, mẹhe nọ nọpọ́ hẹ Jiwheyẹwhe to olọn mẹ lẹ kẹdẹ wẹ yin họntọn etọn lẹ. To nukọn mẹ e dá gbẹtọvi lẹ, podọ yelọsu gán yin jonọ etọn lẹ. Dile ojlẹ to yìyì, delẹ to jonọ enẹlẹ mẹ wẹ Enọku, Noa, Ablaham po Jobu po. Biblu dọ gando sinsẹ̀n-basitọ nugbonọ enẹlẹ go dọ yé yin họntọn Jiwheyẹwhe tọn, kavi mẹhe zinzọnlin “hẹ Jiwheyẹwhe nugbo lọ” lẹ.—Jen. 5:24; 6:9; Jobu 29:4; Isa. 41:8.
5. Etẹwẹ mí gán plọn sọn dọdai he tin to Ezekiẹli 37:26, 27 mẹ?
5 To owhe kanweko susu lẹ gblamẹ, Jehovah zindonukọn nado to oylọ-basina họntọn etọn lẹ nado yin jonọ etọn lẹ. (Hia Ezekiẹli 37:26, 27.) Di apajlẹ, dọdai Ezekiẹli tọn plọn mí dọ Jiwheyẹwhe jlo nugbonugbo dọ sinsẹ̀n-basitọ nugbonọ emitọn lẹ ni tindo haṣinṣan pẹkipẹki de hẹ emi. E dopà dọ emi na basi “alẹnu jijọho tọn de hẹ yé.” Dọdai enẹ to alọdlẹndo ojlẹ he mẹ mẹhe tindo todido olọn mẹ tọn lẹ po mẹhe do todido aigba ji tọn lẹ po na yin kinkọndopọ do gòhọ yẹhiadonu tọn etọn mẹ taidi “lẹngbọpa dopo” te. (Joh. 10:16) Ojlẹ enẹ mẹ wẹ mí to gbẹnọ te todin!
JIWHEYẸWHE NỌ PENUKUNDO MÍ GO MAHOPỌNNA FIE MÍ TE
6. Nawẹ mẹde nọ lẹzun jonọ to gòhọ Jehovah tọn mẹ gbọn, podọ fitẹ wẹ gòhọ Etọn gán yin mimọ te?
6 To ojlẹ Biblu tọn lẹ mẹ, gòhọ mẹde tọn nọ yin nọtẹn gbọjẹ tọn kavi fie e gán mọ hihọ́ te. Jonọ he to gòhọ mọnkọ mẹ nọ donukun dọ yè na penukundo emi go ganji. Whenue mí klan míde do wiwe na Jehovah, mí lẹzun jonọ lẹ to gòhọ yẹhiadonu tọn etọn mẹ. (Salm. 61:4) Mí nọ duvivi núdùdù gbigbọmẹ tọn susugege tọn gọna gbẹdido hẹ mẹdevo he lẹzun jonọ Jehovah tọn lẹ tọn ga. Gòhọ yẹhiadonu tọn etọn ma tin to ofi tangan de. A gán ko zingbejizọnlin yì otò devo mẹ vlavo nado yì plidopọ vonọtaun de, podọ a dukosọna mẹdevo lẹ he homẹ yetọn hùn nado to gòhọ Jiwheyẹwhe tọn mẹ. Enẹwutu, gòhọ enẹ gán tin to fidepope he sinsẹ̀n-basitọ tonusetọ etọn lẹ tin te.—Osọ. 21:3.
7. Naegbọn mí gán dọ dọ nugbonọ he ko kú lẹ gbẹ́ yin jonọ to gòhọ Jehovah tọn mẹ? (Sọ pọ́n yẹdide lọ.)
7 Bọ etẹwẹ lo na nuhe dù nugbonọ he ko kú lẹ? Be e sọgbe nado wá tadona kọ̀n dọ yé gbẹ́ yin jonọ lẹ to gòhọ Jehovah tọn mẹ ya? Gbau! Naegbọn mí gán dọ mọ? Na omẹ enẹlẹ gbẹ́ to oflin Jehovah tọn mẹ wutu. Jesu dọmọ: “Dọ oṣiọ lẹ na yin finfọn, Mose lọsu hẹn ẹn zun yinyọnẹn to kandai he gando wùnkan he to miyọ́n ji go lọ mẹ, to whenue e ylọ Jehovah dọ ‘Jiwheyẹwhe Ablaham tọn, Jiwheyẹwhe Isaki tọn podọ Jiwheyẹwhe Jakọbu tọn.’ Jiwheyẹwhe mẹhe to ogbẹ̀ lẹ tọn wẹ ewọ, e ma yin oṣiọ lẹ tọn gba, na yemẹpo wẹ to ogbẹ̀ na ẹn.”—Luku 20:37, 38.
Nugbonọ he tlẹ ko kú lẹ gán yin pinpọnhlan taidi jonọ lẹ to gòhọ Jiwheyẹwhe tọn mẹ (Pọ́n hukan 7tọ)
DONA PO AZỌNGBAN HE NỌ ZỌNPỌ HẸ JONỌ JEHOVAH TỌN YINYIN LẸ PO
8. Nawẹ jonọ Jehovah tọn lẹ nọ mọaleyi na yé tin to gòhọ etọn mẹ gbọn?
8 Kẹdẹdile gòhọ jọnun de gán yin nọtẹn gbọjẹ po hihọ́ po tọn de do, gòhọ Jehovah tọn nọ basi hihọ́na jonọ etọn lẹ sọn nuhe sọgan gbleawuna yé to gbigbọ-liho lẹ si, bosọ nọ na yé todido nujọnu tọn. Eyin mí hẹn haṣinṣan pẹkipẹki de go hẹ Jehovah, Satani ma sọgan hẹn awugble tẹgbẹ tọn de wá mí ji. (Salm. 31:23; 1 Joh. 3:8) To aihọn yọyọ lọ mẹ, enẹ wẹ to owhe fọtọ́n lọ whenu, Jehovah na gbẹ́ zindonukọn nado to hihọ́-basina họntọn nugbonọ etọn lẹ sọn nuhe gán hẹn haṣinṣan yetọn hẹ ewọ gble lẹ si podọ sọn okú si.—Osọ. 21:4.
9. Walọ tẹwẹ Jehovah nọ donukun dọ jonọ emitọn lẹ ni zan?
9 Nado dọ hójọhó, gbégbò daho de wẹ e yin nado yin jonọ de to gòhọ Jehovah tọn mẹ, enẹ wẹ nado to họntọn vivẹ́ etọn yin zọnmii. Nawẹ mí dona nọ yinuwa gbọn eyin mí jlo na zindonukọn nado to jonọ etọn lẹ yin? Eyin mẹde basi oylọna we wá owhé etọn gbè, a na jlo na yọ́n nuhe e to nukundo sọn asi we lẹ. Di apajlẹ, e gán jlo dọ a ni de afọpa towe lẹ whẹpo do biọ họmẹ, podọ po homẹhunhun po wẹ a na wàmọ. Mọdopolọ, ayihaawe ma tin dọ mí jlo na yọ́n nuhe Jehovah nọ biọ to mẹhe jlo na to jonọ yin zọnmii to gòhọ etọn mẹ lẹ si. Owanyi mítọn na Jehovah nọ whàn mí nado wà nuhe go mí pé lẹpo “nado hẹn homẹ etọn hùn to gigọ́ mẹ.” (Kol. 1:10) Podọ, dile etlẹ yindọ mí nọ mọ Jehovah taidi Họntọn mítọn, mí yọnẹn dọ ewọ sọ yin Jiwheyẹwhe po Otọ́ mítọn po, yèdọ mẹlọ he jẹna gbégbò po sisi mítọn po. (Salm. 25:14) Po enẹ po to ayiha mẹ, mí dona nọ tindo sisi sisosiso na ewọ bosọ nọ flin mẹhe ewọ yin to whelẹponu. Sisi sisosiso mọnkọ na gọalọna mí ma nado yinuwa to aliho de mẹ he na gbleawuna ẹn. Matin ayihaawe, ojlo mítọn wẹ “nado nọ yí whiwhẹ do zinzọnlin” hẹ Jiwheyẹwhe mítọn.—Mika 6:8.
JEHOVAH YINUWA HẸ ISLAELIVI LẸ PO MẸNUKUNTAMAHOPỌN PO
10, 11. Nawẹ nuyiwa Jehovah tọn hẹ Islaelivi lẹ to danfafa Sinai tọn ji do mẹnukuntamahopọn hia gbọn?
10 Jehovah ma nọ homẹnukuntapọn to whenue e to nuyiwa hẹ jonọ etọn lẹ. (Lom. 2:11) Aliho he mẹ Jehovah yinuwa hẹ Islaelivi lẹ te to danfafa Sinai tọn ji gán gọalọna mí nado mọnukunnujẹ mẹnukuntamahopọn etọn mẹ ganji.
11 Whenue Jehovah ko tún omẹ etọn lẹ dote sọn kanlinmọgbenu to Egipti godo, e deazọ́nna yẹwhenọ lẹ nado nọ sẹ̀n to gòhọtúntún lọ mẹ. E deazọ́nna Levinu lẹ nado nọ penukundo azọ́n devo lẹ go to gòhọ wiwe enẹ mẹ. Be mẹhe nọ sẹ̀n to gòhọtúntún lọ mẹ lẹ kavi mẹhe whèsla do fie sẹpọ ẹ lẹ nọ duvivi nukunpedomẹgo Jehovah tọn hugan mẹhe pò lẹ wẹ a? Lala! Jehovah ma nọ homẹnukuntapọn.
12. Nawẹ lehe Jehovah yinuwa hẹ Islaelivi lẹ do to danfafa ji dohia dọ ewọ ma nọ homẹnukuntapọn gbọn? (Eksọdusi 40:38) (Sọ pọ́n yẹdide lọ.)
12 Islaelivi lẹpo wẹ do dotẹnmẹ hundote dopolọ nado yin họntọn Jehovah tọn, mahopọnna azọ́ndenamẹ vonọtaun depope he yé do to gòhọtúntún lọ mẹ kavi fihe yé nọ nọ̀ do gòhọtúntún lọ. Di apajlẹ, Jehovah hẹn ẹn diun dọ akọta lọ blebu nọ penugo nado mọ dòtin aslọ po miyọ́n po tọn jiawu lọ to gòhọtúntún lọ ji. (Hia Eksọdusi 40:38.) Whenue aslọ lọ jẹ tẹnsẹ ji yì fiyọyọ devo, etlẹ yin mẹhe whèsla do fie dẹn hugan do gòhọtúntún lọ lẹ nọ penugo nado mọ ẹn, bo nọ blá agbàn yetọn lẹ, nọ tún gòhọ whẹndo yetọn lẹ tọn bosọ nọ to yìyì afọsu-afọsi hẹ mẹhe pò to akọta lọ mẹ lẹ. (Sọh. 9:15-23) Mẹlẹpo wẹ gán sè nudidọ opẹ̀n awe he yè yí fataka do tùn lọ tọn, ehe nọ tátá bo nọ dohia mẹlẹpo dọ yé dona jẹ tẹnsẹ ji. (Sọh. 10:2) E họnwun dọ e ma yin gòhọtúntún lọ pá ninọ wẹ yin ohia lọ dọ mẹde yin họntọn vivẹ́ Jehovah tọn. Kakatimọ, mẹhe to akọta yọyọ Jehovah tọn mẹ lẹpo wẹ gán yin jonọ Etọn bosọ ganjẹ anademẹ po hihọ́-basinamẹ Etọn po go. Mọdopolọ to egbehe, mahopọnna fie mí nọ nọ̀ to aigba ji, mí gán mọaleyi sọn nukunpedomẹgo owanyinọ po hihọ́-basinamẹ Jehovah tọn po mẹ.
Tito he Jiwheyẹwhe basi gando gòhọtúntún lọ go lẹ dohia dọ e ma nọ homẹnukuntapọn (Pọ́n hukan 12tọ)
JEHOVAH GBẸ́ NỌ DO MẸNUKUNTAMAHOPỌN HIA TO EGBEHE
13. Etẹwẹ yin dopo to aliho he mẹ Jehovah nọ do mẹnukuntamahopọn hia te to egbehe lẹ mẹ?
13 To egbehe, mẹdelẹ to omẹ Jiwheyẹwhe tọn lẹ mẹ nọ nọ̀ fie sẹpọ tatọ́-tẹnnọ lọ kavi alahọ Kunnudetọ Jehovah tọn lẹ tọn de. Mẹdevo lẹ tlẹ nọ sẹ̀n to nọtẹn ehelẹ paapá mẹ. Taidi kọdetọn de, omẹ mọnkọ lẹ gán do mahẹ to nususu he nọ yin wiwà to nọtẹn ehelẹ mẹ bosọ dogbẹ́ hẹ mẹhe to anadenanu lẹ tlọlọ. Mẹdelẹ nọ sẹ̀n taidi nugopọntọ tomẹyitọ kavi nọ doalọ to sinsẹ̀nzọn whenu-gigọ́ tọn vonọtaun devo lẹ mẹ. Eyin a tin to omẹ planplan he ma do dotẹnmẹ hundote mọnkọ lẹ mẹ to alọnu, deji dọ Jonọyitọ mítọn Jehovah yiwanna jonọ etọn he e kẹalọyi lẹpo. Podọ, yemẹpo go wẹ ewọ lọsu nọ penukundo tlọlọ. (1 Pita 5:7) Omẹ Jiwheyẹwhe tọn lẹpo wẹ nọ mọ núdùdù gbigbọmẹ tọn, anademẹ po hihọ́-basinamẹ he yé do hudo etọn po yí.
14. Apajlẹ devo tẹwẹ do mẹnukuntamahopọn Jehovah tọn hia taidi Jonọyitọ?
14 Apajlẹ devo he dohia dọ Jehovah yin Jonọyitọ he ma nọ homẹnukuntapọn wẹ yindọ, e hẹn Biblu tin-to-aimẹ na gbẹtọ lẹpo lẹdo aihọn pé to egbehe. To dowhenu, ogbè atọ̀n poun mẹ wẹ Biblu yin kinkando, enẹ wẹ Heblugbe, Alamaikigbe po Glẹkigbe po. Be mẹhe gán hia ogbè he mẹ Biblu yin kinkando to dowhenu enẹlẹ nọ duvivi haṣinṣan pẹkipẹki de tọn hẹ Jehovah hugan mẹhe ma gán hia yé lẹ wẹ ya? Lala, e ma yinmọ.—Mat. 11:25.
15. Kunnudenu tẹwẹ do mẹnukuntamahopọn Jehovah tọn hia? (Sọ pọ́n yẹdide lọ.)
15 Nukundagbe Jehovah tọn ma nọ sinai do obá he mẹ mí sewé jẹ kavi nugopipe mítọn nado do ogbè lẹ ji gba. Kakati Jehovah ni na nuyọnẹn etọn mẹhe sewé taun lẹ kẹdẹ, e hẹn ẹn tin-to-aimẹ na gbẹtọ lẹpo lẹdo aihọn pé, vlavo yé yin wesetọ daho kavi lala. Ohó etọn Biblu ko yin lilẹdo ogbè fọtọ́n susu lẹ mẹ; gbọnmọ dali, gbẹtọ lẹ lẹdo aihọn pé gán mọaleyi sọn nuplọnmẹ etọn lẹ mẹ bosọ plọn lehe yé gán lẹzun họntọn etọn lẹ do.—2 Tim. 3:16, 17.
Nawẹ nugbo lọ dọ Biblu tin-to-aimẹ to ogbè susu mẹ dohia dọ Jiwheyẹwhe ma nọ homẹnukuntapọn gbọn? (Pọ́n hukan 15tọ)
TO JONỌ JEHOVAH TỌN YIN ZỌNMII
16. Sọgbe hẹ Owalọ lẹ 10:34, 35, etẹwẹ mí dona wà na Jehovah nido to alọkẹyi mí zọnmii?
16 Lẹblanulọkẹyi daho wẹ e yin dọ Jehovah kẹalọyi mí taidi jonọ etọn lẹ to gòhọ yẹhiadonu tọn etọn mẹ. Ewọ wẹ Jonọyitọ homẹdagbenọ, owanyinọ podọ johẹmẹtọ daho hugan he mí gán tindo. Humọ e ma nọ homẹnukuntapọn, e nọ kẹalọyi mímẹpo mahopọnna fie mí nọ nọ̀, ninọmẹ mítọn, obá he mẹ mí sewé jẹ, akọ̀, hẹnnu, owhe kavi eyin vlavo mí yin sunnu kavi yọnnu. Etomọṣo, mẹhe nọ nọgbẹ̀ sọgbe hẹ nubiọtomẹsi etọn lẹ kẹdẹ wẹ ewọ nọ kẹalọyi taidi jonọ etọn lẹ.—Hia Owalọ lẹ 10:34, 35.
17. Etẹwẹ mí na gbadopọnna to hosọ he bọdego mẹ?
17 Dile Salmu lẹ 15:1 dohia do, Davidi fọ́n kanbiọ ehelẹ dote: “Jehovah E, mẹnu wẹ sọgan yin jonọ to gòhọ towe mẹ? Mẹnu wẹ sọgan nọ osó wiwe towe ji?” Salmu-kantọ lọ yin gbigbọdo nado na gblọndo kanbiọ enẹlẹ tọn. Hosọ he bọdego na dọhodo nubiọtomẹsi tangan he kọ̀n mí dona jẹ nado to jonọ Jehovah tọn yin zọnmii lẹ ji.
OHÀN 32 Nọ Adà Jehovah Tọn Mẹ!
