Kanbiọ lẹ sọn Wehiatọ lẹ Dè
Be hogbe lọ lẹ “Hiẹ na họ́ yé” he to Salmu lẹ 12:7 mẹ to alọdlẹndo “mẹhe to yaji,” ehe yin nùdego to (wefọ 5tọ) mẹ lẹ wẹ ya, kavi “hodidọ Jehovah tọn” he to (wefọ 6tọ) mẹ lẹ wẹ yé to alọdlẹndo?
Lẹdo hodidọ lọ tọn dohia dọ gbẹtọ lẹ wẹ wefọ ehe to alọdlẹndo.
To Salmu lẹ 12:1-4 mẹ, mí hia dọ “omẹ nugbonọ lẹ ko vọ̀ sọn gbẹtọ lẹ ṣẹnṣẹn.” Todin, mì gbọ mí ni gbadopọnna Salmu lẹ 12:5-7, enẹ wẹ wefọ he ji kanbiọ he to aga lọ sinai do lẹ.
“‘Na yè to kọgbidina mẹhe to yaji lẹ wutu,
Podọ na azọ̀nwinwẹn wamọnọ lẹ tọn wutu,
Yẹn na fọ́n bo yinuwa,’ wẹ Jehovah dọ.
‘Yẹn na whlẹn yé sọn alọ mẹhe to nuyiwa hẹ yé po vlẹko po lẹ tọn mẹ.’
Hodidọ Jehovah tọn lẹ wé-ṣeke;
Yé tin taidi fataka he yè kọ̀n to zòhọ de mẹ, bo yin kiklọ́we whla ṣinawe.
Hiẹ na họ́ yé, Jehovah E;
Hiẹ na basi hihọ́na dopodopo yetọn sọn alọ whẹndo ehe tọn mẹ kakadoi.”
Wefọ 5tọ do nuhe Jiwheyẹwhe dọ gando “mẹhe to yaji lẹ” go hia. E na whlẹn yé.
Wefọ 6tọ yidogọ dọ “hodidọ Jehovah tọn lẹ wé-ṣeke,” ‘taidi fataka he yè kọ̀n whla ṣinawe.’ Ehe do numọtolanmẹ Klistiani lẹ tọn hia to gigọ́ mẹ.—Salm. 18:30; 119:140.
Todin, lẹnnupọndo wefọ he bọdego ji, enẹ wẹ Salmu lẹ 12:7, e dọmọ: “Hiẹ na họ́ yé, Jehovah E; hiẹ na basi hihọ́na dopodopo yetọn sọn alọ whẹndo ehe tọn mẹ kakadoi.” Etẹwẹ hogbe lọ “yé” to alọdlẹndo?
Na wefọ 7tọ bọdo wefọ 6tọ he dọho gando “hodidọ Jehovah tọn lẹ” go wutu, mẹdelẹ gán wá tadona kọ̀n dọ “yé” to alọdlẹndo hodidọ Jiwheyẹwhe tọn lẹ. Podọ, mí yọnẹn dọ Jiwheyẹwhe ko basi hihọ́na Biblu mahopọnna vivẹnu susu nukundiọsọmẹtọ lẹ tọn nado glọnalina ẹn bosọ de e sẹ̀ sọn aimẹ.—Isa. 40:8; 1 Pita 1:25.
Amọ́, nuhe yin didọ to wefọ 5tọ mẹ lẹ sọ yin nugbo ga. Jehovah ko gọalọna “mẹhe to yaji lẹ” po mẹhe “yè to kọgbidina” lẹ po bo nasọ zindonukọn nado to mọwà, podọ e na whlẹn yé.—Jobu 36:15; Salm. 6:4; 31:1, 2; 54:7; 145:20.
Eyin mọwẹ, etẹwẹ hogbe lọ “yé” he to wefọ 7tọ mẹ to alọdlẹndo?
Eyin mí yí sọwhiwhe do gbadopọnna Salmu ehe ganji, mí na mọdọ gbẹtọ lẹ wẹ “yé” lọ to alọdlẹndo.
Salmu lẹ 12:1 dọho gando ninọmẹ “omẹ nugbonọ lẹ” he mẹylankan lẹ gán ko dolalo na lẹ tọn go. Enẹgodo, mí mọ hodidọ de he dohia dọ Jehovah na yinuwa sọta mẹhe nọ ṣì odẹ́ yetọn zan lẹ. Salmu lọ hẹn mí deji dọ mí gán deji dọ Jiwheyẹwhe na yinuwa do ota omẹ etọn lẹ tọn mẹ, na hodidọ etọn lẹ wé-ṣeke wutu.
Enẹwutu, nuhe dọ wefọ 7tọ te wẹ yindọ, Jehovah na họ́ bosọ basi hihọ́na “yé,” enẹ wẹ mẹhe to yaji to alọ mẹylankan lẹ tọn mẹ lẹ.
Hogbe lọ he yin lilẹdo “yé” sọgbe hẹ aliho he mẹ e yin yiyizan te to kandai dejidego Owe-wiwe Heblu tọn lẹ mẹ. Septante Glẹkigbe tọn yí hogbe lọ “mí” zan whla awe to wefọ 7tọ mẹ, ehe dlẹnalọdo nugbonọ he to yaji bọ yè sọ to kọgbidina lẹ. Gbọngodo, wefọ 7tọ dọ dọ nugbonọ “dopodopo” na yin hihọ́-basina “sọn alọ whẹndo ehe tọn mẹ,” enẹ wẹ sọn alọ gbẹtọvi he nọ ze walọ gblezọn daga lẹ tọn mẹ. (Salm. 12:7, 8) To lẹdogbedevomẹ Owe-wiwe Heblu tọn lẹ tọn de mẹ to Alamaikigbe mẹ, wefọ 7tọ dọ dọ, “Hiẹ, OKLUNỌ E, a na basi-hihọ́na dodonọ lẹ, a na họ́ yé sọn whẹndo ylankan ehe si kakadoi. Awà lẹpo ji wẹ mẹylankan lẹ nọ to yìyì, taidi aslọ́nẹn he nọ gbọ́n ohùn visunnu gbẹtọvi lẹ tọn.” Ehe yidogọna kunnudenu lọ dọ Salmu lẹ 12:7 ma to hodọ gando hodidọ Jiwheyẹwhe tọn lẹ go.
Enẹwutu, wefọ ehe na todido “omẹ nugbonọ lẹ” dọ Jiwheyẹwhe na yinuwa.
