1. Naegbọn mẹdelẹ sọgan nọma nọ tindo ojlo sọmọ nado plọnnu?

TO OJLẸ mítọn mẹ, avùnnukundiọsọmẹnu sinsinyẹn wẹ e nọ yin nado mọ dandannu gbẹ̀mẹ tọn lẹ. Susu to mẹmẹsunnu mítọn lẹ mẹ wẹ nọ wazọ́n na gànhiho susu lẹ nado mọ nuhe yé nado hẹn whẹndo yetọn poun. Mẹsusu devo lẹ nọ yí gànhiho susu zan to azọ́nzán dopodopo ji nado zingbejizọnlin yì azọ́nwatẹn yetọn, podọ nado lẹkọ. Mẹsusu nọ wà huhlọnzọ́n lẹ nado penukundo yede go. To vivọnu azán de tọn, onú nọ ṣikọna mẹmẹsunnu po mẹmẹyọnnu azọ́n sinsinyẹnwatọ ehelẹ po taun! Enẹ nọ zọ́n bọ yé ma nọ do ojlo sọmọ nado plọnnu.

2. Ojlẹ tẹwẹ a de dovo nado nọ plọnnu?

² Ṣigba, nugbo lọ wẹ yindọ mí dona nọ de whenu dovo nado plọnnu—mọwẹ nado plọnnu sisosiso—to Ohó Jiwheyẹwhe tọn po owe mítọn lẹ po mẹ. Enẹ yin dandan nado tindo haṣinṣan dagbe hẹ Jehovah podọ nado nọgbẹ̀ kakadoi! (1 Tim. 4:15) Mẹdelẹ nọ fọ́nzán to azán dopodopo gbè bo nọ plọnnu to whenue filẹpo to tóó bọ ayiha yetọn mẹ fá na yé ko gbọjẹ to zánmẹ wutu. Mẹdevo lẹ nọ de ojlẹ kleun de dovo to fie ayihafẹsẹnamẹnu de ma tin te to vivọnu azán lọ tọn nado plọnnu bosọ lẹnayihamẹpọn.

3, 4. Vọjlado tẹlẹ wẹ ko yin bibasi gando sọha zinjẹgbonu mítọn lẹ tọn go, podọ etẹwutu?

³ Ayihaawe ma tin dọ a kọngbedopọ dọ nujọnu wẹ e yin nado nọ de whenu dovo na nupinplọn. Amọ́, etẹwẹ mí dona nọ yizan nado plọnnu? A sọgan dọ dọ ‘Nuhe n’dona hia lẹ ma whè. N’ka mọdọ e vẹawu nado hia popolẹpo.’ Mẹdelẹ nọ dovivẹnu nado mọaleyi sọn awuwledainanu gbigbọmẹ tọn he tin lẹpo mẹ, amọ́ mẹmẹsunnu mítọn susu wẹ e nọ vẹawuna nado mọ whenu nado wàmọ. Hagbẹ Anademẹtọ lọ mọnukunnujẹ ehe  mẹ. Enẹwutu wẹ anademẹ lẹ yin nina to agọe nado de sọha hosọ he nọ yin zinjẹgbonu lẹ po dehe nọ tọ́n to Intẹnẹt ji lẹ po tọn pò.

⁴ Di apajlẹ, mí masọ nọ zín Owhewé Kunnudetọ Jehovah tọn lẹ tọn jẹgbonu ba, na numimọ tulinamẹ tọn susu lẹ nọ tin-to-aimẹ to jw.org^® ji, podọ to tito sunmẹsunmẹ tọn Televiziọn^® JW tọn mẹ wutu. Zinjẹgbonu Atọ̀họ̀-Nuhihọ́ lọ Tọn mẹlẹpo tọn po Fọ́n! po nọ yin zinzinjẹgbonu todin whla atọ̀n poun to owhe dopo mẹ. Vọjlado ehelẹ ma yin bibasi na mí nido nọ mọ whenu susu dogọ nado doafọna nuwiwa devo lẹ gba. Yé yin bibasi nado hẹn mí penugo nado na ayidonugo sọwhiwhe tọn “nuhe yin nujọnu hugan lẹ.” (Flp. 1:10) Mì gbọ mí ni dọhodo lehe mí sọgan nọ de nuhe yin nujọnu hugan lẹ do, podọ lehe mí sọgan mọaleyi sọn oplọn mẹdetiti tọn mítọn mẹ to gigọ́ mẹ do ji.

5, 6. Owe tẹlẹ wẹ mí dona hẹn ẹn diun dọ mí nọ plọn po sọwhiwhe po?

⁵ Etẹlẹ wẹ dona nọ yin nujọnu hugan na mí? E họnwun dọ mí dona nọ yí whenu zan egbesọegbesọ nado plọn Ohó Jiwheyẹwhe tọn. Weta he nọ yin dide na Biblu hihia sẹmẹsẹmẹ tọn to agun mẹ todin lẹ ko yin didepo, na mí nido mọ whenu dogọ nado nọ lẹnayihamẹpọn do nuhe mí hia ji, podọ nado basi dodinnanu yinukọn. Yanwle mítọn ma dona yin nado nọ hia adà he yin dide lọ domọ poun gba, ṣigba mí dona nọ dike owẹ̀n Biblu tọn ni mọ ahun mítọn bo dọ̀n mí sẹpọ Jehovah dogọ.—Salm. 19:14.

⁶ Nudevo tẹwẹ mí dona nọ plọn po sọwhiwhe po? Na nugbo tọn, mí nọ jlo na wleawuna Oplọn Atọ̀họ̀-Nuhihọ́ lọ Tọn po Biblu Pinplọn Agun tọn po, gọna hosọ devo he na yin dogbapọnna to opli osẹ ṣẹnṣẹn tọn whenu lẹ. Mí sọ dona nọ gbadopọnna zinjẹgbonu Atọ̀họ̀-Nuhihọ́ lọ Tọn mẹlẹpo tọn po Fọ́n! po tọn dopodopo.

7. Eyin mí ma nọ penugo nado hia kavi pọ́n nuhe nọ sọawuhia to nọtẹn Intẹnẹt tọn mítọn po Televiziọn JW po ji lẹpo, be mí dona gbọjọ wẹ ya?

⁷ A sọgan dọ dọ: ‘Eyọn, amọ́ etẹwẹ lo na nuhe dù hosọ he nọ sọawuhia to nọtẹn Intẹnẹt tọn jw.org ji lẹ po dehe tin to Televiziọn JW ji lẹ po? Yé sù taun!’ Lẹnnupọndo apajlẹ ehe ji: Núdùdù dagbedagbe tẹnmẹtẹnmẹ lẹ wẹ nọ tin to núdùdù-satẹn de. Nuhọ̀tọ de ma gán dọ́ núdùdù he tin-to-aimẹ to finẹ lẹpo pọ́n gbede. Enẹwutu, e nọ de vude poun to yé mẹ. Mọdopolọ, eyin a ma nọ penugo nado hia nuhe tin-to-aimẹ to Intẹnẹt ji lẹpo, ma gbọjọ blo. Nọ hia kavi pọ́n dehe go a pé lẹ. Todin, mì gbọ mí ni dọhodo nuhe nupinplọn bẹhẹn po lehe mí sọgan mọ ale susu yí sọn nupinplọn mítọn mẹ do po ji.

8. Afọdide tẹlẹ wẹ mí sọgan ze nado plọn Atọ̀họ̀-Nuhihọ́ lọ Tọn, podọ nawẹ mọwiwà na hẹn ale wá na we gbọn?

⁸ Nupinplọn zẹẹmẹdo nado nọ yí sọwhiwhe do hiawe, bosọ wàmọ po yanwle tangan de po. E ma yin nado nọ yìnnukun gbọn nuhe hia mí te ji bo nọ zẹhudo gblọndo lẹ glọ poun gba. Di apajlẹ, to whenue a to awuwlena Oplọn Atọ̀họ̀-Nuhihọ́ lọ Tọn, jẹnukọn whẹ́ nọ na ayidonugo bladopọ he to bẹjẹeji hosọ lọ tọn. Enẹgodo, nọ lẹnnupọndo hosọ lọ, hóvila lẹ po kanbiọ dogbapọn tọn lẹ po ji. Bọdego, nọ hia hosọ lọ po sọwhiwhe po. Nọ lẹnnupọndo linlẹn tangan lọ ji, ehe nọ saba tin to hodidọ tintan hukan dopodopo tọn mẹ. Linlẹn tangan lọ na gọalọna we nado mọnukunnujẹ nuagokun hukan lọ tọn mẹ. Dile a to hosọ lọ blebu hia, nọ lẹnnupọndo lehe hukan dopodopo nọgodona hóvila lọ lẹ bosọ tindo kanṣiṣa hẹ linlẹn tangan hosọ lọ tọn do ji. Nọ basi kandai hogbe he a ma jẹakọ hẹ lẹ po nuagokun he ji a jlo na basi dodinnanu dogọ do lẹ po tọn.

9. (a) Naegbọn mí dona nọ na ayidonugo nujọnu tọn wefọ lẹ to whenue mí to Atọ̀họ̀-Nuhihọ́ lọ Tọn plọn, podọ nawẹ mí sọgan wàmọ gbọn? (b) Sọgbe hẹ Jọṣua 1:8, etẹwẹ mí dona wà gbọnvona wefọ lẹ hihia?

 ⁹ Oplọn Atọ̀họ̀-Nuhihọ́ lọ Tọn nọ gọalọna mí nado mọnukunnujẹ Biblu mẹ. Enẹwutu, nọ lẹnnupọndo wefọ lẹ ji po sọwhiwhe po, titengbe dehe na yin hihia to whenue agun lọ na to dogbapọnna hosọ lọ. Nọ na ayidonugo nujọnu tọn lehe hogbe kavi hodidọ tangan he to wefọ lọ lẹ mẹ lẹ nọgodona nuagokun he to hukan lọ mẹ do. Humọ, nọ yí whenu do lẹnayihamẹpọn do wefọ he a hia lẹ ji, bo nọ lẹnnupọndo aliho he mẹ a sọgan yí yé zan to gbẹzan towe titi mẹ do ji.—Hia Jọṣua 1:8.

10. To kọndopọ mẹ hẹ Heblu lẹ 5:14, naegbọn mẹjitọ lẹ nọ yí whenu zan to sinsẹ̀n-bibasi whẹndo tọn whenu nado plọn ovi yetọn lẹ lehe yè nọ plọnnu bo nọ basi dodinnanu do?

¹⁰ Owhẹ̀ mẹjitọ lẹ tọn whẹ́n nado nọ jlo dọ sinsẹ̀n-bibasi whẹndo tọn sẹmẹsẹmẹ tọn yetọn ni yin ojlẹ awuvivi tọn de na ovi yetọn lẹ. Ṣigba, dile etlẹ yindọ mẹjitọ lẹ dona nọ tindo onú tangan he ji yé na dọhodo to sinsẹ̀n-bibasi whẹndo tọn lọ whenu to linlẹn mẹ, yé ma dona nọ mọdọ emi to dandannu glọ nado wleawuna onú vonọtaun kavi nuwiwa he fọnjlodotenamẹ lẹ to osẹ lẹpo mẹ gba. Nugbo wẹ dọ ojlẹ sinsẹ̀n-bibasi whẹndo tọn sọgan nọ yin yiyizan nado pọ́n tito sunmẹsunmẹ tọn Televiziọn JW tọn kavi nado wazọ́n do tito vonọtaun de ji sọn ojlẹ de mẹ jẹ devo mẹ taidi awuwiwlena aki Noa tọn, nujọnu wẹ e sọ yin nado plọn ovi lẹ lehe yè nọ plọnnu do. Di apajlẹ, yé dona plọn lehe yè nọ wleawuna opli agun tọn lẹ kavi lehe yè nọ basi dodinnanu do whẹho he fọndote to wehọmẹ de ji do. (Hia Heblu lẹ 5:14.) Eyin yé nọ yí whenu zan na tito nupinplọn tọn lẹ to whégbè, yé na penugo dogọ nado nọ na ayidonugo nuhe nọ yin dogbapọnna to opli agun tọn lẹ po plidopọ lẹ po ji lẹ, ehe ma nọ bẹ video hẹn to whelẹponu. Na nugbo tọn, ojlẹ he oplọn de na dẹn na na sinai do owhe po gbẹtọ-yinyin ovi dopodopo tọn po ji.

11. Naegbọn e do yin nujọnu nado plọn plọnmẹ Biblu mítọn lẹ lehe yelọsu na nọ plọnnu sisosiso do?

¹¹ Plọnmẹ Biblu mítọn lẹ lọsu dona plọn lehe yè nọ plọnnu do. Eyin mí ṣẹṣẹ bẹ po yé po wẹ, homẹ mítọn nọ hùn nado mọdọ yé zẹhudo gblọndo lẹ glọ poun dile yé to awuwlena oplọn lọ kavi na opli agun tọn lẹ. Amọ́, onú titengbe wẹ e yin nado nọ plọn plọnmẹ Biblu mítọn lẹ lehe yè nọ basi dodinnanu do, podọ lehe yelọsu sọgan nọ plọnnu to aliho nujọnu tọn mẹ do. Gbọnmọ dali, eyin nuhahun lẹ fọ́n, kakati nado nọ dín alọgọ sọn mẹdevo lẹ dè to agun lọ mẹ, yé na yọ́n lehe yé sọgan mọ ayinamẹ  yọ́n-na-yizan lẹ na yede do gbọn dodinnanu bibasi to owe mítọn lẹ mẹ dali.

12. Yanwle tẹlẹ wẹ mí sọgan zedai gando nupinplọn go?

¹² Eyin a ma nọ yiwanna nupinplọn, a gán lẹndọ e ma yọnbasi dọ nupinplọn ni hẹn awuvivi wá na emi. Amọ́ e sọgan wàmọ. Bẹjẹeji po ojlẹ nupinplọn tọn kleunkleun lẹ po, podọ enẹgodo, a sọgan yidogọna ojlẹ enẹ vudevude. Nọ tindo yanwle de to ayiha mẹ. Na nugbo tọn, yanwle titengbe hugan mítọn dona yin nado dọnsẹpọ Jehovah hugan gbede pọ́n. Yanwle ojlẹ gli tọn de sọgan yin nado nọ dín gblọndo na kanbiọ he mẹde kanse kavi nado basi dodinnanu do nuhahun he mí to pipehẹ de ji.

13. (a) Basi zẹẹmẹ afọdide he jọja de sọgan ze lẹ tọn nado yiavùnlọna nuyise etọn lẹ to wehọmẹ. (b) Nawẹ a sọgan yí ayinamẹ he to Kolosinu lẹ 4:6 mẹ do yizan mẹ gbọn?

¹³ Di apajlẹ, be jọja he to wehọmẹ yì de wẹ a yin ya? Klasigbẹ́ towe lẹpo sọgan tindo yise to nuplọnmẹ nulẹ tin yededenu tọn mẹ. A sọgan nọ jlo nado yiavùnlọna nuplọnmẹ Biblu tọn, amọ́ bo nọ mọdọ emi ma penugo nado wàmọ. Ehe na biọ dọ a ni ze tito nupinplọn tọn de dai! Yanwle awe he a sọgan zedai lẹ wẹ: (1) nado hẹn nuyise towe lodo dọ Jiwheyẹwhe wẹ dá nulẹpo, podọ (2) nado hẹn nugopipe towe nado yiavùnlọna nugbo lọ pọnte dogọ. (Lom. 1:20; 1 Pita 3:15) A sọgan kanse dewe jẹnukọn dọ, ‘Whẹwhinwhẹ́n tẹlẹ wẹ klasigbẹ́ ṣie lẹ nọ na nado nọgodona nuplọnmẹ nulẹ tin yededenu tọn?’ Enẹgodo, basi dodinnanu sọwhiwhe tọn to owe mítọn lẹ mẹ. Avùnlọyiyi na nuyise towe sọgan nọma vẹawu dile a lẹn do. Suhugan gbẹtọ lẹ tọn wẹ yise dọ nulẹ tin to yededenu na mẹhe yé nọ na sisi de dọna yé dọ enẹ yin nugbo poun wutu. Eyin a mọ nuagokun dopo kavi awe he a sọgan má hẹ mẹhe kanhose we po ahundopo po de, a sọgan gọalọna ẹn nado mọ gblọndo he na hẹn pekọ wá na ẹn.—Hia Kolosinu lẹ 4:6.

14-16. (a) Nawẹ a sọgan mọnukunnujẹ owe Biblu tọn he a ma jẹakọ hẹ ganji de mẹ gbọn? (b) Nawẹ wefọ he yin sislẹ lẹ gọalọna we nado yọ́n nususu dogọ gando owe Amọsi tọn go gbọn? (Sọ pọ́n apotin lọ “ Nọ Yí Nukun Homẹ Tọn Do Mọ Nujijọ Biblu Tọn Lẹ!”)

¹⁴ Mí ni dọ dọ to opli agun tọn he bọdego whenu, mí dona gbadopọnna kandai dopo to mẹhe nọ saba yin yiylọdọ yẹwhegán pẹvi lẹ mẹ tọn, vlavo dehe a ma jẹakọ hẹ ganji de. Afọdide tintan lọ sọgan yin nado wleawuna ojlo to nuhe yẹwhegán lọ kàn mẹ. Nawẹ a sọgan wà enẹ gbọn?

¹⁵ Jẹnukọn whẹ́, kanse dewe dọ: ‘Etẹwẹ n’yọnẹn gando mẹhe kàn owe lọ go? Omẹ nankọ wẹ e yin, fie wẹ e nọ, podọ azọ́n tẹ e nọ wà?’ Onú enẹlẹ yinyọnẹn gando wekantọ lọ go sọgan sọ do nuhewutu e do yí hogbe kavi apajlẹ delẹ zan hia. Dile a to Biblu hia, nọ na ayidonugo hogbe delẹ he do gbẹtọ-yinyin wekantọ lọ tọn hia.

¹⁶ Enẹgodo, a na mọdọ alenu wẹ e yin nado nọ na ayidonugo ojlẹ he mẹ kandai lọ yin bibasi te. A sọgan wàmọ gbọn dogbigbapọnna “Todowhinnu Owe Biblu Tọn lẹ Tọn” dali, ehe tin to godo Owe Wiwe lẹ—Lẹdogbedevomẹ Aihọn Yọyọ Tọn. Humọ, a sọgan gbadopọnna apotin nudọnamẹ tọn he dọhodo yẹwhegán lẹ po ahọlu lẹ po ji to Nudọnamẹ Dogọ A6 mẹ. Eyin owe Biblu tọn he a to dogbapọnna lọ yin owe dọdai tọn de, e na yọ́n dọ a ni dindona ninọmẹ he tin to aimẹ to ojlẹ he mẹ owe lọ yin kinkan te lẹ. Pọndohlan kavi walọyizan he ma sọgbe tẹlẹ wẹ yẹwhegán lọ jlo na gọalọna mẹlẹ nado dapana? Mẹnu lẹ po e po wẹ nọgbẹ̀ to ojlẹ dopolọ mẹ? Nado yọ́n nususu gando yẹwhegán lọ go, a sọgan basi dodinnanu sọn  asisa devo lẹ mẹ. Di apajlẹ, nado mọnukunnujẹ lehe nulẹ yì do to ojlẹ Amọsi tọn mẹ to gigọ́ mẹ, alenu wẹ e yin nado gbadopọnna wefọ delẹ to owe 2 Ahọlu lẹ po 2 Otànnugbo lẹ po mẹ, ehe yin sislẹ do alọdlẹndonu ṣẹnṣẹn mẹ tọn Amọsi 1:1 tọn mẹ. Humọ, a sọgan gbadopọnna owe Hosea tọn, yèdọ mẹhe nọgbẹ̀ to ojlẹ dopolọ mẹ hẹ Amọsi. Asisa ehe lẹpo na gọalọna we nado mọnukunnujẹ ojlẹ he mẹ Amọsi nọgbẹ̀ te mẹ hezeheze.—2 Ahọ. 14:25-28; 2 Otàn. 26:1-15; Hos. 1:1-11; Amọ. 1:1.

17, 18. Gbọn apajlẹ he tin to hukan lọ lẹ mẹ kavi apajlẹ towe titi de yiyizan dali, do lehe ayidonugo nina nudọnamẹ flinflin lẹ sọgan hẹn oplọn mẹdetiti tọn yin awuvivinu de do hia.

¹⁷ Nujọnu wẹ e yin nado nọ hia Biblu po tlintlindo-dindin he siso de po. Di apajlẹ, mí ni dọ dọ a to weta 12tọ Zekalia tọn hia, fie yè dọ dọdai okú Mẹsia tọn te. (Zek. 12:10) Whenue a jẹ wefọ 12tọ ji, a hia dọ “whẹndo owhé Natani tọn” na blawu tlala na okú Mẹsia tọn wutu. Kakati nado lọ́n dasá nudọnamẹ kleun enẹ poun, a yiagbọji bo kanse dewe dọ: ‘Kanṣiṣa tẹwẹ owhé Natani tọn tindo hẹ Mẹsia lọ? Be aliho de tin nado mọ nudọnamẹ dogọ ya?’ A basi dodinnanu vude deji. Alọdlẹndonu ṣẹnṣẹn mẹ tọn de dlẹnalọdo 2 Samuẹli 5:13, 14, fie a hia te dọ Natani yin dopo to visunnu Ahọlu Davidi tọn lẹ mẹ. Alọdlẹndonu ṣẹnṣẹn mẹ tọn awetọ slẹ Luku 3:23, 31, ehe dohia dọ Jesu wá sọn kúnkan Natani tọn mẹ tlọlọ gbọn Malia gblamẹ. (Sọ pọ́n “Mẹnu wẹ yin otọ́ Josẹfu tọn?” wp16.3 9 huk. 1-3) To ajiji mẹ, a doayi nupaṣamẹ de go! A yọnẹn dọ dọdai lẹ dohia dọ Jesu na wá sọn kúnkan Davidi tọn mẹ. (Mat. 22:42) Amọ́, visunnu 20 linlán wẹ Davidi tindo. Be e ma jiawu dọ Zekalia zinnudo whédo Natani tọn ji na taun tọn bo dohia dọ  whédo ehe do whẹwhinwhẹ́n nado nọ aluẹmẹ na okú Jesu tọn ya?

¹⁸ Lẹnnupọndo apajlẹ devo ji. To weta tintan owe Luku tọn mẹ, mí hia dọ angẹli Gabliẹli wá dla Malia pọ́n bo dọhona ẹn gando visunnu he e na wá ji lọ go bo dọmọ: “Ewọ na klo bo na yin yiylọdọ Visunnu Gigogán lọ tọn, Jehovah Jiwheyẹwhe nasọ yí ofìn Davidi otọ́ etọn tọn na ẹn, ewọ nasọ yin Ahọlu do owhé Jakọbu tọn ji kakadoi.” (Luku 1:32, 33) Adà tintan wẹndomẹ Gabliẹli tọn sọgan dọ̀n ayidonugo mítọn, fie e dọ te dọ Jesu na yin yiylọdọ “Visunnu Gigogán lọ tọn.” Ṣigba, Gabliẹli sọ dọ dọdai dọ Jesu na “yin Ahọlu.” Enẹwutu, mí sọgan kanse míde nuhe hogbe Gabliẹli tọn enẹlẹ sọgan zẹẹmẹdo na Malia. Be ewọ mọnukunnujẹemẹ dọ hogbe Gabliẹli tọn lẹ zẹẹmẹdo dọ Jesu na wá jẹ otẹn Ahọlu Hẹlọdi kavi dopo to mẹhe na bọdego taidi ahọlu to Islaeli lẹ tọn mẹ wẹ ya? Eyin Jesu lẹzun ahọlu, Malia na yin ahọsi daho, podọ whẹndo etọn na nọ nọ̀ họ̀nmẹ ahọlu tọn. Etomọṣo, Biblu ma dohia dọ Malia tlẹ donù onú mọnkọtọn depope go to hodọdopọ etọn hẹ Gabliẹli mẹ, mọjanwẹ mí masọ hia gbede dọ Malia biọ nado tindo otẹn nukundeji de to Ahọluduta lọ mẹ dile devi Jesu tọn awe delẹ wà do. (Mat. 20:20-23) Zẹẹmẹ ehe do mẹhe Malia yin hia mí dogọ, yèdọ yọnnu he yin whiwhẹnọ tlala de!

19, 20. Sọgbe hẹ Jakọbu 1:22-25; 4:8, yanwle tẹlẹ wẹ mí nọ tindo to whenue mí to nuplọn?

¹⁹ Mì gbọ mí ni flindọ yanwle titengbe hugan he wutu mí do nọ plọn Ohó Jiwheyẹwhe tọn po owe mítọn lẹ po wẹ nado dọnsẹpọ Jehovah dogọ. Mí sọ nọ jlo na mọnukunnujẹ “gbẹtọ wunmẹ” he mí yin mẹ hezeheze gọna diọdo he mí dona basi nado hẹn homẹ Jiwheyẹwhe tọn hùn lẹ. (Hia Jakọbu 1:22-25; 4:8.) Enẹwutu, to bẹjẹeji nupinplọn dopodopo tọn, mí dona nọ biọ gbigbọ Jehovah tọn. Mí dona vẹ̀ ẹ nado gọalọna mí nado mọaleyi to gigọ́ mẹ sọn nuhe plọn mí te mẹ podọ nado nọ pọ́n míde hlan dile ewọ nọ mọ mí do.

²⁰ Mì gbọ mímẹpo ni taidi omẹ Jiwheyẹwhe tọn lọ he salmu-kantọ basi zẹẹmẹ etọn dọmọ: “Osẹ́n Jehovah tọn mẹ wẹ e nọ mọ awuvivi te, bo nọ yí ogbè dẹẹdẹ do to osẹ́n Etọn hia to okle po ozán po. . . . Podọ nudepope he ewọ wà na nọ tindo kọdetọn dagbe.”—Salm. 1:2, 3.