HOSỌ OPLỌN TỌN 19
Owanyi po Whẹdida Dodo po to Whenue Mí Pehẹ Kanyinylan
“Hiẹ ma yin Jiwheyẹwhe de he nọ mọ awuvivi to kanyinylan mẹ; mẹylankan de ma sọgan gbọṣi dè we.”—SALM. 5:4.
OHÀN 142 Mí Ni Hẹn Todido Mítọn Go Gligli
BLADOPỌ *
1-3. (a) Sọgbe hẹ Salmu lẹ 5:4-6, numọtolanmẹ tẹwẹ Jehovah nọ tindo gando kanyinylan go? (b) Naegbọn mí sọgan dọ dọ danuwiwa do yọpọvu lẹ go jẹagọdo “osẹ́n Klisti tọn”?
JEHOVAH JIWHEYẸWHE gbẹwanna kanyinylan wunmẹ lẹpo. (Hia Salmu lẹ 5:4-6.) Lehe ewọ nọ gbẹwanna ovivu zinzanhẹ do sọ, yèdọ nuyiwa he hiọawu taun de! Taidi Jehovah, míwu Kunnudetọ etọn lẹ nọ gbẹwanna danuwiwa do ovivu lẹ go bo ma nọ kẹalọyi i to aliho depope mẹ to agun Klistiani tọn mẹ.—Lom. 12:9; Heb. 12:15, 16.
2 Danuwiwa do ovivu lẹ go wunmẹ lẹpo wẹ jẹagọdo “osẹ́n Klisti tọn”! (Gal. 6:2) Naegbọn mí sọgan dọ mọ? Dile mí ko mọ do to hosọ he wayi mẹ, osẹ́n Klisti tọn, yèdọ nuhe Jesu plọnmẹ to ohó po apajlẹ etọn po mẹ lẹpo wẹ sinai do owanyi ji bo nọ ze whẹdida dodo daga. Na osẹ́n ehe wẹ nọ deanana Klistiani nugbo lẹ wutu, aliho he mẹ yé nọ yinuwa hẹ ovivu lẹ te nọ zọ́n bọ ovi lọ lẹ nọ tindo numọtolanmẹ hihọ́ tọn, bosọ nọ mọdọ yé yiwanna emi nugbonugbo. Ṣigba, ovivu zinzanhẹ yin nuyiwa ṣejannabi po mawadodo po tọn de he nọ hẹn ovi de nado mọdọ emi ma to hihọ́ glọ bọ yè sọ gbẹwanna emi.
3 E blawu dọ ovivu zinzanhẹ yin aṣa ylankan de he gbayipe lẹdo aihọn pé, podọ Klistiani nugbo lẹ lọsu ma vò sọn nuyiwadomẹji etọn si. Etẹwutu? Na “mẹylankan lẹ po mẹblutọ lẹ po” sù taun, podọ delẹ tlẹ sọgan tẹnpọn nado lìn biọ agun mẹ. (2 Tim. 3:13) Humọ, mẹdelẹ he nọ dọ dọ emi tin to agun lọ mẹ ko joawuna ojlo agbasalan tọn gblezọn lẹ bo zanhẹ ovivu lẹ. Mì gbọ mí ni gbadopọnna nuhewutu ovivu zinzanhẹ do yin ylando sinsinyẹn sọmọ. Enẹgodo, mí na dọhodo lehe mẹho agun tọn lẹ nọ penukundo whẹho ylanwiwa sinsinyẹn tọn lẹ, taidi danuwiwa do yọpọvu lẹ go do ji, podọ lehe mẹjitọ lẹ sọgan basi hihọ́na ovivu yetọn lẹ do. *
YLANDO SINSINYẸN DE
4, 5. Naegbọn danuwiwa do yọpọvu de go do yin ylando de sọta ovi lọ?
4 Nuhe mẹ danuwiwa do ovivu lẹ go nọ dekọtọn do lẹ sù taun. E nọ yinuwado mẹhe jiya etọn lẹ po mẹhe yiwanna yé lẹ po ji, yèdọ hagbẹ whẹndo tọn yetọn lẹ, gọna mẹmẹsunnu po mẹmẹyọnnu yetọn lẹ po. Ylando sinsinyẹn wẹ danuwiwa do yọpọvu lẹ go yin.
5 Ylando de sọta mẹhe jiya danuwadomẹgo lọ tọn. * Ylando wẹ e yin nado hẹn awufiẹsa po yajiji he ylan taun po wá mẹdevo lẹ ji. Dile mí na mọ do to hosọ he bọdego mẹ, nuhe mẹhe wadanu do yọpọvu de go nọ wà niyẹn—e nọ gbleawuna ovi lọ to aliho he ylan taun lẹ mẹ. Ovi lọ nọ dejidego bọ e wá tafu i, ehe zọ́n bọ ovi lọ masọ nọ tindo numọtolanmẹ hihọ́ tọn ba. Yọpọvu lẹ dona yin hihọ́-basina sọta nuyiwa ylankan enẹ, podọ mẹhe ko jiya onú mọnkọ de tọn lẹ do hudo homẹmimiọn po alọgọ po tọn.—1 Tẹs. 5:14.
6, 7. Naegbọn danuwiwa do yọpọvu lẹ go do yin ylando de sọta agun lọ, podọ sọta aṣẹpatọ lẹ?
6 Ylando de sọta agun lọ. Whenue mẹhe to agun lọ mẹ de hùwhẹ danuwiwa do yọpọvu go tọn, ewọ kọnmasin do agun lọ go. (Mat. 5:16; 1 Pita 2:12) E ma na sọgbe paali nado lẹndọ agun lọ nọ kẹalọyi danuwiwa do yọpọvu lẹ go, na Klistiani nugbonọ livi susu wẹ to ‘avùn sinsinyẹn hò na yise lọ’! (Juda 3) Mí ma nọ kẹalọyi mẹhe nọ wà nuylankan bo ma lẹnvọjọ, bosọ nọ kọnmasin do yinkọ dagbe agun lọ tọn go lẹ to ṣẹnṣẹn mítọn.
7 Ylando de sọta aṣẹpatọ lẹ. Klistiani lẹ dona nọ “yin mẹmẹglọ na aṣẹpipa daho lẹ.” (Lom. 13:1) Mí nọ do taliai mítọn hia gbọn sisi he jẹ nina osẹ́n otò tọn lẹ dali. Eyin mẹde to agun lọ mẹ gbà osẹ́n otò tọn de, vlavo gbọn zinzanhẹ ovivu de dali, ewọ waylando sọta aṣẹpatọ lẹ. (Yijlẹdo Owalọ lẹ 25:8 go.) Dile etlẹ yindọ mẹho lẹ ma tindo jlọjẹ nado tẹkudeji dọ osẹ́n otò tọn ni yin hihodo, yé ma nọ ṣinyọ́nalọ mẹhe wadanu do yọpọvu go de ji ma nado jiya kọdetọn ylando etọn lẹ tọn. (Lom. 13:4) Mẹhe waylando lọ nọ gbẹ̀n nuhe e do.—Gal. 6:7.
8. Nukun tẹwẹ Jehovah nọ yí do pọ́n ylando he yin wiwà sọta gbẹtọvi lẹ?
8 Hú popolẹpo, ylando de wẹ e yin sọta Jiwheyẹwhe. (Salm. 51:4) Eyin gbẹtọ de waylando sọta gbẹtọ hatọ etọn, e sọ waylando sọta Jehovah ga. Lẹnnupọndo apajlẹ de ji to Osẹ́n he Jiwheyẹwhe na Islaeli mẹ. Osẹ́n lọ dọ dọ sunnu he jẹajo do kọmẹnu etọn kavi hò e dù yinuwa “po nugbonọ-mayin po hlan Jehovah.” (Lev. 6:2-4) Enẹwutu, e họnwun dọ to whenue mẹde wadanu do ovivu de go to agun lọ mẹ, bo fìn numọtolanmẹ hihọ́ tọn ovi lọ tọn, ewọ yinuwa po nugbonọ-mayin po hlan Jiwheyẹwhe. Danuwatọ lọ hẹn vlẹko daho wá yinkọ Jehovah tọn ji. Enẹwutu, ovivu zinzanhẹ dona yin whẹgbledo na eyin ylando sinsinyẹn sọta Jiwheyẹwhe wutu.
9. Nudọnamẹ sinai do Owe-wiwe ji tẹlẹ wẹ titobasinanu Jehovah tọn ko wleawuna to owhe lẹ gblamẹ gando ovivu zinzanhẹ go, podọ etẹwutu?
9 To owhe lẹ gblamẹ, titobasinanu Jehovah tọn ko na nudọnamẹ sinai do Owe-wiwe ji susu lẹ do whẹho danuwiwa do yọpọvu lẹ go tọn ji. Di apajlẹ, hosọ voovo lẹ to Atọ̀họ̀-Nuhihọ́ lọ tọn po Fọ́n! po mẹ ko dọhodo lehe mẹhe yin zinzanhẹ gánnugánnu lẹ sọgan duto awugble yetọn to numọtolanmẹ-liho ji do, lehe mẹdevo lẹ sọgan gọalọna yé bo na tuli yé do, gọna lehe mẹjitọ lẹ sọgan basi hihọ́na ovivu yetọn lẹ do ji. Mẹho lẹ ko mọ azọ́nplọnmẹ sinai do Owe-wiwe ji gigọ́ lẹ yí nado yọ́n lehe yé sọgan penukundo whẹho danuwiwa do yọpọvu lẹ go tọn lẹ go do. Titobasinanu lọ zindonukọn nado to vọjlado basi na aliho he mẹ agun lẹ nọ penukundo ylando danuwiwa do yọpọvu lẹ go tọn go te. Etẹwutu? Nado hẹn ẹn diun dọ aliho he mẹ mí nọ penukundo whẹho lọ go te sọgbe hẹ osẹ́n Klisti tọn.
NUKUNPIPEDO WHẸHO YLANWIWA SINSINYẸN TỌN LẸ GO
10-12. (a) To whenue mẹho lẹ to nukunpedo whẹho ylanwiwa sinsinyẹn tọn de go, etẹwẹ yé nọ hẹn do ayiha mẹ, podọ etẹlẹ wẹ nọ duahunmẹna yé? (b) Sọgbe hẹ Jakọbu 5:14, 15, etẹwẹ mẹho lẹ nọ dovivẹnu nado wà?
10 To whenue mẹho lẹ to nukunpedo whẹho ylanwiwa sinsinyẹn tọn depope go, yé nọ hẹn do ayiha mẹ dọ osẹ́n Klisti tọn biọ dọ emi ni yinuwa hẹ lẹngbọpa lọ po owanyi po, bo wà nuhe jlọ bosọ sọgbe to nukun Jiwheyẹwhe tọn mẹ. Enẹwutu, nudelẹ nọ duahunmẹna yé eyin yé sè dọ ylando sinsinyẹn de yin wiwà. Nuhe nọ duahunmẹna mẹho lẹ hugan wẹ nado gbògbéna Jehovah bo basi hihọ́na oyín wiwe etọn. (Lev. 22:31, 32; Mat. 6:9) Nudevo he sọ nọ duahunmẹna yé sisosiso wẹ dagbemẹninọ mẹmẹsunnu po mẹmẹyọnnu yetọn lẹ po tọn to agun lọ mẹ, podọ yé nọ jlo na gọalọna mẹdepope he ylanwiwa lọ hẹn awugble wá na.
11 Humọ, eyin ylanwatọ lọ tin to agun mẹ, nuhe nọ duahunmẹna mẹho lẹ wẹ nado tẹnpọn bo gọalọna ẹn nado jla haṣinṣan etọn do hẹ Jehovah eyin e yọnbasi. (Hia Jakọbu 5:14, 15.) Klistiani he joawuna ojlo ylankan bo waylando sinsinyẹn de, to azọ̀njẹ to gbigbọ-liho. Ehe zẹẹmẹdo dọ ewọ masọ tindo haṣinṣan dagbe de hẹ Jehovah ba. * To aliho de mẹ, mẹho lẹ taidi doto gbigbọmẹ tọn lẹ. Yé nọ dovivẹnu nado hẹn “mẹhe to azọ̀njẹ [to whẹho ehe mẹ, ylanwatọ lọ] jẹgangan.” Ayinamẹ sinai do Owe-wiwe ji yetọn lẹ sọgan gọalọna ẹn nado vọ́ haṣinṣan etọn jlado hẹ Jiwheyẹwhe, ṣigba ehe na yọnbasi kiki eyin ewọ lẹnvọjọ nugbonugbo.—Owalọ 3:19; 2 Kọl. 2:5-10.
12 E họnwun dọ azọngban sinsinyẹn de wẹ mẹho lẹ tindo. Yé nọ hò lẹngbọpa he Jiwheyẹwhe zedo alọmẹ na yé lọ tọn pọ́n sisosiso. (1 Pita 5:1-3) Yé nọ jlo dọ mẹmẹsunnu po mẹmẹyọnnu yetọn lẹ po ni mọdọ emi tin to hihọ́ glọ to agun mẹ. Enẹwutu, yé nọ yawu yinuwa, eyin yé sè linlin ylanwiwa sinsinyẹn de tọn, taidi danuwiwa do yọpọvu de go. Lẹnnupọndo kanbiọ he sọawuhia to bẹjẹeji hukan 13, 15 po 17 po tọn lẹ ji.
13, 14. Be mẹho lẹ nọ setonuna osẹ́n otò tọn he biọ dọ whẹsadokọnamẹ danuwiwa do yọpọvu lẹ go tọn ni yin didọna aṣẹpatọ lẹ ya? Basi zẹẹmẹ.
13 Be mẹho lẹ nọ setonuna osẹ́n otò tọn lẹ he biọ dọ whẹsadokọnamẹ danuwiwa do yọpọvu lẹ go tọn ni yin didọna aṣẹpatọ lẹ ya? Mọwẹ. To fihe osẹ́n mọnkọtọn lẹ tin te, mẹho lẹ nọ dovivẹnu nado yinuwa to kọndopọ mẹ hẹ osẹ́n, bo nọ yì dọ whẹsadokọnamẹ danuwiwa tọn lẹ na aṣẹpatọ lẹ. (Lom. 13:1) Osẹ́n mọnkọtọn lẹ ma jẹagọdo osẹ́n Jiwheyẹwhe tọn. (Owalọ 5:28, 29) Enẹwutu, tlolo he yé sè whẹsadokọnamẹ de, mẹho lẹ nọ dín anademẹ nado yọ́n lehe yé sọgan setonuna osẹ́n bo hẹn whẹsadokọnamẹ lọ yì aṣẹpatọ lẹ dè do.
14 Mẹho lẹ nọ hẹn mẹhe jiya danuwadomẹgo tọn lọ po mẹjitọ etọn lẹ po gọna mẹdevo he mọdona whẹho lọ lẹ deji dọ yé vò nado yì jẹwhẹ na aṣẹpatọ lẹ. Ṣigba, etẹwẹ lo eyin whẹsadokọnamẹ lọ gando mẹhe tin to agun mẹ de go, bọ mẹsusu ko sèhó gandego to lẹdo lọ mẹ? Be Klistiani he jẹwhẹ lọ dona lẹndọ emi ko hẹn vlẹko wá oyín Jiwheyẹwhe tọn ji wẹ ya? Lala. Ylanwatọ lọ wẹ kọnmasin do yinkọ Jiwheyẹwhe tọn go.
15, 16. (a) Sọgbe hẹ 1 Timoti 5:19, naegbọn e whè gbau kunnudetọ awe dona tin whẹpo mẹho lẹ nido ze afọdide whẹdida tọn? (b) Etẹwẹ mẹho lẹ nọ wà eyin yé sè dọ mẹde hùwhẹ danuwiwa do ovivu go tọn to agun lọ mẹ?
15 To agun mẹ, whẹpo afọdide whẹdida tọn nido yin zize, naegbọn e nọ biọ e whè gbau kunnudetọ awe? Nubiọtomẹsi ehe yin apadewhe nujinọtedo yiaga whẹdida dodo tọn he to Biblu mẹ lẹ tọn. Eyin ylanwatọ lọ lọsu ma wá yigbe nuṣiwa lọ tọn, e nọ biọ kunnudetọ awe na whẹsadokọnamẹ de nido yin alọkẹyi bo na dotẹnmẹ mẹho lẹ nado ze afọdide whẹdida tọn. (Deut. 19:15; Mat. 18:16; hia 1 Timoti 5:19.) Be ehe zẹẹmẹdo dọ kunnudetọ awe dona tin whẹpo whẹho ovivu zinzanhẹ tọn de nido yin didọna aṣẹpatọ lẹ wẹ ya? Lala. Nubiọtomẹsi ehe ma sọgan yin yiyizan nado de eyin vlavo mẹho lẹ kavi mẹdevo lẹ na jẹwhẹ sẹ́nhẹngba de tọn.
16 Eyin mẹho lẹ sè dọ mẹde hùwhẹ danuwiwa do ovivu go tọn to agun lọ mẹ, yé nọ dovivẹnu nado setonuna osẹ́n otò tọn depope he biọ dọ yè ni jẹwhẹ na aṣẹpatọ lẹ, podọ yé nọ dindona whẹho lọ sọgbe hẹ Owe-wiwe lẹ. Eyin mẹlọ gbẹ́ owhẹ̀ he yin sisadokọna ẹn lọ, mẹho lẹ nọ lẹnnupọndo kunnudide kunnudetọ lẹ tọn ji. Wedegbẹ́ whẹdida tọn de na yin didoai eyin e whè gbau omẹ awe dohia dọ whẹsadokọnamẹ lọ yin nugbo, yèdọ mẹhe wá jẹwhẹ lọ gọna mẹdevo he sọgan na kunnudenu danuwiwa do ovivu go ehe tọn kavi devo lẹ tọn sọta ylanwatọ lọ. * Eyin kunnudetọ awetọ de ma tin, ehe ma dohia dọ mẹhe hẹn whẹsadokọnamẹ lọ wá yin lalonọ. Eyin kunnudetọ awe ma tlẹ tin gando whẹsadokọnamẹ de go, mẹho lẹ nọ mọnukunnujẹemẹ dọ ylando sinsinyẹn de sọgan ko yin wiwà, he gbleawuna mẹdevo lẹ sinsinyẹn. Mẹho lẹ nọ zindonukọn nado to alọgọna mẹdepope he sọgan ko yin awugblena. Humọ, yé nọ tin to aṣeji gando mẹhe yin whẹsadokọna lọ go nado sọgan basi hihọ́na agun lọ, na onú mọnkọtọn devo nikaa jọ.—Owalọ 20:28.
17, 18. Basi zẹẹmẹ azọngban wedegbẹ́ whẹdida tọn de tọn.
17 Etẹwẹ yin azọngban wedegbẹ́ whẹdida tọn? Hogbe lọ “whẹdida” ma zẹẹmẹdo dọ mẹho lẹ nọ dawhẹ kavi nọ magbe eyin vlavo aṣẹpatọ lẹ dona sayana ylanwatọ lọ na e gbàsẹ́n wutu gba. Mẹho lẹ ma nọ dádo whẹho osẹ́n otò tọn lẹ tọn mẹ; yé nọ jo whẹho sẹ́nhẹngba tọn lẹ do alọmẹ na aṣẹpatọ lẹ. (Lom. 13:2-4; Titu 3:1) Kakatimọ, mẹho lẹ nọ dawhẹ kavi magbe eyin mẹde gbẹ́ sọgan gbọṣi agun lọ mẹ.
18 Whenue mẹho lẹ tin to wedegbẹ́ whẹdida tọn de mẹ, azọngban gbigbọmẹ tọn kavi sinsẹ̀n tọn wẹ yé nọ hẹndi. Owe-wiwe lẹ nọ deanana yé nado magbe eyin mẹhe wadanu do ovivu go lọ lẹnvọjọ kavi lala. Eyin e ma do lẹnvọjọ hia, e nọ yin didesẹ, podọ ehe nọ yin lilá na agun lọ. (1 Kọl. 5:11-13) Eyin e lẹnvọjọ, e sọgan gbọṣi agun mẹ. Ṣigba, mẹho lẹ na dọna ẹn dọ ewọ sọgan nọma pegan gbede na lẹblanulọkẹyi kavi otẹn azọngban tọn depope to agun mẹ. Na mẹho lẹ nọ hò dagbemẹninọ ovivu lẹ tọn pọ́n wutu, yé sọgan na avase mẹjitọ he tindo ovivu lẹ to nuglọ nado payi nuyiwa ylanwatọ lọ tọn hẹ ovivu yetọn lẹ go. To whenue mẹho lẹ to afọdide hihọ́-basinamẹ tọn enẹlẹ ze, yé nọ tin to aṣeji ma nado de whẹho aṣli tọn lẹ gbà gando mẹhe jiya ylanwiwa lọ tọn lẹ go.
LEHE MÌ SỌGAN BASI HIHỌ́NA OVIVU MÌTỌN LẸ DO
Mẹjitọ lẹ nọ basi hihọ́na ovivu yetọn lẹ sọta mẹhe sọgan zanhẹ yé lẹ gbọn nudọnamẹ he sọgbe gando zanhẹmẹ go lẹ mimá hẹ yé dali. Nado wàmọ, mẹjitọ lẹ nọ yí nudọnamẹ he titobasinanu Jiwheyẹwhe tọn ko wleawuna lẹ zan. (Pọ́n hukan 19-22tọ)
19-22. Etẹwẹ mẹjitọ lẹ sọgan wà nado basi hihọ́na ovi yetọn lẹ? (Pọ́n yẹdide he to wepa ji.)
19 Mẹnu wẹ tindo azọngban lọ nado basi hihọ́na ovivu lẹ ma nado yin awugblena? Mẹjitọ lẹ wẹ. * Nunina wiwe de wẹ ovi mìtọn lẹ yin, yèdọ ‘ogú de sọn Jehovah dè.’ (Salm. 127:3) Azọngban mìtọn wẹ nado basi hihọ́na nuhe yin zizedo alọmẹ na mì enẹ. Etẹwẹ mì sọgan wà nado basi hihọ́na ovi mìtọn lẹ sọn danuwatọ mọnkọtọn lẹ si?
20 Tintan, mì tẹnpọn nado yọ́n nususu do whẹho danuwiwa do ovivu lẹ go tọn ji. Mì nọ basi dodinnanu gando gbẹtọ wunmẹ he nọ wadanu do ovivu lẹ go po wlẹnwin he yé nọ zan nado doyẹklọ ovi lẹ po go. Mì tin to aṣeji gando ninọmẹ he sọgan hẹn owù wá lẹ go. (Howh. 22:3; 24:3) Mì flindọ, to suhugan whẹho lẹ tọn mẹ, danuwatọ lọ nọ yin mẹhe ovi lọ yọnẹn bo nọ dejidego de.
21 Awetọ, mì tindo aṣa lọ nado nọ dọho ganji hẹ ovi mìtọn lẹ. (Deut. 6:6, 7) Ehe na biọ dọ mì ni nọ dotoaina yé ganji. (Jak. 1:19) Mì flindọ, ovivu lẹ nọ saba whleawu nado jẹwhẹ danú he yin wiwà do yé go de tọn. Yé sọgan lẹndọ mẹde ma na yí emi sè, kavi danuwatọ lọ sọgan ko vannukundo yé nado hẹn whẹho lọ taidi aṣli. Eyin mì doayi e go dọ nude to jijọ, mì yí homẹdagbe do kàn kanbiọ lẹ sè, podọ to enẹgodo mì yí homẹfa do dotoaina gblọndo yetọn lẹ.
22 Atọ̀ntọ, mì nọ plọn ovi mìtọn lẹ. Mì nọ plọnnu yé gando zanhẹmẹ go sọgbe hẹ owhe yetọn. Mì plọn yé nuhe yé sọgan dọ kavi wà eyin mẹde tẹnpọn nado doalọ yé go to aliho he ma sọgbe de mẹ. Mì nọ yí nudọnamẹ he titobasinanu Jiwheyẹwhe tọn ko wleawuna gando lehe mì na nọ basi hihọ́na ovi mìtọn lẹ do go lẹ zan.—Pọ́n apotin lọ “ Plọn Dewe po Ovi Towe lẹ Po.”
23. Nukun tẹwẹ mí nọ yí do pọ́n whẹho ovivu zinzanhẹ tọn, podọ kanbiọ tẹwẹ na mọ gblọndo to hosọ he bọdego mẹ?
23 Taidi Kunnudetọ Jehovah tọn lẹ, mí nọ pọ́n ovivu zinzanhẹ hlan taidi ylando sinsinyẹn de, podọ nuyiwa kanyinylan tọn de. Na osẹ́n Klisti tọn wẹ nọ deanana agun mítọn lẹ wutu, mí ma nọ ṣinyọ́nalọ mẹhe wadanu do ovivu lẹ go lẹ ji ma nado jiya kọdetọn ylando yetọn lẹ tọn. Ṣigba, etẹwẹ mí sọgan wà nado gọalọna mẹhe ko jiya danuwadomẹgo tọn lẹ? Hosọ he bọdego na na gblọndo kanbiọ enẹ tọn.
OHÀN 103 Lẹngbọhọtọ lẹ—Sunnu lẹ Di Nunina
^ huk. 5 To hosọ ehe mẹ, mí na gbadopọnna lehe mí sọgan basi hihọ́na ovi mítọn lẹ sọn mẹhe nọ zanhẹ ovivu lẹ si do. Mí na plọn lehe mẹho lẹ nọ jẹtukla do agun lọ tamẹ do, gọna lehe mẹjitọ lẹ sọgan basi hihọ́na ovivu yetọn lẹ do.
^ huk. 3 ZẸẸMẸ HOGBE LẸ TỌN: Eyin mẹhe ko whẹ́n mẹho de yí yọpọvu de zan nado hẹn pekọ wá na ojlo zanhẹmẹ tọn edetiti tọn lẹ, e zanhẹ ovivu niyẹn. Ovivu zinzanhẹ bẹ kọndopọ zanhẹmẹ tọn, zanhẹmẹ nùmẹ tọn kavi yonu tọn, alọsisado vijinu, anọ́ kavi gogo ovi lọ tọn go hẹn; kavi nuyiwa gblezọn devo lẹ. Nugbo wẹ dọ viyọnnu lẹ wẹ nọ jiya etọn hugan, amọ́ visunnu susu lẹ ko jiya etọn ga. Dile etlẹ yindọ suhugan mẹhe nọ zanhẹ ovivu lẹ tọn nọ yin sunnu, yọnnu delẹ nọ zanhẹ ovivu lẹ ga.
^ huk. 5 ZẸẸMẸ HOGBE LẸ TỌN: To hosọ ehe po dehe bọdego po mẹ, mí yí hogbe lọ “mẹhe jiya” zan nado dlẹnalọdo mẹde he yin zinzanhẹ to ovu whenu. Mí yí hogbe ehe zan nado hẹn ẹn họnwun dọ ovivu lọ yin awugblena, dọ yè tafu i podọ ewọ yin homẹvọnọ.
^ huk. 11 Na nugbo tọn, azọ̀njijẹ to gbigbọ-liho ma nọ suwhẹna ylanwiwa sinsinyẹn. Ylanwatọ lọ wẹ dona yin whẹgbledo na nudide po nuyiwa ylankan etọn lẹ po, podọ ewọ na dogbè na Jehovah.—Lom. 14:12.
^ huk. 16 To whenue mẹho lẹ to hodọ hẹ mẹhe yin whẹsadokọna de, yé ma na biọ to ovivu de si gbede nado tin to otẹn lọ mẹ, na ehe sọgan gbleawuna ovi lọ dogọ to numọtolanmẹ-liho. Mẹjitọ kavi mẹhe go ovi lọ dejido de sọgan dọhona mẹho lẹ gando whẹsadokọnamẹ lọ go.
^ huk. 19 Nuhe yin didọ gando mẹjitọ lẹ go sọ gando mẹhe osẹ́n nagbè nado hẹn ovi lẹ kavi mẹdevo he to mẹjitọ tẹnmẹ na ovivu lẹ go ga.
