1. Sọgbe hẹ Matiu 24:9, naegbọn e ma dona paṣa mí eyin aihọn gbẹwanna mí?

JEHOVAH dá mí nado yiwannamẹ, podọ na yè nido yiwanna mí. Enẹwutu, eyin mẹde gbẹwanna mí, e nọ gbleawuna mí taun bo tlẹ gán sọ dobuna mí. Di apajlẹ, mẹmẹyọnnu de he nọ yin Georgina bo nọ nọ̀ Europe dọ dọ: “Whenue n’do owhe 14, iya ṣie gbẹwanna mi na n’to Jehovah sẹ̀n wutu. N’do numọtolanmẹ dọ yè gbẹ́ mi dai bosọ jẹ ayihaawe do ji eyin gbẹtọ dagbe ján n’yin.” * Mẹmẹsunnu de he nọ yin Danylo dọ dọ: “Whenue ponọ lẹ linú mi, zùn mi bo vannukundo mi na Kunnudetọ Jehovah tọn he n’yin wutu, n’dibu bosọ mọdọ yé de mi pò.” Wangbẹnamẹ mọnkọ lẹ nọ gbleawunamẹ taun, amọ́ e ma nọ paṣa mí. Jesu ko dọ dọdai dọ gbẹtọ lẹ na gbẹwanna mí.—Hia Matiu 24:9.

2, 3. Naegbọn gbẹtọ lẹ do nọ gbẹwanna hodotọ Jesu tọn lẹ?

² Aihọn nọ gbẹwanna hodotọ Jesu tọn lẹ. Etẹwutu? Na taidi Jesu, mí “ma yin apadewhe aihọn lọ tọn” wutu. (Joh. 15:17-19) Enẹwutu, dile etlẹ yindọ mí nọ na sisi gandudu gbẹtọvi tọn lẹ, mí nọ gbẹ́ nado doalọ to tonudidọ mẹ, dọnudo asia, kavi ji asia-hàn. Jehovah kẹdẹ wẹ mí nọ sẹ̀n. Mí nọ nọgodona jlọjẹ Jiwheyẹwhe tọn nado dugán do gbẹtọvi lẹ ji, yèdọ jlọjẹ lọ he Satani po “kúnkan” etọn po jẹagọdo sinsinyẹn. (Jen. 3:1-5, 15) Mí nọ dọyẹwheho dọ Ahọluduta Jiwheyẹwhe tọn wẹ yin todido dopo gee lọ na gbẹtọvi lẹ, podọ dọ to madẹnmẹ, Ahọluduta enẹ na sukúndona mẹhe nọ diọnukunsọ ẹ lẹpo. (Dan. 2:44; Osọ. 19:19-21) Wẹndagbe de wẹ ehe yin na homẹmimiọnnọ lẹ, amọ́  na mẹylankan lẹ, owẹ̀n ylankan wẹ.—Salm. 37:10, 11.

³ Gbẹtọ lẹ sọ nọ gbẹwanna mí, na mí nọ nọgbẹ̀ sọgbe hẹ nujinọtedo dodo Jiwheyẹwhe tọn lẹ wutu. Nujinọtedo ehelẹ gbọnvo mlẹnmlẹn na walọ aihọn tọn he hiọawu lẹ. Di apajlẹ, mẹsusu to egbehe wẹ nọ kẹalọyi tlọlọ dọ nude ma ylan to e mẹ nado doalọ to walọyizan gblezọn he wutu Jiwheyẹwhe do và Sodọmi po Gomọla po sudo lẹ mẹ! (Juda 7) Na mí nọ setonuna nujinọtedo Biblu tọn he gando walọyizan enẹlẹ go wutu, mẹsusu nọ ṣàn mí kò bo nọ ylọ mí dọ hẹngogonọ!—1 Pita 4:3, 4.

4. Jẹhẹnu tẹlẹ wẹ nọ na mí huhlọn whenue gbẹtọ lẹ gbẹwanna mí?

⁴ Etẹwẹ gán gọalọna mí nado doakọnnanu to whenue mẹlẹ gbẹwanna mí bosọ zùn mí? Mí dona do yise dolido dọ Jehovah na gọalọna mí. Taidi awọ̀yinu de, yise mítọn gán “ṣimiyọ́n ogá miyọ́nnọ mẹylankan lọ tọn lẹpo.” (Efe. 6:16) Amọ́, yise kẹdẹ ma ko pé. Mí sọ do hudo owanyi tọn ga. Etẹwutu? Na owanyi “ma nọ gblehomẹ aplà.” E nọ ṣinyọnnudo awugblenamẹnu lẹpo bosọ nọ doakọnna yé. (1 Kọl. 13:4-7, 13) Todin, mì gbọ mí ni pọ́n lehe owanyi na Jehovah, na sinsẹ̀n-basitọ hatọ lẹ, podọ etlẹ yin na kẹntọ mítọn lẹ nọ gọalọna mí nado doakọnna wangbẹna do.

5. Nawẹ owanyi he Jesu do na Otọ́ etọn na ẹn huhlọn gbọn?

⁵ To ozán he jẹnukọnna whenue kẹntọ Jesu tọn lẹ hù i mẹ, e dọna hodotọ nugbonọ etọn lẹ dọmọ: “Yẹn yiwanna Otọ́, [enẹwutu] dile Otọ́ ko degbena mi do, mọkẹdẹ wẹ yẹn to wiwà do.” (Joh. 14:31) Owanyi he Jesu do na Jehovah na ẹn huhlọn nado pehẹ whlepọn he to nukọnna ẹn lẹ. Owanyi mítọn na Jehovah gán wà nudopolọ na mílọsu.

6. Sọgbe hẹ Lomunu lẹ 5:3-5, etẹwẹ nọ yin numọtolanmẹ devizọnwatọ Jehovah tọn lẹ tọn gando akọndidona wangbẹna aihọn tọn go?

⁶ Owanyi na Jehovah wẹ nọ gọalọna devizọnwatọ etọn lẹ to whelẹponu nado doakọnna homẹkẹn. Di apajlẹ, whenue whẹdatẹn daho huhlọnnọ Ju lẹ tọn degbena apọsteli lẹ nado doalọtena yẹwhehodidọ, owanyi na Jiwheyẹwhe wẹ whàn yé nado “setonuna Jiwheyẹwhe taidi ogán kakati nido yin gbẹtọ lẹ.” (Owalọ 5:29; 1 Joh. 5:3) Owanyi mawhango mọnkọ sọ nọ na huhlọn mẹmẹsunnu mítọn lẹ to egbehe, bọ susu yetọn nọ nọtegli to gandudu huhlọnnọ podọ kanylantọ lẹ nukọn. Kakati nado gbọjọ, lẹblanulọkẹyi de wẹ e nọ yin na mí nado doakọnna wangbẹna aihọn tọn.—Owalọ 5:41; hia Lomunu lẹ 5:3-5.

7. Nawẹ mí dona yinuwa do whenue hagbẹ whẹndo tọn lẹ diọnukunsọ mí?

⁷ Vlavo dopo to whlepọn he sinyẹn hugan he mí nọ pehẹ lẹ mẹ wẹ dehe wá sọn hagbẹ whẹndo tọn mítọn lẹ dè. Whenue mí jẹ ojlo do na nugbo lọ ji, hagbẹ whẹndo tọn mítọn delẹ gán lẹndọ mí ko yin yẹdoklọ. Mẹdevo lẹ gán lẹndọ tadu wẹ mí hùn. (Yijlẹdo Malku 3:21 go.) Yé tlẹ gán diọnukunsọ mí sinsinyẹn. Nuyiwahẹmẹ agọ̀ ehe ma dona paṣa mí. Jesu dọ dọ: “Mẹhe tin to whédo mẹtọn titi mẹ lẹ wẹ na yin kẹntọ mẹtọn lẹ.” (Mat. 10:36) Na nugbo tọn, mahopọnna nukun he hẹnnumẹ mítọn lẹ nọ yí do pọ́n mí, mí nọ gbẹ́ nado yinuwa hẹ yé di kẹntọ. To vogbingbọn mẹ, dile owanyi mítọn na Jehovah to sinsinyẹn, mọ wẹ owanyi mítọn na gbẹtọ lẹ lọsu nọ to sinsinyẹn dogọ do niyẹn. (Mat. 22:37-39) Amọ́, mí ma na gbẹ́ nujinọtedo mítọn lẹ dai gbede, bo dovọ́na osẹ́n po nunọwhinnusẹ́n Biblu tọn lẹ po, na mí jlo na hẹn homẹ mẹde tọn hùn poun wutu.

8, 9. Etẹwẹ gọalọna mẹmẹyọnnu de nado nọtegli mahopọnna nukundiọsọmẹ sinsinyẹn?

⁸ Georgina he go mí donù wayi penugo bo  nọtegli mahopọnna nukundiọsọmẹ sinsinyẹn iya etọn tọn. E dọmọ: “Yẹn po iya ṣie po wẹ jẹ Biblu plọn hẹ Kunnudetọ lẹ ji. Amọ́, osun ṣidopo godo, whenue n’jlo na yì opli lẹ, nuyiwa onọ̀ ṣie tọn diọ petepete. N’doayi e go dọ e nọ dogbẹ́ hẹ atẹṣitọ lẹ, podọ e nọ yí hogbe yetọn lẹ do dọhona mi. E sọ nọ zùn mi, dọ̀n oda ṣie lẹ po huhlọn po, bo nọ finyọ́n ovẹ́ na mi bosọ nọ bẹ owe ṣie lẹ dlan. Whenue n’do owhe 15, n’yí baptẹm. Na onọ̀ ṣie jlo dọ ma doalọtena Jehovah sinsẹ̀n wutu, e ze mi do owhé de gbè fie jọja yọnnu he gbẹ́-hẹn lẹ nọ yin didohlan, bọ delẹ to yé mẹ nọ nù amà bosọ nọ doalọ to sẹ́nhẹngba mẹ. Akọndidona homẹkẹn ma nọ yin jẹkẹ́, titengbe eyin e wá sọn mẹhe dona yiwanna we bosọ penukundo gowe de dè.”

⁹ Nawẹ Georgina doakọnna ninọmẹ lọ gbọn? E dọmọ: “Gbeegbe n’fó Biblu blebu hihia wẹ onọ̀ ṣie jẹ nukundiọsọ mi ji. Todin, n’kudeji mlẹnmlẹn dọ n’ko mọ nugbo lọ, bosọ dọnsẹpọ Jehovah pẹkipẹki. N’nọ saba hodẹ̀ hlan ẹn, podọ e nọ dotoaina mi. Whenue n’to owhé lọ gbè, mẹmẹyọnnu de bayi oylọna mi wá owhé etọn gbè, bọ mí plọn Biblu dopọ. To ojlẹ enẹ lẹpo mẹ, mẹmẹsunnu po mẹmẹyọnnu lẹ po nọ hẹn mi lodo to Plitẹnhọ Ahọluduta tọn mẹ. Yé nọ yinuwa hẹ mi di hagbẹ whẹndo tọn yetọn nkọ. N’mọ nugbonugbo dọ Jehovah dohuhlọn hú nukundiọsọmẹtọ mítọn lẹ, mahopọnna mẹdepope he yé yin.”

10. Jidide tẹwẹ mí gán do to Jehovah Jiwheyẹwhe mítọn mẹ?

¹⁰ Apọsteli Paulu wlan dọ, nudepope ma na penugo nado “klan mí sọn owanyi Jiwheyẹwhe tọn he tin to Klisti Jesu Oklunọ mítọn mẹ lọ go.” (Lom. 8:38, 39) Dile etlẹ yindọ mí gán jiya na ojlẹ de, Jehovah na to adà mítọn mẹ to whepoponu nado miọnhomẹna mí bo na mí huhlọn. Podọ, dile apajlẹ Georgina tọn dohia do, Jehovah sọ nọ yí whẹndo gbigbọmẹ tọn mítọn he họakuẹ lọ zan nado gọalọna mí.

11. Nawẹ owanyi he sin zẹẹmẹ Jesu bayi to Johanu 15:12, 13 mẹ gọalọna devi etọn lẹ gbọn? Na apajlẹ.

¹¹ To ozán he jẹnukọnna okú Jesu tọn mẹ, e flinnu devi etọn lẹ nado nọ yiwanna ode awetọ. (Hia Johanu 15:12, 13.) E yọnẹn dọ owanyi mẹde-yido-sanvọ́ tọn wẹ na gọalọna yé nado gbọṣi pọninọ mẹ bo doakọnna wangbẹna aihọn tọn. Lẹnnupọndo apajlẹ agun Tẹsalonika tọn ji. Sọn whenue agun enẹ yin didoai wẹ mẹhe to e mẹ lẹ yin homẹkẹndo. Etomọṣo,  mẹmẹsunnu gọna mẹmẹyọnnu he to finẹ lẹ lẹzun apajlẹ tenọgli po owanyi po tọn lẹ. (1 Tẹs. 1:3, 6, 7) Paulu dotuhomẹna yé nado zindonukọn bo to owanyi dohia, etlẹ yin “to gigọ́ mẹ dogọ.” (1 Tẹs. 4:9, 10) Owanyi na whàn yé nado nọ miọnhomẹna mẹhe jẹflumẹ lẹ, bo nọ gọalọna madogánnọ lẹ. (1 Tẹs. 5:14) Yé hodo anademẹ Paulu tọn lẹ, na to wekanhlanmẹ etọn awetọ mẹ, ehe e kàn nudi owhe dopo godo, Paulu dọna yé dọ: “Owanyi mẹdopodopo tọn podọ mìmẹpo tọn to jijideji hlan ode awetọ.” (2 Tẹs. 1:3-5) Owanyi gọalọna yé nado doakọnna ninọmẹ sinsinyẹn lẹ gọna homẹkẹn.

12. To ojlẹ awhàn tọn de whenu, nawẹ mẹmẹsunnu po mẹmẹyọnnu he to otò de mẹ lẹ po do owanyi hia ode awetọ gbọn?

¹² Lẹnnupọndo apajlẹ Danylo he go mí donù wayi po asi etọn po tọn ji. Whenue awhàn jẹ núgbà ji to tòdaho yetọn mẹ, yé zindonukọn nado nọ yì opli lẹ, dekunnu dile yé penugo do, podọ nado nọ má núdùdù he to yé si hẹ mẹmẹsunnu po mẹmẹyọnnu yetọn lẹ po. To gbèdopo, ponọ lẹ wá owhé Danylo tọn gbè po osò po. Danylo dọmọ: “Yé hẹn mi po huhlọn po dọ ma mọ́n yise ṣie. Whenue n’gbẹ́, yé hò mi bo ze osò do ji e bosọ desò lọ gbọn ota na mi. Whẹpo yé do yì, yé sin-adán dọ emi na lẹkọwa bo na wá zanhẹ asi e gánnugánnu. Amọ́, mẹmẹsunnu mítọn lẹ yawu do pinpán na mí yì tòdaho devo mẹ. N’ma gán wọn owanyi mẹmẹsunnu vivẹ́ enẹlẹ tọn gbede. Podọ, whenue mí jẹ tòdaho lọ mẹ, mẹmẹsunnu he to finẹ lẹ na mí núdùdù bo gọalọna mi nado mọ azọ́n po adọtẹn po! Taidi kọdetọn de, mí penugo bo mọ fibẹtado de na Kunnudetọ devo he họ̀n sọn lẹdo he mẹ awhàn to núgbà te lọ.” Apajlẹ mọnkọ lẹ dohia dọ owanyi Klistiani tọn gán gọalọna mí nado doakọnna wangbẹna.

13. Nawẹ gbigbọ wiwe nọ gọalọna mí nado doakọnnanu to sinsẹ̀nzọn Jehovah tọn mẹ gbọn, eyin gbẹtọ lẹ tlẹ gbẹwanna mí?

¹³ Jesu dọna hodotọ etọn lẹ nado nọ yiwanna kẹntọ yetọn lẹ. (Mat. 5:44, 45) Amọ́, be enẹ bọawu ya? Paali! Ṣigba, po alọgọ gbigbọ wiwe Jiwheyẹwhe tọn po, e gán pà mí. Sinsẹ́n gbigbọ Jiwheyẹwhe tọn nọ bẹ owanyi, homẹfa, homẹdagbe, walọmimiọn po mawazẹjlẹgo po hẹn. (Gal. 5:22, 23) Jẹhẹnu ehelẹ nọ gọalọna mí nado doakọnna wangbẹna. Nukundiọsọmẹtọ susu wẹ ko diọ jijọ na asu, asi, ovi kavi kọmẹnu yisenọ de ko do jẹhẹnu Jiwheyẹwhe  tọn enẹlẹ nkọ hia wutu. Susu yetọn tlẹ ko wá lẹzun mẹmẹsunnu po mẹmẹyọnnu vivẹ́ mítọn lẹ po. Enẹwutu, eyin a mọdọ e vẹawuna emi nado yiwanna mẹhe gbẹwanna we lẹ, na a to Jehovah sẹ̀n poun wutu, hodẹ̀ bo biọ gbigbọ wiwe. (Luku 11:13) Podọ, deji mlẹnmlẹn dọ aliho Jiwheyẹwhe tọn lẹ wẹ yọ́n hugan to whepoponu.—Howh. 3:5-7.

14, 15. Nawẹ Lomunu lẹ 12:17-21 gọalọna Yasmeen nado do owanyi hia asu etọn mahopọnna nukundiọsọmẹ sinsinyẹn etọn gbọn?

¹⁴ Lẹnnupọndo apajlẹ Yasmeen tọn ji. Whenue e lẹzun Kunnudetọ Jehovah tọn, asu etọn lẹndọ e ko yin yẹdoklọ, podọ e tẹnpọn nado glọnalina ẹn nado sẹ̀n Jiwheyẹwhe. E nọ zùn in bosọ nọ na tuli hẹnnumẹ lẹ, sinsẹ̀ngán po owọ́ntọ de po nado dobuna ẹn bo sawhẹdokọna ẹn dọ e to kinklan hẹnwa whẹndo etọn mẹ. Asu etọn tlẹ yì zùn mẹmẹsunnu lẹ po awhá po to opli agun tọn de whenu! Yasmeen gbọ bo nọ wá pò na avi, na yè nọ yinuwa hẹ ẹ to aliho he ma jọmẹ mẹ wutu.

¹⁵ To Plitẹnhọ Ahọluduta tọn mẹ, whẹndo gbigbọmẹ tọn Yasmeen tọn nọ miọnhomẹna ẹn bo nọ hẹn ẹn lodo. Mẹho lẹ na ẹn tuli nado yí nue Lomunu lẹ 12:17-21 dọ lẹ do yizan mẹ. (Hia.) Yasmeen dọ dọ: “E vẹawu taun. Amọ́, n’biọ alọgọ Jehovah tọn, podọ n’wà nue go n’pé lẹpo nado yí nue Biblu dọ lẹ do yizan mẹ. Enẹwutu, eyin asu ṣie yí homẹgble do kọ̀n dihónu lẹ do adòhọsa, n’nọ jla filọ do. Eyin e zùn mi, n’nọ gblọnna ẹn po ogbè fifá po. Podọ, eyin lanmẹ etọn gble, n’nọ penukundego.”

16, 17. Etẹwẹ a plọn sọn apajlẹ Yasmeen tọn mẹ?

¹⁶ Owanyi he Yasmeen dohia asu etọn ma yin to ovọ́ mẹ. E dọmọ: “Asu ṣie jẹ jidedo go e ji, na e yọnẹn dọ nugbo wẹ n’nọ dọ to whepoponu. Todin, eyin mí to hodọ gando sinsẹ̀n go, e nọ dotoaina mi po sisi po, podọ e yigbe nado yí adà etọn wà, na jijọho nido tin to whégbè. E sọ nọ na mi tuli nado yì opli agun tọn lẹ. Gbẹzan whẹndo tọn mítọn diọ taun, bọ jijọho tin to owhé mítọn gbè nugbonugbo. Todido ṣie wẹ yindọ asu ṣie ni kẹalọyi nugbo lọ bo wá sẹ̀n Jehovah hẹ mi.”

¹⁷ Apajlẹ Yasmeen tọn dohia dọ owanyi “nọ ṣinyọnnudo nulẹpo, . . . nọ do todido to nulẹpo mẹ, nọ doakọnna nulẹpo.” (1 Kọl. 13:4, 7) Wangbẹna gán dohuhlọn bo gbleawunamẹ, amọ́ owanyi sọ dohuhlọn hú i. E nọ yinuwado ahun lẹ ji sisosiso. Podọ, e nọ hẹn Jehovah jaya. Amọ́, eyin nukundiọsọmẹtọ lẹ tlẹ zindonukọn nado to wangbẹna mí, mí gán gbẹ́ nọ jaya. Gbọnna?

18. Naegbọn mí gán jaya whenue gbẹtọ lẹ gbẹwanna mí?

¹⁸ Jesu dọ dọ: “Ayajẹnọ wẹ mìwlẹ to whedepopenu he gbẹtọ lẹ gbẹwanna mì.” (Luku 6:22) Mí ma nọ jlo dọ yè ni gbẹwanna mí. Podọ, mí ma nọ tẹnpọn nado kú do sinsẹ̀n mítọn tamẹ. Enẹwutu, naegbọn mí gán jaya whenue gbẹtọ lẹ gbẹwanna mí? Lẹnnupọndo whẹwhinwhẹ́n atọ̀n ehelẹ ji. Tintan, eyin mí doakọnnanu, mí nọ mọ nukundagbe Jiwheyẹwhe tọn. (1 Pita 4:13, 14) Awetọ, yise mítọn nọ yin whiwhlepọn bo nọ lodo dogọ. (1 Pita 1:7) Podọ atọ̀ntọ, mí na mọ ahọsumẹ họakuẹ de—enẹ wẹ ogbẹ̀ madopodo.—Lom. 2:6, 7.

19. Naegbọn apọsteli lẹ do jaya to whenue yé ko yin hihò godo?

¹⁹ Ojlẹ vude to fọnsọnku Jesu tọn godo, apọsteli lẹ do numimọ ayajẹ he hó e dọ tọn. To whenue yè ko hò yé bosọ dosẹ́n na yé ma nado dọyẹwheho ba godo, yé jaya. Etẹwutu? “Na yé ko yin hihia jẹ nado yin winyando na oyín [Jesu] tọn wutu.” (Owalọ 5:40-42) Owanyi yetọn na Ogán yetọn sinyẹn hú obu kẹntọ lẹ tọn. Podọ, yé do owanyi yetọn hia gbọn wẹndagbe lọ lilá “mapote” dali. Susu mẹmẹsunnu mítọn lẹ tọn to egbehe wẹ zindonukọn bo to Jehovah sẹ̀n po nugbonọ-yinyin po mahopọnna nuhahun lẹ. Yé yọnẹn dọ Jehovah ma na wọn azọ́n po owanyi he yé dohia na oyín etọn po.—Heb. 6:10.

20. Etẹwẹ mí na gbadopọnna to hosọ he bọdego mẹ?

²⁰ Dile e na dẹnsọ bọ titonu ehe na pò to ote, aihọn na gbẹwanna mí. (Joh. 15:19) Amọ́, mí ma dona dibu. Dile mí na mọ do to hosọ he bọdego mẹ, Jehovah na hẹn nugbonọ etọn lẹ “lodo bo nasọ basi hihọ́na” yé. (2 Tẹs. 3:3) Enẹwutu, mì gbọ mí ni zindonukọn nado nọ yiwanna Jehovah, mẹmẹsunnu po mẹmẹyọnnu mítọn lẹ po, podọ etlẹ yin kẹntọ mítọn lẹ. Eyin mí hodo ayinamẹ ehe, mí na gbọṣi pọninọ mẹ bo na lodo to gbigbọ-liho, podọ mí na hẹn gbégbò wá na Jehovah, bo nasọ dohia dọ owanyi dohuhlọn tlala hú wangbẹna.