Mẹdelẹ ko kàn kanbiọ mọnkọ sè, na yé ma yí sọwhiwhe do hia kandai lọ wutu. Amọ́, sunnu voovo awe go wẹ kandai lọ donù he nọ yin Mẹfiboṣẹti, podọ mí gán plọn nudelẹ eyin mí gbadopọnna nujijọ lọ.

Ahọlu Sauli Islaeli tọn tindo visunnu ṣinawe po viyọnnu awe po. Visunnu plọnji Sauli tọn wẹ Jonatani. To nukọn mẹ, asimọwhlá Sauli tọn Lizpa ji visunnu de na ẹn he nọ yin Mẹfiboṣẹti. E jẹna ayidego dọ Jonatani lọsu do visunnu de he nọ yin Mẹfiboṣẹti. Enẹwutu, Ahọlu Sauli tindo visunnu de gọna ovivi de he tindo yinkọ dopolọ, enẹ wẹ Mẹfiboṣẹti.

To ojlẹ de mẹ, Ahọlu Sauli diọnukunsọ Gibeọninu he to ṣẹnṣẹn Islaelivi lẹ tọn bo tẹnpọn nado sukúndona yé. E taidi dọ delẹ to yé mẹ yin hùhù. E họnwun dọ nuylankan de wẹ enẹ yin. Etẹwutu? Na nukọntọ Islaelivi lẹ tọn lẹ ko basi alẹnu jijọho tọn de hẹ Gibeọninu lẹ to ojlẹ Jọṣua tọn mẹ wutu.—Jọṣ. 9:3-27.

Alẹnu enẹ gbẹ́ pò to ote to ojlẹ Ahọlu Sauli tọn mẹ. Mahopọnna alẹnu enẹ, ahọlu lọ tẹnpọn nado sukúndona Gibeọninu lẹ. Nuyiwa enẹ zọ́n bọ “hùnhọ́ de to okọ̀ na Sauli po whédo etọn po.” (2 Sam. 21:1) To godo mẹ, Davidi wá lẹzun ahọlu. Gibeọninu he pò to ogbẹ̀ lẹ dọhona ẹn gando nujijọ ylankan lọ go. Davidi kanse yé lehe ovẹsè sọgan yin bibasi gando nuyiwa ylankan Sauli tọn go do, ehe na zọ́n bọ Jehovah na dona aigba Islaeli tọn. Kakati Gibeọninu lẹ ni biọ akuẹ, yé biọ dọ visunnu ṣinawe dawe he “kàn ayiha gigẹdẹ nado sukúndona” yé lọ tọn lẹ ni yin nina emi, na emi nido hù yé. (Sọh. 35:30, 31) Davidi kẹalọyi obiọ yetọn.—2 Sam. 21:2-6.

To ojlẹ lọ mẹ, Sauli po Jonatani po ko kú to awhàngbenu, amọ́ visunnu Jonatani tọn Mẹfiboṣẹti gbẹ́ pò togbẹ̀. Nujijọ ylankan he wá aimẹ to ovuwhenu etọn de zọ́n bọ e hò plibọ, podọ e ma doalọ to ayikinkàn baba daho etọn tọn nado sukúndona Gibeọninu lẹ mẹ. Davidi ko basi alẹnu họntọnjiji tọn de hẹ Jonatani, ehe na hẹn ale wá na kúnkan Jonatani tọn, ehe Mẹfibosẹti yin dopo to yé mẹ. (1 Sam. 18:1; 20:42) Kandai lọ dọmọ: “Ahọlu [Davidi] do awuvẹmẹ hia Mẹfiboṣẹti, yèdọ visunnu Jonatani he yin visunnu Sauli tọn, na whiwhle he Davidi po Jonatani visunnu Sauli tọn po ko basi to Jehovah nukọn wutu.”—2 Sam. 21:7.

Enẹwutu, nawẹ Davidi yinuwa sọgbe hẹ obiọ Gibeọninu lẹ tọn gbọn? E ze visunnu Sauli tọn awe, ehe dopo to yé mẹ nọ yin Mẹfiboṣẹti gọna ovivi sauli tọn atọ́n jo na yé. (2 Sam. 21:8, 9) Nuyiwa Davidi tọn doalọtena hùnhọdùdù lọ to aigba lọ ji.

Nujijọ ehe ma yin otàn de poun. Osẹ́n Jiwheyẹwhe tọn họnwun. E dọmọ: “Ovi lẹ ma dona yin hùhù na ylando otọ́ yetọn lẹ tọn.” (Deut. 24:16) Jehovah ma na ko kẹalọyi nuhe yin wiwà na visunnu Sauli tọn awe gọna ovivi etọn atọ́n, eyin yé ko yin homẹvọnọ wẹ. Osẹ́n lọ yidogọ dọmọ: “Mẹdopodopo wẹ dona yin hùhù na ylando etọn titi.” E taidi dọ ovi po ovivi Sauli tọn ṣinawe he yin hùhù lẹ po doalọ to ayikinkàn Sauli tọn nado sukúndona Gibeọninu lẹ mẹ to aliho de mẹ. Taidi kọdetọn de, yé omẹ ṣinawe lẹ jiya nuyiwa ylankan yetọn tọn.

Kandai ehe dohia dọ mẹde ma gán suwhẹna nuṣiwa etọn bo nọ lẹn kavi dọ dọ anademẹ he emi mọyi lẹ wẹ emi hodo poun. Howhinwhẹn de dọmọ: “Nọ jlọ aliho he ji afọ towe lẹ nọ gbọn, aliho towe lẹpo nasọ tindo jide.”—Howh. 4:24-27; Efe. 5:15.