1. Etẹwẹ mẹjitọ lẹ nọ jlo na ovi yetọn lẹ?

 MẸJITỌ lẹ emi, mí yọnẹn dọ ojlo mìtọn wẹ nado gọalọna ovi mìtọn lẹ nado wá yọ́n Jehovah bosọ yiwanna ẹn. Amọ́, mí ma nọ mọ Jiwheyẹwhe. Nawẹ mì gán gọalọna ovi mìtọn lẹ nado nọ mọ ewọ taidi Omẹ nujọnu tọn de bosọ dọnsẹpọ ẹ gbọn?—Jak. 4:8.

2. Nawẹ mẹjitọ lẹ gán nọ plọnnu ovi yetọn lẹ gando jẹhẹnu Jehovah tọn lẹ go gbọn?

² Aliho titengbe de nado gọalọna ovi lẹ nado dọnsẹpọ Jehovah wẹ nado nọ plọn Biblu hẹ yé. (2 Tim. 3:14-17) Amọ́, Biblu sọ do aliho devo he mẹ jọja lẹ gán plọnnu gando Jehovah go te hia. To owe Howhinwhẹn lẹ tọn mẹ, e họnwun dọ otọ́ de flinnu visunnu etọn ma nado dekọ sọn jẹhẹnu Jehovah tọn lẹ go gbede, yèdọ dehe nọ yin didehia to nudida etọn lẹ mẹ lẹ. (Howh. 3:19-21) Mí na gbadopọnna aliho delẹ he mẹ mẹjitọ lẹ gán nọ yí nudida lẹ zan nado gọalọna ovi yetọn lẹ nado plọnnu gando jẹhẹnu Jehovah tọn lẹ go te.

3. Alọgọ tẹwẹ mẹjitọ lẹ dona na ovi yetọn lẹ?

³ Biblu dọ dọ “jẹhẹnu mayinukundomọ [Jiwheyẹwhe tọn] lẹ to yinyin mimọ hezeheze sọn whenue gbọ́n aihọn ko yin didá, na yé yin ayidego gbọn nuhe yin bibasi lẹ dali.” (Lom. 1:20) Mẹjitọ lẹ emi, ayihaawe ma tin dọ mì nọ duvivi whenu yiyizan hẹ ovi mìtọn lẹ to gbonu tọn. Mì nọ yí ojlẹ enẹ zan nado gọalọna ovi mìtọn lẹ nado mọ kanṣiṣa he tin to “nuhe yin bibasi lẹ” po jẹhẹnu dagbedagbe Jehovah tọn lẹ po ṣẹnṣẹn. To adà ehe mẹ, mì gbọ mí ni pọ́n nuhe mẹjitọ lẹ gán plọn sọn apajlẹ Jesu tọn mẹ.

4. Nawẹ Jesu yí nudida lẹ zan nado plọnnu devi etọn lẹ gbọn? (Luku 12:24, 27-30)

 ⁴ Doayi lehe Jesu yí nudida lẹ zan nado plọnmẹ do go. To gbèdopo, e biọ to devi etọn lẹ si nado yí sọwhiwhe do pọ́n ohọ́n lẹ po vounvoun lẹ po. (Hia Luku 12:24, 27-30.) Jesu gán ko donù kanlin kavi ogbé devo de go, amọ́ ohẹ̀ po vounvoun he devi etọn lẹ yọnẹn ganji de po go wẹ e donù. Devi lẹ gán ko mọ bọ ohọ́n lẹ to zinzlọn gbọn aga na yé, bọ vounvoun lẹ vùn to danji. Be a gán yí nukun homẹ tọn do pọ́n Jesu dile e to alọdlẹndo onú ehelẹ whenue e to hodọ ya? Podọ, etẹwẹ e wà whenue e donù apajlẹ ehelẹ go godo? E plọn devi etọn lẹ nuplọnmẹ huhlọnnọ de gando Otọ́ olọn mẹ tọn alọtlútọ podọ homẹdagbenọ yetọn go, enẹ wẹ yindọ Jehovah na na núdùdù po avọ̀ po devizọnwatọ nugbonọ etọn lẹ dile e nọ wà na ohọ́n lẹ po vounvoun danji tọn lẹ po do.

5. Apajlẹ nudida tọn tẹlẹ wẹ mẹjitọ lẹ gán yizan nado plọnnu ovi yetọn lẹ gando Jehovah go?

⁵ Mẹjitọ lẹ emi, be mì na hodo apajlẹ aliho he mẹ Jesu nọ plọnmẹ te tọn ya? Mì gán dọhona ovi mìtọn lẹ gando nudida he mìlọsu lẹ yiwanna de go, enẹ wẹ kanlin, atin kavi vounvoun he mì yiwanna hugan de. Dile mì to mọwà, mì nọ hẹn ẹn diun dọ mì nọ basi zẹẹmẹ nuhe nudida enẹ plọn mí gando Jehovah go tọn na yé. Enẹgodo, mì gán kanse ovi mìtọn kanlin kavi atin he ewọ yiwanna hugan. Eyin a nọ yí nudida he e yiwanna de zan, e yọnbasi dọ e na tlẹ dotoai dogọ whenue a to hodọna ẹn gando jẹhẹnu Jehovah tọn lẹ go.

6. Etẹwẹ mí gán plọn sọn apajlẹ he onọ̀ Christopher tọn zedai mẹ?

⁶ Be e biọ dọ mẹjitọ lẹ ni yí whenu susu zan nado basi dodinnanu gando kanlin kavi atin tangan de go whẹpo do dọhodo nuhe azọ́n nudida tọn enẹ dehia gando Jehovah go ji wẹ ya? E ma yinmọ dandan. Jesu ma basi zẹẹmẹ gaa gando lehe ohọ́n lẹ nọ dùnú do go kavi gando lehe vounvoun lẹ nọ whẹ́n do go. Na nugbo tọn, ovi towe gán nọ yiwanna hodọdopọ sisosiso gando nudida lẹ go to whedelẹnu, amọ́ to ojlẹ devo lẹ mẹ, ohó kleun de kavi kanbiọ de poun ko pé nado de nuagokun lọ tọ́n. Doayi nuhe mẹmẹsunnu de he nọ yin Christopher flin gando vuwhenu etọn go, e dọmọ: “Mama nọ dọ ohó kleun de nado gọalọna mí nado yiwanna nudida he lẹdo mí lẹ. Di apajlẹ, eyin mí to osó lẹ pá, e gán dọ dọ: ‘Pọ́n lehe osó ehelẹ klo bosọ yọnwhanpẹ do! Be Jehovah ma jiawu ya?’ Kavi whenue mí to huto, e gán dọ dọ: ‘Pọ́n lehe agbówhẹ̀n ehelẹ dohuhlọn do sọ! Be Jiwheyẹwhe ma dohuhlọn ya?’” Christopher dọmọ: “Ohó mẹhẹnlẹnnupọn tọn kleunkleun ehelẹ yinuwado mí ji sisosiso.”

7. Nawẹ a gán plọnazọ́n ovi towe lẹ nado nọ lẹnnupọndo nudida lẹ ji gbọn?

⁷ Dile ovi towe lẹ to whinwhẹ́n, a gán plọnazọ́n yé nado nọ lẹnnupọndo nudida lẹ ji dogọ bo nọ wá tadona lẹ kọ̀n na yede gando jẹhẹnu Jehovah tọn lẹ go. A gán donù dopo to azọ́n nudida tọn Jiwheyẹwhe tọn lẹ mẹ go bo kanse ovi towe dọ, “Etẹwẹ ehe plọn we gando Jehovah go?” E gán paṣa we nado sè linlẹn etọn.—Mat. 21:16.

8. Dotẹnmẹ hundote tẹwẹ mẹjitọ Islaelivi lẹ do dile yé to gbejizọnlinzin gbọn “aliji”?

⁸ Mẹjitọ Islaelivi lẹ yin tulina nado nọ plọn gbedide Jehovah tọn lẹ ovi yetọn lẹ whenue yé to zọnlinzin “to aliji.” (Deut. 11:19) Ali lẹ sù to glètoho Islaeli tọn lẹ mẹ. Kanlin, ohẹ̀ po vounvoun voovo lẹ po wẹ gán yin mimọ to finẹ. Dile whẹndo Islaelivi lẹ tọn lẹ to gbejizọnlinzin gbọn ali lẹ ji, mẹjitọ lẹ nọ tindo dotẹnmẹ hundote lọ nado fọnjlodotena ovi yetọn lẹ gando nudida Jehovah tọn lẹ go.  Mẹjitọ lẹ emi, e yọnbasi dọ mìlọsu tindo dotẹnmẹ hundote mọnkọ nado yí nudida lẹ zan nado plọnnu ovi mìtọn lẹ. Pọ́n lehe mẹjitọ delẹ ko wàmọ do.

9. Etẹwẹ a gán plọn sọn apajlẹ Punitha po Katya po tọn mẹ?

⁹ Mẹmẹyọnnu de he nọ yin Punitha bo nọ nọ̀ tòdaho de mẹ to Inde dọmọ: “Eyin mí jei whẹndo mítọn dlapọn gbé to glètoho mẹ, mí nọ mọdọ dotẹnmẹ hundote de die nado gọalọna ovi mítọn lẹ nado plọnnu gando nudida jiawu Jehovah tọn lẹ go. N’nọ mọdọ ovi ṣie lẹ nọ mọnukunnujẹ nudida lẹ mẹ dogọ whenue yé ma to tòhomẹ.” Mẹjitọ lẹ emi, e yọnbasi dọ ovi mìtọn lẹ ma na wọ̀n ojlẹ he yé yizan hẹ mì to lẹdo dagbedagbe de mẹ pọ́n gbede. Katya, yèdọ mẹmẹyọnnu de sọn Moldavie dọmọ: “Oflin vuwhenu tọn ṣie he gbọṣi ayiha ṣie mẹ hugan lẹ wẹ ojlẹ he n’yizan hẹ mẹjitọ ṣie lẹ to glètoho mẹ. N’dopẹ́ dọ yé plọn mi sọn ovu nado nọ nọte bo nọ pọ́n nuhe Jehovah dá lẹ tlintlin bosọ nọ mọ jẹhẹnu etọn lẹ to nudida etọn lẹ mẹ.”

10. Etẹwẹ mẹjitọ lẹ gán wà eyin yé mọdọ e vẹawu nado zingbejizọnlin yì glètoho de mẹ? (Pọ́n apotin lọ “ Alọgọ Na Mẹjitọ Lẹ.”)

¹⁰ Etẹwẹ lo eyin e ma yọnbasi na we nado zingbejizọnlin yì glètoho mẹ? Amol he nọ nọ̀ Inde ga dọmọ: “To fie n’nọ nọ̀, mẹjitọ lẹ dona nọ wazọ́n na gànhiho susu, podọ e gán biọ akuẹzinzan susu nado zingbejizọnlin yì glètoho mẹ. Amọ́, a gán pọ́n nudida Jehovah tọn lẹ bosọ dọho gando jẹhẹnu etọn lẹ go to whenue a to jipa pẹvi de mẹ kavi to agbàsẹnu ohọ̀ de tọn.” Eyin a yí sọwhiwhe do pọ́n, e yọnbasi dọ a nasọ mọ nudida susu lẹ he ma dẹn do owhé towe gbè ehe a gán dohia ovi towe lẹ. (Salm. 104:24) Ayihaawe ma tin dọ a na mọ ohẹ̀ lẹ, wánvú lẹ, atin lẹ po mọmọ po sọyi. Karina he wá sọn Allemagne dọmọ: “Onọ̀ ṣie yiwanna vounvoun lẹ, enẹwutu, whenue n’gbẹ́ yin jọja yọnnu de, e nọ do  vounvoun dagbedagbe lẹ hia mi whedepopenu he mí to zọnlinzin dopọ.” Mẹjitọ lẹ emi, mì gán sọ nọ yí video po owe susu he dọho gando nudida lẹ go he titobasinanu mítọn wleawuna lẹ po zan nado plọnnu ovi mìtọn lẹ. Mọwẹ, mahopọnna ninọmẹ mìtọn, mì gán gọalọna ovi mìtọn lẹ nado nọ yí sọwhiwhe do pọ́n nuhe Jiwheyẹwhe dá lẹ. Todin, mì gbọ mí ni gbadopọnna jẹhẹnu Jehovah tọn delẹ he ji mì gán dọhodo hẹ ovi mìtọn lẹ.

11. Nawẹ mẹjitọ lẹ gán gọalọna ovi yetọn lẹ nado doayi owanyi Jehovah tọn go gbọn?

¹¹ Nado gọalọna ovi mìtọn lẹ nado mọ owanyi Jehovah tọn, mì gán donù aliho owanyi tọn he mẹ kanlin susu nọ penukundo ovi yetọn lẹ go te mẹ. (Mat. 23:37) Mì gán sọ zinnudo lehe mí nọ duvivi vogbingbọn jiawu he to nudida lẹ mẹ tọn do ji. Karina he go mí donù wayi dọmọ: “Whenue mí tọ́n bo to zọnlinzin, onọ̀ ṣie nọ na mi tuli nado nọte bo pọ́n lehe vounvoun dopodopo gbọnvo do gọna lehe whanpẹ yetọn nọ do owanyi Jehovah tọn hia do.” To owhe lẹ godo, n’gbẹ́ nọ yí sọwhiwhe do pọ́n vounvoun lẹ, enẹ wẹ lehe yé gbọnvona yede do, lehe yé yin aṣọ́dona do gọna sinmẹ yetọn. Yé gbẹ́ nọ flin mi obá he mẹ Jehovah yiwanna mí jẹ.”

12. Nawẹ mẹjitọ lẹ gán gọalọna ovi yetọn lẹ nado doayi nuyọnẹn Jiwheyẹwhe tọn go gbọn? (Salmu lẹ 139:14) (Sọ pọ́n yẹdide lọ.)

¹² Nọ gọalọna ovi towe lẹ nado doayi nuyọnẹn Jiwheyẹwhe tọn go. Matin ayihaawe, Jehovah yọnnuin hú mí tlala. (Lom. 11:33) Di apajlẹ, a gán dọhodo lehe osin nọ yiaga bo nọ wleawuna aslọ lẹ do gọna lehe aslọ enẹlẹ nọ sẹtẹn po awubibọ po sọn fide jẹ fidevo do ji. (Jobu 38:36, 37) A gán sọ zinnudo aliho jiawu he mẹ agbasa gbẹtọ tọn yin didá te ji. (Hia Salmu lẹ 139:14.) Pọ́n lehe mẹjitọ de he nọ yin Vladimir wàmọ do. E dọmọ: “To gbèdopo, visunnu mítọn jai sọn kẹkẹ etọn ji, bo gbleawu. To azán delẹ godo, apà lọ kú. Yẹn po asi e po basi zẹẹmẹ na ẹn dọ Jehovah dá agbasa mítọn po nugopipe lọ po nado nọ jla ede do. Mí zinnudeji dọ mí ma ko mọ onú mọnkọ de pọ́n to nuhe gbẹtọvi lẹ basi mẹ. Di apajlẹ, mọto de ma nọ jla ede do whenue e basi asidan godo. Apajlẹ ehe gọalọna visunnu mítọn nado mọnukunnujẹ nuyọnẹn Jehovah tọn mẹ.”

13. Nawẹ mẹjitọ lẹ gán gọalọna ovi yetọn lẹ nado doayi huhlọn Jiwheyẹwhe tọn go gbọn? (Isaia 40:26)

¹³ Jehovah basi oylọna mí nado ze nukun mítọn lẹ daga hlan olọn bo lẹnnupọndo lehe huhlọn jiawu emitọn hẹn wẹkẹ lọ dote do ji. (Hia Isaia 40:26.) A gán na tuli ovi towe lẹ nado nọ pọ́n agahomẹ bo lẹnnupọndo nuhe yé mọ lẹ ji. Pọ́n nuhe mẹmẹyọnnu de he nọ yin Tingting bo wá sọn Taïwan flin gando vuwhenu etọn go, e dọmọ: “To gbèdopo he onọ̀ ṣie plan mi tọ́n bọ mí whèsla do fide, mí pọ́n agahomẹ to zánmẹ bo mọ sunwhlẹvu susu lẹ hlan ganji, na miyọ́ngbán tòhomẹ tọn lẹ ma dotukla mí wutu. Ehe jọ to ojlẹ he mẹ n’to nuhà gando kọgbidinamẹ hagbẹ lẹ tọn go bosọ to ayihaawe tindo eyin n’na penugo nado to Jehovah sẹ̀n po nugbonọ-yinyin po zọnmii. Onọ̀ ṣie na mi tuli nado lẹnnupọndo huhlọn he Jehovah yizan nado dá sunwhlẹvu enẹ lẹpo ji, podọ nado flindọ matin ayihaawe E gán yí huhlọn enẹ zan nado gọalọna mi nado pehẹ whlepọn depope. To whenue n’ko pọ́n nudida lẹ to gbejizọnlin ehe whenu godo, n’yin whinwhàn nado yọ́n Jehovah dogọ podọ n’hẹn gbemima ṣie nado sẹ̀n ewọ sinyẹn deji.”

14. Nawẹ mẹjitọ lẹ gán yí nudida lẹ zan nado gọalọna ovi yetọn lẹ nado nọ mọ Jehovah di Jiwheyẹwhe ayajẹnọ de gbọn?

¹⁴ Nudida Jehovah tọn lẹ nọ dohia dọ ewọ yin ayajẹnọ bosọ jlo dọ mílọsu ni do ayajẹ ga. Lẹnunnuyọnẹntọ lẹ ko doayi e go dọ kanlin susu lẹ nọ daihun, ehe bẹ ohẹ̀ po whèvi lẹ po hẹn. (Jobu 40:20) Be e ko jọ pọ́n bọ ovi towe lẹ bẹ nukiko dile yé to kanlin de pọ́n bọ e to aihunda ya? Vlavo yé mọ bọ asévi de yí bọlu pẹvi de do to aihunda kavi avúnvi lẹ to akitita. Whedevonu he ovi towe lẹ na konu dile yé to kanlin de pọ́n bọ e to nuhe whẹ́n kikò de basi, naegbọn a ma na flinnu yé dọ Jiwheyẹwhe ayajẹnọ de wẹ mí nọ sẹ̀n?—1 Tim. 1:11.

15. Etẹwẹ gán gọalọna mẹjitọ lẹ nado dọ̀n linlẹn ovi yetọn lẹ tọn tọ́n? (Howhinwhẹn lẹ 20:5) (Sọ pọ́n yẹdide lọ.)

¹⁵ To whedelẹnu, mẹjitọ lẹ gán nọ mọdọ e vẹawu nado hẹn ovi yetọn lẹ nado dọho gando  nuhahun he pehẹ yé te lẹ go. Eyin ninọmẹ towe niyẹn, e gán biọ dọ a ni dọ̀n linlẹn ovi towe lẹ tọn tọ́n. (Hia Howhinwhẹn lẹ 20:5.) Mẹjitọ delẹ mọdọ e nọ bọawu nado wàmọ whenue yé to nudida lẹ pọ́n dopọ hẹ ovi yetọn lẹ. Etẹwutu? Whẹwhinwhẹ́n dopo wẹ yindọ, to ojlẹ enẹlẹ mẹ ayihafẹsẹnamẹnu lẹ ma nọ sù na ovi lẹ, podọ na mẹjitọ lẹ. Otọ́ de to Taïwan he nọ yin Masahiko donù whẹwhinwhẹ́n devo go, e dọmọ: “Whenue mí yí whenu zan hẹ ovi mítọn lẹ to gbonu, enẹ wẹ whenue mí to osó lẹ fán kavi to zọnlinzin gbọn huto, yé nọ saba voawu dogọ. Gbọnmọ dali, e nọ bọawuna mí dogọ nado kanhose yé bo yọ́n nuhe to ayiha yetọn mẹ.” Katya he go mí donù wayi dọmọ: “To wehọmẹ godo, onọ̀ ṣie nọ plan mi yì jipa dagbedagbe de mẹ. To ninọmẹ he hẹnmẹ voawu mọnkọ mẹ, e nọ bọawuna mi dogọ nado dọ nuhe jọ to wehọmẹ kavi nuhe dobuna mi lẹ na ẹn.”

16. Nawẹ whẹndo lẹ gán voawu bosọ daihun whenue yé to vivi nudida Jehovah tọn lẹ tọn dù gbọn?

¹⁶ Nudida Jehovah tọn lẹ gán sọ hùn dotẹnmẹ dote na whẹndo lẹ nado voawu bo nọ daihun dopọ, bo gbọnmọ dali hẹn haṣinṣan whẹndo yetọn tọn lodo dogọ. Biblu dọ dọ “ojlẹ de [tin] nado konu,” podọ “ojlẹ de [tin] nado lọ́n pé.” (Yẹwh. 3:1, 4, Odò.) Jehovah ko dá nọtẹn dagbedagbe lẹ na mí to aigba ji fie mí gán wà nuhe mí yiwanna lẹ te. Whẹndo susu nọ yiwanna nado nọ yí whenu zan dopọ to kanlinpọntẹn de, gbétatò de mẹ, lẹdo osó tọn lẹ mẹ kavi to huto. Ovi delẹ nọ yiwanna nado họnwezun bosọ daihun to jipa de mẹ, nado pọ́n kanlin lẹ kavi nado lìnsin gbọn tọ̀sisa de, tándo de kavi gbọn ohù mẹ. Dotẹnmẹ hundote dagbedagbe nankọ lẹ die mí tindo nado deayidai whenue mí to gbonu bọ nuhe Jehovah dá lẹ lẹdo mí!

17. Naegbọn mẹjitọ lẹ dona nọ gọalọna ovi yetọn lẹ nado nọ duvivi nudida Jiwheyẹwhe tọn lẹ tọn?

¹⁷ To aihọn yọyọ Jiwheyẹwhe tọn mẹ, mẹjitọ lẹ po ovi lẹ po na duvivi nudida Jehovah tọn lẹ tọn hugan gbede pọ́n. To vogbingbọn mẹ na nuhe nọ jọ to egbehe, mí ma na tindo whẹwhinwhẹ́n depope nado dibuna kanlin lẹ, mọ yelọsu ma na dibuna mí. (Isa. 11:6-9) Mí na duvivi nuhe Jehovah dá lẹ tọn kakadoi podọ doidoi. (Salm. 22:26) Amọ́ mẹjitọ lẹ emi, mì ma nọte kakajẹ whenẹnu nado gọalọna ovi mìtọn lẹ nado jẹ vivi nudida lẹ tọn dù ji blo. Dile mì to nudida lẹ yizan nado plọnnu ovi mìtọn lẹ gando Jehovah go sọ, e yọnbasi dọ yé ni wá kọngbedopọ hẹ nuhe Ahọlu Davidi dọ dọmọ: “Jehovah E, azọ́n depope ma tin he taidi towe lẹ.”—Salm. 86:8.