1. Numọtolanmẹ tẹwẹ devizọnwatọ nugbonọ Jehovah tọn delẹ gán nọ diahi hẹ?

 LEHE e vọ́ jidenamẹ do sọ nado yọnẹn dọ Jehovah nọ kẹalọyi omẹ etọn lẹ taidi pipli de! Biblu dọmọ: “Jehovah nọ hùnhomẹ do omẹ etọn lẹ go.” (Salm. 149:4) Amọ́ to whedelẹnu, mẹdelẹ nọ jẹflumẹ sọmọ bo nọ kanse yede dọ, ‘Be Jehovah nọ kẹalọyi yẹnlọsu ya?’ To ojlẹ he mẹ Biblu yin kinkàn te, sinsẹ̀n-basitọ nugbonọ Jehovah tọn susu wẹ diahi hẹ linlẹn mọnkọ lẹ to whedelẹnu.—1 Sam. 1:6-10; Jobu 29:2, 4; Salm. 51:11.

2. Mẹnu lẹ wẹ nọ tindo nukundagbe Jehovah tọn?

² Biblu dohia hezeheze dọ gbẹtọvi mapenọ lẹ gán tindo nukundagbe kavi alọkẹyi Jehovah tọn. Gbọnna? Mí dona do yise hia to Jesu Klisti mẹ bosọ yí baptẹm. (Joh. 3:16) Gbọnmọ dali, mí nọ dohia dọ mí ko lẹnvọjọ sọn ylando mítọn lẹ mẹ bo ko sọ dopà na Jiwheyẹwhe nado wà ojlo etọn. (Owalọ 2:38; 3:19) Homẹ Jehovah tọn nọ hùn taun, eyin mí ze afọdide ehelẹ nado jihọntọn po ewọ po. Dile e na dẹnsọ bọ mí zindonukọn nado to nuhe go mí pé lẹpo wà nado nọgbẹ̀ sọgbe hẹ opà klandowiwe tọn mítọn, Jehovah nọ kẹalọyi mí bosọ nọ pọ́n mí hlan taidi họntọn vivẹ́ etọn lẹ.—Salm. 25:14.

3. Etẹwẹ mí na gbadopọnna todin?

³ Amọ́, etẹwutu mẹdelẹ gán nọ lẹn to whedelẹnu dọ Jiwheyẹwhe ma kẹalọyi yé? Nawẹ Jehovah nọ dohia dọ emi kẹalọyi mí gbọn? Podọ, nawẹ Klistiani de gán hẹn jidide etọn lodo dọ emi tindo nukundagbe Jiwheyẹwhe tọn gbọn?

 NUHEWUTU MẸDELẸ GÁN LẸNDỌ JIWHEYẸWHE MA KẸALỌYI YÉ

4, 5. Mahopọnna numọtolanmẹ nuvọ́nọ-yinyin tọn lẹ, nujikudo tẹwẹ mí gán do?

⁴ Susu mítọn wẹ ko to ahidi hẹ numọtolanmẹ nuvọ́nọ-yinyin tọn sọn vuwhenu. (Salm. 88:15) Mẹmẹsunnu de he nọ yin Adrián dọmọ: “Whelẹponu wẹ n’nọ mọ ovọ́ mẹ na dee. N’nọ flindọ whenue n’to pẹvi, n’nọ hodẹ̀ dọ Jiwheyẹwhe ni gọalọna whẹndo ṣie nado yì Paladisi mẹ, dile etlẹ yindọ n’kudeji dọ n’ma jẹ nado nọ finẹ.” Tony he whẹ́n to whẹndo he ma yin Kunnudetọ tọn de mẹ dọmọ: “Mẹjitọ ṣie lẹ ma dọna mi pọ́n dọ emi yiwanna mi kavi dọ homẹ yetọn nọ hùn do go e. Ehe zọ́n bọ n’nọ lẹndọ nude ma tin he n’gán wà nado hẹn homẹ yetọn hùn.”

⁵ Eyin mí nọ diahi hẹ numọtolanmẹ nuvọ́nọ-yinyin tọn to whedelẹnu, mí gán flindọ Jehovah lọsu wẹ dọ̀n mí wá ede dè. (Joh. 6:44) E yọ́n jẹhẹnu mítọn lẹ hugan mílọsu, podọ e yọ́n nuhe to ahun mítọn mẹ. (1 Sam. 16:7; 2 Otàn. 6:30) Enẹwutu, mí gán deji eyin e dọna mí dọ mí họakuẹ.—1 Joh. 3:19, 20.

6. Numọtolanmẹ tẹwẹ apọsteli Paulu tindo gando ylando etọn he wayi lẹ go?

⁶ Whẹpo mí do plọn nugbo lọ, delẹ to mí mẹ ko wà nudelẹ he gán zọ́n bọ mí na gbẹ́ nọ dowhẹ̀ míde. (1 Pita 4:3) Klistiani nugbonọ lẹ lọsu nọ diahi hẹ ayilinlẹn ylando tọn lẹ. Be ahun towe nọ gblewhẹdo we wẹ ya? Eyin mọ wẹ, homẹ towe ni nọ hùn to yinyọnẹn mẹ dọ devizọnwatọ Jehovah tọn nugbonọ lẹ ko diahi hẹ numọtolanmẹ mọnkọ lẹ ga. Di apajlẹ, apọsteli Paulu mọdọ emi yin tapònọ whenue e lẹnnupọndo awugbopo etọn lẹ ji. (Lom. 7:24) Nugbo wẹ dọ Paulu ko lẹnvọjọ sọn ylando etọn lẹ mẹ bosọ yí baptẹm. Ṣogan, e gbẹ́ ylọ ede dọ “pẹvi pete to apọsteli lẹ mẹ,” podọ mẹhe yin “tọ́ntlọ́ngbọ́n” to ylandonọ lẹ mẹ.—1 Kọl. 15:9; 1 Tim. 1:15.

7. Etẹwẹ mí dona nọ hẹn do ayiha mẹ gando ylando mítọn he wayi lẹ go?

⁷ Otọ́ olọn mẹ tọn mítọn dopà nado jona mí eyin mí lẹnvọjọ. (Salm. 86:5) Enẹwutu, eyin ylando he mí wà lẹ vẹna mí nugbonugbo, mí gán deji dọ nugbo wẹ Jehovah dọ, enẹ wẹ yindọ e ko jona mí.—Kol. 2:13.

8, 9. Nawẹ mí gán duto numọtolanmẹ lọ ji dọ nuhe mí nọ wà lẹ ma gán pé gbede nado hẹn homẹ Jehovah tọn hùn gbọn?

⁸ Mímẹpo wẹ nọ jlo na sẹ̀n Jehovah to gigọ́ mẹ dile e yọnbasi do. Amọ́, mẹdelẹ nọ lẹndọ nuhe emi nọ wà lẹ ma gán pé gbede nado mọ nukundagbe etọn. Mẹmẹyọnnu de he nọ yin Amanda dọmọ: “N’nọ saba lẹndọ dagbe hugan ṣie nina Jehovah zẹẹmẹdo nado nọ dovivẹnu to whelẹponu bo wà hú dehe n’nọ wà. N’nọ saba biọ nususu sọn dee si hú nuhe go n’pé. Eyin n’wá ‘gboawupo,’ n’nọ mọdọ homẹ Jehovah tọn ma hùn do go e kẹdẹdile homẹ yẹnlọsu tọn ma hùn do dee go do.”

⁹ Nawẹ mí gán duto numọtolanmẹ lọ ji dọ nuhe mí nọ wà lẹ ma gán pé gbede nado hẹn homẹ Jehovah tọn hùn gbọn? Flindọ Jehovah ma yin hẹngogonọ. E ma nọ biọ nususu sọn mí si gbede hugan nuhe mí gán wà sọgbe hẹ lẹnpọn dagbe. E nọ yọ́n pinpẹn nudepope he mí wà na ẹn lẹ tọn dile e na dẹnsọ bọ mí to nuhe go mí pé lẹpo wà. Humọ, nọ lẹnnupọndo apajlẹ mẹhe go Biblu donù bọ yé sẹ̀n Jehovah po ahun lẹpo po tọn lẹ ji. Pọ́n apajlẹ Paulu tọn. E yí ede zan po zohunhun po na owhe susu, bo zingbejizọnlin yì fisusu lẹ bosọ do agun susu ai. Ṣogan, whenue ninọmẹ lẹ dekanpona nuhe e gán wà to azọ́n yẹwhehodidọ tọn lọ mẹ, be e ba nukundagbe Jiwheyẹwhe tọn pò wẹ ya? Lala. E zindonukọn nado to nuhe go e pé wà, podọ Jehovah dona ẹn. (Owalọ 28:30, 31) Mọdopolọ, nuhe mí gán na Jehovah gán diọ to whedelẹnu. Amọ́, nuhe yin nujọnu hugan to nukun etọn mẹ wẹ mẹwhinwhàn he wutu  mí do to sinsẹ̀n ẹn. Mì gbọ mí ni pọ́n aliho delẹ he mẹ Jehovah nọ do nukundagbe etọn hia mí te.

NAWẸ JEHOVAH NỌ DO NUKUNDAGBE ETỌN HIA GBỌN?

10. To linlẹn de mẹ, nawẹ mí gán sè ogbè Jehovah tọn he na dohia dọ ewọ kẹalọyi mí gbọn? (Johanu 16:27)

¹⁰ Gbọn Biblu gblamẹ. Jehovah nọ yiwanna nado do nukundagbe sisosiso etọn hia mẹhe nọ hẹn homẹ etọn hùn lẹ. Owe-wiwe lẹ donù nujijọ awe delẹ go ehe whenu E dọna Jesu te dọ e yin mẹyiwanna Emitọn, yèdọ Visunnu he emi kẹalọyi. (Mat. 3:17; 17:5) Be e na jlo we nado sè dọ Jehovah to jide vọ́ na we dọ a tindo nukundagbe emitọn ya? Mí ma nọ sè ogbè Jehovah tọn tlọlọ, amọ́ e nọ dọhona mí gbọn Ohó etọn gblamẹ. Whenue mí hia hogbe Jesu tọn lẹ to owe Wẹndagbe tọn lẹ mẹ, e nọ taidi dọ mí to ogbè Jehovah tọn sè bọ e to nukundagbe dohia mí wẹ nkọ. (Hia Johanu 16:27.) Jesu nọ do jẹhẹnu Otọ́ etọn tọn lẹ hia to aliho pipé mẹ. Enẹwutu, whenue mí hia dọ Jesu do nukundagbe hia hodotọ etọn he yin nugbonọ mahopọnna dọ yé yin mapenọ lẹ, mí gán yí nukun homẹ tọn do mọdọ Jehovah to hogbe enẹlẹ yizan na mílọsu. —Joh. 15:9, 15.

11. Naegbọn bọ pipehẹ awusinyẹnnamẹnu lẹ ma zẹẹmẹdo dọ mí hẹn nukundagbe Jehovah tọn bu? (Jakọbu 1:12)

¹¹ Gbọn nuyiwa etọn lẹ gblamẹ. Jehovah nọ to jejeji nado gọalọna mí, di apajlẹ e nọ penukundo nuhudo agbasa tọn mítọn lẹ go. To whedelẹnu, Jehovah gán dike bọ mí na jiya awusinyẹnnamẹnu lẹ tọn dile e yindo to whẹho dawe dodonọ lọ Jobu tọn mẹ. (Jobu 1:8-11) Whlepọn lẹ ma yin ohia lọ dọ mí ko hẹn nukundagbe Jiwheyẹwhe tọn bu. Kakatimọ, yé nọ hùn dotẹnmẹ lẹ dote na mí nado do obá he mẹ mí yiwanna Jiwheyẹwhe bosọ nọ dejido ewọ go jẹ hia. (Hia Jakọbu 1:12.) Mí na to vivi nukunpedomẹgo owanyinọ po godonọnamẹ etọn po tọn dù dile e to alọgọna mí nado doakọnnanu.

12. Etẹwẹ mí gán plọn sọn nuhe jọ do Dmitrii go mẹ?

¹² Lẹnnupọndo apajlẹ mẹmẹsunnu de he nọ yin Dmitrii tọn ji to Asie. Azọ́n gble do e bọ e masọ penugo bo mọ devo na osun susu lẹ. Enẹwutu, e basi dide nado yí whenu susu zan dogọ to lizọnyizọn lọ mẹ bo gbọnmọ dali dohia dọ emi dejido Jehovah go. Osun susu lẹ juwayi, ṣogan e ma mọ azọ́n de. Enẹgodo, e jẹazọ̀n sọmọ bọ e ma gán nọ fọ́n sọn adọzan etọn ji. E jẹ ayihaawe do ji eyin asu po otọ́ dagbe de po janwẹ emi yin, bo nọ kanse ede eyin  e gbẹ́ do nukundagbe Jehovah tọn. Enẹgodo to whèjai dopo, viyọnnu etọn zín hogbe he to Isaia 30:15 mẹ lẹ tọ́n do wema de ji, ehe dọmọ: “Huhlọn mìtọn na tin to abọẹninọ po jidide mlẹnmlẹn po mẹ.” Viyọnnu lọ hẹn wema lọ sọyi na ẹn to adọzan etọn pá, bo dọna ẹn dọmọ, “Papa, eyin awú ma yá mì, mì gán nọ flin wefọ ehe.” Dmitrii doayi e go dọ, po alọgọ Jehovah tọn po, whẹndo emitọn gbẹ́ nọ mọ núdùdù dagbe, avọ̀ po adọtẹn po. E dọmọ: “Nuhe n’dona wà wẹ nado tin to abọẹninọ mẹ, bo zindonukọn nado nọ dejido Jiwheyẹwhe ṣie go.” Eyin a to pipehẹ whlepọn mọnkọ de, a gán deji dọ Jehovah nọ hò towe pọ́n, bo nasọ gọalọna we nado doakọnnanu.

13. Mẹnu lẹ wẹ Jehovah gán yizan nado dohia dọ emi kẹalọyi mí, podọ gbọnna?

¹³ Gbọn sinsẹ̀n-basitọ hatọ lẹ gblamẹ. Jehovah nọ yí mẹmẹsunnu po mẹmẹyọnnu mítọn lẹ po zan nado do nukundagbe etọn hia mí. Di dohia, e gán whàn mẹdevo lẹ nado dọ hogbe tulinamẹ tọn lẹ na mí to ojlẹ dagbe mẹ. Mẹmẹyọnnu de to Asie do numimọ ehe tọn to ojlẹ he mẹ e do ayimajai sinsinyẹn te de. Azọ́n gble do e bọ e sọ bẹ awutu sinsinyẹn. Enẹgodo, asu etọn waylando sinsinyẹn bọ azọngban mẹho tọn yin yíyí sọn e si. E dọmọ: “N’ma yọ́n fie nuhahun ehe lẹpo tlọ́n. N’lẹndọ vlavo n’ko ṣì nude wà bo ko sọ hẹn nukundagbe Jehovah tọn bu.” Mẹmẹyọnnu mítọn vẹ̀ Jehovah dọ ni vọ́ jidena emi gando nukundagbe etọn go. Nawẹ Jehovah wàmọ gbọn? E dọmọ, “Mẹho agun tọn lẹ dọho hẹ mi bo vọ́ jide na mi dọ Jehovah yiwanna mi.” To nukọn mẹ, e sọ vọ́ biọ alọgọ Jehovah tọn. E dọmọ: “To azán dopolọ gbè, n’mọ wekanhlanmẹ de yí sọn mẹmẹsunnu po mẹmẹyọnnu he to agun lọ mẹ lẹ po dè. Dile n’to hogbe homẹmiọnnamẹ tọn lọ lẹ hia, n’mọdọ Jehovah ko sè odẹ̀ ṣie.” Na nugbo tọn, Jehovah nọ saba do nukundagbe etọn  hia gbọn hogbe dagbe mẹdevo lẹ tọn gblamẹ.—Salm. 10:17.

14. Aliho devo tẹ mẹ wẹ Jehovah nọ do nukundagbe etọn hia mí te?

¹⁴ Jehovah sọ nọ do nukundagbe etọn hia mí gbọn yisenọ hatọ lẹ yiyizan nado na mí ayinamẹ whenue mí do hudo etọn te dali. Di apajlẹ to owhe kanweko tintan whenu, Jehovah yí apọsteli Paulu zan nado kàn wekanhlanmẹ gbọdo 14 hlan yisenọ hatọ etọn lẹ. Wekanhlanmẹ enẹlẹ bẹ ayinamẹ nujikudo tọn he sọ do owanyi hia lẹ hẹn. Naegbọn Jehovah do gbọdo Paulu nado yí ayinamẹ ehelẹ dogọ nuhe e kàn lẹ? Otọ́ dagbe wẹ Jehovah yin, podọ e nọ domẹplọnlọ ovi etọn “he go homẹ etọn hùn do” lẹ go. (Howh. 3:11, 12) Enẹwutu eyin mí mọ ayinamẹ sinai do Biblu ji de yí, mí gán nọ mọ ẹn taidi kunnudenu lọ dọ mí do nukundagbe Jiwheyẹwhe tọn bọ e ma yindọ ewọ gbẹ́ mí dai wẹ gba. (Heb. 12:6) Nudevo tẹlẹ wẹ nọ dohia dọ mí do nukundagbe Jehovah tọn?

KUNNUDENU DEVO LẸ HE NỌ DOHIA DỌ JEHOVAH KẸALỌYI MÍ

15. Mẹnu lẹ wẹ Jehovah nọ na gbigbọ wiwe etọn, podọ naegbọn ehe gán na mí jide?

¹⁵ Jehovah nọ na gbigbọ wiwe etọn mẹhe ewọ kẹalọyi lẹ. (Mat. 12:18) Mí gán kanse míde dọ, ‘Be n’ko penugo bo do adà sinsẹ́n gbigbọ Jiwheyẹwhe tọn delẹ tọn hia to gbẹzan ṣie mẹ ya?’ Be a doayi e go dọ emi nọ fahomẹ hẹ mẹdevo lẹ dogọ hugan lehe emi nọ wà do whẹpo do wá yọ́n Jehovah ya? Nado dọ hójọhó, lehe a to pinplọn nado do adà sinsẹ́n gbigbọ Jiwheyẹwhe tọn lẹ tọn hia sọ, mọ wẹ e na họnwun dogọ dọ a tindo nukundagbe Jehovah tọn do niyẹn!—Pọ́n apotin lọ “ Sinsẹ́n Gbigbọ Tọn Wẹ . . . ”

16. Mẹnu lẹ wẹ Jehovah nọ yizan nado lá wẹndagbe lọ, podọ numọtolanmẹ tẹwẹ enẹ nọ hẹn we tindo? (1 Tẹsalonikanu lẹ 2:4)

¹⁶ Homẹ Jehovah tọn nọ hùn nado ze wẹndagbe lọ do alọmẹ na mẹhe ewọ kẹalọyi lẹ. (Hia 1 Tẹsalonikanu lẹ 2:4.) Doayi lehe wẹndagbe lọ lilá na mẹdevo lẹ wà dagbe na mẹmẹyọnnu de he nọ yin Jocelyn do go. To gbèdopo, Jocelyn fọ́n po numọtolanmẹ flumẹjijẹ tọn po. E dọmọ: “N’gbọjọ pete bosọ do numọtolanmẹ nuvọ́nọ-yinyin tọn. Amọ́ gbehosọnalitọ wẹ n’yin, bọ azán he ji n’nọ dekunnu te de wẹ. Enẹwutu, n’hodẹ̀ bo tọ́n na lizọnyizọn lọ.” To afọnnu enẹ, Jocelyn dukosọna Mary, yèdọ yọnnu jijọ dagbenọ de he yigbe nado plọn Biblu. To osun delẹ godo, Mary dọna Jocelyn dọ gbeegbe e wá húhú ohọ̀n na emi, odẹ̀  hò wẹ emi te dọ Jiwheyẹwhe ni gọalọna emi. Whenue Jocelyn lẹnnupọndo numimọ ehe ji, e dọmọ, “E taidi na mi dọ Jehovah to didọna mi dọ, ‘N’kẹalọyi we.’” Nugbo wẹ dọ mẹlẹpo ma na kẹalọyi owẹ̀n mítọn. Amọ́ mí gán deji dọ homẹ Jehovah tọn nọ hùn, eyin mí dovivẹnu nado lá wẹndagbe lọ na mẹdevo lẹ.

17. Etẹwẹ a plọn sọn nuhe Vicky dọ gando ofligọ lọ go lẹ mẹ? (Salmu lẹ 5:12)

¹⁷ Jehovah nọ yí nuhọakuẹ-yinyin ofligọ lọ tọn zan do mẹhe ewọ kẹalọyi lẹ tamẹ. (1 Tim. 2:5, 6) Amọ́ etẹwẹ lo eyin ahun mítọn jẹagọdo linlẹn lọ dọ Jehovah kẹalọyi mí, dile etlẹ yindọ mí tindo yise to ofligọ lọ mẹ bosọ yí baptẹm? Flindọ mí ma gán nọ dejido numọtolanmẹ míde tọn lẹ go to whelẹponu, amọ́ mí gán dejido Jehovah uwọ go. E nọ pọ́n mẹhe tindo yise to ofligọ lọ mẹ lẹ hlan taidi dodonọ, podọ e dopà nado dona yé. (Hia Salmu lẹ 5:12; Lom. 3:26) Ayihamẹlinlẹnpọn do ofligọ lọ ji gọalọna mẹmẹyọnnu de he nọ yin Vicky. To gbèdopo, whenue e ko lẹnnupọn sisosiso do ofligọ lọ ji godo, e wá tadona lọ kọ̀n dọmọ: “Jehovah ko fahomẹ hẹ mi na ojlẹ dindẹn taun. . . . Ṣogan na taun tọn nuhe dọna ẹn n’te wẹ yindọ: ‘Owanyi towe ma sinyẹn sọmọ nado dọ̀n mi. Avọ́sinsan Visunnu towe tọn ma ko pé nado súnsún ylando ṣie lẹ sẹ̀.’” Whenue e lẹnayihamẹpọn do nunina ofligọ lọ tọn ji, e jẹ mimọ ji dọ Jehovah yiwanna emi. Mílọsu gán mọdọ Jehovah yiwanna mí bosọ doayi nukundagbe etọn go dile mí to nulẹnpọn do ofligọ lọ ji.

18. Nujikudo tẹwẹ mí gán tindo eyin mí zindonukọn nado yiwanna Otọ́ olọn mẹ tọn mítọn?

¹⁸ Dile etlẹ yindọ mí gán ko dovivẹnu susu nado yí ayinamẹ he yin nùdego wayi lẹ do yizan mẹ, mí gán nọ jẹflumẹ to whedelẹnu bo nọ kanse míde eyin mí do nukundagbe Jehovah tọn. Eyin enẹ jọ, flindọ ewọ nọ kẹalọyi “mẹhe zindonukọn nado to wanyina Ẹn lẹ.” (Jak. 1:12) Enẹwutu, to dindọnsẹpọ Jehovah zọnmii bosọ nọ doayi nukundagbe etọn go. Nọ hẹn do ayiha mẹ to whelẹponu dọ Jehovah “ma dẹn do dopodopo mítọn.”—Owalọ 17:27.