Mí gán mọ jona ylando mítọn lẹ tọn yí gbọn avọ́sinsan ofligọ lọ tọn he Jesu yí ohùn etọn do suahọ etọn lọ kẹdẹ gblamẹ. (Efe. 1:7) Amọ́, Biblu dọmọ: “Jiwheyẹwhe gbọn awujonanu dali to ylando he ko yin wiwà wayi lẹ jonamẹ,” enẹ wẹ whẹpo Jesu do suahọ ofligọ lọ tọn. (Lom. 3:25, Odò.) Nawẹ Jehovah gán wà ehe bosọ hẹn nujinọtedo pipé whẹdida dodo tọn etọn go to ojlẹ dopolọ mẹ gbọn?

To nukun Jehovah tọn mẹ, e taidi dọ ofligọ lọ ko yin súsú sọn ojlẹ he mẹ ewọ basi dide nado wleawuna “kúnkan” de he na whlẹn gbẹtọvi he do yise hia lẹ gán. (Jen. 3:15; 22:18) Jiwheyẹwhe kudeji mlẹnmlẹn dọ to ojlẹ sisọ mẹ, Visunnu detọ́n dopo akàn etọn na desọn ojlo mẹ nado suahọ ofligọ lọ tọn. (Gal. 4:4; Heb. 10:7-10) Whenue Jesu tin to aigba ji taidi afọzedaitọ Jiwheyẹwhe tọn, e tindo aṣẹ lọ nado jo ylando lẹ namẹ whẹpo ofligọ lọ nido yin súsú. E wàmọ gbọn nuhọakuẹ-yinyin avọ́sinsan he e na basi to sọgodo lọ tọn yiyizan do mẹhe do yise hia lẹ tamẹ dali.—Mat. 9:2-6.