1, 2. Nawẹ gbẹninọ nọ pọnte dogọ gbọn to baptẹm godo?

 AYAJẸNU wẹ e yin nado yí baptẹm, podọ nado biọ whẹndo Jehovah tọn mẹ. Mẹhe tindo lẹblanulọkẹyi vonọtaun mọnkọtọn lẹ na kọngbedopọ hẹ hogbe salmu-kantọ Davidi tọn lẹ, mẹhe dọmọ: “Ayajẹnọ wẹ mẹhe hiẹ [Jehovah] de bo dọ̀n ẹn sẹpọ dewe nado nọ nọ̀ awánu towe lẹ mẹ.”—Salm. 65:4.

² Jehovah ma nọ plan mẹdepope poun wá awánu etọn lẹ mẹ. Dile mí dọ do to hosọ he wayi mẹ, e nọ de nado dọnsẹpọ mẹhe dohia dọ yé jlo na tindo haṣinṣan pẹkipẹki de hẹ ewọ lẹ. (Jak. 4:8). Whenue a klan dewe do wiwe na Jehovah bosọ yí baptẹm, a dọnsẹpọ ewọ to aliho vonọtaun de mẹ. A sọgan kudeji dọ to enẹgodo, e na “kọ̀n dona de jẹgbonu do ji [we] kaka bọ nuhudo nudepope tọn ma na tin ba.”—Mal. 3:10; Jel. 17:7, 8.

3. Azọngban sinsinyẹn tẹwẹ Klistiani he klan yede do wiwe bo yí baptẹm lẹ tindo? (Yẹwhehodọtọ 5:4, 5)

³ Bẹjẹeji de poun wẹ baptẹm yin. Whenue a ze afọdide enẹ godo, a na jlo nado wà nuhe go a pé lẹpo nado nọgbẹ̀ sọgbe hẹ opà klandowiwe tọn towe, eyin a tlẹ pehẹ mẹtẹnpọn kavi whlepọn yise tọn lẹ. (Hia Yẹwhehodọtọ 5:4, 5.) Taidi devi Jesu tọn de, a na hodo apajlẹ po gbedide Jesu tọn lẹ po pẹkipẹki dile e yọnbasi do. (Mat. 28:19, 20; 1 Pita 2:21) Hosọ ehe na gọalọna we nado wàmọ.

TO JESU ‘HODO ZỌNMII’ MAHOPỌNNA WHLEPỌN PO MẸTẸNPỌN LẸ PO

4. Linlẹn tẹ mẹ wẹ devi Jesu tọn lẹ nọ ze “yatin” de te? (Luku 9:23)

⁴ To baptẹm godo, nuhahun lẹ ma na hán to gbẹzan towe mẹ. Nado dọ hójọhó, Jesu hẹn ẹn họnwun dọ devi emitọn lẹ  na ze “yatin” de. Na taun tọn, yé na wàmọ “egbesọegbesọ.” (Hia Luku 9:23.) Be didọ wẹ Jesu te dọ hodotọ emitọn lẹ na nọ to yaji to whelẹponu ya? Paali. Nuhe dọ e te poun wẹ yindọ, to pọmẹ hẹ dona he sin vivi yé na dù lẹ, yé nasọ pehẹ nuhahun lẹ. Delẹ to nuhahun ehelẹ mẹ tlẹ gán hẹn awufiẹsa wá na yé taun.—2 Tim. 3:12.

5. Dona tẹlẹ sin opà wẹ Jesu do na mẹhe nọ basi avọ́sinsan lẹ?

⁵ Vlavo a ko pehẹ nukundiọsọmẹ sọn hagbẹ whẹndo tọn towe lẹ dè, kavi vlavo a ko yí yanwle agbasa tọn delẹ do sanvọ́ nado ze Ahọluduta lọ do otẹn tintan mẹ. (Mat. 6:33) Eyin mọ wẹ, a gán deji dọ Jehovah doayi azọ́n nugbonọ-yinyin tọn towe lẹ go. (Heb. 6:10) E yọnbasi dọ a ni ko do numimọ nugbo-yinyin hogbe Jesu tọn ehelẹ tọn dọmọ: “Mẹdepope ma tin he jo owhé kavi nọvisunnu lẹ kavi nọviyọnnu lẹ kavi onọ̀ kavi otọ́ kavi ovi lẹ kavi aigba lẹ do, na yẹn tọn podọ na wẹndagbe lọ tọn wutu he ma na mọ donu 100 to ojlẹ ehe mẹ todin—owhé lẹ, nọvisunnu lẹ, nọviyọnnu lẹ, onọ̀ lẹ, ovi lẹ po aigba lẹ po, gọna homẹkẹn lẹ—podọ ogbẹ̀ madopodo to titonu he ja mẹ.” (Malku 10:29, 30) Na nugbo tọn, dona he a ko mọyi lẹ ma sọgan yin yiyijlẹdo avọ́sinsan he a basi lẹ go.—Salm. 37:4.

6. Naegbọn a dona zindonukọn nado to avùnho sọta “ojlo agbasalan tọn” lẹ to baptẹm godo?

⁶ E na gbẹ́ biọ dọ a ni nọ hoavùn sọta “ojlo agbasalan tọn” lẹ to baptẹm towe godo. (1 Joh. 2:16) To popolẹpo mẹ, a na gbẹ́ to mapenọ yin. To whedelẹnu, numọtolanmẹ towe lẹ gán nọ taidi apọsteli Paulu tọn lẹ nkọ. E wlan dọmọ: “Na taun tọn, yẹn nọ mọ awuvivi to osẹ́n Jiwheyẹwhe tọn mẹ sọgbe hẹ mẹhe n’yin to homẹ, ṣigba n’mọ osẹ́n devo to agbasa ṣie mẹ he to awhànfun sọta osẹ́n ayiha ṣie mẹ tọn bo to hinhẹn mi zun kanlinmọ na osẹ́n ylando tọn he tin to agbasa ṣie mẹ.” (Lom. 7:22, 23) Ayilinlẹn ylando tọn towe lẹ gán nọ hẹn we gbọjọ. Amọ́, nulinlẹnpọn do opà he a do na Jehovah whenue a klan dewe do wiwe na ewọ ji, na na huhlọn gbemima towe nado nọavùnte sọta mẹtẹnpọn. Nugbo lọ wẹ yindọ whenue a pehẹ mẹtẹnpọn lẹ, opà klandowiwe tọn towe na hẹn gbẹninọ bọawuna we. Gbọnna?

7. Nawẹ dewe kinklan do wiwe na Jehovah na gọalọna we nado hẹn nugbonọ-yinyin towe na ewọ go gbọn?

⁷ Whenue a klan dewe do wiwe na Jehovah, a mọ́n dewe wẹ. Ehe zẹẹmẹdo dọ a dọ lala na ojlo mẹdetiti tọn po yanwle he na hẹn homẹgble Jehovah lẹ po. (Mat. 16:24) Enẹwutu, whenue a pehẹ mẹtẹnpọn de, e ma na biọ dọ a ni yí whenu nado to nulẹnpọn do nuhe a na wà ji. A na ko yọ́n nuhe a na wà, enẹ wẹ nado to nugbonọ yin na Jehovah zọnmii. A na tẹdo gbemima towe nado hẹn homẹ Jehovah tọn hùn go gligli. Gbọnmọ dali, a na taidi Jobu. Mahopọnna dọ e pehẹ whlepọn he sẹhundaga lẹ, e dọ po nujikudo po dọmọ: “Yẹn ma na jo tenọgli ṣie do!”—Jobu 27:5.

8. Nawẹ nulinlẹnpọn do odẹ̀ klandowiwe tọn towe ji gán gọalọna we nado duto mẹtẹnpọn ji gbọn?

⁸ Eyin a nọ lẹnnupọndo odẹ̀ klandowiwe tọn towe hlan Jehovah ji, a na mọ huhlọn nado pehẹ mẹtẹnpọn depope. Taidi apajlẹ, be a na nọ daihun gblewa tọn hẹ alọwlemẹ mẹdevo tọn wẹ ya? E họnwun dọ paali wẹ! A na ko dọ lala na onú mọnkọ. Gbọnmọ dali, a na dapana awufiẹsa he numọtolanmẹ agọ̀ lẹ nọ hẹnwa to whenue yé ko doadọ̀do to ahun mẹ godo. A na “zẹ̀” sọn “ali mẹylankan tọn” ji.—Howh. 4:14, 15.

9. Nawẹ nulinlẹnpọn do odẹ̀ klandowiwe tọn towe ji gán sọ gọalọna we nado to nuwiwa gbigbọmẹ tọn lẹ zedo otẹn tintan mẹ zọnmii gbọn?

⁹ Etẹwẹ lo eyin a mọ azọ́n de he na glọnalina  we nado nọ yì opli Klistiani tọn towe lẹ to gbesisọ mẹ? Nuhe a na wà ko họnwun na we. Ojlẹ dindẹn whẹpo a do mọ azọ́n lọ, a ko dọ lala na nuzedonukọnnamẹ mọnkọ. Gbọnmọ dali, a ma na kẹalọyi azọ́n lọ bo na wá to ayiha kàn nado ze Jehovah do otẹn tintan mẹ. Eyin a nọ flin gbemima Jesu tọn nado hẹn homẹ Otọ́ etọn tọn hùn, a na yawu yí nujikudo do gbẹ́ nudepope he a yọnẹn dọ e na hẹn homẹgble Jiwheyẹwhe dai, yèdọ mẹlọ he a klan dewe do wiwe na.—Mat. 4:10; Joh. 8:29.

10. Nawẹ Jehovah na gọalọna we to baptẹm towe godo nado to Jesu ‘hodo zọnmii’ gbọn?

¹⁰ Nugbo lọ wẹ yindọ whlepọn po mẹtẹnpọn lẹ po nọ hùn dotẹnmẹ dote na we nado dohia dọ a ko magbe nado to Jesu ‘hodo zọnmii.’ Dile a to mọwà, a gán deji dọ Jehovah na gọalọna we. Biblu dọmọ: “Nugbonọ wẹ Jiwheyẹwhe, podọ ewọ ma na dike mì ni yin whiwhlepọn zẹ̀ nuhe mì sọgan doakọnna go, ṣigba eyin whlepọn lọ wá, ewọ nasọ deali de, na mìwlẹ nido penugo nado doakọnna ẹn.”—1 Kọl. 10:13.

LEHE MÍ GÁN TO JESU HODO ZỌNMII DO

11. Aliho titengbe tẹ mẹ wẹ mí gán to Jesu hodo zọnmii te? (Sọ pọ́n yẹdide lọ.)

¹¹ Jesu yin zohunhunnọ, bosọ nọ hodẹ̀ hlan Jehovah whẹwhẹ. (Luku 6:12) Nado dọ hójọhó, dopo to aliho dagbe hugan he mẹ a gán zindonukọn nado to Jesu hodo to baptẹm towe godo te lẹ mẹ wẹ nado wleawuna aṣa lọ nado nọ wà nuhe na dọ̀n we sẹpọ Jehovah dogọ lẹ. Biblu dọmọ: “Sọgbe hẹ obá he mẹ mí ko yinukọn jẹ, mì gbọ mí ni nọ to zọnlin jijlọ zìn sọgbe hẹ aliho nuyiwa tọn ehe dopolọ.” (Flp. 3:16) Sọn ojlẹ de mẹ jẹ devo mẹ, a na sè numimọ mẹmẹsunnu po mẹmẹyọnnu lẹ po tọn he ko dovivẹnu nado gbloada na  sinsẹ̀nzọn wiwe yetọn. Vlavo yé yì Wehọmẹ Wẹndagbe-Jlatọ Ahọluduta lọ tọn lẹ tọn kavi sẹtẹn yì fie nuhudo sù te de. Eyin a gán ze yanwle mọnkọ de donukọnna dewe, bo wà nuhe go a pé lẹpo nado wàmọ. Omẹ Jehovah tọn lẹ nọ to jejeji nado gbloada na lizọnyizọn yetọn. (Owalọ 16:9) Bọ eyin to alọnu a ma penugo nado wàmọ lo? Ma lẹndọ mẹhe penugo bo wàmọ lẹ yiaga hú emi blo. Alewezun he họ̀n Klistiani lẹ te nọ biọ akọndonanu. (Mat. 10:22) Ma yí nukunpẹvi do pọ́n lehe e yin nujọnu sọ nado nọ sẹ̀n Jehovah sọgbe hẹ nugopipe po ninọmẹ towe lẹ po blo. Aliho titengbe de niyẹn nado to Jesu hodo zọnmii to baptẹm towe godo.—Salm. 26:1.

12, 13. Etẹwẹ a gán wà eyin zohunhun towe jẹ didepo ji? (1 Kọlintinu lẹ 9:16, 17) (Sọ pọ́n apotin lọ “ Gbọṣi Alewezun lọ Mẹ.”)

¹² Etẹwẹ lo eyin na ojlẹ de a do numọtolanmẹ lọ dọ odẹ̀ towe lẹ kavi lizọnyizọn towe wá lẹzun nuwiwa mọmọ tọn lẹ? Bọ eyin a masọ nọ mọ awuvivi to Biblu hihia towe mẹ dile a nọ wà do to ojlẹ de mẹ wayi lo? Eyin ninọmẹ mọnkọ lẹ sọawuhia to baptẹm towe godo, a wá tadona kọ̀n dọ gbigbọ Jehovah tọn ko jo emi do blo. Gbẹtọvi mapenọ wẹ a yin, podọ numọtolanmẹ towe lẹ gán nọ diọ. Eyin zohunhun towe jẹ didepo ji, lẹnnupọndo apajlẹ apọsteli Paulu tọn ji. Mahopọnna dọ e tẹnpọn nado hodo apajlẹ Jesu tọn, e yọnẹn dọ to whedelẹnu, e ma na nọ tindo zohunhun dile e nọ yindo to ojlẹ devo lẹ mẹ. (Hia 1 Kọlintinu lẹ 9:16, 17.) E dọmọ: “Eyin yẹn tlẹ wà ẹ jẹagọdo ojlo ṣie, yẹn gbẹsọ tindo họ̀nkọnsi-zọ́n de he ko yin zizedo alọmẹ na mi.” To hogbe devo mẹ, Paulu magbe nado hẹn lizọnyizọn etọn di mahopọnna numọtolanmẹ he e do to ojlẹ lọ mẹ lẹ.

¹³ To aliho dopolọ mẹ, ma nọ ze nudide towe lẹ sinai do numọtolanmẹ mape tọn  towe lẹ kẹdẹ ji blo. Magbe nado wà nuhe sọgbe mahopọnna numọtolanmẹ towe lẹ. Eyin a zindonukọn nado to nudagbe lẹ wà, to nukọn mẹ numọtolanmẹ towe lẹ gán diọ. Depope he whẹho lọ yin, aṣa gbigbọmẹ tọn dagbe lẹ go hinhẹn na gọalọna we nado to Jesu hodo zọnmii to baptẹm towe godo. Eyin yisenọ hatọ towe lẹ mọ akọndonanu towe to sinsẹ̀nzọn Jehovah tọn mẹ, enẹ na na tuli yelọsu.—1 Tẹs. 5:11.

“MÌ NỌ TẸ́N MÌDE PỌ́N . . . MÌ NỌ DINDONA MÌDE”

14. Etẹwẹ a dona nọ gbeje pọ́n whẹwhẹ, podọ etẹwutu? (2 Kọlintinu lẹ 13:5)

¹⁴ E nasọ gọalọ ga eyin a nọ gbeje dewe pọ́n whẹwhẹ to baptẹm towe godo. (Hia 2 Kọlintinu lẹ 13:5.) Sọn ojlẹ de mẹ jẹ devo mẹ, nọ gbeje gbẹzan po nuyiwa towe lẹ po pọ́n, nado yọnẹn eyin a nọ hodẹ̀ egbesọegbesọ, nọ hia Biblu bo nọ plọn ẹn, nọ yì opli lẹ bosọ nọ doalọ to lizọnyizọn lọ mẹ. Tẹnpọn bo dín aliho lẹ nado nọ duvivi nuwiwa ehelẹ tọn bosọ nọ mọaleyi sọn yé mẹ dogọ. Taidi apajlẹ, nọ kàn kanbiọ ehelẹ sè dewe: ‘Be n’gán basi zẹẹmẹ nuplọnmẹ dodonu tọn Biblu tọn lẹ tọn na mẹdevo lẹ ya? Be aliho delẹ tin he mẹ n’gán hẹn lizọnyizọn ṣie zun awuvivinu te dogọ ya? Obá tẹ mẹ wẹ odẹ̀ ṣie lẹ nọ yì nuagokun lẹ ji jẹ, podọ be yé nọ dohia dọ n’deji do Jehovah go mlẹnmlẹn ya? Be n’nọ yì opli Klistiani tọn lẹ whẹwhẹ ya? Nawẹ n’gán hẹn todidoai po mahẹ tintindo to opli lẹ ji ṣie po pọnte dogọ gbọn?’

15, 16. Etẹwẹ a plọn sọn numimọ mẹmẹsunnu de tọn mẹ na nuhe dù avùnteninọ sọta mẹtẹnpọn?

¹⁵ A nasọ wà dagbe nado nọ yí ahundopo do gbeje dewe pọ́n na nuhe dù awugbopo towe lẹ. Mẹmẹsunnu de he nọ yin Robert dọ numimọ de he zinnudo nuagokun ehe ji, e dọmọ: “Whenue n’do nudi owhe 20, n’do azọ́n whenu-gli tọn de. Gbèdopo to azọ́n godo, azọ́n-gbẹ́ ṣie yọnnu de basi oylọna mi nado wá owhé etọn gbè. E dọna mi dọ míwu omẹ awe lẹ kẹdẹ wẹ na to owhé lọ gbè, podọ mí na ‘dugbẹ̀.’ To tintan whenu, n’na whẹjijọ kúkú de, amọ́ n’wá gbẹ́ to godo mẹ bo basi zẹẹmẹ nuhewutu wẹ tọn.” Robert duto mẹtẹnpọn lọ ji, podọ enẹ jẹna pipà. Amọ́ to godo mẹ, e wá vọ́ nulẹnpọn do nujijọ lọ ji bo mọdọ emi gán ko didẹ ninọmẹ lọ to aliho he pọnte de mẹ. E yigbe dọmọ: “N’ma yawu gbẹ́ nuzedonukọnnamẹ lọ po nujikudo po dile Josẹfu wà do to whẹho asi Pọtifali tọn mẹ. (Jen. 39:7-9) Na nugbo tọn, e paṣạ mi dọ e vẹawuna mi sọmọ nado gbẹ́. Nujijọ ehe gọalọna mi nado mọdọ n’dona hẹn haṣinṣan ṣie hẹ Jehovah lodo dogọ.”

 ¹⁶ E gán wà dagbe na we eyin a gbeje dewe pọ́n dile Robert wà do. Eyin a tlẹ penugo bo nọavùnte sọta mẹtẹnpọn de, kanse dewe dọ, ‘Ojlẹ nẹmu wẹ e yí to asi e nado dọ lala?’ Eyin a mọdọ emi dona basi vọjlado to adà delẹ mẹ, ma gblewhẹdo dewe blo. Homẹ towe ni hùn dọ emi doayi awugbopo lọ go todin. Nọ hodẹ̀ gandego whẹwhẹ, bo ze afọdide lẹ nado na huhlọn gbemima towe nado nọgbẹ̀ sọgbe hẹ nujinọtedo walọ dagbe tọn Jehovah tọn lẹ.—Salm. 139:23, 24.

17. Nawẹ nuhe jọ do Robert go gando yinkọ Jehovah tọn go gbọn?

¹⁷ Nudevo tin he mí gán plọn sọn numimọ Robert tọn mẹ. E yidogọ dọmọ: “Whenue n’gbẹ́ oylọ-basinamẹ azọ́n-gbẹ́ ṣie tọn godo, e dọmọ, ‘A dín na tẹnpọn lọ!’ N’kanse e nuhewutu e do dọ mọ. E basi zẹẹmẹ dọ họntọn emitọn de he ko yin Kunnudetọ wayi dọna emi dọ jọja Kunnudetọ lẹpo wẹ nọ zan gbẹzan awe, podọ bleun wẹ yé na jogbe eyin dotẹnmẹ lọ hundote. Enẹwutu, e dọna họntọn etọn dọ emi na tẹ́n yẹnlọsu pọ́n. Lehe homẹ ṣie hùn do sọ dọ n’ma kọnmasin do yinkọ Jehovah tọn go!”

18. Etẹwẹ a magbe nado wà to baptẹm towe godo? (Sọ pọ́n apotin lọ “ Hosọ Debọdo-Dego Delẹ He A Na Yiwanna.”)

¹⁸ Whenue a klan dewe do wiwe na Jehovah bo yí baptẹm, a dohia dọ emi jlo na klan yinkọ etọn do wiwe eyin etlẹ to kínni bo to kanna. Podọ, a gán kudeji dọ Jehovah yọ́n whlepọn he pehẹ a te lẹ gọna mẹtẹnpọn he ji a to dùdù te lẹ. E na dona vivẹnudido towe lẹ nado hẹn nugbonọ-yinyin towe go. Deji dọ gbọn gbigbọ wiwe etọn gblamẹ, e gán na we huhlọn nado wàmọ. (Luku 11:11-13) Po alọgọ Jehovah tọn po, a na penugo nado to Jesu hodo zọnmii to baptẹm towe godo.