NUYIWA homẹdagbe tọn nọ vọ́ jidenamẹ bosọ nọ miọnhomẹnamẹ taun! Mí nọ yọ́n pinpẹn etọn eyin mẹde hò mítọn pọ́n. To whenuena e yindọ dopodopo mítọn wẹ e nọ vivi na eyin yè do homẹdagbe hia mí, nawẹ mí sọgan wleawuna jẹhẹnu dagbedagbe ehe gbọn?

Homẹdagbe nọ bẹ ojlo nujọnu tọn tintindo to dagbemẹninọ mẹdevo lẹ tọn mẹ hẹn, yèdọ ojlo de he nọ sọawuhia to hodidọ mítọn po nuhe mí nọ wà nado gọalọna yé lẹ po mẹ. Na homẹdagbe nọ biọ nuyiwa wutu, e bẹ nususu hẹn hú jijọ dagbe po mẹtọnhopọn nukunta tọn po didohia poun. Owanyi po awuvẹmẹ sisosiso po wẹ nọ whànmẹ nado do homẹdagbe nujọnu tọn hia. Humọ, homẹdagbe yin adà sinsẹ́n gbigbọ wiwe Jiwheyẹwhe tọn de he Klistiani lẹ yin tulina nado wleawuna. (Gal. 5:22, 23) Na mí dona wleawuna homẹdagbe wutu, mì gbọ mí ni gbadopọnna lehe Jehovah po Visunnu etọn po do jẹhẹnu ehe hia, gọna lehe mí sọgan hodo apajlẹ yetọn do.

Jehovah yin homẹdagbenọ bosọ nọ hò mẹlẹpo tọn pọ́n, kakajẹ “mayọndagbenọ lẹ po mẹylankan lẹ po” ji. (Luku 6:35) Di apajlẹ, e “nọ hẹn owhè etọn zẹ̀ do mẹylankan lẹ po mẹdagbe lẹ po ji bosọ nọ hẹn jikun ja do dodonọ lẹ po mawadodonọ lẹ po ji.” (Mat. 5:45) Abajọ, mẹhe ma kẹalọyi Jehovah taidi Mẹdatọ yetọn lẹ lọsu tlẹ nọ duvivi nuhe ewọ gbọn homẹdagbe dali wleawu etọn na mí nado nọgbẹ̀ lẹ tọn, podọ yé sọgan tindo ayajẹ jẹ obá de mẹ.

Jehovah do homẹdagbe ayidego tọn hia Adam po Evi po. Ojlẹ kleun de to whenue Adam po Evi po waylando godo, yé “tọ̀ amà ovòtin tọn lẹ dopọ bo yí do ṣinyọ́n omẹ́ yetọn.” Ṣigba, Jehovah yọnẹn dọ yé na wá do hudo nusisọ́ he jẹ de tọn nado sọgan nọgbẹ̀ to gbonu jipa Edẹni tọn, fie aigba he yin dẹ̀hodo todin lọ wú “owùn po tẹwùn po” jẹgbonu te. Enẹwutu, Jehovah yí homẹdagbe do penukundo nuhudo yetọn go gbọn “tewu ayú tọn lẹ” bibasi na yé dali.—Jen. 3:7, 17, 18, 21.

Dile Jehovah tlẹ nọ do homẹdagbe hia “mẹylankan lẹ po mẹdagbe lẹ po,” devizọnwatọ nugbonọ etọn lẹ wẹ e nọ wàmọ na hugan. Di apajlẹ, to ojlẹ yẹwhegán Zekalia tọn mẹ, e vẹna angẹli de dọ azọ́n tẹmpli lọ vivọgbá tọn to Jelusalẹm doalọte. Jehovah dotoaina ahunmẹdunamẹnu angẹli lọ tọn lẹ bo yí “homẹdagbe po hogbe homẹmiọnnamẹ tọn lẹ po” do gblọnhona ẹn. (Zek. 1:12, 13) Aliho dopolọ mẹ wẹ Jehovah yinuwa hẹ Elija te. To ojlẹ de mẹ, yẹwhegán lọ jẹflumẹ sọmọ bọ e vẹ̀ Jehovah dọ ewọ ni gbọ bo hù emi. Jehovah doayi numọtolanmẹ Elija tọn lẹ go bo do angẹli de hlan nado na ẹn huhlọn. Humọ, Jiwheyẹwhe sọ hẹn ẹn deji dọ ewọ ma tin edeṣo. To hogbe homẹdagbe tọn enẹlẹ sisè po alọgọ he e do nuhudo etọn po mimọyi godo, Elija penugo nado zindonukọn to azọ́ndenamẹ etọn mẹ. (1 Ahọ. 19:1-18) Devizọnwatọ  Jiwheyẹwhe tọn tẹwẹ do homẹdagbe ayidego tọn Jehovah tọn nkọ hia hugan?

Whenue Jesu to aigba ji, ewọ yin yinyọnẹn taidi homẹdagbenọ podọ mẹtọnhopọntọ. E ma nọ yinuwa po kanyinylan po kavi duklunọ do mẹdevo lẹ ji gbede. E dọ po awuvẹmẹ po dọmọ: “Mì wá dè e, mì mẹhe tin to magbọjẹ mẹ bọ yè doagban pinpẹn na lẹpo, yẹn nasọ fakọna mì. . . . Na zẹgẹ ṣie bọawu bọ agbàn ṣie sọ fua.” (Mat. 11:28-30) Na homẹdagbe Jesu tọn wutu, gbẹtọgun lẹ nọ hodo e yì fidepope he e yì. Na “onú yetọn sọ wàlẹblanuna” ẹn wutu, ewọ na yé núdùdù, hẹnazọ̀ngbọna yé, bosọ plọn yé “nususu” gando Otọ́ etọn go.—Malku 6:34; Mat. 14:14; 15:32-38.

Nukunnumọjẹnumẹ gọna wuntuntun he Jesu nọ yizan to nuyiwa etọn hẹ mẹdevo lẹ mẹ yin kunnudenu de dọ ewọ nọ do homẹdagbe hia taun. Na nugbo tọn, mahopọnna lehe obiọ lọ ma sọgbe sọ, Jesu yí “homẹdagbe” do yí mẹhe yí ahundopo do dín in mọ lẹpo. (Luku 9:10, 11) Di apajlẹ, ewọ ma gblewhẹdo nawe he to obu ji de, mẹhe yin mawé ṣogan bo doalọ awugbó etọn go po linlẹn lọ po dọ hùndidi emitọn na gbọ. (Lev. 15:25-28) Na Jesu vẹawu nawe he to yaji sọn owhe 12 die lọ wutu, e dọna ẹn dọmọ: “Viyọnnu ṣie, yise towe ko hẹn we jẹgangan. Yì to jijọho mẹ, bo yin azọ̀nhẹngbọna sọn azọ̀n sinsinyẹn towe mẹ.” (Malku 5:25-34) Homẹdagbe ayidego tọn nankọ die!

To apajlẹ he yin nùdego wayi lẹ mẹ, mí mọdọ homẹdagbe nujọnu tọn nọ yin didohia gbọn nuyiwa dali. Jesu dohia dọ enẹ yin nujọnu to apajlẹ Samalianu kọmẹnu dagbe lọ tọn mẹ. Dile etlẹ yindọ Ju lẹ po Samalianu lẹ po ma nọ jẹpọ, dawe Samalianu lọ do lẹblanu hia dawe he jaguda lẹ bẹ onú etọn lẹpo bo hò e bosọ jo e do kúdaa-gbẹ̀daa to aliji lọ. Homẹdagbe whàn Samalianu lọ nado yinuwa. E klọ apà dawe lọ tọn lẹ bosọ ze e sọyi hotẹli pẹvi de. Enẹgodo, e sú akuẹ na nukunpedonugotọ hotẹli pẹvi lọ tọn nado penukundo dawe he gbleawu lọ go, bo tlẹ dọ dọ emi na suahọ nudepope he sọ yin zinzan humọ tọn.—Luku 10:29-37.

Gbọnvona nuyiwa, homẹdagbe sọgan sọ yin didohia gbọn ohó mẹtọnhopọn tọn he nọ na tulimẹ lẹ didọ dali. Abajọ, Biblu dọ dọ “magbọjẹ he to ahun gbẹtọ tọn mẹ nọ hẹn agbàn pẹ̀n ẹn, ṣigba, ohó dagbe nọ vọ́ zodolanmẹna ẹn.” (Howh. 12:25) Mí sọgan hẹn mẹdevo lẹ lodo eyin homẹdagbe po dagbewà po nọ whàn mí nado dọ nuhe nọ jlọmẹdote lẹ na yé. * Ohó homẹdagbe tọn mítọn lẹ na dohia dọ mí nọ hò yetọn pọ́n. Gbọnmọ dali, tulinamẹ he yé mọyi na gọalọna yé nado pehẹ whlepọn gbẹ̀mẹ tọn lẹ.—Howh. 16:24.

Na mí yin didá “to apajlẹ Jiwheyẹwhe tọn mẹ” wutu, mímẹpo wẹ sọgan wleawuna homẹdagbe. (Jen. 1:27) Di apajlẹ, awhàngán Lomu tọn Juliu, mẹhe sin anademẹ glọ Paulu zingbejizọnlin te yì Lomu, “do homẹdagbe hia [apọsteli lọ] taun bo na ẹn dotẹnmẹ nado yì họntọn etọn lẹ dè bosọ duvivi nukunpedomẹgo yetọn tọn” to tòdaho Sidoni tọn mẹ. (Owalọ 27:3) To ojlẹ de godo, mẹhe nọ nọ̀ lopo Malita tọn ji lẹ do “homẹdagbe vonọtaun” hia Paulu po mẹdevo lẹ po tlolo he ohún siọ do yé. Yé tlẹ flọ miyọ́n na mẹhe adán gbò lọ lẹ nido hú miyọ́n. (Owalọ 28:1, 2) Ṣigba, dile nuyiwa yetọn lẹ tlẹ jẹna pipà, homẹdagbe bẹ nususu hẹn hú nuyiwa to aliho he jọmẹ mẹ to ojlẹ delẹ mẹ poun.

Nado hẹn homẹ Jiwheyẹwhe tọn hùn to gigọ́ mẹ, mí dona hẹn homẹdagbe zun apadewhe gbẹtọ-yinyin po aliho gbẹninọ tọn mítọn po tọn. Abajọ Jehovah do dọna mí nado  yí homẹdagbe “dogo.” (Kol. 3:12) Ṣigba, e ma nọ bọawuna mí to whelẹponu nado hẹn jẹhẹnu Jiwheyẹwhe tọn ehe zun apadewhe gbẹtọ-yinyin mítọn tọn. Etẹwutu? Mí sọgan nọ whleawu nado do homẹdagbe hia na winyan, ayimajai, nukundiọsọmẹ kavi na ṣejannabi he pò to ahun mítọn mẹ wutu. Etomọṣo, mí sọgan duto aliglọnnamẹnu enẹlẹ ji, eyin mí nọ ganjẹ gbigbọ Jehovah tọn go bosọ nọ hodo apajlẹ homẹdagbe etọn tọn.—1 Kọl. 2:12.

Be mí sọgan nọdoayi adà he mẹ e biọ dọ mí ni do homẹdagbe hia te dogọ lẹ go ya? Mí dona nọ kanse míde dọ: ‘Be n’nọ yí awuvẹmẹ do dotoaina mẹdevo lẹ ya? Be n’nọ yawu doayi nuhudo yetọn go ya? Whetẹnu wẹ n’do homẹdagbe hia mẹhe ma yin hagbẹ whẹndo tọn kavi ma yin họntọn vivẹ́ de gbọngodo?’ Enẹgodo, mí sọgan ze yanwle lẹ dai, di apajlẹ nado nọ tẹnpọn bo yọ́n mẹhe lẹdo mí lẹ dogọ, titengbe to agun mẹ. Gbọnmọ dali, mí sọgan doayi ninọmẹ po nuhudo yetọn lẹ po go dogọ. Humọ, mí dona nọ tẹnpọn nado do homẹdagbe hia mẹdevo lẹ dile mí na ko jlo dọ yé ni wà na mí do eyin mí to otẹn yetọn mẹ. (Mat. 7:12) To godo mẹ, Jehovah na dona vivẹnudido mítọn lẹ nado wleawuna homẹdagbe, eyin mí nọ biọ alọgọ etọn.—Luku 11:13.

Apọsteli Paulu slẹ “homẹdagbe” do nue dohiagona ẹn taidi lizọnyizọnwatọ Jiwheyẹwhe tọn lẹ mẹ. (2 Kọl. 6:3-6) Gbẹtọ lẹ nọ jlo na dọnsẹpọ Paulu, na e nọ do ojlo hia to yé mẹ gbọn nuyiwa po ohó homẹdagbe tọn etọn lẹ po gblamẹ. (Owalọ 28:30, 31) Mọdopolọ, nuyiwa homẹdagbe tọn mílọsu tọn lẹ sọgan dọ̀n gbẹtọ lẹ wá nugbo lọ mẹ. Eyin mí nọ do homẹdagbe hia mẹlẹpo, etlẹ yin mẹhe nọ diọnukunsọ mí lẹ, mí sọgan whàn ahun yetọn bo de wangbẹna yetọn sẹ̀. (Lom. 12:20) To godo mẹ, owẹ̀n Biblu tọn tlẹ sọgan wá dọ̀n yé.

To Paladisi aigba ji tọn he ja lọ mẹ, homẹ gbẹtọvi madosọha he na yin finfọnsọnku lẹ tọn na hùn nado duvivi homẹdagbe nujọnu tọn, vlavo whla tintan. Pinpẹn-nutọn-yinyọnẹn na whàn yelọsu nado do homẹdagbe hia mẹdevo lẹ. To whenẹnu, mẹdepope he gbẹ́ nado do homẹdagbe hia kavi nado gọalọna mẹdevo lẹ ma na mọtẹn to Ahọluduta Jiwheyẹwhe tọn mẹ. To alọ devo mẹ, mẹhe Jiwheyẹwhe kẹalọyi nado nọgbẹ̀ kakadoi lẹ na nọ do owanyi po homẹdagbe po hia ode awetọ. (Salm. 37:9-11) Lehe hihọ́ po jijọho po na tin to aihọn whenẹnu tọn mẹ do sọ! Ṣigba, whẹpo ojlẹ jiawu enẹ nado wá, nawẹ mí sọgan mọaleyi todin sọn homẹdagbe didohia mẹ gbọn?

Biblu dọmọ: “Homẹdagbenọ nọ hẹn ale wá na ede.” (Howh. 11:17) Gbẹtọ lẹ nọ dọnsẹpọ mẹhe yin homẹdagbenọ bo nọ jlo na do homẹdagbe hia ewọ lọsu. Jesu dọmọ: “Nujlẹnu he mì to yíyí do jlẹ namẹ wẹ yé na yí do jlẹ na mì ga.” (Luku 6:38) Enẹwutu, e nọ bọawuna gbẹtọ homẹdagbenọ nado jihọntọn dagbe lẹ bosọ to họntọn yetọn yin zọnmii.

Apọsteli Paulu na tuli Klistiani Efesu tọn lẹ nado “lẹzun homẹdagbenọ hlan ode awetọ bo gọ́ na awuvẹmẹ sisosiso bosọ nọ jona ode awetọ sọn ojlo mẹ wá.” (Efe. 4:32) Agun de nọ mọaleyi taun eyin e bẹ Klistiani awuvẹmẹtọ he nọ do homẹdagbe hia bosọ nọ gọalọna ode awetọ lẹ hẹn. Omẹ mọnkọ lẹ ma nọ yí hogbe awugblenamẹ tọn, homọdọdomẹgo kavi mẹṣanko tọn lẹ zan gbede. Kakati nado fúnfún mẹnudidọ mẹhẹngble tọn lẹ pé, yé nọ dovivẹnu nado yí odẹ́ yetọn zan nado gọalọna mẹdevo lẹ. (Howh. 12:18) Gbọnmọ dali, agun lọ nọ vùn to gbigbọ-liho.

Mọwẹ, homẹdagbe nọ yin didohia to ohó po nuyiwa po mẹ. Eyin mí wàmọ, mí nọ hodo apajlẹ owanyi po alọtútlú Jehovah tọn po. (Efe. 5:1) Taidi kọdetọn de, mí nọ hẹn agun mítọn lẹ lodo bosọ nọ dọ̀n mẹdevo lẹ wá sinsẹ̀n-bibasi wiwe-ṣeke mẹ. Mì gbọ mí ni yin yinyọnẹn to whelẹponu taidi gbẹtọ homẹdagbenọ!