HOSỌ OPLỌN TỌN 47
A Dike Nudepope Klan We sọn Jehovah Go Blo
“Hiẹ go wẹ yẹn dejido, Jehovah E.”—SALM. 31:14.
OHÀN 122 Nọte Gligli, Masẹafọ!
BLADOPỌ a
1. Nawẹ mí yọnẹn gbọn dọ Jehovah jlo dọ mí ni dọnsẹpọ emi?
JEHOVAH basi oylọ na mí nado dọnsẹpọ ewọ. (Jak. 4:8) E jlo nado yin Jiwheyẹwhe mítọn, Otọ́ mítọn podọ Họntọn mítọn. E nọ na gblọndo odẹ̀ mítọn lẹ tọn bosọ nọ gọalọna mí to ojlẹ awusinyẹn tọn lẹ mẹ. Podọ, e nọ yí titobasinanu etọn zan nado plọnnu mí bosọ basi hihọna mí. Amọ́, etẹwẹ mí gán wà nado dọnsẹpọ Jehovah?
2. Nawẹ mí gán dọnsẹpọ Jehovah gbọn?
2 Mí gán dọnsẹpọ Jehovah eyin mí nọ hodẹ̀ hlan ẹn, nọ hia Ohó etọn bosọ nọ lẹnayihamẹpọn deji. Dile mí to mọwà, ahun mítọn nọ gọ́ na owanyi po pinpẹn-nutọn-yinyọnẹn po na ewọ. Mí nọ yin whinwhàn nado setonuna ewọ bosọ na ẹn pipà he e jẹna. (Osọ. 4:11) Lehe mí to Jehovah yọnẹn sọ, mọ wẹ mí nọ dejido ewọ po titobasinanu he e wleawuna nado gọalọna mí lọ po go dogọ do niyẹn.
3. Nawẹ Lẹgba nọ tẹnpọn nado klan mí sọn Jehovah go gbọn, podọ etẹwẹ na gọalọna mí ma nado jo Jiwheyẹwhe po titobasinanu etọn po do gbede? (Salmu lẹ 31:13, 14)
3 Amọ́, Lẹgba nọ tẹnpọn nado klan mí sọn Jehovah go, titengbe whenue mí to pipehẹ whlepọn lẹ. Wlẹnwin tẹwẹ e nọ yizan? Vudevude, e nọ tẹnpọn nado dekanpona jidide mítọn to Jehovah po titobasinanu etọn po mẹ. Amọ́, mí gán nọavùnte sọta wlẹnwin etọn lẹ. Eyin yise mítọn lodo bọ jidide mítọn to Jehovah mẹ dolido, mí ma na jo Jiwheyẹwhe mítọn po titobasinanu etọn po do.—Hia Salmu lẹ 31:13, 14.
4. Etẹwẹ mí na gbadopọnna to hosọ ehe mẹ?
4 To hosọ ehe mẹ, mí na gbadopọnna avùnnukundiọsọmẹnu atọ̀n delẹ he gán wá sọn gbonu agun lọ tọn; dopodopo yetọn gán dekanpona jidide mítọn to Jehovah po titobasinanu etọn po mẹ. Nawẹ avùnnukundiọsọmẹnu ehelẹ gán klan mí sọn Jehovah go gbọn? Podọ, etẹwẹ mí gán wà nado nọavùnte sọta vivẹnudido Satani tọn lẹ?
WHENUE MÍ PEHẸ AWUSINYẸNNAMẸNU LẸ
5. Nawẹ awusinyẹnnamẹnu lẹ gán dekanpona jidide mítọn to Jehovah po titobasinanu etọn po mẹ gbọn?
5 To whedelẹnu, mí nọ pehẹ awusinyẹnnamẹnu lẹ taidi nukundiọsọmẹ whẹndo tọn kavi azọ́n gán gble do mí. Nawẹ awusinyẹnnamẹnu mọnkọ lẹ gán dekanpona jidide mítọn to titobasinanu Jehovah tọn mẹ bosọ klan mí sọn ewọ go gbọn? Eyin mí to akọndona awusinyẹnnamẹnu de na ojlẹ dindẹn, mí gán hẹn todido bu kavi jẹflumẹ petepete. Satani nọ yí dotẹnmẹ enẹlẹ zan bo nọ tẹnpọn nado sisẹ́ mí nado do ayihaawe gando owanyi Jehovah tọn na mí go. Lẹgba jlo dọ mí ni nọ lẹndọ Jehovah kavi titobasinanu Etọn wẹ yin adọ̀ yajiji mítọn lẹ tọn. Onú mọnkọ de wẹ jọ do Islaelivi delẹ go to Egipti. To tintan whenu, yé yise dọ Jehovah wẹ de Mose po Aalọn po nado whlẹn yé sọn kanlinmọgbenu. (Eks. 4:29-31) Amọ́ to nukọn mẹ, whenue Falo hẹn nulẹ vẹawuna yé, yé dowhẹ Mose po Aalọn po na nuhahun yetọn lẹ bo dọna yé dọmọ: “Mì ko hẹn Falo po devizọnwatọ etọn lẹ po nado gbẹwanna mí, bọ mì ko sọ ze ohí do alọ yetọn mẹ nado hù mí.” (Eks. 5:19-21) Yé dowhẹ devizọnwatọ nugbonọ Jiwheyẹwhe tọn lẹ. Lehe enẹ blawu do sọ! Eyin a ko to akọndona awusinyẹnnamẹnu lẹ na ojlẹ dindẹn, nawẹ a gán hẹn jidide towe to Jehovah po titobasinanu etọn po mẹ lodo gbọn?
6. Etẹwẹ mí plọn sọn yẹwhegán Habakuku dè na nuhe dù akọndidona awusinyẹnnamẹnu lẹ? (Habakuku 3:17-19)
6 Nọ dọ nuhe to ahun ji na we lẹ na Jehovah to odẹ̀ mẹ bosọ nọ deji dọ ewọ na sè odẹ̀ towe. Yẹwhegán Habakuku pehẹ awusinyẹnnamẹnu susu. E wá jẹ fide bọ e taidi dọ e do ayihaawe eyin vlavo Jehovah to etọn dọ. Enẹwutu, e dọ nuhe to ahun ji na ẹn lẹ na Jehovah to odẹ̀ mẹ. E dọmọ: “Jehovah E, nawẹ yẹn na to awhádo na alọgọ dẹnsọ bọ hiẹ ma na sè? . . . Naegbọn hiẹ do jotẹnna kọgbidinamẹ?” (Hab. 1:2, 3) Jehovah na gblọndo na odẹ̀ ahundopo tọn devizọnwatọ nugbonọ etọn tọn. (Hab. 2:2, 3) Whenue Habakuku lẹnayihamẹpọndo azọ́n whlẹngán tọn Jehovah tọn lẹ ji godo, ayajẹ etọn gọwá. E wá kudeji dọ Jehovah to emitọn dọ, podọ e na gọalọna emi nado doakọnna whlepọn depope. (Hia Habakuku 3:17-19.) Etẹwẹ yin nuplọnmẹ lọ na mí? Whenue a pehẹ awusinyẹnnamẹnu lẹ, nọ hodẹ̀ hlan Jehovah bo nọ dọ numọtolanmẹ towe lẹ na ẹn. Enẹgodo, nọ deji dọ ewọ na sè odẹ̀ towe. Eyin a wàmọ, a gán kudeji dọ Jehovah na na we huhlọn he a do hudo etọn nado doakọnnanu. Podọ eyin a doayi godonọnamẹ etọn go, yise towe na lodo dogọ.
7. Nawẹ hẹnnumẹ Shirley tọn lẹ tẹnpọn nado diọlinlẹnna ẹn gbọn, podọ etẹwẹ gọalọna ẹn nado hẹn yise etọn to Jehovah mẹ go?
7 Nọ hẹn aṣa gbigbọmẹ tọn towe lẹ go. Pọ́n lehe enẹ gọalọna mẹmẹyọnnu Shirley he wá sọn Papouasie-Nouvelle-Guinée do whenue e pehẹ awusinyẹnnamẹnu lẹ. b Whẹndo Shirley tọn yin hẹntọnọ, podọ to whedelẹnu e nọ vẹawuna yé nado mọ núdùdù he pemẹnu. Hẹnnumẹ etọn de tlẹ tẹnpọn nado dekanpona jidide etọn to Jehovah mẹ. E dọmọ: “A nọ dọ dọ gbigbọ wiwe Jiwheyẹwhe tọn to alọgọna we, amọ́ fie wẹ alọgọ lọ te? Whẹndo lọ gbẹ́ yin hẹntọnọ. A nọ to whenu towe hẹngu dọ emi to yẹwhehodọ.” Shirley yigbe dọmọ: “N’kanse dee dọ, ‘Be Jehovah to mítọn dọ nugbonugbo a?’ Enẹwutu, n’hodẹ̀ hlan Jehovah to afọdopolọji bo dọ nuhe lẹn n’te lẹpo na ẹn. N’zindonukọn nado nọ hia Biblu po owe mítọn lẹ po, podọ nado nọ dọyẹwheho bosọ nọ yì opli agun tọn lẹ.” E ma dẹn bọ e doayi e go dọ Jehovah to nukunpedo whẹndo etọn go. Whẹndo etọn ma nọ dọ́ huvẹ, podọ yé sọ do ayajẹ. Shirley dọmọ: “N’mọdọ Jehovah nọ na gblọndo odẹ̀ ṣie lẹ tọn.” (1 Tim. 6:6-8) Eyin hiẹ lọsu nọ tẹdo aṣa gbigbọmẹ tọn towe lẹ go, a ma na dike na awusinyẹnnamẹnu kavi ayihaawe towe lẹ ni klan we sọn Jehovah go.
WHENUE MẸMẸSUNNU AZỌNGBANNỌ LẸ YIN NUYIWA HẸ PO KANYINYLAN PO
8. Etẹwẹ gán jọ do mẹmẹsunnu azọngbannọ he to titobasinanu Jehovah tọn mẹ lẹ go?
8 Kẹntọ mítọn lẹ gán yí linlinnamẹnu lẹ kavi nọtẹn gbẹdido Intẹnẹt ji tọn lẹ zan nado hẹn lalo kavi nudọnamẹ agọ̀ lẹ gbayipe gando mẹmẹsunnu azọngbannọ he to titobasinanu Jehovah tọn mẹ lẹ go. (Salm. 31:13) Mẹmẹsunnu delẹ ko yin wiwle bọ yè sawhẹdokọna yé dọ yé yin sẹ́nhẹngbatọ. Klistiani owhe kanweko tintan whenu tọn lẹ pehẹ ninọmẹ mọnkọ whenue yè sawhẹ lalo dokọna apọsteli Paulu bosọ wle e. Nawẹ yé yinuwa gbọn?
9. Nawẹ Klistiani delẹ yinuwa gbọn whenue apọsteli Paulu yin súsú do gànmẹ?
9 Klistiani owhe kanweko tintan whenu tọn delẹ doalọtena godoninọna apọsteli Paulu whenue e yin súsú do gànmẹ to Lomu. (2 Tim. 1:8, 15) Etẹwutu? Be winyan hù yé na mẹlẹ nọ pọ́n Paulu hlan taidi sẹ́nhẹngbatọ de wutu wẹ ya? (2 Tim. 2:8, 9) Kavi ahun yetọn gbàdo na yé to budi dọ emi lọsu na pehẹ homẹkẹn wutu? Depope he whẹwhinwhẹ́n lọ yin, yí nukun homẹ tọn do pọ́n lehe e na ko ṣí na Paulu. E ko doakọnna awusinyẹnnamẹnu susu bo tlẹ ko ze ogbẹ̀ etọn do owù mẹ na yetọn wutu. (Owalọ 20:18-21; 2 Kọl. 1:8) Mì gbọ mí ni ma taidi mẹhe gbẹ́ Paulu dai whenue e do hudo yetọn te lẹ gbede blo! Etẹwẹ mí dona nọ hẹn do ayiha mẹ whenue mẹmẹsunnu azọngbannọ lẹ pehẹ homẹkẹn?
10. Etẹwẹ mí dona nọ flin whenue mẹmẹsunnu azọngbannọ lẹ pehẹ homẹkẹn, podọ etẹwutu?
10 Nọ flin nuhewutu mí nọ pehẹ homẹkẹn, podọ mẹhe yin adọ̀ etọn. 2 Timoti 3:12 dọmọ: “Mẹhe to jijlo nado nọgbẹ̀ po mẹdezejo na Jiwheyẹwhe po to kọndopọ mẹ hẹ Klisti Jesu lẹpo na yin homẹkẹndo ga.” Enẹwutu, e ma dona nọ paṣa mí dọ mẹmẹsunnu azọngbannọ lẹ wẹ Satani to dindin hugan to mẹgbeyinyan etọn lẹ mẹ. Yanwle etọn wẹ yindọ mẹgbeyinyan enẹlẹ ni hẹn tenọgli yetọn gble bosọ gbàhundona mí.—1 Pita 5:8.
Dile etlẹ yindọ Paulu tin to gẹdẹ mẹ, Onesifọlu yí adọgbigbo do nọgodona ẹn. To egbehe, mẹmẹsunnu po mẹmẹyọnnu mítọn lẹ po nọ nọgodona yisenọ hatọ yetọn he yin súsú do gànmẹ lẹ dile e yin didohia do to wadohia ehe mẹ (Pọ́n hukan 11, 12tọ)
11. Etẹwẹ mí plọn sọn apajlẹ Onesifọlu tọn mẹ? (2 Timoti 1:16-18)
11 Zindonukọn nado nọ nọgodona mẹmẹsunnu towe lẹ po nugbonọ-yinyin po. (Hia 2 Timoti 1:16-18.) Mẹmẹsunnu owhe kanweko tintan whenu tọn de he nọ yin Onesifọlu yinuwa to aliho he gbọnvo mẹ whenue Paulu to gànmẹ. “Winyan gẹdẹ gàntọ tọn [Paulu tọn] lẹ tọn ma hù i.” Kakatimọ, Onesifọlu dín Paulu, podọ to whenue e mọ ẹn, e dín aliho yọ́n-na-yizan lẹ nado nọgodona ẹn. Gbọnmọ dali, Onesifọlu ze ogbẹ̀ ede tọn do owù mẹ. Etẹwẹ mí plọn sọn ehe mẹ? Mí ma dona nọ dike na obu gbẹtọ tọn ni gbàhundona mí kavi glọnalina mí nado nọgodona mẹmẹsunnu mítọn he to pipehẹ homẹkẹn lẹ. Kakatimọ, mì gbọ mí ni nọ yiavùnlọna yé bosọ nọ gọalọna yé. (Howh. 17:17) Yé do hudo owanyi po godonọnamẹ mítọn po tọn.
12. Etẹwẹ mí plọn sọn mẹmẹsunnu po mẹmẹyọnnu mítọn Russie tọn lẹ po dè?
12 Lẹnnupọndo lehe mẹmẹsunnu po mẹmẹyọnnu mítọn Russie tọn lẹ po nọ wá alọgọ na yisenọ hatọ vivẹ́ yetọn he yin súsú do gànmẹ lẹ do ji. Whenue delẹ to yé mẹ yin zize yì owhẹ̀ nukọn, mẹmẹsunnu po mẹmẹyọnnu susu po wẹ nọ wá whẹdatẹn lọ nado nọgodona yé. Etẹwẹ mí plọn sọn ehe mẹ? Whenue owhẹ̀ agọ̀ yin sisadokọna mẹmẹsunnu azọngbannọ lẹ, bọ yé yin wiwle kavi yin homẹkẹndo, ahun towe ni ma nọ gbàdo blo. Nọ hodẹ̀ na yé, nọ penukundo hagbẹ whẹndo tọn yetọn lẹ go, bo nọ dín aliho yọ́n-na-yizan devo lẹ nado nọgodona yé.—Owalọ 12:5; 2 Kọl. 1:10, 11.
WHENUE MÍ PEHẸ MẸṢANKO
13. Nawẹ mẹṣanko gán dekanpona jidide mítọn to Jehovah po titobasinanu etọn po mẹ gbọn?
13 Hẹnnumẹ mayisenọ, azọnwatọgbẹ́ kavi klasigbẹ́ mítọn lẹ gán nọ ṣàn mí kò na azọ́n yẹwhehodidọ tọn mítọn kavi na mí nọ nọgbẹ̀ sọgbe hẹ nujinọtedo walọdagbe tọn Jehovah tọn he yiaga lẹ wutu. (1 Pita 4:4) Yé gán nọ dọna mí dọ: “A jọmẹ taun, amọ́ sinsẹ̀n towe yin hẹngogonọ, podọ aihọn lọ ko hunnukun hú mọ.” Mẹdelẹ gán nọ mọhodọdo mí go na aliho he mẹ mí nọ yinuwa hẹ mẹdesẹsọn agun mẹ lẹ te, bo nọ dọ dọ: “Nawẹ mì gán dọ dọ mì yiwanna mìdelẹ gbọn”? Hodidọ ehelẹ nkọ gán nọ fọ́n ayihaawe dote to ahun mítọn mẹ. Mí gán jẹ kinkanse míde ji dọ: ‘Be nuhe Jehovah to bibiọ to asi e ma ko sinyẹn gbau wá? Be titobasinanu etọn ma nọ hẹn nulẹ sinsinyẹn gbau wá?’ Eyin a to pipehẹ ninọmẹ mọnkọ de, nawẹ a gán tẹdo Jehovah po titobasinanu etọn po go gbọn?
Jobu gbẹ́ nado yí nuhe họntọn lalo etọn he ṣàn ẹn kò lẹ dọ sè. Kakatimọ, e magbe nado hẹn tenọgli etọn na Jehovah go (Pọ́n hukan 14tọ)
14. Nawẹ mí dona nọ yinuwa gbọn whenue mẹdevo lẹ ṣàn mí kò na mí nọ nọgbẹ̀ sọgbe hẹ nujinọtedo Jehovah tọn lẹ wutu? (Salmu lẹ 119:50-52)
14 Magbe nado tẹdo nujinọtedo Jehovah tọn lẹ go. Jobu tẹdo nujinọtedo Jehovah tọn lẹ go mahopọnna dọ mẹlẹ ṣàn ẹn kò. Dopo to họntọn lalo etọn lẹ mẹ tlẹ tẹnpọn nado hẹn ẹn kudeji dọ e ma nọ di nude na Jiwheyẹwhe eyin Jobu nọ hodo nujinọtedo Etọn lẹ kavi lala. (Jobu 4:17, 18; 22:3) Amọ́, Jobu gbẹ́ nado yí lalo mọnkọ lẹ sè. E yọnẹn dọ nujinọtedo Jehovah tọn lẹ gando dagbe po oylan po go wẹ sọgbe, podọ e magbe nado nọgbẹ̀ sọgbe hẹ yé. E ma dike na mẹdevo lẹ ni hẹn tenọgli etọn gble. (Jobu 27:5, 6) Etẹwẹ yin nuplọnmẹ lọ na mí? Ma dike na mẹṣanko ni sisẹ́ we nado do ayihaawe gando nujinọtedo Jehovah tọn lẹ go blo. Lẹnnupọndo apajlẹ hiẹ lọsu tọn ji. Be a ma ko mọ whlasusu dọ nujinọtedo Jehovah tọn lẹ wẹ sọgbe bosọ nọ hẹn ale wá na we ya? Magbe nado nọ nọgodona titobasinanu he nọ tẹdo nujinọtedo enẹlẹ go. To whenẹnu, mẹṣanko depope mahopọnna fie e wá sọn ma na klan we sọn Jehovah go gbede.—Hia Salmu lẹ 119:50-52.
15. Naegbọn Brizit do pehẹ mẹṣanko?
15 Lẹnnupọndo apajlẹ Brizit tọn ji, yèdọ mẹmẹyọnnu de to Inde. Hagbẹ whẹndo tọn etọn lẹ nọ ṣàn ẹn kò na nuyise etọn lẹ wutu. Ojlẹ kleun de to baptẹm etọn godo to 1997, azọ́n gble do asu etọn he yin mayisenọ. Enẹwutu, asu lọ basi dide dọ ewọ, Brizit gọna viyọnnu yetọn lẹ na lẹkọyi mẹjitọ emitọn lẹ pá to tòdaho devo mẹ. Amọ́, Brizit wá pehẹ avùnnukundiọsọmẹnu he tlẹ sọ sinyẹn humọ lẹ. Na azọ́n gble do asu etọn wutu, e to dandannu glọ nado nọ wazọ́n na whenu-gigọ́ nado penukundo whẹndo lọ go. Humọ, agun he sẹpọ yé hugan tin to nudi kilomẹtlu 350 do fie yé te. E blawu dọ asu etọn sin mẹlẹ diọnukunsọ ẹ na nuyise etọn lẹ wutu. Ninọmẹ lọ wá ylan sọmọ bọ whẹndo Brizit tọn to dandannu glọ nado sẹtẹn whladopo dogọ. Enẹgodo, asu etọn kú to ajiji mẹ. To nukọn mẹ, dopo to viyọnnu etọn lẹ mẹ bẹ kansẹẹ-zọ̀n bo kú to whenue e do owhe 12 poun. Nuhe sọ hẹn ninọmẹ lọ vantan wẹ yindọ, hẹnnumẹ Brizit tọn lẹ dowhẹ ẹ na onú ehelẹ he jọ dego. Yé dọ dọ Kunnudetọ Jehovah tọn he Brizit lẹzun wẹ zọ́n bọ adán ehelẹ do gbò e. Etomọṣo, e zindonukọn nado nọ dejido Jehovah go bosọ tẹdo titobasinanu etọn go.
16. Nawẹ Brizit yin didona gbọn na e tẹdo Jehovah po titobasinanu etọn po go wutu?
16 Na fie Brizit nọ nọ̀ dẹn do agun lọ taun wutu, nugopọntọ lẹdo tọn de na ẹn tuli nado nọ dọyẹwheho to lẹdo etọn mẹ bosọ nọ deanana opli lẹ to owhé etọn gbè. To tintan whenu, ahun etọn gbàdo. Amọ́, e hodo ayinamẹ lọ. E nọ dekunnu to lẹdo etọn mẹ, nọ deanana opli lẹ to owhé etọn gbè bosọ nọ de whenu dovo na sinsẹ̀n-bibasi whẹndo tọn hẹ viyọnnu etọn lẹ. Etẹwẹ yin kọdetọn lọ? Brizit penugo bo deanana plọnmẹ Biblu susu, podọ susu yetọn wẹ yí baptẹm. To 2005, e lẹzun gbehosọnalitọ whepoponu tọn. Jidide etọn to Jehovah mẹ gọna nugbonọ-yinyin etọn na titobasinanu lọ yin ahọsuna. Viyọnnu etọn lẹ to Jehovah sẹ̀n po nugbonọ-yinyin po, podọ todin, agun awe wẹ tin to lẹdo enẹ mẹ! Brizit kudeji dọ Jehovah na emi huhlọn nado pehẹ awusinyẹnnamẹnu emitọn lẹ bosọ doakọnna mẹṣanko hagbẹ whẹndo tọn emitọn lẹ tọn.
TO NUGBONỌ YIN ZỌNMII NA JEHOVAH PO TITOBASINANU ETỌN PO
17. Etẹwẹ mí dona magbe nado wà?
17 Satani nọ jlo dọ mí ni lẹndọ Jehovah nọ gbẹ́ mí dai to awusinyẹnnamẹnu mítọn lẹ whenu, podọ dọ godoninọna titobasinanu Jehovah tọn nasọ hẹn gbẹninọ vẹawuna mí dogọ. Satani jlo dọ ahun mítọn ni nọ gbàdo whenue yè sawhẹ agọ̀ dokọna mẹmẹsunnu azọngbannọ lẹ, dohomẹkẹn yé kavi sú yé do gànmẹ. Podọ, e nọ yí mẹṣanko zan nado dekanpona jidide mítọn to nujinọtedo Jehovah tọn lẹ po titobasinanu Etọn po mẹ. Amọ́ mí yọ́n ayiha gigẹdẹ etọn lẹ ganji, podọ mí ma nọ yin yẹdoklọ. (2 Kọl. 2:11) Magbe nado gbẹ́ lalo Satani tọn lẹ dai bosọ to nugbonọ yin na Jehovah po titobasinanu Etọn po zọnmii. Flindọ Jehovah ma na gbẹ́ we dai gbede. (Salm. 28:7) Enẹwutu, a dike nudepope ni klan we sọn Jehovah go blo!—Lom. 8:35-39.
18. Etẹwẹ mí na gbadopọnna to hosọ he bọdego mẹ?
18 To hosọ ehe mẹ, mí ko gbadopọnna avùnnukundiọsọmẹnu he mí gán pehẹ sọn gbonu agun lọ tọn lẹ. Amọ́ avùnnukundiọsọmẹnu he wá sọn agun mẹ lẹ lọsu gán whlé jidide mítọn to Jehovah po titobasinanu etọn po mẹ pọ́n. Nawẹ mí gán pehẹ avùnnukundiọsọmẹnu enẹlẹ po kọdetọn dagbe po gbọn? Mí na dọhodo ehe ji to hosọ he bọdego mẹ.
OHÀN 118 “Do Yise Yise Ji Na Mí”
a Eyin mí na doakọnnanu po nugbonọ-yinyin po to azán godo tọn ehelẹ mẹ, mí dona zindonukọn nado nọ dejido Jehovah po titobasinanu etọn po go. Lẹgba nọ tẹnpọn nado yí whlepọn lẹ zan nado hù jidide enẹ sudo. Hosọ ehe na gbadopọnna avùnnukundiọsọmẹnu atọ̀n delẹ he Lẹgba nọ yizan, podọ nuhe mí gán wà nado duto vivẹnudido etọn lẹ ji.
b Yinkọ delẹ ko yin didiọ.