“Eyin n’jẹ ovọ́ mẹ mọ na dee ji, Jehovah nọ na tuli mi gbọn ohàn he to Televiziọn JW^® ji lẹ gblamẹ.”—Lorraine he nọ nọ̀ États-Unis.

“Ohàn gbigbọmẹ tọn lẹ” ko yin apadewhe sinsẹ̀n-bibasi Klistiani tọn sọn hoho gbọ́n jẹ din. (Kol. 3:16) Eyin a plọn ohàn ehelẹ do tamẹ, enẹ na gọalọna we nado nọ flin yé etlẹ yin to whenue ohanwe kavi nuyizan lẹtliki tọn de ma to asi we. Tẹ́n ayinamẹ voovo ehelẹ pọ́n nado sọgan plọn ohàn lọ lẹ do tamẹ.

• Nọ yí sọwhiwhe do hia hogbe ohàn lọ tọn lẹ nado mọnukunnujẹ yé mẹ. E nọ bọawu taun nado flin nudọnamẹ de eyin yè mọnukunnujẹemẹ. A gán mọ hogbe ohàn mítọn lẹpo tọn, etlẹ yin ohàn Televiziọn JW^® tọn po ohàn yọpọvu lẹ tọn po to jw.org ji. A na mọ yé eyin a yì adà lọ Wesẹdotẹn glọ bo zín Ohàn.

• Nọ kàn hogbe ohàn lọ tọn lẹ do wema ji. E yọnbasi dọ mọwiwà na zọ́n bọ a na hẹn hogbe lọ lẹ do tamẹ ganji dogọ.—Deut. 17:18.

• Nọ jihàn lọ po gbèzeyiaga po. Hia hogbe lọ lẹ kavi jihàn lọ whlasusu.

• Pọ́n eyin a gán ji sọn tamẹ. Tẹnpọn nado flin hogbe lọ lẹ matin ohàn wema lọ ji pinpọn, enẹgodo pọ́n eyin a ma wọn hogbe de.