1. Naegbọn Jehovah do jẹna mẹdezejo mlẹnmlẹn mítọn?

JEHOVAH jẹna mẹdezejo mlẹnmlẹn mítọn, na ewọ wẹ Mẹdatọ podọ Gbẹ̀namẹtọ mítọn. (Osọ. 4:11) Ṣigba, mí nọ pehẹ avùnnukundiọsọmẹnu de. Dile etlẹ yindọ mí yiwanna Jehovah bosọ nọ na ewọ sisi, mí sọgan yin yẹdoklọ ma nado ze míde jo na ẹn mlẹnmlẹn dile ewọ jẹna do. E na yọ́n nado mọnukunnujẹ lehe enẹ sọgan jọ do mẹ. Ṣigba, jẹnukọn whẹ́, mì gbọ mí ni gbadopọnna adà delẹ he mẹdezejo mlẹnmlẹn nọ bẹhẹn.

2. Sọgbe hẹ Eksọdusi 34:14, etẹwẹ mí na wà eyin mí ze míde jo na Jehovah mlẹnmlẹn?

² To Biblu mẹ, mẹdezizejo na Jiwheyẹwhe nọ biọ dọ yè ni yiwanna ewọ sisosiso. Eyin mí ze míde jo na Jehovah mlẹnmlẹn, ewọ kẹdẹ wẹ mí na nọ sẹ̀n. Mí ma na na dotẹnmẹ mẹdepope kavi nudepope nado hò otẹn he mẹ e tin te to ahun mítọn mẹ yí.—Hia Eksọdusi 34:14.

3. Naegbọn mẹdezejo mítọn na Jehovah ma yin wunvi tọn?

³ Mẹdezejo mítọn na Jehovah ma yin wunvi tọn. Gbọnna? Na e nọ sinai do nugbo he mí plọn gando ewọ go lẹ ji. Mí ko wá yiwanna jẹhẹnu dagbedagbe etọn lẹ. Mí yọ́n nuhe ewọ yiwanna po nuhe ewọ gbẹwanna lẹ po bosọ nọ kẹalọyi yé. Mí mọnukunnujẹ lẹndai etọn na mí mẹ bosọ nọ nọgodona enẹ. Mí nọ mọdọ ewọ doyẹyigona mí gbọn dotẹnmẹ nina mí nado yin họntọn etọn dali. (Salm. 25:14) Nuhe mí plọn gando Mẹdatọ mítọn go lẹpo wẹ nọ dọ̀n mí sẹpọ ewọ dogọ.—Jak. 4:8.

4. (a) Etẹlẹ wẹ Lẹgba nọ yizan nado dekanpona mẹdezejo mítọn na Jehovah? (b) Etẹwẹ mí na gbadopọnna to hosọ ehe mẹ?

 ⁴ Lẹgba wẹ to anadena titonu ehe, podọ e nọ yí i zan nado yinuwado ojlo jọwamọ tọn po madogán agbasa tọn mítọn lẹ po ji. (Efe. 2:1-3; 1 Joh. 5:19) Yanwle etọn wẹ nado dekanpona owanyi mítọn na Jehovah, ehe na zọ́n bọ mí na gboawupo nado ze míde jo na ewọ mlẹnmlẹn. Mì gbọ mí ni gbadopọnna aliho awe delẹ he mẹ e sọgan pà ẹ jẹ obá de mẹ te. Tintan, e nọ sisẹ́ mí nado doafọna adọkunnu lẹ, podọ awetọ, e nọ tẹnpọn nado yinuwado mí ji nado basi nudide he ma sọgbe lẹ gando ayidedai go.

5. Naegbọn mí dona họ́ míde sọta awuwiwlena owanyi na akuẹ?

⁵ To jọwamọ-liho, mímẹpo wẹ nọ jlo na tindo núdùdù he pemẹnu, avọ̀ he sọgbe lẹ po adọtẹn dagbe de po. Etomọṣo, mí dona họ́ míde sọta awuwiwlena owanyi na akuẹ. Susu mẹhe yin apadewhe aihọn Satani tọn lẹ tọn wẹ ‘yiwanna akuẹ’ po nuhe akuẹ sọgan họ̀ lẹ po. (2 Tim. 3:2) Jesu yọnẹn dọ hodotọ emitọn lẹ sọgan yin whiwhlepọn nado wleawuna owanyi wunmẹ ehe. E dọmọ: “Mẹdepope ma sọgan yin afanumẹ na ogán awe; adavo ewọ na gbẹwanna ode bo yiwanna awetọ, kavi ewọ na sẹbọdo ode go bo gbẹkọ awetọ go. Mìwlẹ ma sọgan yin afanumẹ na Jiwheyẹwhe podọ na Adọkunnu lẹ.” (Mat. 6:24) Mẹhe to Jehovah sẹ̀n, podọ to ojlẹ dopolọ mẹ nọ yí whenu po huhlọn susu po zan nado dovivẹnu bo tindo adọkunnu aihọn ehe tọn lẹ, to tintẹnpọn to linlẹn de mẹ nado sẹ̀n ogán awe. Ewọ ma to ede zejo na Jehovah mlẹnmlẹn gba.

6. Etẹwẹ mí sọgan plọn sọn nuhe Jesu dọna agun Laodikea tọn mẹ?

⁶ Sẹpọ vivọnu owhe kanweko tintan W.M., hagbẹ agun he tin to tòdaho Laodikea tọn mẹ lẹ tọn nọ yí nùgo dọmọ: “Adọkunnọ wẹ yẹn bo ko jẹ adọkun bo masọ tindo nuhudo  nudepope tọn paali.” Ṣigba to nukun Jehovah po Jesu po tọn mẹ, “tapònọ, lèlènọ, wamọnọ, nukuntọ́nnọ wẹ [yé] bosọ to omẹ́.” Jesu na yé ayinamẹ, e ma yin na yé yin adọkunnọ wutu gba, ṣigba na owanyi he yé tindo na adọkunnu lẹ to haṣinṣan yetọn hẹ Jehovah hẹngble wutu. (Osọ. 3:14-17) Eyin mí doayi e go dọ ojlo lọ nado doafọna adọkunnu lẹ to whinwhẹ́n to ahun mítọn mẹ, mí dona yawu yinuwa nado jla nulẹnpọn mítọn do. (1 Tim. 6:7, 8) Eyin mí ma wàmọ, ahun mítọn na má bọ Jehovah ma na kẹalọyi sinsẹ̀n-bibasi mítọn. Ewọ “nọ biọ mẹdezejo mlẹnmlẹn.” (Deut. 4:24) Nawẹ mí sọgan hẹn jlẹkajininọ bu, na nuhe dù pọndohlan mítọn gando akuẹ go gbọn?

7-9. Etẹwẹ a plọn sọn numimọ mẹho agun tọn de he nọ yin David tọn mẹ?

⁷ Lẹnnupọndo apajlẹ David tọn ji, yèdọ mẹho agun tọn azọ́n sinsinyẹnwatọ de he nọ nọ̀ États-Unis. E dọ dọ emi ze emide jo mlẹnmlẹn na azọ́n emitọn. Ewọ yin zizedo otẹn he yiaga de mẹ to azọ́nwhé etọn bo tlẹ sọ yin yinyọnẹn to otò lọ blebu mẹ taidi dopo to mẹhe nọ wazọ́n enẹ ganji hugan lẹ mẹ. David dọmọ: “To ojlẹ lọ mẹ, n’lẹndọ ale enẹlẹ yin ohia lọ dọ Jehovah to didona mi.” Ṣigba be mọ wẹ nugbonugbo ya?

⁸ David jẹ ohia avase tọn delẹ mọ ji he dohia dọ azọ́n etọn to bibẹpla haṣinṣan etọn hẹ Jehovah. E dọmọ: “Whenue n’to opli agun tọn lẹ ji, podọ etlẹ yin to lizọnyizọn lọ mẹ, n’nọ to nulẹnpọn do nuhahun azọ́nmẹ tọn lẹ ji. N’nọ mọ akuẹ susu, ṣigba ayimajai ṣie to jijideji, podọ n’sọ jẹ nuhahun tindo ji to alọwle ṣie mẹ.”

⁹ David mọdọ emi dona vọ́ nuhe to otẹn tintan mẹ na emi lẹ gbeje pọ́n. E dọmọ: “N’magbe sinsinyẹn nado jla ninọmẹ ṣie do.” David jlo nado diọ tito azọ́nwiwa tọn etọn, podọ e dọhona azọ́nmẹyimẹdotọ etọn gando tito etọn go. Etẹwẹ yin kọdetọn lọ? Azọ́n gble do David! Nawẹ ewọ yinuwa gbọn? E dọmọ: “To wunkẹngbe  tlolo, n’doalọwemẹ nado sẹ̀n taidi gbehosọnalitọ alọgọtọ tọn na ojlẹ dindẹn.” Nado penukundo yede go, David po asi etọn po jẹ azọ́n wiwejininọ tọn wà ji. To ojlẹ de godo, e bẹ gbehosọnalitọ whepoponu tọn jẹeji, podọ to godo mẹ, asi etọn wá hopódona ẹn to azọ́n gbehosọnalitọ tọn mẹ. Asu po asi po ehe basi dide nado wà agbasazọ́n de he mẹsusu nọ yí nukunpẹvi do pọ́n, ṣigba e ma yin azọ́n wunmẹ he wà yé te wẹ yin nujọnu hugan na yé gba. Dile etlẹ yindọ akuẹ he yé nọ dù todin yin mado-ao dehe yé nọ dù dai tọn, yé nọ mọ akuẹ he sin hudo yé tindo pẹẹ nado penukundo nuhudo yetọn lẹ go to sunmẹsunmẹ. Yé jlo na ze Jehovah do otẹn tintan mẹ, podọ yé ko mọ tlọlọ dọ ewọ nọ penukundo mẹhe ze Ahọluduta lọ do otẹn tintan mẹ lẹ go.—Mat. 6:31-33.

10. Nawẹ mí sọgan họ́ ahun mítọn gbọn?

¹⁰ Vlavo mí tindo agbasanu susu kavi vude, mí dona họ́ ahun mítọn. Gbọnna? Ma wleawuna owanyi na adọkunnu lẹ blo. Podọ, ma nọ dike agbasazọ́n towe ni jẹnukọnna sinsẹ̀nzọn towe na Jehovah blo. Nawẹ a sọgan yọnẹn gbọn dọ enẹ ko to jijọ do gowe? Kanbiọ delẹ he a sọgan kanse dewe wẹ: ‘Be n’nọ saba lẹnnupọndo agbasazọ́n ṣie ji to whenue n’to opli lẹ ji kavi to lizọnyizọn lọ mẹ wẹ ya? Be n’nọ to nuhà mapote eyin n’na tindo akuẹ he pé to sọgodo wẹ ya? Be akuẹ po nutindo agbasa tọn lẹ po to nuhahun hẹnwa na yẹn po alọwlemẹ ṣie po wẹ ya? Be n’na desọn ojlo mẹ nado wà azọ́n he mẹdevo lẹ nọ yí nukunpẹvi do pọ́n, eyin enẹ na na mi dotẹnmẹ nado yí whenu susu dogọ zan to sinsẹ̀nzọn ṣie na Jehovah mẹ ya?’ (1 Tim. 6:9-12) Dile mí to nulẹnpọn do kanbiọ enẹlẹ ji, mì gbọ mí ni flindọ Jehovah yiwanna mí bosọ dopà na mẹhe ze yede jo na ewọ lẹ dọmọ: “Yẹn ma na jo mì do gbede podọ yẹn ma na gbẹ́ mì dai gbede.” Abajọ apọsteli Paulu wlan dọmọ: “Mì gbọ aliho gbẹninọ tọn mìtọn ni tin matin wanyina akuẹ.”—Heb. 13:5, 6.

11. Kọdetọn tẹwẹ ayidedai lẹ sọgan hẹnwa na mẹde?

¹¹ Jehovah jlo dọ mí ni duvivi ogbẹ̀ tọn, podọ ayidedai lẹ sọgan gọalọna mí nado wàmọ. Na nugbo tọn, Ohó Jiwheyẹwhe tọn dọ dọ “nude ma yọ́n na gbẹtọ hú nado dù bo nù bosọ mọ awuvivi to azọ́n sinsinyẹn etọn mẹ.” (Yẹwh. 2:24) Ṣigba, susu ayidedai he to aihọn lọ mẹ lẹ tọn sọgan tindo nuyiwadomẹji ylankan do mí ji. Yé nọ hẹn nujinọtedo walọ dagbe tọn gbẹtọ lẹ tọn gble, bo nọ na yé tuli nado kẹalọyi kavi tlẹ yiwanna nuhe Ohó Jiwheyẹwhe tọn jẹagọdo lẹ.

12. Sọgbe hẹ 1 Kọlintinu lẹ 10:21, 22, naegbọn mí dona nọ yí sọwhiwhe do de ayidedai mítọn lẹ?

¹² Mí nọ jlo na ze míde jo na Jehovah  mlẹnmlẹn, enẹwutu mí ma sọgan dùnú to “tafo Jehovah tọn” ji podọ to “tafo aovi lẹ tọn” ji. (Hia 1 Kọlintinu lẹ 10:21, 22.) Nado dùnú dopọ hẹ mẹde nọ saba yin ohia họntọnjiji tọn. Eyin mí de nado tindo mahẹ to ayidedai he nọ ze danuwiwa, afinyọnnuwiwa, fẹnnuwiwa kavi ojlo po pọndohlan agbasalan tọn devo lẹ po daga lẹ mẹ, to linlẹn de mẹ, núdùdù he kẹntọ Jiwheyẹwhe tọn lẹ wleawuna de dù wẹ mí te. Taidi kọdetọn de, mí na hẹn awugble wá na míde bosọ hẹn haṣinṣan mítọn hẹ Jehovah gble.

13, 14. Sọgbe hẹ Jakọbu 1:14, 15, naegbọn mí dona nọ payi ayidedai he mí nọ de lẹ go? Na apajlẹ.

¹³ Lẹnnupọndo aliho tangan delẹ ji he mẹ ayidedai sọgan yin yiyijlẹdo núdùdù go te. Eyin mí to núdù, mí sọgan de nuhe mí na zedo nùmẹ. Amọ́ to whenue mí ko mì núdùdù lọ godo, mí ma sọgan sọ deanana lehe núdùdù lọ na yinuwado agbasa mítọn ji do ba. Núdùdù dagbe sọgan na mí agbasalilo; núdùdù he ma yọ́n na doazọ̀n mí. Kọdetọn lọ lẹ sọgan nọma sọawuhia to zánto dopo mẹ, amọ́ yé na wá họnwun to nukọn mẹ.

¹⁴ Mọdopolọ, whenue mí to nudide basi gando ayidedai mítọn lẹ go, mí sọgan de nuhe mí na zedo ayiha mítọn mẹ lẹ. Enẹgodo, ayidedai lọ nọ yinuwado ayiha po ahun mítọn po ji. Ayidedai dagbe lẹ sọgan wà dagbe na mí; ayidedai ylankan lẹ na gbleawuna mí. (Hia Jakọbu 1:14, 15.) Kọdetọn he ayidedai ylankan lẹ nọ hẹnwa sọgan nọma sọawuhia to afọdopolọji, amọ́ yé na wá họnwun to nukọn mẹ. Abajọ Biblu na mí avase dọmọ: “Yè klọ mì blo: Jiwheyẹwhe ma yin mẹhe yè na vlẹ. Na nudepope he mẹde to dido, enẹ wẹ e na gbẹ̀n ga; na mẹhe to dido sọgbe hẹ agbasalan etọn na gbẹ̀n gbigble sọn agbasalan etọn mẹ.” (Gal. 6:7, 8) Lehe e yin nujọnu taun do sọ dọ mí ni nọ gbẹ́ ayidedai he nọ nọgodona nuhe Jehovah gbẹwanna lẹpo dai!—Salm. 97:10.

15. Nunina tẹwẹ Jehovah ko wleawuna bọ mí nọ duvivi etọn?

¹⁵ Susu to omẹ Jehovah tọn lẹ mẹ nọ duvivi Televiziọn JW^® tọn, yèdọ tito Televiziọn Intẹnẹt ji tọn dagbedagbe mítọn. Mẹmẹyọnnu de he nọ yin Marilyn dọmọ: “Televiziọn JW ko gọalọna mi nado wleawuna pọndohlan dagbe dogọ, podọ e ma nọ biọ dọ n’ma ṣinyankẹ́nna nuhe e nọ bẹhẹn lẹ. Eyin n’tin to ṣokẹdẹ kavi gbọjọ, n’nọ pọ́n hodidọ kavi tito Sinsẹ̀n-Bibasi Afọnnu tọn tulinamẹ tọn de. Ehe nọ hẹn mi dọnsẹpọ Jehovah po titobasinanu etọn po dogọ. Televiziọn JW he yin awuwlena lọ ko diọ gbẹzan ṣie pete.” Be hiẹ lọsu to alemọyi sọn nunina Jehovah tọn mẹ ya? Gbọnvona tito-to-whinnu yọyọ he nọ tọ́n to sunmẹsunmẹ lọ, Televiziọn JW sọ bẹ tito-to-whinnu hoyidokanji po video po tọn gọna ohàn mẹjlọdote tọn voovo he a sọgan hò to whedepopenu lẹ hẹn.

16, 17. Naegbọn mí dona nọ yí sọwhiwhe do de dogbó de na whenu he mí nọ yizan na ayidedai, podọ nawẹ mí sọgan wàmọ gbọn?

¹⁶ Gbọnvona dọ mí dona nọ yí sọwhiwhe do de ayidedai wunmẹ he mẹ mí nọ do mahẹ te, mí sọ dona payi whenu nẹmu he mí nọ yizan na ẹn go. Eyin mí ma wàmọ, mí sọgan wá yí whenu susu zan na ayidedai lẹ hugan dehe mí nọ zan na sinsẹ̀nzọn Jehovah tọn. E nọ vẹawuna mẹsusu nado de dogbó de na whenu he yé na yizan na ayidedai lẹ. Mẹmẹyọnnu de he nọ yin Abigail bo tindo owhe 18 dọmọ: “Televiziọn pinpọn nọ gọalọna mi nado deayidai to vivọnu azán he ján taun de tọn. Amọ́ eyin n’ma to aṣeji, n’gán yí gànhiho susu zan nado pọ́n televiziọn.” Mẹmẹsunnu jọja de he nọ yin Samuel dọmọ: “N’mọdọ n’nọ pọ́n video kleunkleun susu lẹ to Intẹnẹt ji. To bẹjẹeji, n’nọ jẹ dopo poun pọ́n ji, podọ whẹpo n’nado yọnẹn, gànhiho atọ̀n kavi ẹnẹ ko nọ juwayi.”

¹⁷ Nawẹ a sọgan de dogbó na whenu nẹmu he a nọ yizan to ayidedai lẹ kọ̀n gbọn? Afọdide  tintan wẹ nado yọ́n ojlẹ nẹmu he a nọ yizan taun to e kọ̀n. Naegbọn a ma na basi kandai whenu he a yizan na ẹn to osẹ dopo gblamẹ tọn? To sunzanhiawe de ji, kàn gànhiho nẹmu he a yizan nado pọ́n televiziọn, nado yì Intẹnẹt ji, podọ nado daihun to alokan towe ji. Eyin a doayi e go dọ whenu he a nọ yizan ko sù zẹjlẹgo, tẹnpọn bo basi tito de. De whenu dovo na nuhe yin nujọnu hugan lẹ whẹ́, podọ enẹgodo dín whenu na ayidedai lẹ. Humọ, biọ to Jehovah si nado gọalọna we nado tẹdo tito towe go. Gbọnmọ dali, a na mọ whenu po huhlọn he sin nuhudo a do po na oplọn mẹdetiti tọn, sinsẹ̀n-bibasi whẹndo tọn, opli agun tọn lẹ, gọna azọ́n yẹwhehodidọ po mẹpinplọn po tọn. Podọ e yọnbasi dọ whenu he a nọ yizan na ayidedai lẹ ma na vẹna we.

18, 19. Nawẹ mí sọgan dohia dọ mí ze míde jo na Jehovah mlẹnmlẹn gbọn?

¹⁸ To whenue apọsteli Pita ko dọho gando vivọnu aihọn Satani tọn po aihọn yọyọ he na wá aimẹ lọ po go godo, e wlan dọmọ: “Mẹyiwanna lẹ emi, to whenuena e yindọ mì to tenọpọn onú ehelẹ, mì wà nuhe go mì pé lẹpo na ewọ nido mọ mì to godo mẹ madodiho, madoblọ podọ to jijọho mẹ.” (2 Pita 3:14) Eyin mí setonuna ayinamẹ enẹ bo wà nuhe go mí pé lẹpo nado gbọṣi wiweji to walọyizan-liho podọ to gbigbọ-liho, mí na dohia dọ mí ze míde jo na Jehovah mlẹnmlẹn.

¹⁹ Satani po titonu etọn po na zindonukọn nado to whiwhle mí pọ́n na mí nido diọ nuhe tin to otẹn tintan mẹ na mí lẹ. (Luku 4:13) Ṣigba, mahopọnna nudepope he mí na pehẹ, mí ma na dike mẹdepope kavi nudepope ni yí otẹn he mẹ Jehovah tin te to ahun mítọn mẹ. Mí ko magbe nado na Jehovah nuhe ewọ kẹdẹ jẹna—enẹ wẹ mẹdezejo mlẹnmlẹn mítọn!