HOSỌ OPLỌN TỌN 44
Be Ovi Towe lẹ Na Wá Sẹ̀n Jiwheyẹwhe to Whenue Yé Whẹ́n Ya?
“Jesu sọ to whinwhẹ́n deji to nuyọnẹn mẹ, to agbasa mẹ podọ to nukundagbe Jiwheyẹwhe tọn po gbẹtọ tọn po mẹ.”—LUKU 2:52.
OHÀN 134 Ovi lẹ Yin Ogú de sọn Jiwheyẹwhe Dè
BLADOPỌ *
1. Nudide dagbe hugan tẹwẹ mẹde gán bayi to gbẹ̀mẹ?
TO PAA mẹ, nudide he mẹjitọ lẹ bayi lẹ nọ yinuwado ovi yetọn lẹ ji na ojlẹ dindẹn. Eyin yé bayi nudide ylankan lẹ, ehe gán hẹn nuhahun wá na ovi yetọn lẹ. Amọ́, eyin yé bayi nudide dagbe lẹ, e yọnbayi taun dọ ovi yetọn lẹ ni do ayajẹ po pekọ po to gbẹ̀mẹ. Podọ, nado dọ hójọhó, ovi lẹ lọsu dona bayi nudide dagbe lẹ ga. Nudide dagbe hugan he mẹde gán bayi wẹ nado sẹ̀n Otọ́ owanyinọ olọn mẹ tọn mítọn Jehovah.—Salm. 73:28.
2. Nudide dagbe tẹlẹ wẹ Jesu po mẹjitọ etọn lẹ po bayi?
2 Ojlo vẹkuvẹku mẹjitọ Jesu tọn lẹ tọn wẹ nado gọalọna ovi yetọn lẹ nado sẹ̀n Jehovah, podọ nudide he yé bayi lẹ dohia dọ enẹ wẹ yin yanwle tangan yetọn to gbẹ̀mẹ. (Luku 2:40, 41, 52) Mọdopolọ, Jesu lọsu bayi nudide dagbe lẹ he gọalọna ẹn nado hẹn azọngban etọn to lẹndai Jehovah tọn mẹ di. (Mat. 4:1-10) Jesu whẹ́n bo wá lẹzun dawe de he jọmẹ, nugbonọ podọ adọgbotọ—yèdọ ovi de he na hẹn pipà po ayajẹ po wá na mẹjitọ depope he nọ dibusi Jiwheyẹwhe.
3. Kanbiọ tẹlẹ wẹ mí na mọ gblọndo na to hosọ ehe mẹ?
3 To hosọ ehe mẹ, mí na gbadopọnna kanbiọ he bọdego ehelẹ: Nudide dagbe tẹlẹ wẹ Jehovah bayi gando Jesu go? Etẹwẹ mẹjitọ Klistiani lẹ gán plọn sọn nudide he mẹjitọ aigba ji tọn Jesu tọn lẹ bayi lẹ mẹ? Podọ, etẹwẹ jọja Klistiani lẹ gán plọn sọn nudide he Jesu bayi lẹ mẹ?
NỌ PLỌNNU SỌN JEHOVAH DÈ
4. Nudide titengbe tẹwẹ Jehovah bayi gando Visunnu etọn go?
4 Mẹjitọ dagbe hugan lẹ wẹ Jehovah de na Jesu. (Mat. 1:18-23; Luku 1:26-38) Hodidọ ahundopo tọn Malia tọn he yin kinkandai do Biblu mẹ lẹ do owanyi sisosiso he e do na Jehovah po Ohó etọn po hia. (Luku 1:46-55) Podọ, aliho he mẹ Josẹfu yinuwa gando anademẹ Jehovah tọn go te dohia dọ e nọ dibusi Jiwheyẹwhe bosọ jlo na hẹn homẹ etọn hùn.—Mat. 1:24.
5, 6. Numimọ tẹwẹ Jehovah dike bọ Visunnu etọn tindo?
5 Doayi e go dọ Jehovah ma de mẹjitọ adọkunnọ lẹ na Jesu. Avọ́sinsan he Josẹfu po Malia po bayi to whenue Jesu yin jiji godo dohia dọ yé ma do alọnu. (Luku 2:24) Josẹfu gán ko do ṣọfu pẹvi de to owhé etọn pá to Nazalẹti, fie e nọ wazọ́n whlẹpipa tọn te. Yé dona ko nọ zan gbẹzan jlẹkaji tọn, titengbe na e whè gbau ovi ṣinawe wẹ yé na ko tindo wutu.—Mat. 13:55, 56.
6 Jehovah bayi hihọ́na Jesu sọn owù delẹ mẹ, amọ́ e ma de Visunnu Etọn sọn nuhahun lẹpo mẹ. (Mat. 2:13-15) Di apajlẹ, Jesu dona diahi hẹ nuyiwa hẹnnumẹ mayisenọ lẹ tọn. Pọ́n lehe Jesu na ko jẹflumẹ do sọ to whenue hagbẹ whẹndo tọn etọn titi delẹ ma kẹalọyi i to tintan whenu taidi Mẹsia lọ. (Malku 3:21; Joh. 7:5) Podọ, vlavo Jesu sọ dona doakọnna okú otọ́ mẹgopọntọ etọn Josẹfu tọn. Okú Josẹfu tọn enẹ gán ko zọ́n bọ Jesu he yin visunnu mẹho lọ na to dandannu glọ nado jẹ azọ́n he otọ́ etọn ko nọ wà dai wà ji. (Malku 6:3) Dile Jesu to whinwhẹ́n, e plọn nado nọ na ayidonugo dagbemẹninọ whẹndo etọn tọn. E sọgan ko nọ wazọ́n sinsinyẹn nado penukundo nuhudo yetọn lẹ go. Enẹwutu, e yọ́n lehe e nọ ṣí eyin agbọ́ pé mẹ to vivọnu azọ́nzán de tọn.
Mẹjitọ lẹ emi, mì na wleawuna ovi mìtọn lẹ nado wá pehẹ ninọmẹ gbẹ̀mẹ tọn lẹ, eyin mì nọ plọn yé nado nọ lẹhlan Ohó Jiwheyẹwhe tọn nado dín ayinamẹ (Pọ́n hukan 7tọ) *
7. (a) Kanbiọ tẹlẹ wẹ na gọalọna asu po asi po lẹ nado pọ́n ovi yetọn lẹ go whẹ́n? (b) Nawẹ Howhinwhẹn lẹ 2:1-6 gán gọalọna mẹjitọ lẹ nado plọn ovi yetọn lẹ gbọn?
7 Eyin alọwlemẹ lẹ wẹ mì yin bo jlo na jivi, mì kanse mìde dọ: ‘Be mí yin gbẹtọ whiwhẹnọ kavi gbigbọnọ he nkọ Jehovah na de nado penukundo ovi de go ya?’ (Salm. 127:3, 4) Eyin mẹjitọ de wẹ a yin, kanse dewe dọ: ‘Be n’to ovi ṣie lẹ plọn nado yiwanna azọ́n sinsinyẹn wiwà ya?’ (Yẹwh. 3:12, 13) ‘Be n’nọ wà nue go n’pé lẹpo nado bayi hihọ́na ovi ṣie lẹ sọn owù he yé gán pehẹ to aihọn Satani tọn mẹ to agbasa-liho, podọ to walọyizan-liho lẹ si ya?’ (Howh. 22:3) A ma sọgan bayi hihọ́na ovi towe lẹ sọn nuhahun he yé gán pehẹ lẹpo si. Enẹ uwọ glo. Amọ́ vudevude, a gán yí owanyi do gọalọna yé nado wá pehẹ ninọmẹ gbẹ̀mẹ tọn lẹ, eyin a nọ plọn yé nado nọ dín anademẹ lẹ to Ohó Jiwheyẹwhe tọn mẹ. (Hia Howhinwhẹn lẹ 2:1-6.) Di apajlẹ, eyin hẹnnumẹ de jo Jehovah do, gọalọna ovi towe lẹ nado dindona sọn Ohó Jiwheyẹwhe tọn mẹ nuhewutu e do yin nujọnu taun nado to nugbonọ yin na Jehovah zọnmii. (Salm. 31:23) Kavi, eyin mẹyiwanna mìtọn de bayi matintọ, dohia ovi towe lẹ lehe yè nọ yí Ohó Jiwheyẹwhe tọn zan nado duto awubla ji bosọ do jijọho do.—2 Kọl. 1:3, 4; 2 Tim. 3:16.
NỌ PLỌNNU SỌN JOSẸFU PO MALIA PO DÈ
8. Sọgbe hẹ Deutelonomi 6:6, 7, etẹwẹ Josẹfu po Malia po dona ko wà?
8 Mẹjitọ aigba ji tọn Jesu tọn lẹ gọalọna ẹn nado tindo nukundagbe Jiwheyẹwhe tọn to whenue e whẹ́n; yé hodo anademẹ he Jehovah na mẹjitọ lẹ. (Hia Deutelonomi 6:6, 7.) Josẹfu po Malia po yiwanna Jehovah taun, podọ yanwle yetọn tintan wẹ nado na tuli ovi yetọn lẹ nado tindo owanyi mọnkọ na Ewọ.
9. Nudide titengbe tẹlẹ wẹ Josẹfu po Malia po bayi?
9 Josẹfu po Malia po bayi dide nado hẹn aṣa gbigbọmẹ tọn dagbe de go taidi whẹndo de. Ayihaawe matin dọ yé nọ yì opli sẹmẹsẹmẹ tọn lẹ to sinagọgu mẹ to Nazalẹti, podọ Juwayi to whemẹwhemẹ to Jelusalẹm. (Luku 2:41; 4:16) Yé sọgan ko nọ yí ojlẹ gbejizọnlin yì Jelusalẹm tọn enẹlẹ zan nado plọnnu Jesu po nọvi ẹ lẹ po gando whenuho omẹ Jehovah tọn lẹ tọn go, vlavo bosọ nọ dla nọtẹn he Owe-wiwe lẹ donù e go delẹ pọ́n to ali ji. Dile vi lẹ wá jẹ susu ji, e ma na ko bọawuna Josẹfu po Malia po nado hẹn aṣa dagbe gbigbọmẹ tọn de go. Amọ́, vivẹnudido yetọn lẹ ma yin to ovọ́ mẹ! Na yé ze Jehovah sinsẹ̀n do otẹn tintan mẹ wutu, whẹndo yetọn tindo haṣinṣan dagbe po E po.
10. Etẹlẹ wẹ mẹjitọ Klistiani lẹ gán plọn sọn Josẹfu po Malia po dè?
10 Etẹwẹ mẹjitọ he nọ dibusi Jiwheyẹwhe lẹ gán plọn sọn Josẹfu po Malia po dè? Nuhe yin nujọnu hugan wẹ nado nọ dohia ovi towe lẹ to ohó po walọ po mẹ dọ a yiwanna Jehovah sisosiso. Flindọ onú daho hugan he a gán na yé wẹ nado gọalọna yé nado yiwanna Jehovah. Podọ, delẹ to onú titengbe hugan he a gán plọn yé lẹ mẹ wẹ lehe yé na hẹn aṣa dagbe gbigbọmẹ tọn lẹ go do, enẹ wẹ nupinplọn, dẹ̀hiho, opli lẹ yìyì po yẹwhehodidọ po. (1 Tim. 6:6) Nugbo wẹ dọ a dona penukundo nuhudo agbasa tọn ovi towe lẹ tọn go. (1 Tim. 5:8) Amọ́, ma wọ̀n blo dọ haṣinṣan pẹkipẹki he yé tindo hẹ Jehovah wẹ na zọ́n bọ yé na lùn vivọnu titonu ylankan ehe tọn tọ́n bo biọ aihọn yọyọ Jiwheyẹwhe tọn mẹ, e ma yin nutindo agbasa tọn yetọn lẹ. *—Ezek. 7:19; 1 Tim. 4:8.
Homẹhunnu wẹ e nọ yin nado mọdọ mẹjitọ Klistiani lẹ bayi nudide gbigbọmẹ tọn dagbe lẹ gando whẹndo yetọn go! (Pọ́n hukan 11tọ) *
11. (a) Nawẹ ayinamẹ he tin to 1 Timoti 6:17-19 mẹ sọgan gọalọna mẹjitọ lẹ nado basi nudide dagbe lẹ dile yé to ovi yetọn lẹ plọn gbọn? (b) Yanwle tẹlẹ ji wẹ whẹndo towe gán lẹnnupọnnudo podọ ale tẹlẹ wẹ e gán hẹnwá? (Pọ́n apotin lọ “ Yanwle Tẹlẹ Wẹ A Tindo?”)
11 Homẹhunnu daho wẹ e yin nado mọdọ mẹjitọ Klistiani susu lẹ nọ bayi nudide gbigbọmẹ tọn dagbe lẹ gando whẹndo yetọn go! Yé nọ sẹ̀n Jehovah dopọ, podọ to gbesisọ mẹ. Yé nọ yì opli agun tọn lẹ po plidopọ lẹ po. Podọ, yé sọ nọ tọ́n na lizọnyizọn lọ. Whẹndo delẹ tlẹ nọ penugo nado yì dọyẹwheho to aigba-denamẹ he to olá lẹ ji. Devo lẹ nọ yì dla Bẹtẹli pọ́n kavi nọ nọgodona tito họ̀gbigba tọn yẹwhehọluduta tọn lẹ. E nọ biọ akuẹzinzan to whẹndo enẹlẹ si nado doalọ to nuwiwa mọnkọ lẹ me, podọ yé tlẹ sọgan nọ pehẹ avùnnukundiọsọmẹnu delẹ. Amọ́ na nugbo tọn, ale he yé nọ mọyi lẹ nọ hẹn yé jẹadọkun to gbigbọ-liho. (Hia 1 Timoti 6:17-19.) Ovi he yin pinplọn to whẹndo mọnkọ mẹ lẹ nọ saba tẹdo aṣa dagbe enẹlẹ go eyin yé whẹ́n, podọ e ma nọ wá vẹna yé! *—Howh. 10:22.
NỌ PLỌNNU SỌN JESU DÈ
12. Etẹwẹ Jesu dona wà dile e to whinwhẹ́n?
12 Otọ́ olọn mẹ tọn Jesu tọn nọ bayi nudide dagbe lẹ to whepoponu, podọ mẹjitọ etọn aigba ji tọn lẹ lọsu sọ bayi nudide nuyọnẹn tọn lẹ ga. Amọ́, to whenue Jesu whẹ́n, e dona bayi nudide etọn titi lẹ. (Gal. 6:5) Taidi mímẹpo, e vò nado bayi nudide lẹ na ede. E gán ko de nado dín ale edetiti tọn lẹ jẹnukọn. Kakatimọ, e de nado hẹn haṣinṣan dagbe de go hẹ Jehovah. (Joh. 8:29) Nawẹ apajlẹ etọn gán gọalọna jọja lẹ to egbehe gbọn?
Jọja lẹ emi, mì ma nọ gbẹ́ anademẹ mẹjitọ mìtọn lẹ tọn dai gbede blo (Pọ́n hukan 13tọ) *
13. Nudide titengbe tẹwẹ Jesu bayi to whenue e pò to jọja?
13 To whenue Jesu to pẹvi, e de nado litaina mẹjitọ etọn lẹ. E ma gbẹ́ anademẹ mẹjitọ etọn lẹ tọn dai gbede po linlẹn lọ po dọ emi yọnnuin hú yé. Kakatimọ, “e to mẹmẹglọ yin hlan yé zọnmii.” (Luku 2:51) Ayihaawe matin dọ Jesu ylọ azọngban etọn taidi visunnu mẹho dọ nujọnu. E họnwun dọ e dovivẹnu bo plọn alọnuzọ́n de to otọ́ mẹgopọntọ etọn dè, na e nido sọgan wá gọalọ na whẹndo etọn.
14. Nawẹ mí wagbọn do yọnẹn dọ Jesu nọ plọn Ohó Jiwheyẹwhe tọn ganji?
14 E yọnbayi dọ mẹjitọ Jesu tọn lẹ ni ko pìntan aliho jiawu he mẹ e yin jiji te tọn na ẹn, gọna nuhe angẹli Jiwheyẹwhe tọn lẹ dọ gando ewọ go. (Luku 2:8-19, 25-38) Jesu ma nọte do nuhe yè dọna ẹn lẹ kẹdẹ ji, e sọ nọ plọn Owe-wiwe lẹ na ede. Nawẹ mí wagbọn do yọnẹn dọ Jesu nọ plọn Ohó Jiwheyẹwhe tọn ganji? Na whenue e gbẹ́ yin jọja, “nukunnumọjẹnumẹ etọn po gblọndo etọn lẹ po nọ jiawu” na mẹplọntọ he to Jelusalẹm lẹ. (Luku 2:46, 47) Podọ, owhe 12 poun wẹ Jesu tindo, bo ko kudeji mlẹnmlẹn dọ Jehovah wẹ Otọ́ emitọn.—Luku 2:42, 43, 49.
15. Nawẹ Jesu dohia gbọn dọ emi de nado wà ojlo Jehovah tọn?
15 Dile Jesu to nuplọn gando azọngban etọn to lẹndai Jehovah tọn mẹ go, e de nado wà ojlo Jiwheyẹwhe tọn. (Joh. 6:38) E ko yọnẹn dọ mẹsusu na gbẹwanna emi, podọ e ma na ko bọawuna ẹn nado lẹnnupọndo enẹ ji. Etomọso, e de nado litaina Jehovah. To whenue Jesu yí baptẹm to owhe 29 W.M, yanwle etọn tintan wẹ nado wà nue Jehovah biọ to e si. (Heb. 10:5-7) Etlẹ yin whenue Jesu to kudonu to yatin ji, e gbẹ́ magbe nado to ojlo Otọ́ etọn tọn wà.—Joh. 19:30.
16. Etẹwẹ yin dopo to nuhe ovi lẹ gán plọn sọn Jesu dè lẹ mẹ?
16 Nọ setonouna mẹjitọ towe lẹ. Taidi Josẹfu po Malia po, mẹjitọ towe lẹ ma yin mẹpipe. Etomọṣo, yewlẹ wẹ Jehovah deazọ́nna nado basi-hihọ́na we bosọ deanana we. Eyin a nọ setonuna ayinamẹ yetọn lẹ bosọ nọ na sisi aṣepipa yetọn, e na “yin dagbe na we.”—Efe. 6:1-4.
17. Sọgbe hẹ Jọṣua 24:15, nudide tẹwẹ jọja lẹ lọsu dona bayi?
17 De mẹhe a na sẹ̀n. A dona hẹn mẹhe Jehovah yin, lẹndai etọn, po lehe e gando gowe do po họnwun na dewe. (Lom. 12:2) To whenẹnu, a na penugo nado bayi nudide titengbe hugan lọ to gbẹzan towe mẹ, enẹ wẹ nudide lọ nado sẹ̀n Jehovah. (Hia Jọṣua 24:15; Yẹwh. 12:1) Eyin a hẹn aṣa dagbe Biblu hihia po nupinplọn tọn po go, owanyi towe na Jehovah na fọ́n bo to sinsinyẹn deji bọ yise towe na lodo dogọ.
18. Nudide tẹwẹ jọja lẹ dona bayi, podọ etẹwẹ na yin kọdetọn lọ?
18 De nado ze Jehovah do otẹn tintan mẹ to gbẹzan towe mẹ. Aihọn Satani tọn nọ hẹnmẹ lẹndọ, eyin a yí nugopipe towe lẹ zan na ale dewe titi tọn, a na do ayajẹ. Amọ́, nado dọ hójọhó, mẹhe nọ doafọna agbasanu lẹ nọ “yí awufiẹsa susu do sọnú yede gbọn filẹpo.” (1 Tim. 6:9, 10) To alọ devo mẹ, eyin a nọ dotoiana Jehovah bo de nado ze ojlo etọn wiwà do otẹn tintan mẹ, a na tindo kọdetọn dagbe to gbẹ̀mẹ, podọ a na “nọ yinuwa po nuyọnẹn po.”—Jọṣ. 1:8.
NUDIDE TẸWẸ A NA BAYI?
19. Etẹwẹ mẹjitọ lẹ dona nọ flin?
19 Mẹjitọ lẹ emi, mì wà nue go mì pé lẹpo nado gọalọna whẹndo mìtọn nado sẹ̀n Jehovah. Mì nọ ganjẹ Jehovah go, podọ e na gọalọna mì nado bayi nudide nuyọnẹn tọn lẹ. (Howh. 3:5, 6) Mì nọ flindọ nuhe mì nọ wà, na yinuwado ovi mìtọn lẹ ji hú nuhe mì nọ dọ. Enẹwutu, mì nọ bayi nudide he na gọalọna yé hugan nado mọ nukundagbe Jehovah tọn lẹ.
20. Dona tẹlẹ wẹ jọja lẹ na mọyi eyin yé de nado sẹ̀n Jehovah?
20 Jọja lẹ emi, mẹjitọ mìtọn lẹ gán gọalọna mì nado bayi nudide nuyọnẹn tọn lẹ to gbẹ̀mẹ. Amọ́, e pò to mì si nado yinuwa sọgbe hẹ nudide enẹlẹ nado mọ nukundagbe Jiwheyẹwhe tọn. Enẹwutu, mì hodo apajlẹ Jesu tọn bo de nado sẹ̀n Otọ́ owanyinọ olọn mẹ tọn mìtọn. Eyin mì wàmọ, ogbẹ̀ mìtọn na yọ́n bo nasọ gọ́na ayajẹ po dona lẹ po bẹsọn din. (1 Tim. 4:16) Podọ to sọgodo, mì na duvivi gbẹzan he do pekọ hugan lọ tọn!
OHÀN 133 Sẹ̀n Jehovah to Jọja Whenu
^ huk. 5 Ojlo mẹjitọ Klistiani lẹ tọn wẹ yindọ ovi yetọn lẹ ni sẹ̀n Jehovah bosọ do ayajẹ to whenue yé whẹ́n. Nudide tẹwẹ mẹjitọ lẹ gán bayi nado gọalọna ovi yetọn lẹ nado jẹ yanwle ehe kọ̀n? Podọ nudide tẹwẹ jọja Klistiani lẹ lọsu dona bayi nado do kọdetọn dagbe to gbẹ̀mẹ? To hosọ ehe mẹ, mí na mọ gblọndo kanbiọ ehelẹ tọn.
^ huk. 10 Pọ́n owe lọ Sinsẹ̀n-Bibasi Wiwe-Ṣeke Jehovah Tọn Yin Hinhẹngọwa Lo! weda 69-70, huk. 17, 18.
^ huk. 11 Pọ́n apotin lọ “Je ne pouvais pas rêver meilleurs parents” to Fọ́n! Flansegbe octobre 2011 tọn mẹ to weda 20tọ, gọna hosọ lọ “Lettre spéciale à leurs parents” to Fọ́n! Flansegbe 8 mars 1999 tọn mẹ to weda 25tọ.
^ huk. 66 ZẸẸMẸ YẸDIDE LẸ TỌN: Malia dona ko do owanyi sisosiso na Jehovah do ahun Jesu tọn mẹ sọn ovu. Mọdopolọ to egbehe, onọ̀ lẹ gán nọ do owanyi na Jehovah do ahun ovi yetọn lẹ tọn mẹ.
^ huk. 68 ZẸẸMẸ YẸDIDE LẸ TỌN: Josẹfu ma na ko nọ yí sinagọgu mẹ yìyì po whẹndo etọn po do daihun. Otọ́ lẹ to egbehe dona nọ yí nukun nujọnu tọn do pọ́n opli lẹ yìyì po whẹndo yetọn po.
^ huk. 70 ZẸẸMẸ YẸDIDE LẸ TỌN: Jesu plọn lehe yè nọ wà onú delẹ do sọn otọ́ etọn dè. To egbehe, jọja lẹ gán wà nudopolọ sọn baba yetọn dè.
