1. Naegbọn mí gán dọ dọ azọ́n gbẹtọ lẹ hinhẹn zun devi tọn yin azọ́n gbẹwhlẹngán tọn de?

AZỌ́N gbẹtọ lẹ hinhẹn zun devi tọn yin azọ́n gbẹwhlẹngán tọn de! Naegbọn mí do dọ mọ? Whenue Jesu na gbedide he tin to Matiu 28:19, 20 mẹ, e dọ dọ: “Mì yì bo hẹn gbẹtọ lẹ . . . zun devi lẹ, bosọ nọ baptizi yé.” Naegbọn e do yin nujọnu nado yí baptẹm? Nubiọtomẹsi de wẹ ehe yin na mẹhe jlo na mọ whlẹngán lẹ. Mẹhe jlo na yí baptẹm lọ dona yise dọ eyin okú avọ́sinsan tọn Jesu tọn po fọnsọnku etọn po tọn dẹ́n, whlẹngán ma na yọnbasi. Abajọ, apọsteli Pita dọna Klistiani hatọ etọn lẹ dọmọ: “Baptẹm to mì whlẹngán todin . . . gbọn fọnsọnku Jesu Klisti tọn gblamẹ.” (1 Pita 3:21) Enẹwutu, eyin devi yọyọ de yí baptẹm, e nọ jẹ ali whlẹngán tọn ji.

2. Sọgbe hẹ 2 Timoti 4:1, 2, mẹplọntọ alọpa tẹwẹ mí dona yin?

² Nado hẹn gbẹtọ lẹ zun devi, mí dona wleawuna “azọ́nyinyọnẹn mẹpinplọn tọn.” (Hia 2 Timoti 4:1, 2.) Etẹwutu? Na Jesu degbena mí dọmọ: “Mì yì, . . . bo hẹn gbẹtọ lẹ zun devi lẹ . . . , bo nọ plọn yé.” Apọsteli Paulu dọ dọ mí ni “zindonukọn” to azọ́n ehe wiwà mẹ, ‘na gbọn ehe wiwà dali, mí na whlẹn míde po mẹhe nọ dotoaina mí lẹ po gán.’ Abajọ Paulu dọmọ: “Nọ payi dewe po mẹpinplọn towe po go.” (1 Tim. 4:16) Na mẹpinplọn yin dandan nado hẹn gbẹtọ lẹ zun devi wutu, mí nọ jlo dọ mẹpinplọn mítọn ni yin dagbe hugan lọ.

3. To hosọ ehe mẹ, etẹwẹ mí na gbadopọnna gando anadidena plọnmẹ Biblu lẹ go?

³ Gbẹtọ livi susu lẹ wẹ mí nọ plọn nugbo Biblu tọn lẹ hẹ. Amọ́, dile hosọ he jẹnukọn dohia do, mí jlo na yọ́n lehe mí sọgan  gọalọna susu yetọn nado lẹzun devi Jesu Klisti tọn he yí baptẹm lẹ do. To hosọ ehe mẹ, mí na gbadopọnna onú atọ́n devo lẹ he mẹplọntọ de dona wà nado gọalọna nuplọntọ etọn nado yinukọn jẹ baptẹm kọ̀n.

4. Naegbọn mẹplọntọ de dona nọ dava ede to whenue e to anadena plọnmẹ Biblu de? (Sọ pọ́n nudọnamẹ odò tọn.)

⁴ Mí nọ yiwanna nuhe mí nọ plọnmẹ sọn Ohó Jiwheyẹwhe tọn mẹ lẹ. Enẹwutu, mí sọgan nọ yin whinwhàn nado dọho susu gando onú enẹlẹ go. Amọ́, mí ma dona nọ lẹ̀ hógle eyin vlavo mí to anadena Oplọn Atọ̀họ̀-Nuhihọ́ lọ Tọn, Biblu Pinplọn Agun tọn kavi plọnmẹ Biblu de. Nado na dotẹnmẹ Biblu nado nọ plọnmẹ, mẹplọntọ lọ dona nọ dava ede bo ma nọ tẹnpọn nado to zẹẹmẹ nuhe e yọnẹn gando wefọ de kavi hosọ de go lẹpo tọn basi. * (Joh. 16:12) Yí nuhe a yọnẹn do Biblu ji to whenue a ṣẹṣẹ yí baptẹm lẹ jlẹdo nuhe a yọnẹn todin lẹ go. E yọnbasi dọ to ojlẹ enẹ mẹ, nugbo dodonu tọn lẹ poun mẹ wẹ a mọnukunnujẹ. (Heb. 6:1) Owhe susu wẹ a yí do plọn nuhe a yọnẹn todin lẹ, enẹwutu ma nọ tẹnpọn nado zín nulẹpo do kọ̀ji na nuplọntọ yọyọ de to oplọn dopo poun whenu blo.

5. (a) Sọgbe hẹ 1 Tẹsalonikanu lẹ 2:13, etẹ mẹ wẹ mí nọ jlo dọ nuplọntọ mítọn ni mọnukunnujẹ? (b) Nawẹ mí sọgan na tuli nuplọntọ de nado nọ dọho gando nuhe plọn e te lẹ go gbọn?

⁵ Mí nọ jlo dọ nuplọntọ mítọn ni mọnukunnujẹemẹ dọ nuhe plọn e te lẹ wá sọn Ohó gbọdo Jiwheyẹwhe tọn mẹ. (Hia 1 Tẹsalonikanu lẹ 2:13.) Nawẹ mí gán wà enẹ gbọn? Nọ na tuli nuplọntọ lọ nado dọho gando nuhe plọn e te lẹ go na mẹdevo lẹ. Kakati a ni nọ to zẹẹmẹ wefọ Biblu tọn lẹ tọn basi na nuplọntọ lọ to whelẹponu, nọ biọ to e si nado basi zẹẹmẹ delẹ tọn na we. Gọalọna nuplọntọ towe nado mọ lehe Ohó Jiwheyẹwhe tọn gandego do tlọlọ. Nọ kàn kanbiọ mẹhẹnlẹnnupọn tọn he sọgan whàn ẹn nado dọ numọtolanmẹ po linlẹn etọn gando wefọ he e hia lẹ go po sè e. (Luku 10:25-28) Di apajlẹ, kanse è dọ: “Jẹhẹnu Jehovah tọn tẹlẹ go wẹ a doayi to wefọ ehe mẹ?” “Dagbe tẹwẹ nugbo Biblu tọn ehe gán wà na we?” “Etẹwẹ a lẹn gando nuhe a ṣẹṣẹ plọn ehe go?” (Howh. 20:5) Nuhe yin nujọnu hugan lọ ma yin obá he mẹ nuhe nuplọntọ de yọnẹn lẹ sù jẹ, amọ́ obá he mẹ e yiwanna yé bosọ nọ yí yé do yizan mẹ jẹ.

6. Naegbọn e gán yin alenu nado plan mẹplọntọ numimọnọ de yì plọnmẹ Biblu mítọn de tẹnmẹ?

⁶ Be a nọ plan wẹnlatọ he yin mẹplọntọ numimọnọ lẹ sọyi plọnmẹ Biblu towe lẹ tẹnmẹ ya? Eyin a nọ wàmọ, a gán kanse yé nuhe go yé doayi gando aliho he mẹ a deanana oplọn lọ te gọna obá he mẹ a na dotẹnmẹ Biblu nado  plọnmẹ jẹ go. Whiwhẹ na gọalọna we, eyin e biọ dọ a ni hẹn aliho mẹpinplọn tọn towe pọnte dogọ. (Yijlẹdo Owalọ lẹ 18:24-26 go.) Enẹgodo, kanse wẹnlatọ numimọnọ lọ eyin e lẹndọ nuplọntọ lọ to nukunnumọjẹ nuhe plọn e te lẹ mẹ. A gán sọ biọ to wẹnlatọ dopolọ si nado deanana oplọn lọ do otẹn towe mẹ, eyin a jlo na tọ́nwhẹ̀n na osẹ dopo kavi humọ. Enẹ na zọ́n bọ oplọn lọ ma na súnadu bo nasọ gọalọna nuplọntọ lọ nado mọ nujọnu-yinyin oplọn lọ tọn. Ma nọ lẹn gbede dọ “emitọn” wẹ oplọn lọ bọ mẹdevo de ma gán sọ deanana ẹn blo. To popolẹpo mẹ, dagbe nuplọntọ lọ tọn dín wẹ a te, na e nido sọgan to nugbo lọ plọn zọnmii, podọ to gbesisọ mẹ.

7. Etẹwẹ na gọalọna nuplọntọ de nado yiwanna nuhe plọn e te lẹ dogọ?

⁷ Nuplọntọ de dona doayi e go dọ a nọ yí zohunhun po nujikudo po do dọho gando nugbo he to Biblu mẹ lẹ go. (1 Tẹs. 1:5) E yọnbasi dọ enẹ ni whàn ẹn dogọ nado yiwanna nuhe plọn e te lẹ. Eyin e biọ domọ, nọ dọhona ẹn gando lehe nunọwhinnusẹ́n Biblu tọn lẹ yíyí do yizan mẹ ko gọalọna hiẹ lọsu do go. Gbọnmọ dali, e na wá mọdọ ayinamẹ dagbe he to Biblu mẹ lẹ gán gọalọna ewọ lọsu ga.

8. Nudevo tẹwẹ a gán sọ wà nado gọalọna nuplọntọ towe, podọ naegbọn e na yọ́n dọ a ni wàmọ?

⁸ To oplọn lọ whenu, nọ na nuplọntọ towe apajlẹ jọnun mẹhe pehẹ nuhahun etọn nkọ bosọ duto yé ji lẹ tọn. A gán plan hagbẹ agun lọ tọn de wá oplọn lọ tẹnmẹ he sin apajlẹ gán whàn nuplọntọ lọ. A gán sọ mọ numimọ ojlofọndotenamẹ tọn lẹ to adà lọ “Biblu Nọ Diọ Gbẹzan Mẹtọn” * mẹ to jw.org ji. Hosọ po video mọnkọ lẹ po na gọalọna nuplọntọ towe nado mọdọ nuyọnẹnnu wẹ e yin nado nọ yí nunọwhinnusẹ́n Biblu tọn lẹ do yizan mẹ to gbẹzan etọn mẹ.

9. Nawẹ a gán na tuli nuplọntọ de nado nọ dọhodo nuhe plọn e te lẹ ji hẹ hẹnnumẹ etọn lẹ po họntọn etọn lẹ po gbọn?

⁹ Eyin nuplọntọ lọ ko wlealọ, be alọwlemẹ etọn lọsu to nuplọn ga ya? Eyin e ma yinmọ, bo biọ to e si nado nọpọ́ hẹ mì to oplọn lọ whenu. Nọ na tuli nuplọntọ towe nado nọ dọhodo nuhe plọn e te lẹ ji hẹ hẹnnumẹ etọn po họntọn etọn lẹ po. (Joh. 1:40-45) Gbọnna? A sọgan kanse e poun dọ: “Nawẹ a na basi zẹẹmẹ nugbo ehe tọn na hẹnnumẹ towe lẹ gbọn?” kavi “Wefọ tẹwẹ a na yizan nado hẹn ehe họnwun na họntọn de?” Gbọnmọ dali, azọ́nplọn nuplọntọ lọ wẹ a te nado wá  lẹzun mẹplọntọ. Podọ, eyin e wá pegan e gán jẹ tintọ́n na lizọnyizọn lọ ji taidi wẹnlatọ he ma yí baptẹm de. A sọgan kanse nuplọntọ lọ eyin e yọ́n mẹdevo depope he na jlo nado plọn Biblu. Eyin e yọ́n omẹ mọnkọ de, doafọna mẹlọ madọngbàn bo ze oplọn de donukọnna ẹn. Do video lọ Nawẹ Mí Nọ Plọn Biblu hẹ Mẹ Gbọn? * hia mẹlọ.

10. Sọgbe hẹ 1 Tẹsalonikanu lẹ 2:7, 8 nawẹ mẹplọntọ de sọgan hodo apajlẹ Paulu tọn gbọn?

¹⁰ Mẹplọntọ lẹ dona nọ dohia nuplọntọ yetọn lẹ dọ onú yetọn nọ duahunmẹna emi sisosiso. Nọ pọ́n yé hlan di mẹhe gán wá lẹzun mẹmẹsunnu po mẹmẹyọnnu towe lẹ po. (Hia 1 Tẹsalonikanu lẹ 2:7, 8.) E ma bọawuna yé nado jo họntọn he yé ko ji to aihọn lọ mẹ lẹ do, podọ nado basi diọdo he jẹ lẹpo nado sẹ̀n Jehovah. Mí dona gọalọna yé nado jihọntọn nugbo lẹ to agun lọ mẹ. A gán lẹzun họntọn na nuplọntọ towe eyin a nọ yí whenu zan hẹ ẹ to ojlẹ devo lẹ mẹ gbọnvona ojlẹ nupinplọn tọn lẹ. E na mọdọ onú emitọn nọ duahunmẹna we nugbonugbo, eyin a nọ tẹkan hlan ẹn, nọ kanwehlan ẹn kavi nọ yì dla ẹ pọ́n to ojlẹ he mẹ mì ma nọ plọnnu te lẹ.

11. Etẹwẹ mí nọ jlo dọ nuplọntọ mítọn lẹ ni mọ to agun mẹ podọ etẹwutu?

¹¹ Mẹlẹ nọ dọ dọ: “Mẹdopo wẹ nọ jivi, amọ́ otò wẹ nọ plọn.” Mọdopolọ mí gán dọ dọ: “Mẹdopo wẹ nọ mọ mẹlọ, amọ́ agun lọ blebu wẹ nọ hẹn ẹn zun devi.” Enẹwutu wẹ mẹplọntọ kọdetọn dagbenọ lẹ nọ do nuplọntọ yetọn lẹ hia mẹdevo lẹ to agun lọ mẹ he sin apajlẹ gán yinuwa do yé ji to aliho dagbe mẹ. Nuplọntọ lẹ sọgan mọaleyi sọn gbẹdido hẹ omẹ Jiwheyẹwhe tọn lẹ mẹ, podọ ehe na gọalọna yé nado jihọntọn nujọnu tọn hẹ Jehovah bosọ mọ tuli yí to whenue yé pehẹ nuhahun lẹ. Ojlo mítọn wẹ yindọ nuplọntọ dopodopo ni voawu ganji to agun lọ mẹ bo nọ mọ ede di hagbẹ whẹndo gbigbọmẹ tọn mítọn tọn de. Mí jlo dọ owanyi sisosiso he tin to pipli mẹmẹsunnu lẹ tọn mítọn ṣẹnṣẹn ni dọ̀n ẹn. Ehe na zọ́n bọ e na bọawuna ẹn dogọ nado gbà-gbẹ́ mẹhe ma na gọalọna ẹn nado yiwanna Jehovah lẹ tọn. (Howh. 13:20) Eyin mẹhe e nọ dogbẹ́ hẹ dai lẹ jo e do, e na deji dọ emi gán mọ họntọn nugbo lẹ to titobasinanu Jehovah tọn mẹ.—Malku 10:29, 30; 1 Pita 4:4.

12. Naegbọn mí dona nọ dọhona nuplọntọ mítọn gando klandowiwe po baptẹm po go?

¹² Ma nọ whleawu nado dọhona ẹn gando klandowiwe po baptẹm po go blo. To  popolẹpo mẹ, nuhewutu mí nọ deanana plọnmẹ Biblu de wẹ nado gọalọna mẹlọ nado lẹzun devi he yí baptẹm de. Whenue a ko deanana plọnmẹ Biblu lọ to gbesisọ mẹ na osun delẹ, bọ nuplọntọ lọ tlẹ ko jẹ opli lẹ wá ji, e dona mọnukunnujẹemẹ dọ yanwle oplọn lọ tọn wẹ nado gọalọna emi nado wá jẹ Jehovah sẹ̀n ji taidi dopo to Kunnudetọ Etọn lẹ mẹ.

13. Afọdide tẹlẹ wẹ nuplọntọ de nọ ze dile e to vivẹnudo nado pegan na baptẹm?

¹³ Vudevude, Biblu plọntọ ahundoponọ de gán jẹ yanwle baptẹm tọn kọ̀n. Jẹnukọn whẹ́, nuplọntọ lọ nọ yọ́n Jehovah, nọ yiwanna ẹn bosọ nọ do yise to Ewọ mẹ. (Joh. 3:16; 17:3) Enẹgodo, e nọ wleawuna haṣinṣan de hẹ Jehovah bo nọ jẹ gbẹdo hẹ hagbẹ agun lọ tọn lẹ ji. (Heb. 10:24, 25; Jak. 4:8) To nukọn mẹ, nuplọntọ lọ nọ dealọ sọn aṣa ylankan lẹ mẹ bo nọ lẹnvọjọ sọn ylando etọn lẹ mẹ. (Owalọ 3:19) To ojlẹ dopolọ mẹ, yise etọn nọ whàn ẹn nado má nugbo lọ hẹ mẹdevo lẹ. (2 Kọl. 4:13) To godo mẹ, e nọ klan ede do wiwe hlan Jehovah bo nọ do enẹ hia gbọn baptẹm yíyí dali. (1 Pita 3:21; 4:2) Mẹlẹpo wẹ nọ jaya to azán enẹ gbè! Dile nuplọntọ lọ to afọdide debọdo-dego tọn enẹlẹ ze nado jẹ yanwle etọn kọ̀n, nọ yí ahundopo do pà ẹ whẹwhẹ bo nọ na ẹn tuli nado to mọwà zọnmii.

14. Nawẹ mẹplọntọ de sọgan gbeje nukọnyiyi nuplọntọ de tọn pọ́n gbọn?

¹⁴ Mí dona nọ do homẹfa hia whenue mí to alọgọna nuplọntọ de nado yinukọn jẹ klandowiwe po baptẹm po kọ̀n. Amọ́, eyin e wá jẹ fie e na jẹ, mí dona dindona eyin ojlo etọn wẹ nado sẹ̀n Jehovah Jiwheyẹwhe. Be a doayi nudelẹ go he dohia dọ nuplọntọ lọ to vivẹnudo nado setonuna gbedide Jesu tọn lẹ ya? Kavi e jlo na mọdona nuhe Biblu plọnmẹ lẹ poun wẹ?

15. Etẹlẹ wẹ na dohia mẹplọntọ de dọ nuplọntọ de to nukọnyi?

¹⁵ Nọ gbeje nukọnyiyi nuplọntọ lọ tọn pọ́n whẹwhẹ. Di apajlẹ, be e nọ dọ numọtolanmẹ he e tindo gando Jehovah go lẹ tọ́n ya? Be e nọ hodẹ̀ hlan Jehovah ya? (Salm. 116:1, 2) Be e yiwanna Biblu hihia ya? (Salm. 119:97) Be e nọ yì opli lẹ to gbesisọ mẹ ya? (Salm. 22:22) Be e ko basi vọjlado he jẹ lẹ to gbẹzan etọn mẹ ya? (Salm. 119:112) Be e ko jẹ nuhe plọn e te lẹ má hẹ hẹnnumẹ po họntọn etọn lẹ po ji ya? (Salm. 9:1) Hú popolẹpo, be e jlo na lẹzun Kunnudetọ Jehovah tọn de ya? (Salm. 40:8) Eyin nuplọntọ lọ ma to dagbe wà to adà  ehelẹ mẹ, yí zinzin do dindona nuhewutu wẹ, enẹgodo yí homẹdagbe do dọhodo whẹho lọ ji hẹ ẹ, amọ́ ma gbánú-donú blo. *

16. Etẹlẹ wẹ gán dohia dọ mí dona doalọtena plọnmẹ Biblu de?

¹⁶ Sọn ojlẹ de mẹ jẹ devo mẹ, nọ pọ́n eyin a dona gbẹ́ zindonukọn nado to nuplọn hẹ mẹde. Kanse dewe dọ: ‘Be nuplọntọ lọ ma nọ wleawuna oplọn lọ wẹ ya? Be e ma nọ jlo na wá opli lẹ wẹ ya? Be aṣa ylankan lẹ gbẹ́ to fẹ̀n mẹ na ẹn wẹ ya? Be e gbẹ́ pò to sinsẹ̀n lalo de mẹ wẹ ya?’ Eyin gblọndo kanbiọ enẹlẹ tọn yin mọwẹ, nado zindonukọn bo to nuplọn hẹ omẹ mọnkọ sọgan taidi sin-bado-pápá-nẹgbé! Naegbọn mí na zindonukọn nado to nuplọn hẹ nuplọntọ de to whenuena e yindọ e ma yọ́n pinpẹn nuhe plọn e te lẹ tọn nugbonugbo bo ma sọ jlo na bayi diọdo?

17. Sọgbe hẹ 1 Timoti 4:16, etẹwẹ mẹhe nọ plọn Biblu hẹ mẹ lẹpo dona wà?

¹⁷ Mí nọ ylọ azọngban mítọn nado hẹn gbẹtọ lẹ zun devi dọ nujọnu podọ ojlo mítọn wẹ nado gọalọna Biblu plọntọ mítọn lẹ nado yinukọn jẹ baptẹm kọ̀n. Enẹwutu wẹ mí nọ jlo na na dotẹnmẹ Biblu nado plọnmẹ, podọ nado yí zohunhun po nujikudo po do wàmọ. Mí ni nọ na tuli nuplọntọ lọ nado jihọntọn lẹ to agun mẹ. Mí ni sọ nọ zinnudo yanwle klandowiwe po baptẹm po tọn ji bo nọ gbeje nukọnyiyi nuplọntọ lọ tọn pọ́n sọn ojlẹ de mẹ jẹ devo mẹ. (Pọ́n apotin lọ “ Lee Mí Gán Gọalọna Nuplọntọ lẹ Nado Yinukọn Jẹ Baptẹm Kọ̀n Do.”) Ayajẹnu wẹ eyin nado mọdọ mí sọgan tindo mahẹ to azọ́n gbẹwhlẹngán tọn ehe mẹ! Mì gbọ mí ni magbe nado wà nuhe go mí pé lẹpo nado to anadena plọnmẹ Biblu he to nukọnzindo lẹ, na yé nido pegan na baptẹm.