HOSỌ OPLỌN TỌN 41
Gọalọna Nuplọntọ Towe Nado Pegan Na Baptẹm—Apá Tintan
“Mì dohia dọ mìwlẹ wẹ yin wekanhlanmẹ Klisti tọn de he míwlẹ he yin lizọnyizọnwatọ lẹ kàn.”—2 KỌL. 3:3.
OHÀN 78 “Nọ to Ohó Jiwheyẹwhe Tọn Plọnmẹ”
BLADOPỌ *
Etẹwẹ gán sọ hẹn homẹ hagbẹ agun de tọn lẹ tọn hùn hugan dọ yé ni mọdọ plọnmẹ Biblu de wá yiwanna Jehovah bosọ yí baptẹm? (Pọ́n hukan 1)
1. Nawẹ 2 Kọlintinu lẹ 3:1-3 gọalọna mí nado yọ́n pinpẹn lẹblanulọkẹyi he mí tindo nado deanana plọnmẹ Biblu de nado yinukọn jẹ baptẹm kọ̀n tọn gbọn? (Pọ́n yẹdide he to wepa ji.)
NAWẸ e nọ ṣí na we eyin a mọ bọ Biblu plọntọ he tin to aigba-denamẹ agun towe tọn ji de yí baptẹm? Ayihaawe ma tin dọ homẹ towe nọ hùn. (Mat. 28:19) Podọ, eyin devi yọyọ he a plọnnu hẹ de wẹ, ayajẹ towe na gọfla dọ e yí baptẹm! (1 Tẹs. 2:19, 20) Devi he ṣẹṣẹ yí baptẹm lẹ yin “wekanhlanmẹ mẹpipa tọn” dagbe lẹ na mẹhe plọnnu hẹ yé lẹ, podọ na agun lọ blebu ga.—Hia 2 Kọlintinu lẹ 3:1-3.
2. (a) Kanbiọ titengbe tẹ ji wẹ mí dona lẹnnupọndo, podọ etẹwutu? (b) Etẹwẹ yè nọ ylọdọ plọnmẹ Biblu? (Pọ́n nudọnamẹ odò tọn.)
2 Ayajẹnu wẹ e yin nado mọdọ to owhe ẹnẹ he wayi lẹ gblamẹ, linlin nudi plọnmẹ Biblu * 10 000 000 tọn wẹ yin nina lẹdo aihọn pé to sunmẹsunmẹ. Podọ, to owhe enẹlẹ dopolọ gblamẹ, gbẹtọ nudi 280 000 wẹ nọ yí baptẹm to whemẹwhemẹ bo nọ lẹzun Kunnudetọ Jehovah tọn, yèdọ devi yọyọ Jesu Klisti tọn lẹ. Nawẹ mí gán gọalọna mẹsusu dogọ to Biblu plọntọ livi susu ehelẹ mẹ nado yí baptẹm gbọn? Dile e na dẹnsọ bọ Jehovah na yí homẹfa do to whenu po dotẹnmẹ po jodo na gbẹtọ lẹ nado lẹzun devi Klisti tọn lẹ, ojlo mílọsu tọn wẹ nado wà nuhe go mí pé lẹpo nado gọalọ, na yé nido yinukọn jẹ baptẹm kọ̀n dile e na yawu yọnbasi do. Azán kaka de masọ pò to gbàn ji!—1 Kọl. 7:29a; 1 Pita 4:7.
3. Etẹ ji wẹ mí na dọhodo to hosọ ehe mẹ gando anadidena plọnmẹ Biblu lẹ go?
3 Na gbẹtọ lẹ hinhẹn zun devi yin azọ́n niyaniya tọn de wutu, e yin bibiọ to azọ́nwatẹn alahọ tọn lẹ si nado pọ́n nuhe yé sọgan wà nado gọalọna susu to Biblu plọntọ mítọn lẹ mẹ nado yinukọn jẹ baptẹm kọ̀n. To hosọ ehe po dehe bọdego po mẹ, mí na mọ nuhe mí sọgan plọn sọn gbehosọnalitọ lẹ, mẹdehlan lẹ, po nugopọntọ lẹdo tọn numimọnọ lẹ po dè. * (Howh. 11:14; 15:22) Yé basi zẹẹmẹ nuhe mẹplọntọ lẹ po nuplọntọ yetọn lẹ po sọgan wà tọn nado hẹn plọnmẹ Biblu de tindo kọdetọn dagbe dogọ. To hosọ ehe mẹ, mí na dọhodo onú atọ́n delẹ ji he nuplọntọ lẹpo dona wà nado yinukọn po gbesisọ po jẹ baptẹm kọ̀n.
NỌ BASI OPLỌN LỌ TO SẸMẸSẸMẸ
Kanse nuplọntọ towe eyin fide tin he mì gán nọ sinai dopọ te nado dọhodopọ do Biblu ji (Pọ́n hukan 4-6tọ)
4. Etẹwẹ mí dona yọnẹn gando anadidena plọnmẹ Biblu de to ohọ̀n ji go?
4 Mẹmẹsunnu po mẹmẹyọnnu mítọn susu lẹ po wẹ nọ deanana plọnmẹ Biblu lẹ to ohọ̀n whétọ lẹ tọn ji. Dile etlẹ yindọ bẹjẹeji dagbe de wẹ ehe yin nado whàn mẹlẹ na yé nido do ojlo to Biblu mẹ, hodọdopọ ehelẹ nọ saba nọ glido bo sọgan nọma nọ yin to osẹ lẹpo mẹ. Nado doafọna ojlo mẹde tọn, wẹnlatọ delẹ nọ yí sọha alokan tọn mẹlọ tọn bo nọ tẹkan hlan ẹn kavi kanwehlan ẹn to azán he gbè yé ma nọ yì e dè te nado má linlẹn Owe-wiwe lẹ tọn kleun de hẹ ẹ. Hodọdopọ mọnkọ lẹ he nọ wá aimẹ sọn ojlẹ de mẹ jẹ devo mẹ gán zindonukọn na osun susu lẹ bo ma dekọtọn do plọnmẹ Biblu kọdetọn dagbenọ de mẹ. Amọ́, nado dọ hójọhó, be nuplọntọ de na yinukọn bo bayi klandowiwe bosọ yí baptẹm eyin whenu po huhlọn po he e nọ yizan nado plọn Ohó Jiwheyẹwhe tọn lẹpo ján niyẹn ya? E na vẹawu.
5. Sọgbe hẹ Luku 14:27-33, etẹ ji wẹ Jesu zinnudo dọ e gán gọalọna mí to azọ́n mẹhẹnzun devi tọn mítọn mẹ?
5 To ojlẹ de mẹ, Jesu na apajlẹ de nado do nuhe mẹde dona wà eyin e jlo na lẹzun devi etọn hia. E dọho gando mẹhe jlo na gbá atọ̀họ̀ de po ahọlu he jei awhàngbenu de po go. Jesu dọ dọ họ̀gbátọ lọ dona “sinai bo lẹn akuẹ etọn whẹ́” nado pọ́n eyin e na dotana atọ̀họ̀ lọ, podọ ahọlu lọ dona “sinai bo dewé whẹ́” nado pọ́n eyin awhànpa etọn gán dotana nuhe yé to linlẹn nado wà lọ. (Hia Luku 14:27-33.) Mọdopolọ, Jesu yọnẹn dọ mẹhe jlo na lẹzun devi emitọn de dona yí sọwhiwhe do gbadopọnna nuhe e na biọ nado yin hodotọ etọn. Enẹwutu, mí dona na tuli devi sọgodo tọn lẹ nado nọ plọnnu hẹ mí to osẹ lẹpo mẹ. Nawẹ mí sọgan wà ehe gbọn?
6. Etẹwẹ mí sọgan dovivẹnu nado wà nado tindo plọnmẹ Biblu he to nukọnyi lẹ?
6 Nado bẹjẹeji, nọ dlẹnkanna whenu he a nọ yizan na oplọn họntonu tọn enẹlẹ. Vlavo a gán nọ dọhodo nuagokun Owe-wiwe tọn devo de ji dogọ to dlapọn dopodopo whenu. Whenue nupinplọn na whenu susu ko má whétọ lọ, kanse e eyin fide tin he mì gán sinai dopọ te nado zindonukọn to hodọdopọ lọ mẹ. Nue whétọ lọ gblọn na do obá he mẹ Biblu pinplọn yin nujọnu na ẹn jẹ hia. To nukọn mẹ, na nuplọntọ lọ nido yawu yinukọn, a tlẹ sọgan kanse e eyin e na jlo dọ oplọn lọ ni nọ yin bibasi whla awe to osẹ dopo mẹ. Ṣigba, nupinplọn whla dopo kavi whla awe to sẹmẹsẹmẹ kẹdẹ ma ko pé.
NỌ WLEAWU WHẸPO DO YÌ OPLỌN LỌ TẸNMẸ
Wleawu ganji na plọnmẹ Biblu lọ, bo dohia nuplọntọ towe lehe yè nọ wàmọ do (Pọ́n hukan 7-9tọ)
7. Nawẹ mẹplọntọ de gán nọ wleawu gbọn whẹpo do yì plọnmẹ Biblu dopodopo tẹnmẹ?
7 Na hiẹ wẹ yin mẹplọntọ lọ wutu, a dona nọ wleawu ganji whẹpo do yì plọnmẹ Biblu dopodopo tẹnmẹ. Nado bẹjẹeji, a gán hia adà he mì jlo na plọn lọ, bo gbadopọnna wefọ he e bẹhẹn lẹ. Nọ hẹn nuagokun lọ lẹ do ayiha mẹ gligli. Nọ lẹnnupọndo hosọ nupinplọn lọ tọn, hóvila lẹ, kanbiọ nupinplọn lọ tọn lẹ, wefọ he yè kàn “hia” donukọnna lẹ, yẹdide lẹ gọna video depope he gán gọalọ nado hẹn hosọ lọ họnwun lẹ ji. Enẹgodo, lẹnayihamẹpọn jẹnukọn do nuplọntọ towe ji podọ do lehe a na ze nudọnamẹ lẹ donukọnna ẹn to aliho he bọawu bosọ họnwun mẹ do ji, na e nido yawu mọnukunnujẹemẹ bosọ yí i do yizan mẹ.—Nẹh. 8:8; Howh. 15:28a.
8. Etẹwẹ nuhe apọsteli Paulu dọ to Kolosinu lẹ 1:9, 10 mẹ plọn mí gando dẹ̀hiho do nuplọntọ mítọn lẹ tamẹ go?
8 Whenue a to awuwle, nọ hodẹ̀ hlan Jehovah do nuplọntọ lọ tamẹ bo nọ donù hudo etọn lẹ go. Biọ to Jehovah si nado gọalọna we na a nido plọnmẹ sọn Biblu mẹ bo jẹ ahun mẹlọ tọn mẹ. (Hia Kolosinu lẹ 1:9, 10.) Tẹnpọn bo lẹnnupọn jẹnukọn do nudepope he gán vẹawuna nuplọntọ lọ nado mọnukunnujẹemẹ kavi nado kẹalọyi lẹ ji. Hẹn do ayiha mẹ dọ yanwle towe wẹ nado gọalọna ẹn, na e nido yinukọn jẹ baptẹm kọ̀n.
9. Nawẹ mẹplọntọ de gán gọalọna nuplọntọ de nado nọ wleawuna oplọn etọn gbọn? Basi zẹẹmẹ.
9 Todido mítọn wẹ yindọ, eyin mí nọ plọnnu hẹ mẹde to gbesisọ mẹ, ehe na gọalọna ẹn nado yọ́n pinpẹn nuhe Jehovah po Jesu po wà na ẹn tọn, bọ e na jlo nado plọnnu dogọ. (Mat. 5:3, 6) Nado mọaleyi sọn nupinplọn lọ mẹ to gigọ́ mẹ, nuplọntọ lọ dona nọ na ayidonugo nuhe plọn e te lẹ. Na e nido pà ẹ, dohia ẹ lehe e yin nujọnu do sọ dọ ni nọ wleawuna oplọn dopodopo, ehe na biọ dọ ni nọ hia nupinplọn lọ jẹnukọn, bo lẹnnupọndo lehe e gandego do ji. Nawẹ mẹplọntọ lọ gán gọalọ gbọn? Wleawuna nupinplọn dopo dopọ hẹ nuplọntọ lọ nado do lehe e nọ yin bibayi do hia ẹ. * Basi zẹẹmẹ lehe yè nọ mọ gblọndo tlọlọ lẹ na kanbiọ nupinplọn lọ tọn lẹ do tọn na ẹn, bo dohia ẹ lehe hùzizẹdo hogbe kavi hodidọ kleun de poun glọ na gọalọna ẹn nado flin gblọndo lọ do. Enẹgodo biọ to e si nado na gblọndo lọ to hogbe etọn titi mẹ. Eyin e wàmọ, a na penugo nado yọ́n obá he mẹ e mọnukunnujẹ nupinplọn lọ mẹ jẹ. Amọ́, onú devo sọ tin he a gán na tuli nuplọntọ towe nado wà.
NỌ PLỌN ẸN NADO NỌ DỌHODOPỌ HẸ JEHOVAH EGBESỌEGBESỌ
Dohia plọnmẹ Biblu towe lehe yè nọ dọhodopọ hẹ Jehovah do (Pọ́n hukan 10, 11tọ)
10. Naegbọn e do yin nujọnu nado nọ hia Biblu egbesọegbesọ, podọ etẹwẹ nuplọntọ de dona wà nado mọaleyi to gigọ́ mẹ sọn Biblu hihia etọn mẹ?
10 Gbọnvona dọ nuplọntọ lọ na nọ plọnnu hẹ mẹplọntọ etọn to sẹmẹsẹmẹ, e nasọ mọaleyi ga eyin e nọ wà nudelẹ na ede to azán lẹpo ji. E dona nọ dọhodopọ hẹ Jehovah. Gbọnna? Gbọn todidoai po hodidọ na Jehovah po dali. E sọgan nọ dotoaina Jiwheyẹwhe gbọn Biblu hihia egbesọegbesọ dali. (Jọṣ. 1:8; Salm. 1:1-3) Dohia ẹ lehe e sọgan yí “Tito-to-Whinnu Biblu Hihia Tọn” he yin zizedo jw.org * ji zan do. Na nugbo tọn, nado gọalọna ẹn na e nido mọaleyi to gigọ́ mẹ sọn Biblu hihia etọn mẹ, nọ na ẹn tuli nado lẹnayihamẹpọn do nuhe Biblu to pinplọn ẹn gando Jehovah go gọna lehe e gán yí nuhe plọn e te lẹ do yizan mẹ to gbẹzan etọn mẹ do ji.—Owalọ 17:11; Jak. 1:25.
11. Nawẹ nuplọntọ de gán plọn nado nọ hodẹ̀ to aliho he sọgbe mẹ gbọn, podọ naegbọn e do yin nujọnu dọ e ni nọ hodẹ̀ hlan Jehovah whẹwhẹ?
11 Nọ na tuli nuplọntọ towe nado nọ dọhona Jehovah gbọn dẹ̀hiho egbesọegbesọ dali. Nọ yí ahundopo do hodẹ̀ hẹ nuplọntọ towe, podọ do ota etọn mẹ to bẹjẹeji podọ to vivọnu oplọn dopodopo tọn. Eyin e nọ dotoaina odẹ̀ towe lẹ, ewọ lọsu na plọn lehe yè nọ dọhona Jehovah Jiwheyẹwhe sọn ahun mẹ wá bo nọ yí ahundopo do hodẹ̀ hlan ẹn to oyín Jesu Klisti tọn mẹ do. (Mat. 6:9; Joh. 15:16) Yí nukun homẹ tọn do pọ́n lehe Biblu hihia egbesọegbesọ (enẹ wẹ todidoai na Jehovah) po dẹ̀hiho po, enẹ wẹ hodidọ na Jehovah na gọalọna nuplọntọ towe nado dọnsẹpọ Jiwheyẹwhe dogọ do! (Jak. 4:8) Eyin nuplọntọ towe nọ wà onú ehelẹ whẹwhẹ, ehe na gọalọna ẹn nado wleawuna nudevo de he gán plan ẹn jẹ klandowiwe po baptẹm po kọ̀n.
GỌALỌNA ẸN NADO WLEAWUNA HAṢINṢAN MẸDETITI TỌN DE HẸ JEHOVAH
12. Nawẹ mẹplọntọ de gán gọalọna nuplọntọ etọn nado wleawuna haṣinṣan de hẹ Jehovah gbọn?
12 Nuhe nuplọntọ de plọn to oplọn etọn whenu dona jẹ ahun po ayiha etọn po mẹ. Etẹwutu? Ahun mítọn he bẹ ojlo po numọtolanmẹ mítọn lẹ po hẹn wẹ nọ whàn mí nado yinuwa. Jesu plọn nususu mẹlẹ, podọ yé nọ jlo na plọnnu sọn e dè. Amọ́, gbẹtọ lẹ nọ lẹzun hodotọ etọn, na e nọ jẹ ahun yetọn mẹ wutu. (Luku 24:15, 27, 32) Nuplọntọ towe dona nọ mọ Jehovah di Mẹhe tin nugbonugbo de, yèdọ mẹde he e gán wleawuna haṣinṣan de hẹ, bo nọ pọnhlan di Otọ́ etọn, Jiwheyẹwhe etọn podọ Họntọn etọn. (Salm. 25:4, 5) To Biblu pinplọn lọ whenu, dọ̀n ayiha nuplọntọ lọ tọn wá jẹhẹnu Jiwheyẹwhe mítọn tọn lẹ ji. (Eks. 34:5, 6; 1 Pita 5:6, 7) Mahopọnna hosọ he ji mì to nuplọn do, nọ zinnudo Omẹ alọpa he Jehovah yin ji. Gọalọna nuplọntọ lọ nado yiwanna jẹhẹnu dagbedagbe Jehovah tọn lẹ, enẹ wẹ owanyi, homẹdagbe po lẹblanu etọn po. Jesu dọ dọ “gbedide lọ he klo hugan bosọ yin tintan” wẹ nado “yiwanna Jehovah Jiwheyẹwhe towe.” (Mat. 22:37, 38) Dovivẹnu nado do owanyi sisosiso na Jiwheyẹwhe do ahun nuplọntọ towe tọn mẹ.
13. Nawẹ yè gán gọalọna nuplọntọ de nado plọnnu gando jẹhẹnu Jehovah tọn lẹ go gbọn? Na apajlẹ.
13 To hodọdopọ hẹ nuplọntọ towe whenu, nọ do numọtolanmẹ sisosiso he a do na Jehovah hia. Enẹ na gọalọna ẹn nado mọdọ emi dona wleawuna họntọnjiji mẹdetiti tọn de, enẹ wẹ haṣinṣan de hẹ Jiwheyẹwhe. (Salm. 73:28) Di apajlẹ, be hodidọ de to owe oplọn tọn lọ mẹ kavi to wefọ de mẹ he do owanyi, nuyọnẹn, whẹdida dodo kavi huhlọn Jehovah tọn hia bosọ yinuwado ji we sisosiso ya? Dọ ẹ na nuplọntọ towe, bo dike ni yọnẹn dọ enẹ yin dopo poun to nuhewutu a do yiwanna Otọ́ olọn mẹ tọn mítọn lẹ mẹ. Amọ́, nudevo sọ tin he Biblu plọntọ lẹpo dona wà nado yinukọn jẹ baptẹm kọ̀n.
NỌ NA ẸN TULI NADO NỌ WÁ OPLI AGUN TỌN LẸ
Na tuli nuplọntọ towe nado jẹ opli lẹ wá ji dile e na yawu yọnbasi do! (Pọ́n hukan 14, 15tọ)
14. Nawẹ nuhe Heblu lẹ 10:24, 25 dọ gando opli lẹ go gán gọalọna Biblu plọntọ de nado yinukọn gbọn?
14 Mímẹpo wẹ nọ jlo dọ nuplọntọ mítọn lẹ ni yinukọn jẹ baptẹm kọ̀n. Dopo to aliho tangan he mẹ mí gán gọalọna yé te lẹ mẹ wẹ nado nọ na yé tuli nado nọ wá opli lẹ. Mẹplọntọ numimọnọ lẹ dọ dọ, nuplọntọ he nọ yawu jẹ opli lẹ wá ji lẹ nọ yinukọn taun. (Salm. 111:1) Mẹplọntọ delẹ nọ basi zẹẹmẹ na nuplọntọ yetọn lẹ dọ, odaa nuhe Biblu plọnmẹ lẹ tọn wẹ yé na mọyi to oplọn lọ whenu bo na mọ odaa he pò yí to opli lẹ ji. Hia Heblu lẹ 10:24, 25 hẹ nuplọntọ towe bo dọ ale he e na mọyi lẹ na ẹn eyin e nọ wá opli lẹ. Hò video lọ Etẹwẹ Nọ Jọ to Plitẹnhọ Ahọluduta Tọn? * na ẹn. Gọalọna nuplọntọ towe nado ylọ opli sẹmẹsẹmẹ tọn lẹ wiwá dọ nujọnu.
15. Etẹwẹ mí gán wà nado na tuli nuplọntọ de nado nọ wá opli lẹ to gbesisọ mẹ?
15 Etẹwẹ a gán wà eyin nuplọntọ towe ma ko jẹ opli lẹ wá ji kavi ma nọ wá to gbesisọ mẹ? Yí zohunhun do má nuhe a plọn to opli de ji to agọe hẹ ẹ. Enẹ na whàn nuplọntọ lọ nado nọ wá opli lẹ hugan dọ a ni nọ basi oylọna ẹn poun. Nọ yí Atọ̀họ̀-Nuhihọ́ lọ Tọn kavi Nuplọnwe Opli Gbẹzan po Lizọnyizọn Mítọn po Tọn he mí to pinplọn to alọnu na ẹn. Nọ do nuhe ji mí na dọhodo to opli he na bọdego ji hia ẹ bo kanse e adà he e yiwanna hugan. Nue nuplọntọ towe na mọ kavi sè whla tintan he e wá pli na zẹ̀ nudepope he e ko mọ to sinsẹ̀n devo mẹ go. (1 Kọl. 14:24, 25) E na mọ mẹdevo lẹ he sin apajlẹ dagbe e gán hodo, podọ he na gọalọna ẹn nado yinukọn jẹ baptẹm kọ̀n.
16. Etẹwẹ mí dona wà nado deanana plọnmẹ Biblu lẹ bọ yé na yinukọn jẹ baptẹm kọ̀n, podọ etẹwẹ mí na gbadopọnna to hosọ he bọdego mẹ?
16 Nawẹ mí gán deanana plọnmẹ Biblu lẹ nado yinukọn jẹ baptẹm kọ̀n gbọn? Mí gán gọalọna nuplọntọ de nado ylọ oplọn lọ dọ nujọnu, eyin mí nọ na ẹn tuli nado nọ plọnnu to sẹmẹsẹmẹ bo nọ wleawuna adà nupinplọn lọ tọn dopodopo. E nasọ yọ́n dọ mí ni nọ na ẹn tuli nado nọ dọhodopọ hẹ Jehovah egbesọegbesọ bo wleawuna haṣinṣan mẹdetiti tọn de hẹ Ewọ. Mí sọ dona na tuli nuplọntọ lọ nado nọ wá opli agun tọn lẹ. (Pọ́n apotin lọ “ Nue Nuplọntọ lẹ Dona Wà Nado Yinukọn Jẹ Baptẹm Kọ̀n.”) To hosọ he bọdego mẹ, mí na gbadopọnna onú atọ́n devo lẹ he mẹplọntọ Biblu tọn lẹ gán wà nado gọalọna nuplọntọ lẹ nado yinukọn jẹ Baptẹm kọ̀n.
OHÀN 76 Na E Nọ te Na We?
^ huk. 5 Nado plọnnu mẹde zẹẹmẹdo nado gọalọna mẹlọ nado “lẹnnupọn, kavi nado yinuwa to aliho yọyọ de mẹ.” Hosọ owhe tọn mítọn 2020 tọn he tin to Matiu 28:19 mẹ flinnu mí dọ nujọnu wẹ e yin nado nọ plọn Biblu hẹ gbẹtọ lẹ bo nọ dohia yé lehe yé gán lẹzun devi Jesu Klisti tọn he yí baptẹm lẹ do. To hosọ ehe po dehe bọdego po mẹ, mí na mọ lehe mí gán tindo kọdetọn dagbe dogọ to azọ́n titengbe ehe mẹ do.
^ huk. 2 ZẸẸMẸ HOGBE DE TỌN: Eyin a nọ dọho hẹ mẹde whẹwhẹ do Biblu ji, podọ sọgbe hẹ tito de, be plọnmẹ Biblu de wẹ a to anadena niyẹn. Eyin a ko dohia ẹ lehe oplọn lọ nọ yì do bo ko deanana ẹn whla awe, bosọ mọ kunnudenu lẹ he hẹn we kudeji dọ oplọn lọ na zindonukọn, a sọgan hia ẹ di plọnmẹ Biblu de.
^ huk. 3 Hosọ ehelẹ sọ bẹ ayinamẹ lẹ hẹn sọn hosọ debọdo-dego lọ “Anadidena Plọnmẹ Biblu He to Nukọnzindo Lẹ” mẹ, ehe sọawuhia to zinjẹgbonu Lizọnyizọn Ahọluduta Tọn mítọn mẹ sọn juillet 2004 jẹ mai 2005.
^ huk. 9 Pọ́n video nukunwhiwhe ẹnẹ tọn lọ he hosọ etọn yin Plọnazọ́n Nuplọntọ Towe Nado Nọ Wleawu. To JW Library® mẹ, zín MULTIMÉDIA > NOS RÉUNIONS ET NOTRE MINISTÈRE > DEVENONS PLUS HABILE.
^ huk. 10 ZÍN WESẸDOTẸN > OWE LẸ PO ALỌNUWE LẸ PO.
^ huk. 14 To JW Library® mẹ zín MULTIMÉDIA > NOS RÉUNIONS ET NOTRE MINISTÈRE > OUTILS POUR LA PRÉDICATION.
