1. Etẹwẹ Klistiani he ko yí baptẹm lẹ dona zindonukọn nado to wiwà?

BE A ko yí baptẹm ya? Eyin mọ wẹ, be a ko dohia to gbangba dọ emi tindo yise to Jehovah mẹ bosọ jlo na sẹ̀n ẹn to pọmẹ hẹ titobasinanu * etọn. Na nugbo tọn, a dona zindonukọn nado to yise towe hẹn lodo dogọ to Jehovah mẹ. Podọ, a gbẹ́ dona to jidide towe hẹn sinyẹn deji dọ Jehovah wẹ to titobasinanu etọn yizan to egbehe.

2, 3. Aliho tẹlẹ mẹ wẹ Jehovah nọ deanana titobasinanu etọn te to egbehe? Na apajlẹ delẹ.

² To egbehe, aliho he mẹ Jehovah nọ deanana titobasinanu etọn te nọ do jẹhẹnu etọn lẹ, lẹndai etọn po nujinọtedo etọn lẹ po hia. Mì gbọ mí ni gbadopọnna jẹhẹnu Jehovah tọn atọ̀n delẹ he titobasinanu etọn nọ dohia.

³ Tintan, “Jiwheyẹwhe ma yin mẹnukuntahopọntọ.” (Owalọ 10:34) Owanyi wẹ whàn Jehovah nado ze Visunnu etọn jo taidi “ofligọ de na mẹlẹpo.” (1 Tim. 2:6; Joh. 3:16) Jehovah to omẹ etọn lẹ yizan nado lá wẹndagbe lọ na mẹhe jlo na dotoai lẹpo, bo gbọnmọ dali to alọgọna gbẹtọ susu dile e sọgan yọnbasi do nado mọaleyi sọn ofligọ lọ mẹ. Awetọ, Jehovah yin Jiwheyẹwhe jijọho tọn he nọ nọ̀ titoji. (1 Kọl. 14:33, 40) Enẹwutu, mí dona donukun dọ devizọnwatọ etọn lẹ ni nọ sẹ̀n ẹn taidi pipli de he to titoji bosọ to jijọho mẹ. Atọ̀ntọ, Jehovah wẹ “Nuplọnmẹtọ Daho” lọ. (Isa. 30:20, 21) Abajọ, nuhe titobasinanu etọn nọ na ayidonugo hugan wẹ nado plọnmẹ Ohó gbọdo etọn to agun mẹ, podọ to  kunnudegbe. Nawẹ jẹhẹnu Jehovah tọn atọ̀n enẹlẹ sọawuhia to nuyiwa agun Klistiani tọn dowhenu tọn mẹ gbọn? Nawẹ omẹ Jehovah tọn lẹ nọ do jẹhẹnu enẹlẹ hia to egbehe gbọn? Podọ, nawẹ gbigbọ wiwe sọgan gọalọna we gbọn dile a to sinsẹ̀n to egbehe to titobasinanu etọn mẹ?

4. Sọgbe hẹ Owalọ lẹ 1:8, etẹwẹ Jesu degbena hodotọ etọn lẹ nado wà, podọ alọgọ tẹwẹ yé na mọyi?

⁴ To owhe kanweko tintan whenu. Owẹ̀n he Jesu lá lọ na todido gbẹtọvi lẹpo. (Luku 4:43) E degbena hodotọ etọn lẹ nado gbẹ̀nkàn do azọ́n he e bẹjẹeji lọ nù, bo dekunnu “kaka yì awà he dẹn hugan aigba tọn lẹ ji.” (Hia Owalọ lẹ 1:8.) Nado dọ hójọhó, yé ma gán wà azọ́n ehe po huhlọn yetọn titi po. Yé na do hudo gbigbọ wiwe tọn, enẹ wẹ “alọgọtọ” he sin opà Jesu dona yé lọ.—Joh. 14:26; Zek. 4:6.

5, 6. Aliho tẹlẹ mẹ wẹ gbigbọ wiwe gọalọna hodotọ Jesu tọn lẹ te?

⁵ Hodotọ Jesu tọn lẹ mọ gbigbọ wiwe yí to Pẹntikọsti 33 W.M. Po alọgọ gbigbọ enẹ tọn po, yé jẹ yẹwhehodọ ji to afọdopolọji, podọ to ojlẹ kleun de godo, gbẹtọ fọtọ́n susu lẹ kẹalọyi wẹndagbe lọ. (Owalọ 2:41; 4:4) To whenue homẹkẹn fọ́n, devi lẹ ma joawuna obu, ṣigba yé lẹhlan Jiwheyẹwhe nado mọ alọgọ. Yé hodẹ̀ dọmọ: “Na afanumẹ towe lẹ nado to ohó towe dọ po adọgbigbo lẹpo po.” Enẹgodo, yé gọ́ na gbigbọ wiwe bo zindonukọn nado “yí adọgbigbo do to ohó Jiwheyẹwhe tọn dọ.”—Owalọ 4:18-20, 29, 31.

⁶ Devi Jesu tọn lẹ sọ pehẹ nuhahun devo lẹ ga. Di apajlẹ, vọkan Owe-wiwe lẹ tọn vude poun wẹ tin. Azọ́nwanu nupinplọn tọn lẹ ma supọ́ sọmọ dile e te do to egbehe. Podọ, ogbè voovo lẹ kẹdẹ wẹ mẹhe devi lẹ dona dọyẹwheho na lẹ nọ do. Mahopọnna nuhahun enẹ lẹpo, devi zohunhunnọ enẹlẹ wà nude he taidi nuhe ma yọnbasi—to owhe kleun delẹ poun gblamẹ, yé lá wẹndagbe lọ na “nudida he to olọn glọ lẹpo.”—Kol. 1:6, 23.

7. To owhe kanweko linlán die wayi, nawẹ devizọnwatọ Jehovah tọn lẹ yọ́n nuhe ewọ biọ to yé si lẹ gbọn, podọ nawẹ yé yinuwa gbọn?

⁷ To ojlẹ mítọn mẹ. Jehovah gbẹ́ to anadena omẹ etọn lẹ bosọ to huhlọn na yé. Ohó gbọdo etọn gblamẹ wẹ ewọ nọ na anademẹ lẹ gbọn hugan. Ohó etọn bẹ kandai lizọnyizọn Jesu tọn hẹn gọna gbedide lọ he e na hodotọ etọn lẹ nado zindonukọn to azọ́n he e bẹjẹeji lọ mẹ. (Mat. 28:19, 20) To juillet 1881, Atọ̀họ̀-Nuhihọ́ lọ Tọn dọ dọ: “Mí ma yin yiylọ kavi yin yiyiamisisadode nado mọ gbégbò bo bẹ adọkunnu lẹ pli gba, amọ́ nado yí míde zan bosọ yin yiyizan nado dọyẹwheho wẹndagbe lọ tọn.” Alọnuwe pẹvi de he hosọ etọn yin Mẹhe Azọ́n lọ Yin Zizedo Alọmẹ Na Lẹ he yin didetọn to 1919 to Glẹnsigbe mẹ dọ dọ: “Azọ́n lọ taidi nuhe sẹhundaga, amọ́ azọ́n Oklunọ tọn wẹ, podọ po huhlọn etọn po, mí na hẹn ẹn jẹ vivọnu.” Na nugbo tọn, taidi Klistiani dowhenu tọn lẹ, mẹmẹsunnu adọgbotọ ehelẹ jẹtọ̀ po avọ̀ po nado wazọ́n lọ bo deji dọ gbigbọ wiwe na gọalọna emi nado dọyẹwheho na gbẹtọ wunmẹ lẹpo. Jidide dopolọ wẹ mílọsu gbẹ́ nọ tindo to egbehe.

8, 9. Aliho tẹlẹ wẹ titobasinanu Jehovah tọn nọ yizan nado gbloada na azọ́n yẹwhehodidọ tọn lọ?

⁸ Titobasinanu Jehovah tọn ko yí azọ́nwanu dagbe hugan he tin-to-aimẹ lẹ zan nado hẹn wẹndagbe lọ gbayipe. To azọ́nwanu ehelẹ mẹ, mí gán mọ owe zinjẹgbonu lẹ, “Photo drame de la création,” glamafonu lẹ, mọto he do zomọ gbèzeyiaga tọn lẹ, tito ladio ji tọn lẹ, podọ to agọe, azọ́nwanu ọdinatẹẹ ji tọn lẹ. Titobasinanu Jiwheyẹwhe tọn sọ to azọ́n pligidi he nkọ ma ko yin wiwà pọ́n to whenuho mẹ de wà nado lilẹ́ owe mítọn lẹ do ogbè devo lẹ mẹ! Etẹwutu? Na gbẹtọ wunmẹ lẹpo nido sọgan sè wẹndagbe lọ to ogbè yetọn titi mẹ. Jehovah ma nọ homẹnukuntapọn; ewọ ko dọ jẹnukọn dọ,  wẹndagbe lọ na yin lilá “na akọta lẹpo, hẹnnu lẹpo, ogbè lẹpo podọ gbẹtọ lẹpo.” (Osọ. 14:6, 7) Ojlo etọn wẹ yindọ gbẹtọ lẹpo ni sè owẹ̀n Ahọluduta lọ tọn.

⁹ Bọ mẹhe e nọ vẹawu nado mọ, na yé nọ nọ̀ owhé he nọ yin hihọ́-basina taun lẹ gbè wutu lẹ lo? Nado jẹ susu omẹ ehelẹ tọn dè, titobasinanu Jehovah tọn ko yí aliho kunnudide gbangba tọn voovo lẹ zan. Di apajlẹ, to 2001, Hagbẹ Anademẹtọ lọ kẹalọyi dọ kẹkẹvi kunnudide tọn lẹ po aliho owe titẹ́ tọn devo lẹ po ni yin yiyizan to France, podọ to nukọn mẹ, e yin alọkẹyi to fidevo lẹ ga. Kọdetọn lọ lẹ jiawu taun. To 2011, tito kunnudide tọn yọyọ de yin tintẹnpọn to États-Unis to dopo to nọtẹn he mẹ gbẹtọ nọ supọ́ te hugan lẹ to New York City. To owhe tintan lọ gblamẹ, owe 102 129 podọ alọnuwe 68 911 wẹ yin didogbonu. Humọ, gbẹtọ 4 701 wẹ biọ nado plọn Biblu! E họnwun dọ Jehovah wẹ to gbigbọ wiwe etọn yizan nado nọgodona azọ́n ehe. Enẹwutu, Hagbẹ Anademẹtọ lọ kẹalọyi dọ aliho owe titẹ́ tọn voovo lẹ gán nọ yin yiyizan lẹdo aihọn pé.

10. Etẹwẹ mí gán wà nado hẹn lizọnyizọn mítọn pọnte?

¹⁰ Nuhe a sọgan wà. Nọ mọaleyi to gigọ́ mẹ sọn azọ́nplọnmẹ he Jehovah nọ na mí to opli mítọn lẹ ji mẹ. Nọ dọyẹwheho to gbesisọ mẹ hẹ pipli kunnudegbe tọn towe. Gbọnmọ dali, a gán doayi fie a dona bayi vọjlado te lẹ go, podọ apajlẹ dagbe mẹdevo lẹ tọn nasọ na we tuli. Nọ doakọnnanu to lizọnyizọn lọ mẹ. Dile hosọ owhe ehe tọn flinnu mí do, gbigbọ wiwe Jiwheyẹwhe tọn wẹ nọ hẹn ẹn yọnbasi na mí nado wà ojlo etọn, e ma yin huhlọn mítọn titi. (Zek. 4:6) To popolẹpo mẹ, azọ́n Jiwheyẹwhe tọn wà wẹ mí te.

11. Nawẹ hagbẹ anademẹtọ owhe kanweko tintan whenu tọn wazọ́n to pọmẹ na nulẹ nido nọ titoji to omẹ Jiwheyẹwhe tọn lẹ ṣẹnṣẹn gbọn?

¹¹ To owhe kanweko tintan whenu. Hagbẹ anademẹtọ lọ he to Jelusalẹm wazọ́n to pọmẹ na nulẹ nido nọ titoji, podọ na jijọho nido tin to omẹ Jiwheyẹwhe tọn lẹ ṣẹnṣẹn. (Owalọ 2:42) Di apajlẹ, to whenue nudindọn de fọ́n gando whẹho adàgbigbo tọn go to owhe 49 W.M, hagbẹ anademẹtọ lọ didẹ ninọmẹ lọ to anademẹ gbigbọ wiwe tọn glọ. Eyin kinklan he whẹho  ehe hẹnwa ko gbọṣi aimẹ wẹ, enẹ sọgan ko bẹpla azọ́n yẹwhehodidọ tọn lọ. Dile etlẹ yindọ Ju wẹ apọsteli lẹ po sunnu mẹho lẹ po yin, yé ma dike na aṣa Ju lẹ tọn kavi mẹhe nọ tẹdego majomajo lẹ ni yinuwado yé ji. Kakatimọ, yé lẹhlan Ohó Jiwheyẹwhe tọn po gbigbọ wiwe etọn po nado mọ anademẹ. (Owalọ 15:1, 2, 5-20, 28) Etẹwẹ yin kọdetọn lọ? Jehovah dona nudide yetọn bọ jijọho po pọninọ po gọwá, podọ azọ́n yẹwhehodidọ tọn lọ zindonukọn.—Owalọ 15:30, 31; 16:4, 5.

12. Etẹwẹ dohia dọ titojininọ po jijọho po tin to titobasinanu Jehovah tọn mẹ to egbehe?

¹² To ojlẹ mítọn mẹ. Titobasinanu Jehovah tọn ko dovivẹnu susu nado hẹn titojininọ po jijọho po tin to omẹ Jehovah tọn lẹ ṣẹnṣẹn. Atọ̀họ̀ Nuhihọ́ lọ Tọn 15 novembre 1895 tọn to Glẹnsigbe mẹ tindo hosọ de he yin “Dile E Jẹ Do Podọ to Titoji” he sinai do 1 Kọlintinu lẹ 14:40 ji. Hosọ lọ dọmọ: “Apọsteli lẹ kàn nususu lẹ hlan Klistiani dowhenu tọn lẹ gando titojininọ go . . . Nuyọnẹnnu wẹ e yin nado nọ yí sọwhiwhe do payi ‘nuhe ko yin kinkandai jẹnukọn na oplọn mítọn lẹ go zọnmii.’” (Lom. 15:4) To egbehe, titobasinanu Jehovah tọn nọ dovivẹnu sinsinyẹn nado hẹn titojininọ po jijọho po go to agun lẹ mẹ dile e yin do to ojlẹ Klistiani dowhenu tọn lẹ tọn mẹ. Di apajlẹ, eyin a yì bayi Atọ̀họ̀-Nuhihọ́ lọ tọn to agun devo mẹ, kavi etlẹ yin to otò devo mẹ, a na ko yọ́n hosọ he na yin dogbapọnna po lehe oplọn lọ na yin anadena do po. Tlolo wẹ a na mọ dọ, aliho he mẹ e nọ yin bibayi te ma gbọnvona fie a tlọ́n tọn! Onú devo tẹwẹ sọgan sọ hẹn pọninọ họakuẹ ehe yọ́n bayi, eyin e ma yin gbigbọ wiwe Jiwheyẹwhe tọn?—Zef. 3:9, Odò.

13. Sọgbe hẹ Jakọbu 3:17, kanbiọ tẹlẹ wẹ mí dona nọ kanse míde?

¹³ Nuhe a sọgan wà. Ojlo Jehovah tọn wẹ yindọ, omẹ etọn lẹ ni “hẹn dopo-yinyin gbigbọ tọn go to gẹdẹ pọninọ jijọho tọn mẹ.” (Efe. 4:1-3) Enẹwutu, nọ kanse dewe dọ: ‘Be n’nọ yidogọna pọninọ po jijọho po to agun mẹ ya? Be n’nọ setonuna mẹhe to anadenanu lẹ ya? Be mẹdevo lẹ gán dejido go e titengbe eyin n’do azọngban lẹ to agun mẹ ya? Be n’nọ nọ̀ gànmẹ ji, bo nọ gọalọnamẹ bosọ nọ to gbesisọ mẹ nado yilizọn ya?’ (Hia Jakọbu 3:17.) Eyin a mọdọ fidelẹ tin he  emi dona bayi vọjlado te, bo biọ alọgọ gbigbọ wiwe tọn to odẹ̀ mẹ. Lee a to dotẹnmẹna gbigbọ enẹ nado diọ jijọ towe bo yinuwado walọyizan towe lẹ ji sọ, mọ wẹ mẹmẹsunnu po mẹmẹyọnnu towe lẹ po na yiwanna we bọ a nasọ họakuẹ na yé dogọ.

14. Sọgbe hẹ Kolosinu lẹ 1:9, 10, nawẹ Jehovah plọn omẹ etọn lẹ to owhe kanweko tintan whenu gbọn?

¹⁴ To owhe kanweko tintan whenu. Homẹ Jehovah tọn nọ hùn taun nado plọn omẹ etọn lẹ. (Salm. 32:8) Ojlo etọn wẹ yindọ yé ni yọ́n ewọ, yiwanna ẹn bosọ nọgbẹ̀ kakadoi di ovi he e yiwanna lẹ. Ehelẹ depope ma gán yọ́n bayi, eyin nuplọnmẹ he ewọ nọ namẹ tọn dẹ́n. (Joh. 17:3) To owhe kanweko tintan whenu, Jehovah yí agun Klistiani tọn zan nado plọn omẹ etọn lẹ. (Hia Kolosinu lẹ 1:9, 10.) Gbigbọ wiwe, enẹ wẹ “alọgọtọ” he sin opà Jesu do lọ lọsu gọalọna devi lẹ taun. (Joh. 14:16) E gọalọna yé nado mọnukunnujẹ Ohó Jiwheyẹwhe tọn mẹ ganji, bosọ hẹn nuhe Jesu dọ bosọ wà lẹ wá oflin mẹ na yé, dile e wá yin kinkandai to Owe Wẹndagbe tọn lẹ mẹ do. Nukunnumọjẹnumẹ he Klistiani dowhenu tọn lẹ tindo gando Ohó Jiwheyẹwhe tọn go ehe, hẹn yise yetọn lodo bosọ yidogọna owanyi yetọn na Jiwheyẹwhe, Visunnu etọn podọ na ode awetọ.

15. Aliho tẹlẹ mẹ wẹ a ko mọdọ, Jehovah hẹn opà he e do to Isaia 2:2, 3 di te?

¹⁵ To ojlẹ mítọn mẹ. Jehovah ko dọ jẹnukọn dọ “to azán godo tọn lẹ mẹ,” gbẹtọ lẹ sọn akọta lẹpo mẹ na wọ̀ wá osó yẹhiadonu tọn etọn ji, na ewọ nido plọn yé aliho etọn lẹ. (Hia Isaia 2:2, 3.) Mí mọdọ nuhe e dọ jẹnukọn enẹ to jijọ to alọnu. Sinsẹ̀n nugbo ko yiaga hú sinsẹ̀n lalo wunmẹ lẹpo. Podọ, lehe nuplọnmẹ Biblu tọn he Jehovah nọ na mí lẹ supọ́ do sọ! (Isa. 25:6) E to “afanumẹ nugbonọ podọ nuyọnẹntọ lọ” yizan nado na mí núdùdù gbigbọmẹ tọn susugege, podọ tẹnmẹtẹnmẹ lẹ he nọ bẹ hosọ lẹ, hodidọ lẹ, yẹdide ṣiṣavi tọn lẹ po video lẹ po hẹn. (Mat. 24:45) Mí nọ do numọtolanmẹ he họntọn  Jobu tọn Elihu tindo nkọ, mẹhe dọ po whẹjijọ po dọmọ: “Nuplọnmẹtọ tẹwẹ taidi [Jiwheyẹwhe]?”—Jobu 36:22.

16. Etẹwẹ a sọgan wà nado mọaleyi sọn nuplọnmẹ Jehovah tọn lẹ mẹ?

¹⁶ Nuhe a sọgan wà. Gbigbọ Jiwheyẹwhe tọn na gọalọna we nado yí nuhe a nọ hia bosọ nọ plọn to Ohó etọn mẹ lẹ do yizan mẹ. Nọ hodẹ̀ dile salmu-kantọ lọ hò do dọmọ: “Plọn mi aliho towe, Jehovah E. Yẹn na nọ zinzọnlin to nugbo towe mẹ. Hẹn mi nado nọ dibusi oyín towe po ahun lẹpo po.” (Salm. 86:11) Enẹwutu, zindonukọn nado nọ dù núdùdù gbigbọmẹ tọn he Jehovah nọ namẹ gbọn Ohó etọn po titobasinanu etọn po gblamẹ. Na nugbo tọn, yanwle towe ma dona yin nado bẹ oyọnẹn pli poun. Amọ́, ojlo towe dona yin nado dike nugbo lọ ni mọ ahun towe, podọ nado nọ nọgbẹ̀ sọgbe hẹ ẹ to gbẹzan towe mẹ. Gbigbọ Jehovah tọn gán gọalọna we na e nido pà we. A sọ dona nọ desọn ojlo mẹ nado na tuli mẹmẹsunnu po mẹmẹyọnnu towe lẹ po. (Heb. 10:24, 25) Etẹwutu? Na whẹndo gbigbọmẹ tọn towe wẹ yé yin wutu. Nọ hodẹ̀ dọ gbigbọ Jiwheyẹwhe tọn ni gọalọna we nado na gblọndo he wá sọn ahun mẹ lẹ, podọ nado nọ na dagbe hugan towe to whenue a do azọ́n to opli lẹ ji. Eyin a nọ wàmọ, a na dohia Jehovah po Visunnu etọn po dọ a yiwanna “lẹngbọ” họakuẹ yetọn lẹ.—Joh. 21:15-17.

17. Aliho tẹlẹ mẹ wẹ a gán dohia te dọ emi nọ nọgodona titobasinanu Jehovah tọn po nugbonọ-yinyin po?

¹⁷ To madẹnmẹ, titobasinanu dopo gee he na pò to aigba ji, wẹ dehe gbigbọ Jiwheyẹwhe tọn to anadena. Enẹwutu, nọ yí zohunhun do wazọ́n dopọ hẹ titobasinanu Jehovah tọn. A na dohia dọ emi tindo owanyi mẹnukuntamahopọn tọn Jiwheyẹwhe tọn nkọ, eyin a nọ lá wẹndagbe lọ na mẹhe a dukosọna lẹpo. Taidi Jiwheyẹwhe, eyin a yiwanna titojininọ po jijọho po, a na yidogọna pọninọ to agun mẹ. Podọ, a na dohia dọ emi nọ dotoaina Nuplọnmẹtọ Daho towe, eyin a nọ mọaleyi sọn núdùdù gbigbọmẹ tọn he e nọ wleawuna lẹ mẹ to gigọ́ mẹ. Enẹ na zọ́n bọ ahun towe ma na gbàdo dile aihọn Satani tọn to vivọnu wá. Kakatimọ, a na gboadọ bo nọtegli to pọmẹ hẹ mẹhe yí nugbonọ-yinyin do to Jehovah sẹ̀n to titobasinanu etọn mẹ lẹ.