Be e ko vẹawuna we pọ́n nado flin nuhe a ṣẹṣẹ plọn ya? Mímẹpo go wẹ enẹ nọ jọ do sọn ojlẹ de mẹ jẹ devo mẹ. Etẹwẹ gán gọalọna we? Nọ gbadopọnna nuagokun tangan lẹ.

Dile a to nuplọn, nọ yiagbọji sọn ojlẹ de mẹ jẹ devo mẹ nado kàn linlẹn tangan lẹ dai. Doayi lehe apọsteli Paulu gọalọna mẹhe to wekanhlanmẹ etọn hia lẹ nado wàmọ do go whenue e wlan dọmọ: “Todin, nuagokun nuhe dọ mí te lọ tọn die.” (Heb. 8:1) Po hogbe ehelẹ po, e gọalọna hosetọ etọn lẹ nado hodo nuhe dọ e te bo mọ lehe nuagokun dopodopo gando hosọ etọn go do.

A gán nọ de whenu dovo, vlavo nukunwhiwhe ao to vivọnu nupinplọn towe tọn nado lẹnnupọndo nuagokun tangan nuhe a plọn lẹ tọn ji. Eyin a ma penugo nado flin yé, vọ́ pọ́n hóvila lẹ kavi hodidọ tangan lẹ he nọ saba yin hodidọ tintan hukan dopodopo tọn nado flinnu dewe. Eyin a plọn nuyọyọ de, tẹnpọn nado yí hogbe towe titi lẹ do basi zẹẹmẹ etọn. Dile a to dogbapọnna nuagokun tangan lẹ, a na hẹn nugopipe nufinflin tọn towe pọnte dogọ bo nasọ mọnukunnujẹ lehe hosọ lọ gando gbẹzan towe go do mẹ hezeheze.