HOSỌ OPLỌN TỌN 40
OHÀN 30 Otọ́ Ṣie, Họntọn Ṣie, Jiwheyẹwhe Ṣie
Jehovah “Nọ Hẹnazọ̀ngbọna Mẹhe Ahun Yetọn Jẹflumẹ Lẹ”
“E nọ hẹnazọ̀ngbọna mẹhe ahun yetọn jẹflumẹ lẹ; e nọ blá apà yetọn lẹ.”—SALM. 147:3.
NUHE E BẸHẸN
Jehovah nọ hò mẹhe to yaji to numọtolanmẹ-liho lẹ tọn pọ́n sisosiso. Hosọ ehe na do lehe e nọ de awubla mítọn pò bosọ nọ gọalọna mí nado nọ miọnhomẹna mẹdevo lẹ do hia.
1. Numọtolanmẹ tẹwẹ Jehovah nọ do na devizọnwatọ etọn lẹ?
ETẸ go wẹ Jehovah nọ doayi eyin e pọ́n devizọnwatọ etọn lẹ hlan to aigba ji? E nọ doayi ayajẹ mítọn po awubla mítọn po go. (Salm. 37:18) Eyin e mọdọ mí to sinsẹ̀n ewọ po nugopipe mítọn lẹpo po mahopọnna dọ mí to pipehẹ awufiẹsa to numọtolanmẹ-liho, homẹ etọn nọ hùn taun! Humọ, e tindo ojlo vẹkuvẹku nado gọalọna mí bosọ miọnhomẹna mí.
2. Etẹwẹ Jehovah nọ wà na mẹhe ahun yetọn jẹflumẹ lẹ, podọ nawẹ mí gán mọaleyi sọn nukunpedomẹgo etọn mẹ gbọn?
2 Salmu lẹ 147:3 dọ dọ Jehovah “nọ blá apà” mẹhe ahun yetọn jẹflumẹ lẹ tọn. Tofi, Jehovah yin alọdlẹndo taidi mẹhe yí awuvẹmẹ do nọ penukundo mẹhe gbleawu to numọtolanmẹ-liho lẹ go. Etẹwẹ mí dona wà nado duale nukunpedomẹgo Jehovah tọn? Lẹnnupọndo apajlẹ de ji. Doto azọ́nyọnẹntọ de gán wà nususu nado hẹn mẹhe gbleawu de jẹgangan. Amọ́ nado mọaleyi, mẹhe gbleawu lọ dona hodo anademẹ doto lọ tọn po sọwhiwhe po. To hosọ ehe mẹ, mí na mọ nuhe Jehovah dọ to Ohó etọn mẹ na mẹhe to yaji to numọtolanmẹ-liho lẹ, bosọ gbadopọnna lehe mí gán yí ayinamẹ owanyinọ etọn lẹ do yizan mẹ do.
JEHOVAH NỌ HẸN MÍ DEJI DỌ MÍ HỌAKUẸ
3. Naegbọn mẹdelẹ do nọ mọdọ emi ma vó nude?
3 Mí to gbẹnọ to aihọn he mẹ owanyi hán te de, podọ e blawu dọ yè ko hẹn mẹdelẹ nado nọ mọdọ yé ma vó nude. Mẹmẹyọnnu de he nọ yin Helen a dọmọ: “N’whẹ́n to whẹndo de he mẹ owanyi ma sù sọmọ te. Baba ṣie ylanhùn taun bo nọ dọna mí egbesọegbesọ dọ nuvọ́nọ wẹ mí.” Vlavo taidi Helen, yè gán ko nọ yinuwa hẹ we to aliho agọ̀ mẹ, mọhodọdo gowe whẹwhẹ kavi hẹn we lẹndọ nuvọ́nọ wẹ a yin. Eyin mọwẹ, e gán nọ vẹawuna we nado yise dọ mẹde nọ hò towe pọ́n nugbonugbo.
4. Sọgbe hẹ Salmu lẹ 34:18, jide tẹwẹ Jehovah na mí?
4 Eyin mẹdevo lẹ tlẹ yinuwa hẹ we to aliho agọ̀ mẹ, a gán kudeji dọ Jehovah yiwanna we bọ a sọ họakuẹ to nukun etọn mẹ. Ewọ “ma dẹn do mẹhe ahun yetọn jẹflumẹ lẹ.” (Hia Salmu lẹ 34:18.) Eyin a tin to ‘ayimajai’ mẹ, flindọ Jehovah mọ jẹhẹnu dagbe towe lẹ bo dọ̀n we wá ede dè. (Joh. 6:44) E nọ to gbesisọ mẹ whepoponu nado gọalọna we, na a họakuẹ na ẹn wutu.
5. Etẹwẹ mí gán plọn sọn aliho he mẹ Jesu yinuwa hẹ mẹhe mẹlẹ nọ yí nukunpẹvi do pọ́n lẹ te mẹ?
5 Mí gán plọnnu gando numọtolanmẹ Jehovah tọn lẹ go eyin mí lẹnnupọndo apajlẹ Jesu tọn ji. To lizọnyizọn aigba ji tọn Jesu tọn whenu, e doayi mẹhe mẹlẹ nọ yí nukunpẹvi do pọ́n lẹ go, podọ e yinuwa hẹ yé po awuvẹmẹ po. (Mat. 9:9-12) Whenue nawe de doalọ awugbó Jesu tọn go po linlẹn lọ po dọ azọ̀n emitọn na gbọ, e miọnhomẹna ẹn bosọ pà ẹ na yise etọn wutu. (Malku 5:25-34) Jesu nọ do jẹhẹnu Otọ́ etọn tọn lẹ hia to aliho pipé mẹ. (Joh. 14:9) Enẹwutu, a gán kudeji dọ a họakuẹ to nukun Jehovah tọn mẹ podọ e nọ doayi jẹhẹnu dagbe towe lẹ go kakajẹ yise towe po owanyi he a tindo na ẹn po ji.
6. Nawẹ mẹde gán duto numọtolanmẹ nuvọ́nọ-yinyin tọn ji gbọn?
6 Etẹwẹ a gán wà eyin a gbẹ́ nọ tindo ayihaawe dọ emi họakuẹ? Nọ hia wefọ Biblu tọn he nọ hẹn we kudeji dọ a họakuẹ na Jehovah lẹ bo nọ lẹnayihamẹpọn do yé ji. b (Salm. 94:19) Eyin a gboawupo nado jẹ yanwle de kọ̀n kavi gbọjọ na a ma gán wà nususu taidi mẹdevo lẹ wutu, ma gblewhẹdo dewe blo. Jehovah ma nọ donukun nuhe zẹ̀ huhlọn mítọn go sọn mí si. (Salm. 103:13, 14) Eyin mẹde ko wadanu do gowe pọ́n, ma dowhẹ dewe na nuhe mẹlọ wà do we blo. A ma jẹna nuyiwahẹmẹ mọnkọ! Nọ flindọ ylanwatọ lẹ wẹ Jehovah nọ hẹn nado dogbè, e ma yin mẹhe jiya kanyinylan tọn lẹ. (1 Pita 3:12) Sandra he go yè wadanu do to ovu whenu dọmọ: “N’nọ biọ Jehovah whẹwhẹ dọ ni gọalọna mi nado nọ tindo pọndohlan jlẹkaji tọn gando dee go, enẹ wẹ nado nọ mọ dee dile ewọ nọ wà do.”
7. Nawẹ numimọ he mí ko do wayi lẹ gán yọ́n-na-yizan to sinsẹ̀nzọn mítọn na Jehovah mẹ gbọn?
7 Ma tindo ayihaawe dọ Jehovah gán yí we zan nado gọalọna mẹdevo lẹ gbede blo. E ko doyẹyigona we bo yí we do basi azọ́nwatọ hatọ etọn to lizọnyizọn Klistiani tọn mẹ. (1 Kọl. 3:9) Numimọ he a do gán ko sọ gọalọna we nado nọ vẹawu mẹdevo lẹ bo mọnukunnujẹ numọtolanmẹ he yé gán tindo mẹ. A gán wà nususu nado gọalọna yé. Helen he go mí donù wayi mọ alọgọ yí bo penugo dogọ nado gọalọna mẹdevo lẹ todin. E dọmọ: “Jehovah ko gọalọna ‘nuvọ́nọ’ yẹn nkọ bọ n’nọ mọdọ yè yiwanna mi bọ n’sọ yọ́n-na-yizan.” Homẹ Helen tọn hùn nado sẹ̀n taidi gbehosọnalitọ whepoponu tọn.
JEHOVAH NỌ JLO DỌ MÍ NI KẸALỌYI JONAMẸ EMITỌN
8. Jidenamẹ tẹwẹ mí mọ to Isaia 1:18 mẹ?
8 Nuhe devizọnwatọ Jehovah tọn delẹ ko ṣiwà wayi lẹ, vlavo jẹnukọnna baptẹm kavi to enẹgodo, gbẹ́ nọ wá dotukla yé sinsinyẹn. Amọ́, mí nọ wà dagbe nado flindọ Jehovah ko wleawuna ofligọ lọ na owanyi sisosiso he e tindo na mí wutu. E họnwun dọ e jlo dọ mí ni kẹalọyi nunina emitọn. Jehovah hẹn mí kudeji dọ to whenue mí ko “dọwhẹgbọ” c hẹ ẹ godo, ewọ masọ nọ hia ylando mítọn lẹ dokọna mí ba. (Hia Isaia 1:18.) Lehe Jehovah yiwanna mí do sọ bo nọ wọn ylando mítọn he wayi lẹ! To ojlẹ dopolọ mẹ, e ma nọ wọn nudagbe he mí ko wà lẹ pọ́n gbede.—Salm. 103:9, 12; Heb. 6:10.
9. Naegbọn mí dona nọ dovivẹnu nado ze ayiha do nuhe wà mí te to alọnu gọna nuhe mí na wà to sọgodo lẹ ji kakati ni yin do nuhe wayi lẹ ji?
9 Eyin nuhe a ko wà wayi lẹ nọ dotukla we sinsinyẹn, nọ wà nuhe go a pé lẹpo nado ze ayiha do nuhe wà a te to alọnu gọna nuhe a na wà to sọgodo lẹ ji kakati ni yin do nuhe ko wayi lẹ ji. Lẹnnupọndo apajlẹ apọsteli Paulu tọn ji. E wá vẹna ẹn dọ e ko yí kanyinylan do dohomẹkẹn Klistiani lẹ, amọ́ e yọnẹn dọ Jehovah ko jona emi. (1 Tim. 1:12-15) Be e gbẹ́ zindonukọn nado to dùkọ́ ylando he e ko wà wayi lẹ tọn dù wẹ ya? Ayihaawe matin dọ e ma wàmọ, kẹdẹdile e ma nọ lẹnnupọndo nuhe e ko wadotana to sinsẹ̀n Ju lẹ tọn mẹ lẹ ji do. (Flp. 3:4-8, 13-15) Kakatimọ, Paulu yí zohunhun do penukundo lizọnyizọn etọn go bo ze ayiha do sọgodo ji. Taidi Paulu, a ma gán diọ nuhe ko jọ wayi lẹ. Amọ́, a gán gbògbéna Jehovah to ninọmẹ towe alọnu din tọn lẹ mẹ, bo ze ayiha do sọgodo jiawu he ewọ dopà etọn na we ji.
10. Etẹwẹ mí gán wà eyin nuhe mí ko wà wayi delẹ gbleawuna mẹdevo lẹ?
10 Nuyiwa towe delẹ he gbleawuna mẹdevo lẹ wayi gán nọ dotukla we. Etẹwẹ gán gọalọna we? Wà nuhe go a pé nado jla ninọmẹ lọ do, ehe bẹ ovẹvivẹ ahundopo tọn hẹn. (2 Kọl. 7:11) Biọ Jehovah dọ ni gọalọna mẹhe ji nuṣiwa towe yinuwado lẹ. E gán gọalọna hiẹ po yewlẹ po nado doakọnnanu bo gọ̀ jijọho mọyi.
11. Etẹwẹ mí gán plọn sọn apajlẹ yẹwhegán Jona tọn mẹ? (Sọ pọ́n yẹdide.)
11 Nọ plọnnu sọn nuṣiwa towe he wayi lẹ mẹ, bo dike Jehovah ni yí we zan to aliho depope he ewọ de mẹ. Doayi apajlẹ yẹwhegán Jona tọn go. Kakati Jona ni yì Nineve, dile Jehovah degbena ẹn do, e dedo fidevo pete. Jehovah dọ̀n otó na Jona, podọ e plọnnu sọn nuṣiwa etọn mẹ. (Jona 1:1-4, 15-17; 2:7-10) Agbọ́ Jona tọn ma pé Jehovah. Jiwheyẹwhe sọ na ẹn dotẹnmẹ devo nado yì Nineve, podọ to ojlẹ ehe uwọ mẹ Jona yawu setonu. E ma dike nuhe e ṣiwà ni glọnalina ẹn nado kẹalọyi azọ́ndenamẹ ehe sọn Jehovah dè.—Jona 3:1-3.
To whenue yẹwhegán Jona ko gán sọn adọ̀go whèvi daho lọ tọn mẹ godo, Jehovah dọna ẹn whladopo dogọ nado yì Nineve bo lá owẹ̀n Emitọn (Pọ́n hukan 11tọ)
JEHOVAH NỌ YÍ GBIGBỌ WIWE ETỌN DO MIỌNHOMẸNA MÍ
12. Nawẹ Jehovah nọ na mí jijọho whenue nuylankan de jọ do mí go gbọn? (Filipinu lẹ 4:6, 7)
12 Jehovah nọ yí gbigbọ wiwe etọn do miọnhomẹna mí whenue nuylankan de jọ do mí go. Lẹnnupọndo apajlẹ Ron po Carol po tọn ji. To ajiji mẹ, visunnu yetọn hù ede. Yé dọmọ: “Mí ko jugbọn whlepọn sinsinyẹn lẹ mẹ wayi, amọ́ ehe uwọ sẹhundaga. Whenue amlọn gbẹ́ mí to zánmẹ mí nọ hodẹ̀, podọ na nugbo tọn mí nọ tindo jijọho he yin zẹẹmẹ-basina to Filipinu lẹ 4:6, 7 mẹ.” (Hia.) Eyin a to pipehẹ whlepọn he hẹn we jẹflumẹ de, a gán nọ dọ nuhe to ahun ji na we lẹpo na Jehovah to odẹ̀ mẹ whla nẹmu he jlo we podọ na ojlẹ he jlo we. (Salm. 86:3; 88:1) Nọ biọ Jehovah whẹwhẹ dọ ni na we gbigbọ wiwe etọn. Ewọ ma na dovọ́na obiọ towe pọ́n gbede.—Luku 11:9-13.
13. Nawẹ gbigbọ wiwe gán gọalọna mí nado zindonukọn bo to Jehovah sẹ̀n po nugbonọ-yinyin po gbọn? (Efesunu lẹ 3:16)
13 Be ninọmẹ flumẹjijẹ tọn de ko hẹn we vọgán wẹ ya? Gbigbọ wiwe gán na we huhlọn nado zindonukọn bo to Jehovah sẹ̀n po nugbonọ-yinyin po. (Hia Efesunu lẹ 3:16.) Lẹnnupọndo numimọ mẹmẹyọnnu de he nọ yin Flora tọn ji. Ewọ po asu etọn po to sinsẹ̀n dopọ taidi mẹdehlan whenue asu etọn masọ yin nugbonọ na ẹn ba, enẹwutu yé basi gbẹdai. E dọmọ: “Awufiẹsa sinsinyẹn he n’mọ to whenue e zan mi hẹn mi vọgán taun. N’hodẹ̀ hlan Jehovah bo biọ gbigbọ wiwe etọn nado doakọnnanu. Jehovah na mi nuhe sin hudo n’do nado jẹgangan bọ n’duto nuhe taidi nuhe húagbọ́ mi to bẹjẹeji lọ ji.” Flora mọdọ Jiwheyẹwhe gọalọna emi nado wleawuna jidide dogọ, podọ dọ ewọ na nọgodona emi to whlepọn emitọn lẹpo mẹ. E yidogọ dọmọ: “Hogbe Salmu lẹ 119:32 tọn lẹ gando go e, ehe dọ: ‘Yẹn na nọ yí jejejininọ do zinzọnlin sọgbe hẹ gbedide towe lẹ, na hiẹ dín tẹnmẹ na ẹn to ahun ṣie mẹ wutu.’”
14. Nawẹ mí gán na dotẹnmẹ gbigbọ Jiwheyẹwhe tọn nado nọ yinuwado mí ji gbọn?
14 To whenue a ko biọ gbigbọ wiwe godo, nawẹ a gán yinuwa sọgbe hẹ obiọ enẹ gbọn? Nọ do mahẹ to nuwiwa he na na dotẹnmẹ gbigbọ Jiwheyẹwhe tọn nado yinuwado ji we lẹ mẹ. Ehe bẹ opli lẹ yìyì po kunnudide na mẹdevo lẹ po hẹn. Nọ hẹn linlẹn Jehovah tọn lẹ gọ́ ayiha towe mẹ gbọn Ohó etọn hihia egbesọegbesọ dali. (Flp. 4:8, 9) Dile a to Biblu hia, nọ doayi mẹhe go Biblu donù bọ yé pehẹ whlepọn lẹ go bo nọ lẹnayihamẹpọn do lehe Jehovah gọalọna yé nado doakọnnanu do ji. Sandra he go mí donù wayi pehẹ nuhahun sinsinyẹn debọdo-dego lẹ. E dọmọ: “Kandai Josẹfu tọn yinuwado ji e taun. E ma dike whlepọn po whẹdida agọ̀ he e jiya etọn lẹ po ni dekanpona haṣinṣan etọn hẹ Jehovah.”—Jen. 39:21-23.
JEHOVAH NỌ YÍ YISENỌ HATỌ LẸ ZAN NADO MIỌNHOMẸNA MÍ
15. Mẹnu lẹ wẹ gán miọnhomẹna mí, podọ nawẹ yé gán gọalọna mí gbọn? (Sọ Pọ́n yẹdide lọ.)
15 Whenue mí to yaji, yisenọ hatọ mítọn lẹ gán yin “asisa homẹmiọnnamẹ tọn daho de” na mí. (Kol. 4:11) Mẹmẹsunnu po mẹmẹyọnnu mítọn lẹ po yin aliho jọnun he mẹ Jehovah nọ do owanyi etọn hia mí te. Yisenọ hatọ lẹ gán nọ miọnhomẹna mí whenue yé yí awuvẹmẹ do dotoaina mí kavi mimọ yé to apá mítọn gán dohia dọ yé to godona mí. Yé gán hia wefọ jidevọnamẹ tọn de hẹ mí kavi hodẹ̀ hẹ mí. d (Lom. 15:4) To whedelẹnu, mẹmẹsunnu kavi mẹmẹyọnnu de gán flin mí linlẹn Jehovah tọn bo gbọnmọ dali gọalọna mí nado hẹn jlẹkajininọ go. Klistiani hatọ lẹ gán sọ gọalọna mí to aliho he yọ́n-na-yizan lẹ mẹ taidi awuwiwlena núdùdù whenue mí to ayimajai mẹ.
Họntọn dejidego he whèwhín lẹ gán miọnhomẹnamẹ bosọ nọgodonamẹ taun (Pọ́n hukan 15tọ)
16. Etẹwẹ e gán biọ dọ mí ni wà nado mọ alọgọ mẹdevo lẹ tọn yí?
16 E gán biọ dọ mí ni biọ alọgọ mẹdevo lẹ tọn whẹpo do mọ ẹn yí. Mẹmẹsunnu po mẹmẹyọnnu mítọn lẹ po yiwanna mí bosọ nọ jlo na gọalọna mí. (Howh. 17:17) Amọ́, yé gán nọma yọ́n numọtolanmẹ mítọn kavi nuhe sin hudo mí do. (Howh. 14:10) Eyin a to awuvẹ sè to numọtolanmẹ-liho, desọn ojlo mẹ nado má numọtolanmẹ towe lẹ hẹ họntọn he whèwhín lẹ. Dike yé ni yọ́n nuhe na gọalọna we. A gán de nado dọ homẹ na mẹho agun tọn dopo kavi awe he a nọ voawu hẹ. Mẹmẹyọnnu delẹ ko mọdọ hodidọ hẹ mẹmẹyọnnu he whèwhín devo ko miọnhomẹna yé.
17. Etẹwẹ yin delẹ to avùnnukundiọsọmẹnu he gán glọnalina mí nado mọ tulinamẹ yí lẹ mẹ, podọ nawẹ mí gán duto yé ji gbọn?
17 Nọ nọavùnte sọta ojlo lọ nado klan dewe dovo. Awufiẹsa to numọtolanmẹ-liho gán zọ́n bọ e ma na nọ jlo we nado wanu dopọ hẹ mẹdevo lẹ. To whedelẹnu, mẹmẹsunnu po mẹmẹyọnnu towe lẹ po gán nọma mọnukunnujẹ numọtolanmẹ towe lẹ mẹ kavi gboawupo nado yí hogbe he sọgbe lẹ zan. (Jak. 3:2) A dike avùnnukundiọsọmẹnu mọnkọ lẹ glọnalina we nado mọ tulinamẹ he sin hudo a do blo. Mẹho agun tọn de he nọ yin Gavin, yèdọ mẹhe jiya apọṣimẹ tọn dọmọ: “Hodọdopọ hẹ họntọn lẹ wẹ nọ yin onú godo tọn he nọ jlo mi.” Amọ́, Gavin ma joawuna numọtolanmẹ etọn lẹ, podọ gbẹdido hẹ mẹdevo lẹ hẹn ale wá na ẹn. Mẹmẹyọnnu de he nọ yin Amy dọmọ: “Numimọ he n’do wayi lẹ zọ́n bọ e nọ vẹawuna mi nado dejido gbẹtọ go. Amọ́, n’to pinplọn nado yiwanna mẹmẹsunnu po mẹmẹyọnnu ṣie lẹ po bosọ nọ dejido yé go dile Jehovah nọ wà do. N’yọnẹn dọ ehe nọ hẹn homẹ Jehovah tọn hùn, podọ e nọ hẹn homẹhun yẹnlọsu.”
OPAGBE JEHOVAH TỌN NA SỌGODO GÁN MIỌNHOMẸNA MÍ
18. Etẹwẹ mí gán to nukundo to sọgodo, podọ etẹwẹ mí gán wà todin?
18 Mí gán pọ́n sọgodo hlan po jide po to yinyọnẹn mẹ dọ to madẹnmẹ Jehovah na de awufiẹsa agbasa mẹ tọn gọna numọtolanmẹ tọn mítọn lẹpo sẹ̀ mlẹnmlẹn. (Osọ. 21:3, 4) To ojlẹ enẹ mẹ, nuylankan he mí ko jiya yetọn lẹ ma nasọ “gọwá ahun mẹ” ba. (Isa. 65:17) Dile mí ko mọ do, Jehovah “nọ blá apà” mítọn lẹ etlẹ yin todin. Nọ mọaleyi to gigọ́ mẹ sọn awuwledainanu owanyinọ Jehovah tọn nado miọnhomẹna we bo hẹn kọgbọ wá na we lẹ mẹ. Ma do ayihaawe gbede blo dọ ewọ ‘to towe hòpọn.’—1 Pita 5:7.
OHÀN 7 Jehovah, Huhlọn Mítọn
a Yinkọ lẹ ko yin didiọ.
b Pọ́n apotin lọ “ A Họakuẹ Na Jehovah.”
c Nado “dọwhẹgbọ” hẹ Jehovah, mí dona dohia dọ mí lẹnvọjọ gbọn jona ylando mítọn lẹ tọn bibiọ ẹ dali, podọ gbọn walọyizan mítọn didiọ dali. Eyin mí waylando sinsinyẹn de, mí sọ dona biọ alọgọ mẹho agun tọn lẹ tọn.—Jak. 5:14, 15.
d Di apajlẹ, lẹnnupọndo wefọ he yin sislẹ lẹ ji to hosọ lọ lẹ “Homẹmimiọn” po “Magbọjẹ” po glọ to owe lọ Wefọ lẹ He Nọ Gọalọ Nado Nọgbẹ̀ Di Klistiani mẹ.
