NUHIHO yin adà titengbe de to aṣa Islaeli hohowhenu tọn mẹ. Biblu donù nuhiho po hànjiji susu po go. Na nugbo tọn, mado ao Owe-wiwe lẹ tọn wẹ yin ohàn, dehe tọ́nta hugan lẹ wẹ owe Salmu lẹ tọn, Ohàn Sọlomọni tọn po Avigbè Jelemia tọn po. Abajọ owe de do dọ dọ Biblu “yí nuyijlẹdonugo he whànmẹ lẹ do basi zẹẹmẹ pipli gbẹtọvi tọn de tọn, he nọ mọtẹn na nuhiho to nuwiwa yetọn he ma do kanṣiṣa hẹ nuhiho lẹ mẹ.”—Music in Biblical Life.

Nuhiho to nuwiwa egbesọegbesọ tọn lẹ mẹ. Islaelivi lẹ nọ hò hànjinu lẹ nado nọ do numọtolanmẹ yetọn lẹ hia. (Isa. 30:29) Yọnnu lẹ nọ hòhún bo nọ yí ayajẹ do jihàn bosọ nọ dúwe to mẹzize do gánzinpo ji, hùnwhẹ lẹ po awhàngbigba lẹ po whenu. (Whẹ. 11:34; 1 Sam. 18:6, 7; 1 Ahọ. 1:39, 40) Islaelivi lẹ sọ nọ jihàn nado do numọtolanmẹ awubla tọn hia to whenue yé to aluẹmẹ. (2 Otàn. 35:25) Nuhe zọ́n niyẹn bọ McClintock and Strong’s Cyclopedia do dọ dọ “Heblu lẹ yin akọta nukundeji de to hànjiji-liho.”

Nuhiho to họ̀nmẹ. Ahọlu Islaeli tọn lẹ nọ mọ awuvivi to nuhiho mẹ. Ahọlu Sauli basi oylọna Davidi wá họ̀nmẹ etọn nado sẹ̀n taidi nuhotọ. (1 Sam. 16:18, 23) Enẹgodo, whenue Davidi lọsu lẹzun ahọlu, e wleawuna hànjinu susu, pà ohàn vivi lẹ, bosọ basi tito na hànjigbẹ́ he na nọ hònú to tẹmpli Jehovah tọn mẹ lẹ. (2 Otàn. 7:6; Amọ. 6:5) Ahọlu Sọlomọni tindo sunnu po yọnnu hànsinọ lẹ po to họ̀nmẹ etọn.—Yẹwh. 2:8.

Nuhiho to sinsẹ̀n-bibasi mẹ. Hú popolẹpo, Islaelivi lẹ nọ yí nuhiho zan nado basi sinsẹ̀n hlan Jehovah. Nugbo lọ wẹ yindọ gbẹtọ 4000 wẹ nọ hònú to tẹmpli mẹ to Jelusalẹm. (1 Otàn. 23:5) Yé nọ hò ajogàn, hànjinu okànnọ lẹ po ajalẹn po bosọ nọ kún opẹ̀n. (2 Otàn. 5:12) Amọ́, e ma yin azọ́nyọnẹntọ ehelẹ kẹdẹ wẹ nọ yí nuhiho do basi sinsẹ̀n hlan Jehovah. E họnwun dọ Islaelivi susu wẹ nọ ji Ohàn Mẹhe Hẹji Jei Tòdaho lọ mẹ lẹ Tọn to whenue yé zingbejizọnlin jei hùnwhẹ whemẹwhemẹ tọn lẹ to Jelusalẹm. (Salm. 120–134) Podọ, sọgbe hẹ kandai Ju lẹ tọn lẹ, Islaelivi lẹ nọ ji Salmu he nọ yin yiylọdọ Hallẹli a to núdùdù Juwayi tọn whenu.

Nuhiho gbẹ́ yin nujọnu na omẹ Jiwheyẹwhe tọn lẹ. (Jak. 5:13) Mí nọ jihàn taidi apadewhe sinsẹ̀n-bibasi mítọn tọn. (Efe. 5:19) Nuhiho nọ kọ̀n mí dopọ hẹ Klistiani hatọ lẹ. (Kol. 3:16) Podọ, e nọ na mí huhlọn whenue mí pehẹ nuhahun lẹ. (Owalọ 16:25) Nuhiho yin aliho dagbe de nado do yise po owanyi mítọn po hia Jehovah.