1, 2. (a) Naegbọn Amagẹdọni do yin wẹndagbe de na gbẹtọvi lẹ? (b) Kanbiọ tẹlẹ wẹ mí na gbadopọnna to hosọ ehe mẹ?

BE A ko sè pọ́n bọ gbẹtọ lẹ yí hogbe lọ “Amagẹdọni” zan na awhàn bọmbu nuzanusẹvaun tọn de kavi na nugbajẹmẹji jọwamọ tọn de ya? To vogbingbọn mẹ, nuhe Biblu dọ gando Amagẹdọni go bẹ owẹ̀n dagbe de hẹn, yèdọ owẹ̀n ayajẹ tọn de! (Osọ. 1:3) Awhàn Amagẹdọni tọn ma na sukúndona gbẹtọvi lẹ, ṣigba e na whlẹn yé wẹ! Gbọnna?

² Biblu dohia dọ awhàn Amagẹdọni tọn na whlẹn whẹndo gbẹtọvi tọn gbọn alọdidotena gandudu gbẹtọ tọn dali. Awhàn enẹ na hẹn pọngbọ wá na gbẹtọvi lẹ, na e na de mẹylankan lẹ sẹ̀ sọn aimẹ bo na pò dodonọ lẹ dogbẹ̀. Podọ e nasọ whlẹn gbẹtọvi lẹ gbọn hihọ́-bibasina aigba lọ ma nado yin huhusudo dali. (Osọ. 11:18) Na nugbo ehelẹ nido họnwun na mí dogọ, mì gbọ mí ni gbadopọnna kanbiọ ẹnẹ delẹ: Etẹwẹ Amagẹdọni yin? Nujijọ tẹlẹ wẹ na dekọtọn do e mẹ? Nawẹ mí na wagbọn nado tin to mẹhe na yin whinwhlẹngán to Amagẹdọni whenu lẹ mẹ? Nawẹ mí sọgan hẹn nugbonọ-yinyin mítọn go dile Amagẹdọni to dindọnsẹpọ gbọn?

3. (a) Etẹwẹ hogbe lọ “Amagẹdọni” zẹẹmẹdo? (b) Sọgbe hẹ Osọhia 16:14, 16, naegbọn mí sọgan dọ dọ Amagẹdọni ma yin nọtẹn jọnun de?

³ Hia Osọhia 16:14, 16. Whladopo gee wẹ hogbe lọ “Amagẹdọni” sọawuhia to Owe-wiwe lẹ mẹ, podọ e wá sọn hogbe Heblugbe tọn de mẹ he zẹẹmẹdo “Osó Mẹgido tọn.” (Osọ. 16:16; Odò.) Mẹgido yin tòdaho de to Islaeli hohowhenu tọn. (Jọṣ. 17:11) Ṣigba, Amagẹdọni ma to alọdlẹndo nọtẹn jọnun depope to aigba ji. Do glido, e to alọdlẹndo ninọmẹ de he mẹ “ahọlu aigba  fininọ lẹpo tọn lẹ” na pli dopọ nado diọnukunsọ Jehovah te. (Osọ. 16:14) Ṣigba, to hosọ ehe mẹ, mí nasọ yí hogbe lọ “Amagẹdọni” zan nado dlẹnalọdo awhàn he na bọdo bibẹplidopọ ahọlu aigba ji tọn lẹ tọn go tlolo. Nawẹ mí yọnẹn gbọn dọ Amagẹdọni to alọdlẹndo nọtẹn yẹhiadonu tọn de? Tintan, osó depope ma tin bo nọ yin Mẹgido. Awetọ, lẹdo Mẹgido tọn ko whè gbau nado hẹn “ahọlu aigba fininọ lẹpo tọn lẹ” gọna awhànpa po awhànfunnu yetọn lẹ po. Atọ̀ntọ, dile mí na mọ do to nukọn mẹ to hosọ ehe mẹ, awhàn Amagẹdọni tọn na bẹjẹeji to whenue “ahọlu” aihọn tọn lẹ na yangbé omẹ Jiwheyẹwhe tọn he gbàpe gbọn aigba lọ blebu ji lẹ tọn.

4. Naegbọn Jehovah do donù Mẹgido go whenue e to hodọ gando awhàn daho godo tọn lọ go?

⁴ Naegbọn Jehovah do donù Mẹgido go whenue e to hodọ gando awhàn daho godo tọn lọ go? Awhàn susu wẹ yin fùnfùn to Mẹgido po Agbàdo Jezleẹli tọn he sẹpọ ẹ po mẹ. To whedelẹnu, Jehovah dádo awhàn enẹlẹ mẹ tlọlọ. Di apajlẹ, “to osin Mẹgido tọn lẹ kọ̀n,” Jiwheyẹwhe gọalọna Whẹdatọ Islaeli tọn lọ Balak nado gbawhàn awhànpa Kenaninu lẹ tọn he awhàngán Sisela to anadena. Balak po yẹwhegán-yọnnu Debola po dopẹna Jehovah na awhàngbigba he e na yé to azọ́njiawu-liho. Yé jihàn dọmọ: ‘Sunwhlẹvu lẹ hoavùn sọn olọn hẹ Sisela. Agbàdo Kiṣọni tọn plọ́ yé yì.’—Whẹ. 5:19-21.

5. Aliho titengbe tẹ mẹ wẹ awhàn Amagẹdọni tọn na gbọnvona dehe Balak fùn te?

⁵ Balak po Debola po dotana ohàn yetọn po hogbe ehelẹ po: “Mọ wẹ kẹntọ towe lẹpo ni dọ̀n do, Jehovah E, ṣigba, gbọ mẹhe yiwanna we lẹ ni taidi owhè he to sisẹ́ to gigo etọn mẹ.” (Whẹ. 5:31) Aliho dopolọ mẹ wẹ kẹntọ Jiwheyẹwhe tọn lẹ na dọ̀n te to Amagẹdọni, to whenuena mẹhe yiwanna Jiwheyẹwhe lẹ na yin whinwhlẹngán. Ṣigba, vogbingbọn titengbe de tin to awhàn awe ehelẹ ṣẹnṣẹn. To Amagẹdọni whenu, omẹ Jiwheyẹwhe tọn lẹ ma na hoavùn. Yé ma tlẹ na hẹn awhànfunnu! “Huhlọn [yetọn] na tin to abọẹninọ po jidide mlẹnmlẹn” to Jehovah gọna awhànpa olọn mẹ tọn etọn lẹ po mẹ.—Isa. 30:15; Osọ. 19:11-15.

6. Aliho tẹlẹ Jehovah sọgan yizan nado gbawhàn kẹntọ etọn lẹ tọn to Amagẹdọni?

⁶ Nawẹ Jiwheyẹwhe na gbawhàn kẹntọ etọn lẹ tọn to Amagẹdọni gbọn? E sọgan yí aliho voovo susu zan. Di apajlẹ, e sọgan yí aigba sisọsisọ, kẹ́nsu po abì lẹ po zan. (Jobu 38:22, 23; Ezek. 38:19-22) E sọgan sọ sisẹ́ kẹntọ etọn lẹ nado lilẹ́ pànta yede. (2 Otàn. 20:17, 22, 23) Podọ e sọgan yí angẹli etọn lẹ zan nado hù mẹylankan lẹ sudo. (Isa. 37:36) Mahopọnna aliho depope he Jiwheyẹwhe yizan, ewọ na gbawhàn mlẹnmlẹn. Kẹntọ etọn lẹpo na yin vivasudo. Podọ dodonọ lẹpo na yin whinwhlẹngán.—Howh. 3:25, 26.

7, 8. (a) Sọgbe hẹ 1 Tẹsalonikanu lẹ 5:1-6, nulila he paṣamẹ taun tẹwẹ nukọntọ aihọn tọn lẹ na basi? (b) Naegbọn nulila ehe do yin lalo he do owù taun de?

⁷ Nulila “jijọho po hihọ́ po” tọn na jẹnukọnna “azán Jehovah tọn.” (Hia 1 Tẹsalonikanu lẹ 5:1-6.) To 1 Tẹsalonikanu lẹ 5:2 mẹ, hodidọ lọ “azán Jehovah tọn” nọ dlẹnalọdo “nukunbibia daho lọ.” (Osọ. 7:14) Nawẹ mí na yọ́n whenue nukunbibia enẹ na bẹjẹeji te gbọn? Biblu dọna mí dọ nulila he paṣamẹ taun de na yin bibasi. Nulila enẹ na yin ohia lọ dọ nukunbibia daho lọ ko to na bẹjẹeji.

⁸ Nulila “jijọho po hihọ́ po” tọn he yin didọdai lọ wẹ. Naegbọn nukọntọ aihọn tọn lẹ na basi nulila enẹ? Be nukọntọ sinsẹ̀n tọn lẹ na tindo mahẹ to e mẹ wẹ ya? E yọnbasi dọ ni yinmọ. Ṣigba, nulila ehe na yin lalo devo he wá sọn aovi lẹ dè. Lalo ehe na yin owùnu daho de, na e na zọ́n bọ gbẹtọ lẹ na tindo numọtolanmẹ hihọ́ tọn oklọ tọn ojlẹ kleun de jẹnukọnna  nukunbibia daho hugan he nkọ ma ko jọ pọ́n lọ. Na nugbo tọn, “vasudo ajiji na wá yé ji to afọdopolọji kẹdẹdile awufiẹsa ajipanu tọn nọ wá yọnnu he to ohò de ji do.” Etẹwẹ na jọ do devizọnwatọ nugbonọ Jehovah tọn lẹ go? E sọgan paṣa yé dọ azán Jehovah tọn bẹjẹeji to ajiji mẹ domọ, ṣigba awhàn sisè ma nọ và-vi.

9. Nawẹ Jiwheyẹwhe na và aihọn Satani tọn sudo gbọn?

⁹ Jehovah ma na và titonu Satani tọn blebu sudo to afọdopolọji, dile e wà do to azán Noa tọn gbè. Kakatimọ, vasudo lọ na bẹ adà voovo awe hẹn. Jẹnukọn whẹ́, Jiwheyẹwhe na và Babilọni Daho lọ sudo, yèdọ sinsẹ̀n lalo lẹpo to pọmẹ. Enẹgodo, to Amagẹdọni, e na và pipotọ aihọn Satani tọn sudo, ehe bẹ tito tonudidọ tọn, awhànfunfun tọn, po ajọwiwa tọn etọn po hẹn. Mì gbọ mí ni gbadopọnna nujijọ ayidego tọn awe enẹlẹ po sọwhiwhe po.

10. Sọgbe hẹ Osọhia 17:1, 6 gọna 18:24, naegbọn Jehovah nado và Babilọni Daho lọ sudo?

¹⁰ “Owhẹ̀ he yin didá na galọtọ daho lọ.” (Hia Osọhia 17:1, 6; 18:24.) Babilọni Daho lọ ko hẹn vlẹko susu wá oyín Jiwheyẹwhe tọn ji. E ko plọnmẹ lalo susu gando Jiwheyẹwhe go. E ko lọga to gbigbọ-liho gbọn alẹnu lẹ bibasi hẹ gandutọ aigba ji tọn lẹ dali. Ewọ ko yí huhlọn po nuyiwadomẹji etọn po zan nado hò sinsẹ̀n-vi etọn lẹ dù. Podọ ewọ ko sọ̀n ohùn susu dai, ehe bẹ ohùn devizọnwatọ Jiwheyẹwhe tọn lẹ tọn hẹn. (Osọ. 19:2) Nawẹ Jehovah na và Babilọni Daho lọ sudo gbọn?

11. Etẹwẹ “gbekanlin vẹẹ ṣẹ́ṣẹ́” lọ nọtena, podọ nawẹ Jiwheyẹwhe na yí i zan nado hẹn lẹndai etọn gando Babilọni Daho lọ go di gbọn?

¹¹ Jehovah na và “galọtọ daho lọ” sudo gbọn “azò ao” “gbekanlin vẹẹ ṣẹ́ṣẹ́ de” tọn lẹ yiyizan dali. Gbekanlin yẹhiadonu tọn enẹ nọtena Plidopọ Akọta lẹ tọn. Azò ao lọ lẹ nọtena gandudu he to godonọna titobasinanu enẹ to alọnu din lẹ. To ojlẹ sisọ Jiwheyẹwhe tọn mẹ, gandudu enẹlẹ na diọnukunsọ Babilọni yẹhiadonu tọn lọ. Yé “na hẹn ẹn zun ovọ́ bo nasọ hẹn ẹn jẹmẹ́” gbọn adọkunnu etọn lẹ hihòyi po kanyinylan etọn didegbà po dali. (Osọ. 17:3, 16) Vasudo he na yawu wá, taidi to azán dopo gblamẹ enẹ, na yin nupaṣamẹ daho de na  mẹhe nọ nọgodona Babilọni lẹ. To popolẹpo mẹ, e ko dẹn din bọ Babilọni nọ yí nùgo dọmọ: “Yẹn sinai taidi ahọsi de, yẹn masọ yin asuṣiọsi, podọ yẹn ma na nọ aluẹmẹ pọ́n gbede.”—Osọ. 18:7, 8.

12. Etẹwẹ Jehovah ma na na dotẹnmẹ akọta lẹ nado wà, podọ etẹwutu?

¹² Jiwheyẹwhe ma na na dotẹnmẹ akọta lẹ nado và omẹ etọn lẹ sudo. Homẹ yetọn nọ hùn nado tindo yinkọ etọn to ota, podọ yé ko setonuna gbedide etọn nado tọ́n sọn Babilọni Daho lọ mẹ. (Owalọ 15:16, 17; Osọ. 18:4) Yé ko sọ dovivẹnu nado gọalọna mẹdevo lẹ nado tọ́n sọn e mẹ. Enẹwutu, devizọnwatọ Jehovah tọn lẹ ma na “yí to azọ̀nylankan etọn lẹ mẹ.” Etomọṣo, yise yetọn na yin whiwhlepọn.

13. (a) Mẹnu wẹ yin Gọgi? (b) Sọgbe hẹ Ezekiẹli 38:2, 8, 9, etẹwẹ na hẹn Gọgi wá nọtẹn yẹhiadonu tọn lọ he nọ yin Amagẹdọni?

¹³ Mẹgbeyinyan Gọgi tọn. (Hia Ezekiẹli 38:2, 8, 9.) To vasudo sinsẹ̀n lalo lẹpo tọn godo, omẹ Jiwheyẹwhe tọn lẹ na luntọ́n taidi atin dopo gee de he pò to ote to yujẹhọn sinsinyẹn de godo. Na nugbo tọn, Satani na gblehomẹ sinsinyẹn. E na do homẹgble etọn hia gbọn nujijla aovi lẹ tọn, yèdọ “ohó gbọdo mawé” lẹ yiyizan dali nado sisẹ́ bẹplidopọ akọta lẹ tọn de nado diọnukunsọ devizọnwatọ Jehovah tọn lẹ. (Osọ. 16:13, 14) Bẹplidopọ enẹ wẹ yin yiylọdọ “Gọgi aigba Magọgi tọn.” To whenue akọta lẹ na bẹ mẹgbeyinyan yetọn jẹeji, e na taidi dọ yé ko wá nọtẹn yẹhiadonu tọn lọ he yin yiylọdọ Amagẹdọni.—Osọ. 16:16.

14. Etẹ go wẹ Gọgi na wá doayi?

¹⁴ Gọgi na ganjẹ “awà agbasalan tọn” etọn, yèdọ huhlọn awhànfunfun tọn etọn go. (2 Otàn. 32:8) Mí na dejido Jehovah Jiwheyẹwhe mítọn go, yèdọ nudide de he na taidi nulunu to nukun akọta lẹ tọn mẹ. To popolẹpo mẹ, yẹwhe he Babilọni Daho he yin huhlọnnọ wayi lọ nọ sẹ̀n lẹ ma whlẹn ẹn sọn alọ “gbekanlin lọ” po “azò ao” etọn lẹ po tọn mẹ! (Osọ. 17:16) Enẹwutu, Gọgi na donukun dọ e na bọawuna emi nado và mí sudo ga. “Taidi aslọ he ṣinyọ́n aigba lọ ji” lẹ, ewọ na yangbé omẹ Jehovah tọn  lẹ tọn. (Ezek. 38:16) Ṣigba e ma na dẹn bọ Gọgi na doayi e go dọ omọ̀ de mẹ wẹ emi jẹ. Taidi Falo to Ohù Vẹẹ kọ̀n, e na wá họnwun na Gọgi dọ Jehovah wẹ emi to avùnho sọta.—Eks. 14:1-4; Ezek. 38:3, 4, 18, 21-23.

15. Aliho tẹlẹ mẹ wẹ Klisti na gbawhàn mlẹnmlẹn te?

¹⁵ Klisti po awhànpa olọn mẹ tọn etọn lẹ po na yiavùnlọna omẹ Jiwheyẹwhe tọn lẹ bo na gídí awhànpa Gọgi tọn. (Osọ. 19:11, 14, 15) Ṣigba etẹwẹ na jọ do kẹntọgán Jehovah tọn Satani go, yèdọ mẹhe yí nujijla oklọ tọn etọn do plan akọta lẹ biọ awhàn Amagẹdọni tọn mẹ? Jesu na ze ewọ po aovi etọn lẹ po dlan odò mapote de mẹ, fie yé na yin súsúdo na owhe fọtọ́n.—Osọ. 20:1-3.

16. (a) Nawẹ mí nọ dohia gbọn dọ mí “yọ́n Jiwheyẹwhe”? (b) Eyin mí yọ́n Jehovah, naegbọn enẹ sọgan yin dona de na mí to Amagẹdọni whenu?

¹⁶ Vlavo mí ko to nugbo mẹ na owhe susu kavi lala, nado yin whinwhlẹngán to Amagẹdọni, mí dona dohia dọ mí “yọ́n Jiwheyẹwhe,” podọ dọ mí nọ “setonuna wẹndagbe he gando Oklunọ mítọn Jesu go.” (2 Tẹs. 1:7-9) Mí nọ “yọ́n Jiwheyẹwhe” eyin mí mọnukunnujẹ nuhe ewọ yiwanna, nuhe e gbẹwanna gọna nujinọtedo etọn lẹ mẹ. Mí sọ nọ dohia dọ mí yọ́n ewọ eyin mí yiwanna ẹn, nọ setonuna ẹn, bosọ nọ do mẹdezejo mlẹnmlẹn mítọn hia ewọ. (1 Joh. 2:3-5; 5:3) Eyin mí dohia dọ mí yọ́n Jiwheyẹwhe, mí nọ tindo lẹblanulọkẹyi lọ nado yin ‘omẹ he ewọ yọnẹn,’ podọ ehe na dekọtọn do whlẹngán mẹ na mí to Amagẹdọni whenu! (1 Kọl. 8:3) Gbọnna? Whẹwhinwhẹ́n lọ wẹ yindọ, nado yin ‘omẹ he ewọ yọnẹn’ sọgan zẹẹmẹdo nado tindo nukundagbe Jiwheyẹwhe tọn.

17. Etẹwẹ e zẹẹmẹdo nado “setonuna wẹndagbe he gando Oklunọ mítọn Jesu go”?

¹⁷ “Wẹndagbe he gando Oklunọ mítọn Jesu go” lọ bẹ nugbo he Jesu plọnmẹ lẹpo hẹn, ehe tin to Ohó Jiwheyẹwhe tọn mẹ. Mí nọ setonuna wẹndagbe lọ, eyin mí nọ yí i do yizan mẹ to gbẹzan mítọn mẹ. Tonusise mọnkọ bẹ onú Ahọluduta lọ tọn lẹ zizedo otẹn tintan mẹ, gbẹninọ sọgbe hẹ nujinọtedo dodo Jiwheyẹwhe tọn  lẹ, po Ahọluduta Jiwheyẹwhe tọn lilá po hẹn. (Mat. 6:33; 24:14) E sọ bẹ godoninọna mẹmẹsunnu yiamisisadode Klisti tọn lẹ hẹn, dile yé to nukunpedo azọngban pinpẹn yetọn lẹ go.—Mat. 25:31-40.

18. Aliho tẹ mẹ wẹ mẹmẹsunnu yiamisisadode Klisti tọn lẹ na penugo nado sú dagbe-họ́ homẹdagbe he yin didohia yé tọn te?

¹⁸ To madẹnmẹ, devizọnwatọ yiamisisadode Jiwheyẹwhe tọn lẹ na penugo nado sú dagbe-họ́ homẹdagbe he “lẹngbọ devo lẹ” dohia yé tọn. (Joh. 10:16) Gbọnna? Whẹpo awhàn Amagẹdọni tọn nado bẹjẹeji, gbẹtọ 144 000 lẹpo na ko yin finfọn do olọn mẹ taidi gbigbọ jọmaku lẹ. Enẹgodo, yé na yin apadewhe awhànpa olọn mẹ tọn lẹ tọn he na gídí Gọgi, bo na whlẹn “gbẹtọ susugege de” he taidi lẹngbọ lẹ gán. (Osọ. 2:26, 27; 7:9, 10) Na nugbo tọn, lẹblanulọkẹyi nankọ die gbẹtọ susugege lọ na ko tindo nado nọgodona devizọnwatọ yiamisisadode Jehovah tọn lẹ to whenue yé gbẹ́ pò to aigba ji!

19, 20. Mahopọnna whlepọn mítọn lẹ, nawẹ mí sọgan hẹn nugbonọ-yinyin mítọn go zọnmii dile Amagẹdọni to dindọnsẹpọ gbọn?

¹⁹ To azán godo tọn he vẹawu ehelẹ mẹ, susu omẹ Jehovah tọn lẹ tọn wẹ to pipehẹ whlepọn lẹ. Etomọṣo, mí sọgan doakọnnanu po ayajẹ po. (Jak. 1:2-4) Onú dopo he sọgan gọalọna mí wẹ nado sinyẹnlin to odẹ̀ ahundopo tọn hihò mẹ. (Luku 21:36) Gbọnvona dẹ̀hiho, mí sọ dona nọ plọn Ohó Jiwheyẹwhe tọn egbesọegbesọ bo nọ lẹnayihamẹpọn deji, gọna dọdai ayidego tọn he gando azán mítọn go lẹ. (Salm. 77:12) Nuwiwa ehelẹ, to pọmẹ hẹ mahẹ gigọ́ tintindo to lizọnyizọn lọ mẹ na zọ́n bọ yise mítọn na lodo dogọ, podọ mí nasọ hẹn todido mítọn dogbẹ̀!

²⁰ Yí nukun homẹ tọn do pọ́n lehe ayajẹ towe na gọfla do sọ to whenue Babilọni Daho lọ masọ tin ba bọ Amagẹdọni na ko wá vivọnu! Humọ, lẹnnupọndo lehe homẹ towe na hùn taun do ji to whenue yinkọ po nupojipetọ-yinyin Jiwheyẹwhe tọn po na ko yin whẹsuna mlẹnmlẹn! (Ezek. 38:23) Na nugbo tọn, wẹndagbe de wẹ Amagẹdọni yin na mẹhe yọ́n Jiwheyẹwhe, nọ setonuna Visunnu etọn bosọ doakọnnanu kakajẹ opodo lẹ.—Mat. 24:13.